വിശാൽ ,കീർത്തി സുരേഷ്,വരലക്ഷ്മി ശരത്കുമാര്‍ എന്നിവർ അഭിനയിക്കുന്ന ‘സണ്ടക്കോഴി 2’ ലൊക്കേഷൻ വീഡിയോ കാണാം. വിശാല്‍ ഫിലിം ഫാക്ടറിയുടെ ബാനറില്‍ വിശാല്‍ തന്നെ നിര്‍മ്മിച്ച ‘സണ്ടക്കോഴി 2′ രമ്യാ മുവീസ് ഒക്ടോബര്‍18 ന് കേരളത്തില്‍ പ്രദര്‍ശത്തിനെത്തിക്കുന്നു.
ഗായിക മാത്രമല്ല നർത്തകിയുമാണ് സിത്താര
ഗായികയായ സിത്താരയെ നമുക്ക് എല്ലാവർക്കും അറിയാം. എന്നാൽ നല്ല ഗായിക എന്നതിലുപരി ഒരു നർത്തകികൂടിയാണ് സിത്താര. നവരാത്രിയോട് അനുബന്ധിച്ചു പുറത്തിറക്കിയ ശ്രീ ഗുരുഭ്യോ നമഃ എന്ന കവർ വിഡിയോയിലാണു വർഷങ്ങൾക്കിപ്പുറം നൃത്തച്ചുവടുകളുമായി ഗായിക സിത്താര കൃഷ്ണകുമാർ എത്തുന്നത്.
തന്റെ ഫേസ്ബുക് പേജിലൂടെ മഞ്ജുവാര്യർ സിത്താരയുടെ നൃത്ത വീഡിയോ പങ്കുവച്ച് കുറിച്ചതിങ്ങനെ ; ” നമുക്കെല്ലാവർക്കും ഏറെ പ്രിയങ്കരിയായ അനുഗൃഹീത ഗായിക സിതാര കൃഷ്ണകുമാർ ഗുരുസമർപ്പണമായി അവതരിപ്പിക്കുന്ന ഗാനം. ഇതിനു വേണ്ടി പത്തു വർഷങ്ങൾക്കു ശേഷമാണ് വീണ്ടും സിതാര നൃത്തം ചെയ്തത് എന്നറിയുന്നു. ഒരുപാട് സന്തോഷം, സ്നേഹം”.
മാധവൻ കിഴക്കുട്ടിന്റെ വരികൾക്കു ബിനീഷ് ഭാസ്കരനാണ് ഈണം പകർന്നിരിക്കുന്നത്. ഗാനം ആലപിച്ചിരിക്കുന്നത് സിത്താര തന്നെയാണ്. ഗാനാലാപനം പോലെതന്നെ സിത്താരയുടെ നൃത്തവും മനോഹരമായിരിക്കുന്നു എന്നാണ് വീഡിയോ കണ്ടവരുടെ അഭിപ്രായം.
ശബരിമല വിഷയം : എഎച്ച്പി ഹർത്താൽ പ്രഖ്യാപിച്ചു
മുഖ്യമന്ത്രിക്കു നൽകിയ നിവേദനത്തിൽ ഉന്നയിച്ച ആവശ്യങ്ങൾ ഒന്നും സർക്കാർ അംഗീകരിക്കാത്ത സാഹചര്യത്തിൽ ഈ വരുന്ന ഒക്ടോബർ പതിനെട്ടാം തീയതി അന്താരാഷ്ട്രീയ ഹിന്ദു പരിഷത്ത് ഹർത്താൽ പ്രഖ്യാപിച്ചു . പതിനേഴാം തീയതി രാത്രി 12 മണിമുതൽ പതിനെട്ടാം തീയതി രാത്രി 12 മണിവരെയാണ് ഹർത്താൽ .ശബരിമലക്ക് വേണ്ടി പോരാടുന്ന എല്ലാ സംഘടനകളെയും സഹകരിപിച്ചുകൊണ്ട് ഹർത്താൽ നടത്തുമെന്ന് അന്താരാഷ്ട്രീയ ഹിന്ദു പരിഷത്ത് നാഷണൽ സെക്രട്ടറി പ്രതീഷ് വിശ്വനാഥ് തന്റെ ഫേസ്ബുക്കിലൂടെ അറിയിച്ചു .
