‘ദ ഗ്ലോറി’ എന്ന ഹിറ്റ് പരമ്പരയിൽ ബദ്ധശത്രുക്കളായി അഭിനയിച്ച ലീ ഡോ-ഹ്യുനും ലിം ജി-യോണും ജീവിതത്തിൽ പ്രണയിതാക്കളായത് ആരാധകർക്ക് വലിയ അത്ഭുതമായിരുന്നു. ഇപ്പോഴിതാ ഇരുവരും വിവാഹിതരാകാൻ ഒരുങ്ങുന്നു എന്ന തരത്തിലുള്ള വാർത്തകളാണ് പുറത്തുവരുന്നത്.
ലിം ജി-യോൺ തന്റെ ഇൻസ്റ്റാഗ്രാമിൽ ‘മിസിസ് ക്വോക്ക’ (Mrs Quokka) എന്ന വെഡ്ഡിംഗ് പ്ലാനർ അക്കൗണ്ട് ഫോളോ ചെയ്തതാണ് ആരാധകർക്കിടയിൽ വിവാഹത്തെക്കുറിച്ചുള്ള ചർച്ചകൾക്ക് വഴിതെളിച്ചത്. ഇത് ഇരുവരും വിവാഹത്തിനുള്ള തയ്യാറെടുപ്പിലാണോ എന്ന സംശയം ബലപ്പെടുത്തി.
‘ദ ഗ്ലോറി’യുടെ സെറ്റിൽ വെച്ചാണ് ഇരുവരും കണ്ടുമുട്ടിയത്. പരമ്പരയിൽ പരസ്പരം പോരടിക്കുന്ന കഥാപാത്രങ്ങളായിരുന്നെങ്കിലും, ചിത്രീകരണത്തിനിടെ ഇവർക്കിടയിൽ നല്ലൊരു സൗഹൃദം രൂപപ്പെടുകയും പിന്നീട് അത് പ്രണയത്തിലേക്ക് മാറുകയും ചെയ്തു. 2023 ഏപ്രിൽ 1-നാണ് ഇവർ തങ്ങളുടെ പ്രണയം ഔദ്യോഗികമായി സ്ഥിരീകരിച്ചത്.
ലീ ഡോ-ഹ്യുൻ സൈനിക സേവനത്തിനായി പോയ സമയത്തും (ഓഗസ്റ്റ് 2023 മുതൽ) ഇരുവരും തങ്ങളുടെ ബന്ധം ദൃഢമായി കാത്തുസൂക്ഷിച്ചിരുന്നു. 2024 സെപ്റ്റംബറിൽ ഒരു സുഹൃത്തിന്റെ വിവാഹത്തിന് ഇരുവരും ഒരുമിച്ച് എത്തിയത് വലിയ വാർത്തയായിരുന്നു. ഔദ്യോഗികമായി വിവാഹത്തെക്കുറിച്ച് ഇതുവരെ പ്രഖ്യാപനങ്ങളൊന്നും ഉണ്ടായിട്ടില്ലെങ്കിലും, ലിം ജി-യോണിന്റെ പുതിയ സോഷ്യൽ മീഡിയ നീക്കം ശുഭവാർത്ത ഉടൻ ഉണ്ടാകുമെന്ന പ്രതീക്ഷയിലാണ് ആരാധകർ.
നിലവിൽ ഔദ്യോഗിക സ്ഥിരീകരണങ്ങളൊന്നുമില്ലെങ്കിലും, കൊറിയൻ സിനിമാലോകത്തെ ഏറ്റവും പ്രിയപ്പെട്ട ജോഡികളിലൊന്നായ ഇവരുടെ വിവാഹവാർത്തയ്ക്കായി കാത്തിരിക്കുകയാണ് ആരാധകർ.
2017-ലെ മികച്ച നടിക്കുള്ള തമിഴ്നാട് സർക്കാരിന്റെ സംസ്ഥാന ചലച്ചിത്ര പുരസ്കാരം ലേഡി സൂപ്പർസ്റ്റാർ നയൻതാരയ്ക്ക്. ‘അറം’ (Aramm) എന്ന ചിത്രത്തിലെ ജില്ലാ കളക്ടറായുള്ള മികച്ച പ്രകടനമാണ് താരത്തെ അവാർഡിന് അർഹയാക്കിയത്.
ഇതോടൊപ്പം നയൻതാരയും വിഘ്നേഷ് ശിവനും ചേർന്ന് നിർമ്മിച്ച (റൗഡി പിക്ചേഴ്സ്) ‘കൂഴങ്ങൾ’ മികച്ച സിനിമയ്ക്കുള്ള പുരസ്കാരവും, ‘നെട്രിക്കൺ’ എന്ന ചിത്രം സ്ത്രീ ശാക്തീകരണത്തിനുള്ള പ്രത്യേക പുരസ്കാരവും നേടി. തമിഴ്നാട് സർക്കാരിന് നന്ദി അറിയിച്ചുകൊണ്ട് നയൻതാര തന്നെയാണ് സോഷ്യൽ മീഡിയയിലൂടെ ഈ സന്തോഷവാർത്ത പങ്കുവെച്ചത്.
