ശബരിമല കർമ്മസമിതി തീരുമാനിച്ചിരുന്ന സെക്രട്ടേറിയറ്റ് ഉപരോധം ഉപേക്ഷിച്ചു. ജനുവരി 18 ന് അഞ്ച് ലക്ഷം പേരെ അണിനിരത്തി സെക്രട്ടേറിയറ്റ് ഉപരോധിക്കാനായിരുന്നു തീരുമാനം പകരം 20ന് അഞ്ച് ലക്ഷം പേരെ പങ്കെടുപ്പിച്ച് പുത്തരിക്കണ്ടം മൈതാനിയിൽ സമ്മേളനം നടത്തുമെന്നും കർമ്മസമിതി. ശബരിമല പ്രക്ഷോഭത്തിലെ പോലീസ് കേസുകളാണ് ഉപരോധം ഉപേക്ഷിക്കാൻ കാരണമെന്ന് സൂചന.

ശബരിമല യുവതീ പ്രവേശനത്തിന് ശേഷമുണ്ടായ എല്ലാ അക്രമണങ്ങൾക്കും പിന്നിൽ ആർഎസ്എസ് എന്ന് സർക്കാർ റിപ്പോർട്ട്. ഇക്കാര്യം വ്യക്തമാക്കി സർക്കാർ ഗവർണർക്ക് റിപ്പോർട്ട് നൽകി. ആക്രമമുണ്ടാക്കാൻ ആസൂത്രിത ഗൂഢാലോചന നടത്തിയെന്നും റിപ്പോർട്ടിൽ. ഹർത്താലിനോടനുബന്ധിച്ച അകമങ്ങളിൽ 1137 കേസുകൾ രജിസ്റ്റർ ചെയ്യുകയും 10024 പ്രതികളെ തിരിച്ചറിഞ്ഞതിൽ 9193 പേർ സംഘപരിവാർ സംഘടനയിലുള്ളവരെന്നും റിപ്പോർട്ടിൽ സർക്കാർ പരാമർശിച്ചു.

സിബിഐ ഡയറക്ടർ സ്ഥാനത്ത് നിന്ന് അലോക് വർമ്മയെ മാറ്റി. ഫയർ സർവീസ് & ഹോം ഗാർഡ് ഡയറക്ടർ ജനറലായി അലോക് വർമയെ നിയമിച്ചു. സെലക്ഷൻ കമ്മിറ്റി യോഗത്തിലാണ് തീരുമാനമായത്. സുപ്രീം കോടതിയാണ് സെലക്ഷൻ കമ്മിറ്റിയെ നിയോഗിച്ചത്.എന്നാൽ സെലക്ഷൻ കമ്മറ്റി തീരുമാനത്തോട് വിയോജിച്ച് മല്ലികാർജുൻ ഖാർഗെ രംഗത്തെത്തി.അലോക് വർമയെ മാറ്റിയ നടപടിയിൽ അത്ഭുതമില്ലെന്ന് കോൺഗ്രസ് വ്യക്തമാക്കി. ഭരണഘടന സ്ഥാപനങ്ങൾ മോദി തകർക്കുകയാണെന്നും മോദിയുടെത് ഏകാധിപത്യ ഭരണമെന്നും കോൺഗ്രസ്. അലോക് വർമയെ കൂടാതെ അഞ്ച് ഉദ്യോഗസ്ഥരെ കൂടി സിബിഐ സ്ഥലം മാറ്റിയിരുന്നു.

മുന്നോക്ക സാമ്പത്തിക സംവരണ ബിൽ രാജ്യസഭയും പാസ്സാക്കി.165 പേർ അനുകൂലിക്കുകയും ഏഴ് പേർ എതിർക്കുകയും ചെയ്തു. മുസ്ലീം ലീഗ് , ഡിഎംകെ, ആം ആദ്മി പാർട്ടി എന്നിവർ എതിർത്തപ്പോൾ അണ്ണാ ഡിഎംകെ വിട്ടുനിന്നു. ബിൽ സെലക്ട് കമ്മിറ്റിക്ക് വിടണമെന്ന പ്രമേയം വോട്ടിനിട്ട് തളളുകയായിരുന്നു. സ്വകാര്യ മേഖലകളിലും സംവരണം വേണമെന്ന സി പി എം ഭേദഗതിയും തള്ളി.

ശബരിമലയിൽ ദർശനം നടത്തിയെന്ന് അവകാശപ്പെട്ട് യുവതി.ഇന്നലെ പുലർച്ചെ ദർശനം നടത്തിയെന്ന് അവകാശം ഉന്നയിച്ച് കൊല്ലം ചാത്തന്നൂർ സ്വദേശിനി മഞ്ജു.പോലീസ് സുരക്ഷയില്ലാതെയാണ് താൻ ദർശനം നടത്തിയതെന്നും മറ്റ് തീർത്ഥാടകർക്കൊപ്പമാണ് പതിനെട്ടാം പടി ചവിട്ടിയതെന്നും മഞ്ജു പറഞ്ഞു. കേരള ദളിത് മഹിളാ ഫെഡറേഷൻ നേതാവാണ് മഞ്ജു. തന്റെ ഫേസ്ബുക്ക് പേജിലൂടെയാണ് മഞ്ജു മലകയറിയ ദൃശ്യങ്ങൾ പുറത്ത് വിട്ടത്. എന്നാൽ വേഷം മാറിയാണ് മഞ്ജു മല കയറിയതെന്ന് ആരോപണം ഉയർന്നു. എന്നാൽ താൻ വേഷം മാറിയല്ല കയറിയതെന്നും സന്നിധാനത്ത് നെയ്യഭിഷേകം ഉൾപ്പെടെ വഴിപാടുകൾ ചെയ്തു എന്നും അയ്യപ്പ സേവാ സംഘത്തിലുള്ളവരാണ് തന്നെ സഹായിച്ചതെന്നും മഞ്ജു പറഞ്ഞു.