ശബരിമല വിഷയത്തിൽ ഇന്ന് മുഖ്യമന്ത്രിയുമായി കൂടിക്കാഴ്ച നടത്തി. സ്ത്രീ പ്രവേശന വിഷയത്തിൽ പുനഃപരിശോധന ഹർജി സർക്കാർ ഫയൽ ചെയ്യില്ല എന്നു തീർത്തു പറഞ്ഞു. പക്ഷേ മറ്റു സംഘടനകൾ ഫയൽ ചെയ്തിട്ടുള്ള പുനഃപരിശോധന ഹർജി പരിഗണിക്കുന്ന വേളയിൽ സർക്കാർ നിലപാട് കോടതി ആവശ്യപ്പെട്ടാൽ തന്ത്രിമാരുടെയും ഹൈന്ദവ ആചാര്യന്മാരുടെയും ഒരു സമിതി രൂപീകരിച്ചു അവരുടെ അഭിപ്രായങ്ങൾ തേടണം എന്ന ആവശ്യം അറിയിക്കും എന്നു പറഞ്ഞു. ഇതിനു വേണ്ടി സർക്കാർ അഭിഭാഷകന് വേണ്ട നിർദ്ദേശം നൽകാം എന്ന ഉറപ്പും നൽകി. നമ്മൾ നിവേദനത്തിൽ ഉന്നയിച്ച ആവശ്യങ്ങൾ ഒന്നും സർക്കാർ അംഗീകരിക്കാത്ത സാഹചര്യത്തിൽ 18 നു പ്രഖ്യാപിച്ച 24 മണിക്കൂർ ഹർത്താൽ ഉൾപ്പെടെയുള്ള ശക്തമായ പ്രക്ഷോഭങ്ങളുമായി AHP യും ശബരിമല സംരക്ഷണ സമിതിയും മുന്നോട്ടു പോകും.
പ്രതീഷ് വിശ്വനാഥ്
നാഷണൽ സെക്രട്ടറി AHP
ഫ്രാങ്കോ മുളയ്ക്കലിന് ഉപാധികളോടെ ജാമ്യം
കന്യാസ്ത്രീയെ പീഡിപ്പിച്ച കേസില്‍ റിമാന്‍ഡില്‍ കഴിഞ്ഞിരുന്ന ഫ്രാങ്കോ മുളയ്ക്കലിന് ഹൈക്കോടതി ഉപാധികളോടെ ജാമ്യം അനുവദിച്ചു. ജാമ്യം ലഭിച്ച ഫ്രാങ്കോ വിദേശത്തേക്ക് കടക്കുന്നതു തടയാന്‍ പാസ്‌പോര്‍ട്ട് ഹാജരാക്കണമെന്നും ഹൈക്കോടതി നിര്‍ദ്ദേശിച്ചു.
കേരളത്തില്‍ പ്രവേശിക്കരുത്, രണ്ടാഴ്ചയില്‍ ഒരിക്കല്‍ അന്വേഷണ ഉദ്യോഗസ്ഥനു മുന്നില്‍ ഹാജരാകണം, വിദേശത്തേക്ക് പോകരുത് എന്നിവയാണ് കോടതി മുന്നോട്ടു വച്ചിരിക്കുന്ന ഉപാധികള്‍.
മുപ്പതോളം ദിവസം കസ്റ്റഡിയില്‍ വച്ചെന്നും താന്‍ അന്വേഷണവുമായി സഹകരിച്ചെന്നും തെളിവെടുപ്പ് പൂര്‍ത്തിയായതിനാല്‍ തനിക്ക് ജാമ്യം നല്‍കണമെന്നാണ് ബിഷപ്പ് ഹര്‍ജിയില്‍ ആവശ്യപ്പെട്ടത്. അതേസമയം ബിഷപ്പിന് ജാമ്യം അനുവദിക്കരുതെന്ന നിലപാടാണ് പൊലീസും സര്‍ക്കാരും കോടതിയില്‍ സ്വീകരിച്ചത്. അഡ്വക്കറ്റ് പി.വിജയഭാനു ആണ് ഫ്രാങ്കോ മുളയ്ക്കലിന് വേണ്ടി ഹാജരായത്.
മോഹൻലാലിനെതിരെ വനിതാകമ്മീഷൻ
മലയാളസിനിമ താര സംഘടനയായ എ.എം.എം.എ പ്രസിഡന്റ് മോഹൻലാലിനെതിരെ ആഞ്ഞടിച്ച് വനിതാകമ്മീഷൻ അധ്യക്ഷ എം.സി ജോസഫൈൻ.