ഇന്ത്യൻ വിപണിയിൽ തങ്ങളുടെ സാന്നിധ്യം ശക്തമാക്കുന്നതിനായി പുതിയ സബ്-കോംപാക്റ്റ് എംപിവിയായ ‘നിസാൻ ഗ്രാവിറ്റ്’ (Nissan Gravite) കമ്പനി പുറത്തിറക്കി. റെനോ ട്രൈബറിനെ (Renault Triber) അടിസ്ഥാനമാക്കി നിർമ്മിച്ചിരിക്കുന്ന ഈ വാഹനം ആകർഷകമായ വിലയിലും ഫീച്ചറുകളിലുമാണ് നിസാൻ അവതരിപ്പിച്ചിരിക്കുന്നത്.
പ്രധാന വിവരങ്ങൾ:
വില: 5.65 ലക്ഷം രൂപയാണ് പ്രാരംഭ എക്സ്-ഷോറൂം വില. ആദ്യത്തെ 1,001 ബുക്കിംഗുകൾക്ക് മാത്രമായിരിക്കും ഈ വില ലഭിക്കുക.
ഡിസൈൻ: നിസാന്റെ സിഗ്നേച്ചർ വി-മോഷൻ ഗ്രിൽ (V-Motion grille), പുതിയ ബമ്പറുകൾ, സ്പ്ലിറ്റ് എൽഇഡി ഡിആർഎല്ലുകൾ (LED DRLs), റാപ് എറൗണ്ട് ടെയിൽ ലാമ്പുകൾ എന്നിവ വാഹനത്തിന് പുതുമയുള്ള ലുക്ക് നൽകുന്നു.
ഇന്റീരിയർ: മൂന്ന് വരികളിലായി 7 പേർക്ക് സഞ്ചരിക്കാവുന്ന സീറ്റിംഗ് സൗകര്യമാണ് (2+3+2) ഗ്രാവിറ്റിലുള്ളത്. ഡിജിറ്റൽ കൺസോൾ, ടച്ച്സ്ക്രീൻ ഇൻഫോടെയ്ൻമെൻ്റ് സിസ്റ്റം, വയർലെസ് ആപ്പിൾ കാർപ്ലേ/ആൻഡ്രോയിഡ് ഓട്ടോ, വയർലെസ് ചാർജിംഗ്, പുഷ്-ബട്ടൺ സ്റ്റാർട്ട്, 360-ഡിഗ്രി ക്യാമറ തുടങ്ങിയ ആധുനിക സംവിധാനങ്ങൾ ഇതിലുണ്ട്.
എഞ്ചിൻ: 71 bhp കരുത്തും 96 Nm ടോർക്കും നൽകുന്ന 1.0 ലിറ്റർ നാച്ചുറലി ആസ്പിറേറ്റഡ് പെട്രോൾ എഞ്ചിനാണ് വാഹനത്തിന് കരുത്തേകുന്നത്. 5-സ്പീഡ് മാനുവൽ, എഎംടി (AMT) ഗിയർബോക്സ് ഓപ്ഷനുകളിൽ ഇത് ലഭ്യമാണ്. ഡീലർഷിപ്പ് വഴി സിഎൻജി (CNG) കിറ്റ് ഘടിപ്പിക്കാനുള്ള സൗകര്യവും നിസാൻ നൽകുന്നുണ്ട്.
സുരക്ഷ: 6 എയർബാഗുകൾ, എബിഎസ് (ABS), ഇബിഡി (EBD), ഇഎസ്സി (ESC), ടിപിഎംഎസ് (TPMS) തുടങ്ങിയ സുരക്ഷാ ക്രമീകരണങ്ങൾ വാഹനത്തിലുണ്ട്.
റെനോ ട്രൈബറിന് സമാനമായ പ്ലാറ്റ്ഫോമിലാണ് നിർമ്മിച്ചിരിക്കുന്നതെങ്കിലും, വ്യത്യസ്തമായ ഡിസൈനും കൂടുതൽ ഫീച്ചറുകളും നൽകി ഗ്രാവിറ്റിനെ നിസാൻ വേറിട്ടുനിർത്തുന്നു. മാരുതി സുസുക്കി എർട്ടിഗ, ടൊയോട്ട റൂമിയോൺ തുടങ്ങിയ വലിയ എംപിവികളേക്കാൾ കുറഞ്ഞ വിലയിൽ 7 സീറ്റർ വാഹനം ആഗ്രഹിക്കുന്നവർക്ക് ഇതൊരു മികച്ച ഓപ്ഷനായിരിക്കും.
