തന്റെ സഹോദരന്റെ കൊലപാതകികളെ കണ്ടെത്തി ശിക്ഷ നൽകണമെന്ന ആവശ്യവുമായി സെക്രട്ടേറിയറ്റ് പടിക്കൽ രാപ്പകൽ സമരം ചെയ്ത് ശ്രദ്ധേയനായ ശ്രീജിത്ത് ഒരു ഹ്രസ്വചിത്രത്തിൽ നായകനായി എത്തുന്നു. ശ്രീജിത്ത് എന്ന് പേരിട്ട ഈ ചിത്രം സംവിധാനം ചെയ്യുന്നത് സതീഷ് കറ്റാനവും, ഹരീഷ് സി.സേനനും ചേർന്നാണ്. എസ്വി ഫിലിംസ് പ്രൊഡക്ഷൻ കൊച്ചിക്കു വേണ്ടി റാണി ഗോകുൽ, ജോർജ് വിപിൻ എന്നിവർ ചേർന്നാണ് നിർമാണം.
ശ്രീജിത്തിന്റെ സമരപ്പന്തലിൽ വച്ച് ചിത്രീകരിച്ച ഈ ടെലിഫിലിം ശ്രീജിത്തിന്റെ ജീവിത വഴികളിലൂടെ സഞ്ചരിച്ച് ചില ഓർമപ്പെടുത്തലുകൾ നടത്തുന്നു. ശ്രീജിത്തിനോടൊപ്പം, സുജിത്ത് കോഴിക്കോട്, സാബു തോട്ടപ്പള്ളി, രാജേഷ് , അജികുമാർ, റാണി ഗോകുൽ, അയ്യപ്പൻ ആർ.വി., പിങ്കിമോൾ, അബ്ദുള്ള ഷാജി എന്നിവരും അഭിനയിക്കുന്നു.