മോഹൻലാൽ പ്രസിഡന്റായതിൽ വലിയ പ്രതീക്ഷ ഉണ്ടായിരുന്നു. എന്നാൽ ആ പ്രതീക്ഷ ആസ്ഥാനത്തതായി. മോഹന്‍ലാല്‍ തന്റെ സ്ഥാനത്തിൽ അല്‍പ്പം കൂടി ഉത്തരവാദിത്തം കാണിക്കണം. ആരാധകരെ നിലയ്ക്ക്‌ നിര്‍ത്തണം, നടിമാർക്കെതിരായ സൈബർ ആക്രമണം അത്ഭുതമല്ല എന്നാൽ നടിമാര്‍ക്കെതിരേ അവഹേളനം പാടില്ലെന്ന് മോഹന്‍ലാല്‍ ഉള്‍പ്പെടെയുള്ളവര്‍ പറയണം എന്നും ജോസഫൈൻ പറഞ്ഞു.
അതുപോലെ ദിലീപിനെ വച്ച് സിനിമചെയ്യുന്നതിൽ ബി. ഉണ്ണിക്കൃഷ്ണനെയും ജോസഫൈൻ വിമർശിച്ചു. കുറ്റാരോപിതനായ ഒരാളെ ഉൾപ്പെടുത്തി സിനിമചെയ്യുന്നത് ന്യായമല്ലെന്നും അവർ പറഞ്ഞു.
അമ്മയ്ക്കെതിരെ രൂക്ഷ വിമര്‍ശനവുമായി ഡബ്ല്യു.സി.സി
താരസംഘടനയായ ‘അമ്മ’യ്ക്കും പ്രസിഡന്റ് മോഹന്‍ലാലിനുമെതിരെ രൂക്ഷ വിമര്‍ശനവുമായി ഡബ്ല്യു.സി.സി. 15 വര്‍ഷം മലയാളസിനിമയില്‍ പ്രവര്‍ത്തിച്ച നടി ആക്രമിക്കപ്പെട്ട സംഭവത്തില്‍ ഡബ്ല്യു.സി.സി ഉന്നയിച്ച പ്രശ്‌നങ്ങള്‍ പരിഹരിക്കാൻ അമ്മയുടെ ഭാരവാഹികള്‍ തയാറായിട്ടില്ലെന്നും കുറ്റാരാപിതനായ നടനെ സംഘടനയിലേക്ക് തിരിച്ചെടുത്തതിന് പിന്നിലെ കാരണം എന്താണെന്ന് അറിയില്ലെന്നും ഡബ്ല്യു.സി.സി അംഗങ്ങൾ പറഞ്ഞു . ഡബ്ല്യുസിസി അംഗങ്ങളുടെ പേരുപറയാനുള്ള മര്യാദപോലും ‘അമ്മ’ പ്രസിഡന്റ് മോഹൻലാൽ കാണിച്ചില്ലെന്നും നടിമാര്‍ എന്നുമാത്രം പറഞ്ഞാണ് സംസാരിച്ചതെന്നും രേവതി പറഞ്ഞു. ഇരയായ പെണ്‍കുട്ടിയെ ബാബുരാജ് ചൂടുവെള്ളത്തില്‍ വീണ പൂച്ചെയെന്നാണ് വിശേഷിപ്പിച്ചതെന്നും പാര്‍വതി പറഞ്ഞു .ഞങ്ങള്‍ സംസാരിക്കുന്നത് നാളെ വരുന്നവര്‍ക്ക് സുരക്ഷ ഒരുക്കാനാണെന്ന് രേവതി വ്യക്തമാക്കി. രേവതി, പത്മപ്രിയ, പാര്‍വതി, ബീന പോള്‍, അഞ്ജലി മേനോന്‍, അര്‍ച്ചന പത്മിനി, റിമ ക്ലല്ലിങ്കല്‍ ദീദീ ദാമോദരന്‍, സജിത മഠത്തില്‍ തുടങ്ങിയവർ വാര്‍ത്താ സമ്മേളനത്തില്‍ പങ്കെടുത്തു .
പുനരുജ്ജീവന വായ്പ അനുവദിച്ചു തുടങ്ങി
പ്രളയബാധിതര്‍ക്ക് കുടുംബശ്രീ മുഖേന ഒരു ലക്ഷം രൂപ വരെ പലിശരഹിത വായ്പ നല്‍കുന്ന പദ്ധതി പ്രകാരം വായ്പാവിതരണം ആരംഭിച്ചു. ഇതുവരെ 1,44,750 പേരാണ് വായ്പക്ക് അപേക്ഷിച്ചത്. ഇതില്‍ 19,205 അപേക്ഷകള്‍ കുടുംബശ്രീ യൂണിറ്റുകള്‍ സി.ഡി.എസിന് കൈമാറി. ബാങ്കുകള്‍ക്ക് 16,218 അപേക്ഷകള്‍ സമര്‍പ്പിച്ചിട്ടുണ്ട്. ഇതില്‍ 1,401 പേര്‍ക്ക് വായ്പ അനുവദിച്ചു. മൊത്തം 73.47 കോടി രൂപയാണ് ബാങ്കുകള്‍ അനുവദിച്ചത്.