കോഴിക്കോട്: കേരളത്തിൽ ഈ വർഷത്തെ റമദാൻ വ്രതാരംഭം ഫെബ്രുവരി 19 വ്യാഴാഴ്ചയായിരിക്കുമെന്ന് പാണക്കാട് സയ്യിദ് സാദിഖ് അലി ശിഹാബ് തങ്ങൾ അറിയിച്ചു.
സംസ്ഥാനത്ത് എവിടെയും ഇന്ന് മാസപ്പിറവി കണ്ടതായി സ്ഥിരീകരണമില്ലാത്ത സാഹചര്യത്തിലാണ് തീരുമാനം. ഇത് പ്രകാരം നാളെ (ബുധനാഴ്ച) ശഅബാൻ 30 പൂർത്തിയാക്കി മറ്റന്നാൾ (വ്യാഴാഴ്ച) റമദാൻ ഒന്നായിരിക്കും.
മാസപ്പിറവി കാണാത്തതിനാൽ നാളെ വ്രതം ആരംഭിക്കില്ലെന്നും വ്യാഴാഴ്ച മുതൽ വിശ്വാസികൾ വ്രതാനുഷ്ഠാനത്തിലേക്ക് കടക്കുമെന്നും ഖാസിമാർ വ്യക്തമാക്കി. ഇതോടെ മാസങ്ങൾ നീണ്ടുനിൽക്കുന്ന പുണ്യമാസത്തിന് വ്യാഴാഴ്ച തുടക്കമാകും.
കോഴിക്കോട് നഗരത്തിലെ ജയലക്ഷ്മി ടെക്സ്റ്റൈൽസിൽ വൻ തീപിടിത്തം. കെട്ടിടത്തിന്റെ രണ്ടും മൂന്നും നിലകളിൽ തീ ആളിക്കത്തുന്നതായാണ് നിലവിൽ ലഭിക്കുന്ന വിവരം. കൂടുതൽ വിവരങ്ങൾ അറിവായിട്ടില്ല.
ഷോറൂമിലെ വിലപിടിപ്പുള്ള വസ്ത്രശേഖരവും കത്തിനശിച്ചതായാണ് വിവരം.ആളപായമില്ല എന്നാണ് റിപ്പോർട്ടുകൾ.
തിരുവനന്തപുരം: സംസ്ഥാനത്തെ ബാറുകളുടെ പ്രവർത്തന സമയത്തിൽ മാറ്റം വരുത്താൻ സർക്കാർ ആലോചിക്കുന്നു. നിലവിലെ സമയക്രമം പരിഷ്കരിച്ച് രാവിലെ 10 മുതൽ രാത്രി 12 വരെ ബാറുകൾക്ക് പ്രവർത്തിക്കാൻ അനുമതി നൽകിയേക്കും. ഇത് സംബന്ധിച്ച ഉത്തരവ് ഉടൻ പുറത്തിറങ്ങുമെന്നാണ് സൂചന.
നിലവിൽ രാവിലെ 11 മുതൽ രാത്രി 11 വരെയാണ് ബാറുകളുടെ പ്രവർത്തന സമയം. വിനോദസഞ്ചാര കേന്ദ്രങ്ങളിലെ ബാറുകൾക്ക് ഇപ്പോൾ രാത്രി 12 വരെ പ്രവർത്തിക്കാൻ അനുമതിയുണ്ട്. എന്നാൽ, ഇതിന് സമീപപ്രദേശത്തുള്ള മറ്റ് ബാറുകൾക്ക് ഈ ആനുകൂല്യം ലഭിച്ചിരുന്നില്ല. ഇതിനെതിരെ ബാറുടമകൾ പ്രതിഷേധമറിയിച്ചിരുന്നു. ഈ പശ്ചാത്തലത്തിലാണ് സംസ്ഥാനത്തെ എല്ലാ ബാറുകളുടെയും പ്രവർത്തന സമയം ഏകീകരിക്കാൻ സർക്കാർ ആലോചിക്കുന്നത്.
മറ്റു പ്രധാന നിർദ്ദേശങ്ങൾ:
ടൂറിസം കേന്ദ്രങ്ങൾ: വിനോദസഞ്ചാര കേന്ദ്രങ്ങളിലെ ബാറുകൾക്ക് പുലർച്ചെ 3 മണി വരെ പ്രവർത്തിക്കാൻ അനുമതി നൽകിയേക്കുമെന്നും സൂചനയുണ്ട്.
ബിസിനസ് ടൂറിസം: ബിസിനസ് ടൂറിസത്തിന്റെ ഭാഗമായി നടക്കുന്ന പ്രത്യേക ചർച്ചകൾ, മേളകൾ, കൂടിച്ചേരലുകൾ എന്നിവയ്ക്ക് പുലർച്ചെ 3 മണി വരെ മദ്യം വിളമ്പാൻ അനുമതിയുണ്ടാകും. ഇതിനായി പ്രത്യേകം ഫീസ് നൽകേണ്ടി വരും.
