By admin 
കേരളത്തിലെ വടക്കേ അറ്റത്തുള്ള ജില്ലയാണ് കാസര്കോട്. കോട്ടകളുടെയും നദികളുടെയും കുന്നുകളുടെയും ബീച്ചുകളുടെയും മാത്രമല്ല ദൈവങ്ങളുടെ കൂടി നാടാണിതെന്ന് പറയാറുണ്ട്. കേരളത്തിലെ ഏറ്റവും വലുതും നന്നായി സംരക്ഷിക്കപ്പെടുന്നതുമായ ചരിത്ര സ്മാരകമെന്ന നിലയില് ബേക്കല് കോട്ടയുടെ സാന്നിദ്ധ്യം കാസര്കോടിനെ ശ്രദ്ധേയമാക്കുന്നു. കാസര്കോട് നിന്ന് 16 കി. മീ. തെക്ക് ദേശീയ പാതയിലാണ് കോട്ട. കോട്ടയ്ക്കു സമീപം ആഴം കുറഞ്ഞ കടലിന്റെ തീരത്തുള്ള ബീച്ച് ബേക്കല് ഫോര്ട്ട് ബീച്ച് എന്നാണറിയപ്പെടുന്നത്. ഈ പ്രദേശത്തിന്റെ വികസനത്തിനായി ബേക്കല് റിസോര്ട്സ് ഡവലപ്മെന്റ് കോര്പ്പറേഷനെയാണ് സര്ക്കാര് ചുമതലപ്പെടുത്തിയിട്ടുള്ളത്.
ബീച്ച് സൗന്ദര്യവല്ക്കരണത്തിന്റെ ഭാഗമായി വലിയ രണ്ട് തെയ്യങ്ങളുടെ ചെങ്കല് പ്രതിമകള് സ്ഥാപിച്ചിരിക്കുന്നു. സമീപത്ത് ഒരു ഭിത്തിയില് നിലമ്പൂരില് നിന്നുള്ള കലാകാരന്മാര് പരമ്പരാഗത രീതിയിലുള്ള ചുവര്ചിത്രങ്ങള് വരച്ചിട്ടുണ്ട്. ചെങ്കല്ലു കൊണ്ട് നിര്മ്മിച്ച ഒരു റോക്ക് ഗാര്ഡന് പാര്ക്കിംഗ് ഏരിയയ്ക്കു സമീപത്തായി സജ്ജീകരിച്ചിരിക്കുന്നു. സാമൂഹ്യ വനവല്ക്കരണ പദ്ധതിയുടെ ഭാഗമായി ബീച്ചില് നട്ടു പിടിപ്പിച്ചിട്ടുള്ള വൃക്ഷങ്ങള് സദാ തണല് നല്കുന്നു.
കടല്തീരത്തിന്റെ സൗന്ദര്യം ആസ്വദിക്കാന് പറ്റിയവിധം നടപ്പാത ഒരുക്കിയിരിക്കുന്നു. ഇവിടെ നിന്ന് ബേക്കല് കോട്ടയും കാണാം. വൈകുന്നേരങ്ങളില് ബീച്ചില് അലങ്കാര ദീപങ്ങള് തെളിയും. ഇതുമൂലം അസ്തമയ ശേഷവും സഞ്ചാരികള്ക്ക് ദീര്ഘ നേരം ബീച്ചില് ചെലവഴിക്കാന് സാധിക്കുന്നു. കടല് കാറ്റേല്ക്കാന് ഏറുമാടങ്ങള് പോലുള്ള സൗകര്യങ്ങളുണ്ട്. കൂടാതെ 14 വയസ്സില് താഴെ പ്രായമുള്ള കുട്ടികള്ക്കായി മനോഹരമായ ചില്ഡ്രന്സ് പാര്ക്കുo ഉണ്ട് ഇവിടെ.
ബേക്കൽ ഫോട്ടിൽ എത്തിച്ചേരാൻ
- സമീപ റെയില്വെ സ്റ്റേഷന് : കാസര്കോട്
- സമീപ വിമാനത്താവളങ്ങള് : മംഗലാപുരം, കാസര്കോട് നിന്ന് 50 കി. മീ. / കരിപ്പൂര്, കോഴിക്കോട് കാസര്കോട് നിന്ന് 200 കി. മീ.