സംസ്ഥാനത്തെ സഹകരണ-വാണിജ്യ ബാങ്കുകളുമായി സഹകരിച്ചാണ് പുനരുജ്ജീവന വായ്പാ പദ്ധതി നടപ്പാക്കുന്നത്. വായ്പയുടെ പലിശ സര്‍ക്കാര്‍ വഹിക്കും. 1.44 ലക്ഷം പേര്‍ക്ക് 957 കോടി രൂപയാണ് ബാങ്കുകളില്‍ നിന്ന് സര്‍ക്കാര്‍ ആവശ്യപ്പെട്ടത്. അര്‍ഹരായ എല്ലാവര്‍ക്കും രണ്ടാഴ്ചകൊണ്ട് വായ്പ ലഭ്യമാക്കാന്‍ കഴിയുമെന്ന് കുടുംബശ്രീ അധികൃതര്‍ പറഞ്ഞു.
ഉളുപ്പുണ്ടോ ശ്രീ എം സ്വരാജ്? : പദ്മാ പിള്ള
ന്യൂഡല്‍ഹി: ശബരിമല സ്ത്രീ പ്രവേശന വിധിക്കെതിരെ നടക്കുന്ന റെഡി ടു വെയിറ്റ് സംഘാടകരിലൊരാളായ പദ്മാ പിള്ള ശബരിമല വിഷയത്തിൽ എം സ്വരാജ് നടത്തിയ പ്രസംഗത്തിനെതിരെയുള്ള ഫേസ്ബുക്ക് പോസ്റ്റ് വയറലാകുന്നു .
ഫേസ്ബുക് പോസ്റ്റ് വായിക്കാം .
ഉളുപ്പുണ്ടോ ശ്രീ എം സ്വരാജ്?
പച്ചക്കള്ളം ഒരു ചളിപ്പുമില്ലാതെ താങ്കൾ തട്ടിവിടുന്ന ഒരു വീഡിയോ കണ്ടു.
“നടതുറക്കുമ്പോൾ” കന്നി അയ്യപ്പൻ വന്നില്ലെങ്കിൽ മാളികപ്പുറവുമായുള്ള വിവാഹം നടക്കും എന്നാണ് ഉടമ്പടി എന്നും, ഈ കാരണം കൊണ്ട് ആ വിവാഹം ഇക്കഴിഞ്ഞ ചിങ്ങപ്രളയത്തിൽ ഭക്തരെത്താത്തത് കൊണ്ടു നടന്നു കഴിഞ്ഞു എന്നുമൊക്കെ പറയുന്നു.
ശുദ്ധ അസംബന്ധം വിളമ്പുമ്പോളും ഹമ്പട ഞാനെ എന്ന ഭാവം നിലനിർത്തുന്ന ആ അഭിനയപാടവം ഗംഭീരം.
കേട്ടോളൂ..
1. മണ്ഡലകാലത്തു, അതായത് 41 ദിവസം നീണ്ടു നിൽക്കുന്ന നടതുറപ്പു നാളുകളിൽ ഒരൊറ്റ കന്നി അയ്യപ്പൻ പോലും വരാത്ത വർഷം, വിവാഹം കഴിക്കാമെന്നാണ് ഉടമ്പടി.
2. കന്നി അയ്യപ്പന്മാരുടെ വരവിനെ സൂചിപ്പിച്ചു അവർ ശരംകുത്തി ആലിൽ തറയ്ക്കുന്ന അമ്പുകളാണ് അതിനു പ്രമാണമായി കൊടുത്ത അടയാളം.
3. കന്നി ശരങ്ങൾ ഉണ്ടോ എന്ന് നോക്കാൻ മാളികപ്പുറത്തമ്മ എഴുന്നള്ളുന്നത് മകരസംക്രമ ദിവസം, ദീപാരാധന കഴിഞ്ഞാണ്. അതായത്, 41 ആം നാൾ തിരുവാഭരണ ഘോഷയാത്രയ്ക്കു മുൻപേ പേട്ട തുള്ളിയെത്തുന്ന ആലങ്ങാട് അമ്പലപ്പുഴ സംഘങ്ങൾ ശരംകുത്തി കടന്നുപോയി സ്വാമിദര്ശനം കഴിഞ്ഞ ശേഷം, തിരുവാഭരണങ്ങൾ ചാർത്തി ഭഗവാനെയും അമ്മയെയും ദീപാരാധന ചെയ്തു കഴിഞ്ഞ്.