2025 ജനുവരി 31-ലെ കണക്കനുസരിച്ച് സംസ്ഥാനത്ത് 847 ബാർ ലൈസൻസുകളാണ് നിലവിലുള്ളത്. ഇതിനു പുറമേ 289 ബവ്കോ ഔട്ട്ലെറ്റുകളും പ്രവർത്തിക്കുന്നുണ്ട്.
സംഗീത് പ്രതാപ്, ഷറഫുദീൻ എന്നിവരെ കേന്ദ്ര കഥാപാത്രങ്ങളാക്കി നവാഗതനായ ശ്യാമിൻ ഗിരീഷ് ഒരുക്കുന്ന “ഇറ്റ്സ് എ മെഡിക്കൽ മിറക്കിൾ” എന്ന ചിത്രത്തിന്റെ ഫസ്റ്റ് ലുക്ക് പുറത്ത്. കൗതുകമുണർത്തുന്നതും വ്യത്യസ്തവുമായ ലുക്കിലാണ് ഫസ്റ്റ് ലുക്ക് പോസ്റ്ററിൽ ഷറഫുദീൻ, സംഗീത് പ്രതാപ് എന്നിവരെ അവതരിപ്പിച്ചിരിക്കുന്നത്. ഡോക്ടർ പോൾസ് എന്റർടൈൻമെന്റ്, ഡ്രീം ബിഗ് ഫിലിംസ് എന്നിവയുടെ ബാനറിൽ ഡോക്ടർ പോൾ വർഗീസ്, സുജിത് ജെ നായർ എന്നിവർ ചേർന്നാണ് ചിത്രം നിർമ്മിക്കുന്നത്. അഖില ഭാർഗവൻ നായികാ വേഷം ചെയ്യുന്ന ചിത്രത്തിന്റെ കഥ, തിരക്കഥ, സംഭാഷണം എന്നിവ രചിച്ചത് നിലീൻ സാന്ദ്രയാണ്.
പ്രേക്ഷകർക്ക് ഏറെ ആകാംഷ പകരുന്ന രീതിയിലാണ് ഫസ്റ്റ് ലുക്ക് പോസ്റ്റർ ഒരുക്കിയിരിക്കുന്നത്. ചിത്രത്തിന്റെ കഥയെ കുറിച്ചും കഥാപാത്രങ്ങളെ കുറിച്ചും പ്രേക്ഷകരിൽ ആകാംഷയും കൗതുകവും ഈ പോസ്റ്റർ സമ്മാനിക്കുന്നുണ്ട്. സംഗീത് പ്രതാപ്, ഷറഫുദീൻ എന്നിവരുടെ കരിയറിലെ തീർത്തും വ്യത്യസ്തവും അവർ ഇതുവരെ ചെയ്യാത്ത തരത്തിലുള്ളതുമായ കഥാപാത്രങ്ങളെയാണ് ഇതിൽ അവതരിപ്പിക്കുന്നതെന്നും ഫസ്റ്റ് ലുക്ക് സൂചിപ്പിക്കുന്നു.
കൊടുങ്ങലൂരും പരിസര പ്രദേശങ്ങളിലും ആയിരുന്നു “ഇറ്റ്സ് എ മെഡിക്കൽ മിറക്കിൾ” ചിത്രീകരണം ആരംഭിച്ചത്. 55 ദിവസത്തോളം നീണ്ടു നിന്ന ചിത്രീകരണം, കൊച്ചിയിൽ നടന്ന അവസാന ഷെഡ്യൂളോടെയാണ് പൂർത്തിയായത്. ചിത്രത്തിന്റെ പോസ്റ്റ് പ്രൊഡക്ഷൻ ജോലികൾ ഇപ്പോൾ പുരോഗമിക്കുകയാണ്. കോട്ടയം നസീർ, ആനന്ദ് മന്മഥൻ, കിരൺ പീതാംബരൻ, പാർവ്വതി ആർ കൃഷ്ണ തുടങ്ങി വലിയൊരു താരനിര ചിത്രത്തിൽ അണിനിരക്കുന്നുണ്ട്. ചിത്രം മധ്യവേനലവധിക്കാലത്ത് തീയേറ്ററുകളിലെത്തിക്കാനുള്ള ശ്രമത്തിലാണ് അണിയറ പ്രവർത്തകർ. ചിത്രം വിതരണം ചെയ്യുന്നത് ഡ്രീം ബിഗ് ഫിലിംസ്.
ഛായാഗ്രഹണം – അഖിൽ സേവ്യർ, എഡിറ്റർ- രാകേഷ് ചെറുമഠം, സംഗീതം- മുജീബ് മജീദ്, സൗണ്ട് ഡിസൈൻ- നിക്സൺ ജോർജ്, മേക്കപ്പ്- റോണക്സ് സേവ്യർ, വസ്ത്രങ്ങൾ- ആരതി ഗോപാൽ, പ്രൊഡക്ഷൻ കൺട്രോളർ – മനോജ് പൂങ്കുന്നം, കലാസംവിധാനം- അപ്പുണ്ണി സാജൻ, ചീഫ് അസ്സോസിയേറ്റ് ഡയറക്ടർ- വിഷ്ണു ദേവ്, അജിത് ജോസ്, വി എഫ് എക്സ്- പിക്ടോറിയൽ വി എഫ് എക്സ്, മാർജ്ജാര വിഎഫ്എക്സ്, അസ്സോസിയേറ്റ് ഡയറക്ടർ-മുബീൻ റാഫി, പ്രോജക്ട് ഡിസൈനർ- അമൃത മോഹൻ,അസ്സോസിയേറ്റ് ക്യാമറാമാൻ- വിശോക് കളത്തിൽ, ഫിനാൻസ് കൺട്രോളർ- ബിബിൻ സേവ്യർ, സ്റ്റിൽസ്- സിനറ്റ് സേവ്യർ, അസിസ്റ്റന്റ് ഡിറക്ടർസ് – ആൽബിൻ ഷാജി, ഷഫീഖ്, ഡിസൈൻസ്- യെല്ലോ ടൂത്സ്, ഡിസ്ട്രിബൂഷൻ – ഡ്രീം ബിഗ് ഫിലിംസ്, ഡിജിറ്റൽ മാർക്കറ്റിങ് – ഒബ്സ്ക്യൂറ, പിആർഒ – ശബരി
അഭിഷേക് നാമ രചിച്ചു സംവിധാനം ചെയ്യുന്ന പാൻ ഇന്ത്യൻ തെലുങ്ക് ചിത്രമായ ‘നാഗബന്ധ’ത്തിന്റെ ടീസർ പുറത്ത് വിട്ട് തെലുങ്ക് സൂപ്പർതാരം മഹേഷ് ബാബു. മഹാശിവരാത്രി ആഘോഷങ്ങളോട് അനുബന്ധിച്ചാണ് ചിത്രത്തിന്റെ ടീസർ റിലീസ് ചെയ്തത്. എൻഐകെ സ്റ്റുഡിയോസ്, അഭിഷേക് പിക്ചേഴ്സ് എന്നിവയുടെ ബാനറിൽ കിഷോർ അന്നപുറെഡ്ഡി, നിഷിത നാഗിറെഡ്ഡി എന്നിവർ ചേർന്ന് നിർമ്മിക്കുന്ന ചിത്രം അവതരിപ്പിക്കുന്നത് ലക്ഷ്മി ഇറയും, ദേവാൻഷ് നാമയും ചേർന്നാണ്. സഹനിർമ്മാതാവ് താരക് സിനിമാസ്.
ലോകോത്തര നിലവാരവും സമ്പന്നമായ നിർമ്മാണ മൂല്യങ്ങളും വാഗ്ദാനം ചെയ്യുന്ന ഗംഭീര കാൻവാസിൽ ആണ് ചിത്രം ഒരുക്കിയിരിക്കുന്നതെന്ന് ടീസർ കാണിച്ചു തരുന്നു. നിഗൂഢമായ ഹിമാലയത്തിന്റെ പശ്ചാത്തലത്തിൽ, കാലത്തേക്കാൾ പഴക്കമുള്ള ഒരു രഹസ്യം മൂടപ്പെട്ടു കിടക്കുന്ന ഒരു ലോകത്തിലേക്കുള്ള വാതിൽ ആണ് ഈ ടീസർ തുറക്കുന്നത്. ഒരു മനുഷ്യന്റെ അത്യാഗ്രഹം ഈ പ്രപഞ്ച രഹസ്യത്തെ തുറന്നു കാണിക്കും എന്ന ഭീഷണി ഉയർത്തുമ്പോൾ, വിധി അതിന്റെ യോദ്ധാവിനെ തിരഞ്ഞെടുത്തു കൊണ്ട് മുന്നോട്ടു വരുന്നു.