4. പേട്ട സംഘങ്ങളും പന്തളം സ്വാമിമാരും, ഒരു വൃതമെന്നോണം തന്നെ എല്ലാക്കൊല്ലവും കന്നിഅയ്യപ്പന്മാരെ കൊണ്ടു പോകാറുണ്ട് എന്നു താങ്കൾക്കറിയില്ലായിരിക്കാം. ശരംകുത്തി ആലിൽ ഒരു കന്നിശരം പോലുമില്ലാത്ത ഒരു വർഷം ഉണ്ടായിട്ടില്ല, ഇനി അതുണ്ടാവുന്നുവെന്കിൽ.. ഈ ഭൂമിയിലെ അവസാന അയ്യപ്പഭക്തനും മരിച്ചു എന്നു വേണം കരുതാൻ.
സർവാഭരണവിഭൂഷിതയായി വാദ്യവും വെട്ടവും അകമ്പടിയായി ശരംകുത്തിയിലേക്കു അമ്മയുടെ യാത്ര, ശരങ്ങൾ കണ്ടു നിരാശയായി ശോകമൂകമായ മടക്കം. ഇതൊക്കെ ഒരുനാൾ അവിടെച്ചെന്നു കണ്ടു നോക്കൂ. അനുഭവിക്കണം ആ അന്തരീക്ഷം!
മാളികപ്പുറത്തമ്മയുടെ ഹൃദയംനുറുങ്ങുന്ന ദുഖവും, അയ്യപ്പസ്വാമിയുടെ വൃതം നിലനിർത്തിയ കൃതാർത്ഥതയും ഇടകലർന്ന് കണ്ണും മനവും നിറഞ്ഞൊഴുകുന്ന ഭക്തരോട് താങ്കൾ ഇന്ന് ചെയ്യുന്ന ഈ വാക് കസർത്തുകൾക്കു ഉടനെ മറുപടി പറയേണ്ടി വരും.
അതിനു മുൻപേ ഭൂതനാഥൻ അങ്ങേയ്ക്കു സദ്ബുദ്ധി നൽകി അനുഗ്രഹിക്കാൻ പ്രാർത്ഥിക്കുക.
ക്ഷേത്ര ആചാരങ്ങളിൽ അന്തിമതീരുമാനം തന്ത്രിയുടേത് : തന്ത്രികുടുംബം പുനഃപരിശോധനാ ഹര്‍ജി നല്‍കി
ന്യൂഡല്‍ഹി: ശബരിമല സ്ത്രീ പ്രവേശന വിധിക്കെതിരെ തന്ത്രി കുടുംബം സുപ്രീംകോടതിയില്‍ പുനഃപരിശോധനാ ഹര്‍ജി നല്‍കി. കണ്ഠരര് മോഹനര്, കണ്ഠരര് രാജീവരര് എന്നിർ പ്രത്യേകമായിട്ടാണ് പുനപരിശോധനാ ഹർജി സമർപ്പിച്ചത്.
ക്ഷേത്രങ്ങളുടെ ആചാര അനുഷ്ടാനങ്ങളില്‍ അന്തിമ തീരുമാനങ്ങളെടുക്കാനുള്ള അവകാശം തന്ത്രി കുടുംബത്തിനാണെന്നും .ഭരണഘടനയുടെ 25(1) പ്രകാരം വിഗ്രഹത്തിനുള്ള അവകാശം സുപ്രീംകോടതി കണക്കിലെടുത്തില്ലെന്നും തന്ത്രികുടുംബം നല്‍കിയ പുനപരിശോധനാ ഹര്‍ജിയില്‍ പറയുന്നു .
സുപ്രീംകോടതി വിധിക്കെതിരെ എന്‍എസ്എസും പന്തളം കൊട്ടാരവും പുനഃപരിശോധന ഹര്‍ജി നല്‍കിയിരുന്നു. ഈ മാസം 28 ന് ശേഷം ഹര്‍ജികള്‍ സുപ്രീംകോടതി പരിഗണിക്കും .