അബ്ദാലിയുടെ നേതൃത്വത്തിലുള്ള ചരിത്രപരമായ അഫ്ഗാൻ അധിനിവേശത്തിൽ നിന്ന് ഭാഗികമായി പ്രചോദനം ഉൾക്കൊണ്ട ഈ ആഖ്യാനം, പുരാണങ്ങളും ചരിത്രവും ആത്മീയ യുദ്ധവും കോർത്തിണക്കിയാണ് ഒരുക്കിയിരിക്കുന്നത്. ഈ ഇതിഹാസത്തിന്റെ ഹൃദയഭാഗത്ത് വിശുദ്ധ നാഗബന്ധം ക്ഷേത്രം സ്ഥിതിചെയ്യുന്നു. ഇത് ആകാശശക്തികളാൽ സംരക്ഷിക്കപ്പെടുകയും, ഒരു പുരാതന കോസ്മിക് ശക്തിയെ സംരക്ഷിക്കുമെന്ന് വിശ്വസിക്കപ്പെടുകയും ചെയ്യുന്ന ഒരു മറഞ്ഞിരിക്കുന്ന ക്ഷേത്രമാണ്. രഹസ്യമായ ഹിമാലയൻ പാതകളിൽ ആഴത്തിൽ സ്ഥിതിചെയ്യുന്ന ഈ ക്ഷേത്രത്തിന് അതിശയകരമായ ഒരു ശക്തിയുണ്ട്. അത് തെറ്റായ കൈകളിലേക്ക് വീഴുന്നത് സങ്കൽപ്പിക്കാനാവാത്ത നാശത്തിന് കാരണമാകും.
ബ്രഹ്മാവിന്റെ സൃഷ്ടിയിൽ നിന്ന്… വിഷ്ണുവിൻറെ ധർമ്മത്താൽ സംരക്ഷിക്കപ്പെടുന്ന… മഹാദേവൻറെ രോഷത്താൽ നയിക്കപ്പെടുന്ന… എന്ന വരികൾ, നാഗബന്ധത്തിൻറെ ആത്മാവിനെ പൂർണ്ണമായും ഉൾക്കൊള്ളുന്നു. ദൈവത്വവും വിധിയും നാശവും കൂട്ടിമുട്ടുന്ന ഒരു കഥയാണ് ചിത്രം പറയുന്നത്. സംവിധായകൻ അഭിഷേക് നാമയുടെ ധീരമായ അഭിലാഷവും വ്യക്തമായ കാഴ്ചപ്പാടും ഈ ടീസറിലൂടെ ദൃശ്യമാണ്. അസാധാരണമായ സാങ്കേതിക നിലവാരത്തിൽ, പുരാണങ്ങൾ, ആക്ഷൻ, ആത്മീയ ആഴം എന്നിവയുടെ സംയോജനം ആണ് ടീസറിന് ശക്തമായ സിനിമാറ്റിക് ഐഡന്റിറ്റി നൽകുന്നത്. ഒരൊറ്റ ഡയലോഗ് പോലും ഇല്ലാതെ, ദൃശ്യങ്ങളുടെ ശക്തിയും അമ്പരപ്പിക്കുന്ന വലിപ്പമുള്ള കഥപറച്ചിലും കൊണ്ട് ടീസർ കാഴ്ചക്കാരെ ആകർഷിക്കുന്നു. ആദ്യ ഫ്രെയിം മുതൽ തന്നെ, നാഗബന്ധം ഒരു മഹത്തായ ദൃശ്യ ഇതിഹാസമായി പ്രേക്ഷകരുടെ മനസ്സിൽ ഇടം നേടുന്നുണ്ട്.
വലിയ സെറ്റുകൾ നിർമ്മിക്കുന്നത് മുതൽ, വിഎഫ്എക്സിലും എല്ലാ സാങ്കേതിക വകുപ്പുകളിലും സൂക്ഷ്മമായ ശ്രദ്ധയും മേൽനോട്ടവും നൽകുന്നതിൽ വരെ, ഇന്ത്യൻ സിനിമയിലെ നിർമ്മാണ മൂല്യത്തിന്റെ മാനദണ്ഡങ്ങൾ പുനർനിർവചിക്കുകയെന്നതാണ് ഈ ചിത്രത്തിലൂടെ സംവിധായകനും നിർമ്മാതാക്കളും ലക്ഷ്യമിടുന്നത്. ഉഗ്രമായ അവതാരമായി സ്ക്രീനിലെത്തുന്ന നായകൻ വിരാട് കർന്നയുടെ പ്രകടനം തന്നെയാണ് ടീസറിന്റെ മറ്റൊരു ഹൈലൈറ്റ്. മുതലയുമായുള്ള പോരാട്ടത്തിനുപുറമെ, ശിവ ഭഗവാന്റെ രൂപത്തിലുള്ള അദ്ദേഹത്തിന്റെ പ്രകടനവും ടീസറിന്റെ ഹൈലൈറ്റ് ആണ്. വമ്പൻ ശാരീരിക പരിവർത്തനം, വൈകാരിക ആഴം, തീവ്രമായ എന്നിവയിലൂടെ തന്റെ കരിയറിനെ നിർവചിക്കുന്ന പ്രകടനമാണ് അദ്ദേഹം നൽകിയിരിക്കുന്നതെന്ന് ടീസർ സൂചിപ്പിക്കുന്നു.