സൗദി ആരോഗ്യമന്ത്രാലയത്തിലേക്ക് നഴ്‌സസുമാരെ റിക്രൂട്ട് ചെയ്യുന്നു
സൗദി അറേബ്യന്‍ സര്‍ക്കാര്‍ ആരോഗ്യ മന്ത്രാലയത്തിന്റെ കീഴില്‍ റിയാദിലുള്ള കിംഗ് ഫഹദ് മെഡിക്കല്‍ സിറ്റി ആശുപത്രിയിലേക്ക് നിയ മനത്തിനായി ഇന്റേണ്‍ഷിപ്പ് കൂടാതെ മൂന്നു വര്‍ഷത്തില്‍ കുറയാത്ത സേവന പരിചയമുള്ള ബി.എസ്.സി., എം.എസ്.സി പി.എച്ച്.ഡി നഴ്‌സുമാരെ (സ്ത്രീകള്‍ മാത്രം) തെരഞ്ഞെടുക്കുന്നതിന് കേരള സര്‍ക്കാര്‍ സ്ഥാപനമായ ഒഡെപെക്‌നെ ചുമതലപ്പെടുത്തിയിട്ടുണ്ട്. ഇതിനുള്ള ഇന്റര്‍വ്യൂ നവംബര്‍ മാസം 19,20,21,22,23 തീയതികളില്‍ ഡല്‍ഹിയില്‍ നടത്തും.
താല്‍പര്യമുള്ള ഉദ്യോഗാര്‍ത്ഥികള്‍ വിശദവിവരങ്ങള്‍ അടങ്ങിയ ബയോഡാറ്റ ഒഡെപെക് വെബ്‌സൈറ്റില്‍ കൊടുത്തിരിക്കുന്ന മാത്യകയില്‍ ഒക്ടോബര്‍ 30നകം [email protected] എന്ന ഇ-മെയില്‍ വിലാസത്തില്‍ അയക്കേണ്ട താണ്. വിശദവിവങ്ങള്‍ക്ക് www.odepc.kerala.gov.in എന്ന വെബ്‌സൈറ്റ് സന്ദര്‍ശിക്കുക.
രണ്ടാമൂഴം സിനിമയാക്കുന്നതില്‍ നിന്ന് എം.ടി പിൻമാറി
രണ്ടാമൂഴം സിനിമയാക്കുന്നതില്‍ നിന്ന് എ.ടി വാസുദേവന്‍ നായർ പിന്മാറി .സംവിധായകന്‍ കരാര് ലംഘിച്ചതിനാലാണ് പിന്മാറിയതെന്ന് അദ്ദേഹം പറഞ്ഞു .മൂന്നുവര്‍ഷത്തിനുള്ളിൽ രണ്ടാമൂഴം സിനിമയാക്കണമെന്നായിരുന്നു കരാര്.എന്നാൽ നാലുവര്‍ഷമായിട്ടും ചിത്രത്തിന്റെ ഷൂട്ടിംഗ് തുടങ്ങാതിരുന്നതിനാലാണ് പിന്മാറുന്നതെന്ന് അദ്ദേഹം പറഞ്ഞു .സംവിധായകനുമായി വഴക്കിട്ട് പിരിഞ്ഞിട്ടില്ലെന്നും മറ്റാരെങ്കിലും സമീപിച്ചാൽ തിരക്കഥ നൽകുന്നതിനെ കുറിച്ച് ആലോചിക്കുമെന്നും അദ്ദേഹം പറഞ്ഞു . സംവിധായകന്‍ വി.എ. ശ്രീകുമാർ മേനോനുമായുള്ള കരാര് അവസാനിച്ചെന്നും തിരക്കഥ തിരികെ കിട്ടണമെന്നും ആവശ്യപെട്ട് കോഴിക്കോട് മുന്‍സിഫ് കോടതിയില്‍ അദ്ദേഹം ഹര്‍ജി നൽകി .
എന്നാൽ സംവിധായകൻ വിഎ ശ്രീകുമാർ മേനോൻ തന്റെ ഫേസ്ബുക്കിലൂടെ മോഹൻലാൽ ആരാധകർക്ക് രണ്ടാമൂഴം സിനിമയാക്കുമെന്ന് ഉറപ്പുനൽകി .
” രണ്ടാമൂഴം നടക്കും!
എം. ടി. സാറിനെ പ്രോജക്ടിന്റെ പുരോഗതി കൃത്യമായി അറിയിക്കാൻ കഴിയാഞ്ഞത് എന്റെ വീഴ്ച്ചയാണ്. ഞാൻ അദ്ദേഹത്തെ നേരിൽ ചെന്ന് കണ്ട് കാര്യങ്ങൾ വ്യക്തമാക്കും. അദ്ദേഹത്തിന് എത്രയും വേഗം രണ്ടാമൂഴം സിനിമയായി കാണണം എന്ന ആഗ്രഹമുണ്ട്. ആ ആഗ്രഹം ഞാൻ നിറവേറ്റും. തിരക്കഥ എഴുതി കൊടുക്കുന്നതിന് മുൻപും, തിരക്കഥ എന്റെ കൈകളിൽ വച്ച് തരുമ്പോഴും ഞാൻ ആ കാലുകൾ തൊട്ട് വന്ദിച്ചു കൊടുത്ത വാക്കാണ്.
ഒരുപാട് അന്താരാഷ്ട്ര കരാറുകളും, സങ്കീർണ്ണമായ സാമ്പത്തിക പ്ലാനുകളും ആവശ്യമായി വന്നു. ആയതിനാൽ ഞാൻ പ്രതീക്ഷിച്ചതിലും ഏറെ സമയം എടുത്തു. നിർമ്മാതാവ് ബി ആർ ഷെട്ടിയും ഞാനും ഇതിനോടനുബന്ധിച്ച് കഴിഞ്ഞ മാസം യു. എസ് സന്ദർശിച്ചിരുന്നു.
മുൻപ് സ്ഥിരമായി എം. ടി സാറിനെ കാണുകയോ, അല്ലെങ്കിൽ ഫോൺ വഴി അദ്ദേഹത്തെ പ്രോജെക്ക്റ്റിന്റെ പുരോഗതിയെ കുറിച്ചും മറ്റും അറിയിക്കാറുണ്ടായിരുന്നു. എന്നാൽ ഒടിയന്റെ പോസ്റ്റ് പ്രൊഡക്ഷൻ നടക്കുന്നതിനാൽ കഴിഞ്ഞ കുറച്ച് ആഴ്ച്ചകളായി അതിനു കഴിഞ്ഞിരുന്നില്ല. ഇതിൽ അദ്ദേഹത്തിന് ആശങ്ക ഉണ്ടായിരുന്നിരിക്കും എന്ന് ഞാൻ മനസ്സിലാക്കുന്നു. അതിനിടയാക്കിയതിൽ ഞാൻ അദ്ദേഹത്തെ നേരിട്ട് കണ്ട് ക്ഷമ ചോദിക്കും.
പ്രീ പ്രൊഡക്ഷൻ വർക്കുകൾ അതിന്റെ അവസാന ഘട്ടത്തിലാണ്. എത്രയും വേഗം ചിത്രത്തിന്റെ ഔദ്യോഗികമായ അറിയിപ്പും, 2019 ജൂലൈയിൽ ചിത്രത്തിന്റെ ഷൂട്ടിങ് ആരംഭിക്കുന്നതിന് വേണ്ടിയുള്ള ഒരുക്കങ്ങളും നടത്തുന്നതായിരിക്കും.
മലയാളികളുടെ അഭിമാനമായ എം. ടി സാറിന്റെ രണ്ടാമൂഴത്തിനെ അന്തർദേശീയ നിലവാരത്തിൽ ചലച്ചിത്രമായി പുറത്തു കൊണ്ടുവരിക എന്നതാണ് ഞാൻ കൊടുത്ത വാക്ക്. അത് നിറവേറ്റാൻ ബി. ആർ. ഷെട്ടിയെ പോലൊരു നിർമ്മാതാവ് കൂടെയുള്ളപ്പോൾ അത് അസംഭവ്യമാകും എന്ന് ഞാൻ ഭയപ്പെടുന്നില്ല. ”
അന്താരാഷ്ട്ര ചലച്ചിത്രമേള ഡിസംബർ ഏഴു മുതൽ 13 വരെ
23 ാമത് അന്താരാഷ്ട്ര ചലച്ചിത്രമേള ഡിസംബർ ഏഴു മുതൽ 13 വരെ തിരുവനന്തപുരത്ത് നടക്കുമെന്ന് സാംസ്കാരിക വകുപ്പ് മന്ത്രി എ.കെ. ബാലൻ വാർത്താ സമ്മേളനത്തിൽ അറിയിച്ചു. പ്രളയദുരന്തത്തിന്റെ പശ്ചാത്തലത്തിൽ ചെലവ് ചുരുക്കിയാണ് മേള സംഘടിപ്പിക്കുക. ഏഴുദിവസമായിരിക്കും ഈ വർഷത്തെ മേളയെന്നും അദ്ദേഹം പറഞ്ഞു. പൊതു ഖജനാവിൽനിന്ന് പണം എടുക്കാനില്ലാത്തതിനാൽ ഡെലിഗേറ്റ് ഫീസ് ഉയർത്തിയും സ്‌പോൺസർഷിപ്പ് വഴിയുമാണ് മേള നടത്തിപ്പിനുള്ള ഫണ്ട് സ്വരൂപിക്കുക. കഴിഞ്ഞ തവണ ആറുകോടി 35 ലക്ഷം രൂപയായിരുന്ന ചെലവ് ഇത്തവണ മൂന്നരക്കോടി രൂപയായി ചുരുക്കും. ഡെലിഗേറ്റ് ഫീസ് 2000 രൂപയായി ഉയർത്തിയിട്ടുണ്ട്. വിദ്യാർത്ഥികൾക്ക് പകുതി നിരക്കായിരിക്കും. സൗജന്യ പാസുകൾ ഉണ്ടായിരിക്കില്ല. 12,000 പാസുകൾ വിതരണം ചെയ്യാനാണ് ഉദ്ദേശിക്കുന്നത്.