നഭാ നടേഷ്, ഐശ്വര്യ മേനോൻ, മഹേഷ് മഞ്ജരേക്കർ, ജഗപതി ബാബു, റിഷഭ് സാഹ്നി, ഗരുഡ റാം, ജയപ്രകാശ്, മുരളി ശർമ, അനസൂയ ഭരദ്വാജ്, ബി. എസ്. അവിനാഷ് എന്നിവർ ആണ് ചിത്രത്തിലെ മറ്റു പ്രധാന താരങ്ങൾ. ഇന്നലെ ഹൈദരാബാദിൽ പ്രസാദ് പി. സി. എക്സിൽ ടീസർ പ്രദർശിപ്പിക്കുകയും, മാധ്യമ പ്രവർത്തകർ ഉൾപ്പെടെയുള്ളവരിൽ നിന്ന് വലിയ കയ്യടിയും അഭിനന്ദനവും നേടുകയും ചെയ്തിരുന്നു. ബ്രഹ്മാണ്ഡ സെറ്റുകളിൽ, അതിശയിപ്പിക്കുന്ന ദൃശ്യങ്ങളോടെ ആണ് ആത്മീയമായ പ്രാധാന്യമുള്ള ഈ കഥ വെള്ളിത്തിരയിൽ ഒരുക്കുന്നത്. ആത്മീയതയും ആവേശകരമായ സാഹസികതയും സംയോജിപ്പിച്ച് ഒരുക്കുന്ന ഈ പാൻ ഇന്ത്യൻ ആക്ഷൻ ചിത്രം തെലുങ്ക്, ഹിന്ദി, തമിഴ്, കന്നഡ, മലയാളം ഭാഷകളിൽ 2026 സമ്മർ റിലീസായി എത്തും.
ഛായാഗ്രഹണം- സൌന്ദർ രാജൻ എസ് , സംഗീതം- അഭേ, ജുനൈദ് കുമാർ, എഡിറ്റർ- ആർ. സി. പനവ്, സിഇഓ -വാസു പൊടിനി, പ്രൊഡക്ഷൻ ഡിസൈനർ – അശോക് കുമാർ, സംഭാഷണങ്ങൾ- കല്യാൺ ചക്രവർത്തി, കോസ്റ്റ്യൂം ഡിസൈനർ-അശ്വിൻ രാജേഷ്, എക്സിക്യൂട്ടീവ് പ്രൊഡ്യൂസർ- അഭിനത്രി ജക്കൽ, ആക്ഷൻ- വെങ്കട്ട്, വ്ലാഡ് റിംബർഗ്, കെച്ച, തിരക്കഥ വികസനം- ശ്ര 1, രാജീവ് എൻ കൃഷ്ണ, Vfx: തണ്ടർ സ്റ്റുഡിയോസ്, Vfx സൂപ്പർവൈസർ-ദേവ് ബാബു ഗാന്ധി (ബുജ്ജി), പബ്ലിസിറ്റി ഡിസൈൻ -കാനി സ്റ്റുഡിയോ, പിആർഓ – ശബരി
പുഴു എന്ന ചിത്രത്തിലൂടെ ശ്രദ്ധേയയായ റത്തീന പി.ടി. സംവിധാനം ചെയ്ത ക്രൈം-ആക്ഷൻ ത്രില്ലര് ചിത്രം ‘പാതിരാത്രി’ ഫെബ്രുവരി 20-ന് ZEE5 ഇൽ പ്രീമിയർ ചെയ്യുന്നു.ബെൻസി പ്രൊഡക്ഷൻസിന്റെ ബാനറിൽ കെ.വി. അബ്ദുൾ നാസർ, ആഷിയ നാസർ എന്നിവർ ചേർന്നാണ് ചിത്രം നിർമ്മിച്ചിരിക്കുന്നത്. സൗബിൻ ഷാഹിറും നവ്യ നായരും കേന്ദ്രകഥാപാത്രങ്ങളെ അവതരിപ്പിക്കുന്ന ചിത്രം തിയറ്ററിൽ വൻ കയ്യടിയോട് കൂടെയാണ് പ്രേക്ഷകർ സ്വീകരിച്ചത്.
ഇലവീഴാപൂഞ്ചിറ എന്ന ചിത്രത്തിന് ശേഷം ഷാജി മാറാട് രചിച്ച ചിത്രമാണ് പാതിരാത്രി.ഒരു അർദ്ധരാത്രി പട്രോളിംഗിനിടെ സംഭവിക്കുന്ന അപ്രതീക്ഷിത സംഭവവികാസങ്ങളാണ് ‘പാതിരാത്രി’യുടെ പ്രമേയം. സി.പി.ഒ ഹരീഷും എസ്.ഐ ജാൻസി കുര്യനും ഒരു രാത്രിയിൽ ഒരാളെ പിന്തുടർന്ന് കാട്ടിലേക്ക് കയറുന്നതോടെ അവരുടെ ജീവിതം മാറിമറിയുന്നു. ഒരു പ്രമുഖ മാധ്യമപ്രവർത്തകന്റെ ദുരൂഹമരണം കൂടി ഇതിലേക്ക് ഇഴചേരുന്നതോടെ, തങ്ങൾ ഈ കുറ്റകൃത്യത്തിന്റെ അന്വേഷകരാണോ അതോ അറിയാതെ ഇതിൽ പങ്കാളികളായവരാണോ എന്ന് ഇരുവരും ഭയപ്പെടുന്നു.നവ്യാ നായരുടെ സിനിമാ കരിയറിലെ ആദ്യ പോലീസ് വേഷമാണ് പാതിരാത്രിയിലേത്.