ഫെസ്റ്റിവലിന്റെ സംഘാടക സമിതി യോഗം ഒക്ടോബർ 11 വൈകിട്ട് അഞ്ചിന് പാളയം ചന്ദ്രശേഖരൻ നായർ സ്റ്റേഡിയത്തിലെ ഒളിംപിയ ഹാളിൽ ചേരും.
മുൻ വർഷങ്ങളിലെപ്പോലെ മേളയിലെ മത്സരവിഭാഗം ഉൾപ്പെടെയുള്ള എല്ലാ വിഭാഗങ്ങളും ഇത്തവണയും ഉണ്ടാകും. അന്താരാഷ്ട്ര മത്സര വിഭാഗത്തിൽ 14 സിനിമകളുണ്ടാവും. നവാഗതരുടെ ആറ് സിനിമകളുൾപ്പെടെ ആകെ 14 മലയാള സിനിമകൾ പ്രദർശിപ്പിക്കും. ഇതിൽ രണ്ടു ചിത്രങ്ങൾ മത്സരവിഭാഗത്തിലേക്ക് തെരഞ്ഞെടുക്കും. ഇന്ത്യൻ സിനിമാവിഭാഗത്തിൽ ഒമ്പത് ചിത്രങ്ങൾ പ്രദർശിപ്പിക്കും. ഇതിൽ രണ്ടെണ്ണം മത്സരവിഭാഗത്തിലായിരിക്കും. സമഗ്ര സംഭാവനയ്ക്കുള്ള ലൈഫ്‌ടൈം അച്ചീവ്‌മെന്റ് അവാർഡ് ഇത്തവണ ഉണ്ടായിരിക്കില്ല. കോംപറ്റിഷൻ, ഫിപ്രസി, നെറ്റ്പാക് അവാർഡുകളുണ്ടായിരിക്കും. ഇന്റർനാഷണൽ ജൂറി ദക്ഷിണേന്ത്യയിൽ നിന്നായി പരിമിതപ്പെടുത്തും. മേള നടക്കുന്ന ദിവസങ്ങളിൽ മുഖ്യവേദിയിൽ വൈകുന്നേരങ്ങളിൽ നടത്താറുള്ള കലാ സാംസ്കാരിക പരിപാടികൾ, ശിൽപശാല, എക്‌സിബിഷൻ, മാസ്റ്റർ ക്ലാസ്, പാനൽ ഡിസ്‌കഷൻ എന്നിവ ഒഴിവാക്കിയിട്ടുണ്ട്. ഓപ്പൺ ഫോറം തുടരും.
പ്രളയക്കെടുതിയിൽ ജീവൻ നഷ്ടപ്പെട്ടവർക്ക് ആദരാഞ്ജലിയർപ്പിച്ച് നിശാഗന്ധിയിൽ ഉദ്ഘാടനച്ചടങ്ങ് ലളിതമായി നടത്തും. ഉദ്ഘാടന ചിത്രം പ്രദർശിപ്പിക്കും. ലളിതമായ രീതിയിൽ നടത്തുന്ന സമാപന ചടങ്ങിൽ അവാർഡുകൾ വിതരണം ചെയ്യും. അവാർഡ് ലഭിച്ച ചിത്രം പ്രദർശിപ്പിക്കും. സ്‌പോൺസർഷിപ്പ് ലഭിക്കുകയാണെങ്കിൽ മാത്രം അലങ്കാരങ്ങൾ, പരസ്യ ഹോർഡിങ്ങുകൾ, പന്തലുകൾ എന്നിവ സ്ഥാപിക്കും. സ്‌പോൺസർഷിപ്പിന് താല്പര്യമുള്ളവരെ പത്രപരസ്യത്തിലൂടെ കണ്ടെത്തും.