നവ്യ നായർ, സൗബിൻ ഇവരെ കൂടാതെ സണ്ണി വെയ്ന്, ആന് അഗസ്റ്റിന്, ആത്മീയാ രാജന്, ശബരീഷ് വര്മ, ഹരിശ്രീ അശോകൻ, സോഹന് സീനുലാല്,അച്യുത് കുമാർ, ഇന്ദ്രൻസ് എന്നിവരും പ്രധാനവേഷത്തിലെത്തുന്നു. പാതിരാത്രി വളരെ ആഴമുള്ള ഒരു പോലീസ് ഡ്രാമയാണിത്, ലോകമെമ്പാടുമുള്ള പ്രേക്ഷകർ ഈ ചിത്രം ZEE5 ഓ ടി ടി യിൽ ഏറ്റെടുക്കുമെന്ന് ഉറപ്പുണ്ടെന്നു സൗബിൻ പറഞ്ഞു.
സംരക്ഷകരാകാൻ പരിശീലനം ലഭിച്ച ഉദ്യോഗസ്ഥർക്ക് സ്വന്തം പ്രവർത്തികളെ തന്നെ ചോദ്യം ചെയ്യേണ്ടി വരുമ്പോൾ എന്ത് സംഭവിക്കുന്നു എന്നതാണ് ഈ ചിത്രം പരിശോധിക്കുന്നത്. ഓ ടി ടി യിൽ റിലീസ് ചെയ്യുമ്പോൾ ഈ ചിത്രം പ്രേക്ഷകർക്കിടയിൽ തീർച്ചയായും വലിയ ചർച്ചയാകും എന്ന് നവ്യ നായർ കൂട്ടിചേർത്തു.
ആക്ഷൻ ത്രില്ലർ എലമെന്റുകളും ഇഴചേർന്ന് നിൽക്കുന്ന ‘പാതിരാത്രി’, മികച്ച ദൃശ്യാനുഭവവും അഭിനയമുഹൂർത്തങ്ങളും പ്രേക്ഷകർക്ക് സമ്മാനിക്കും എന്ന് തീർച്ചയാണ്. ‘പാതിരാത്രി’ ഫെബ്രുവരി 20 മുതൽ മലയാളം സീ5-ൽ സ്ട്രീമിങ് ആരംഭിക്കും.
വിവാദമായ ‘ദി കേരള സ്റ്റോറി’ എന്ന സിനിമയ്ക്ക് ശേഷം ഇതിന്റെ രണ്ടാം ഭാഗമായ ‘ദി കേരള സ്റ്റോറി 2 – ഗോസ് ബിയോണ്ട്’ (The Kerala Story 2 – Goes Beyond) എന്ന ചിത്രത്തിന്റെ ട്രെയിലർ പുറത്തിറങ്ങി. കാമാഖ്യ നാരായൺ സിംഗ് സംവിധാനം ചെയ്യുന്ന ഈ ചിത്രം വിപുൽ അമൃത്ലാൽ ഷാ ആണ് നിർമ്മിക്കുന്നത്. 2026 ഫെബ്രുവരി 27-ന് ചിത്രം തിയേറ്ററുകളിൽ എത്തും.
രാജസ്ഥാൻ, മധ്യപ്രദേശ്, കേരളം എന്നിവിടങ്ങളിലായി നടക്കുന്ന സംഭവങ്ങളാണ് സിനിമയിൽ ദൃശ്യവൽക്കരിക്കുന്നത്. മൂന്ന് ഹിന്ദു പെൺകുട്ടികൾ (ഉൾക്ക ഗുപ്ത, അദിതി ഭാട്ടിയ, ഐശ്വര്യ ഓജ എന്നിവർ അവതരിപ്പിക്കുന്നു) മുസ്ലീം യുവാക്കളുമായി പ്രണയത്തിലാകുന്നതും, തുടർന്ന് മതം മാറ്റത്തിന് വിധേയരാകുന്നതുമാണ് ചിത്രത്തിന്റെ ഇതിവൃത്തമെന്ന് ട്രെയിലർ സൂചിപ്പിക്കുന്നു.
“അടുത്ത 25 വർഷത്തിനുള്ളിൽ ഇന്ത്യ ഒരു ഇസ്ലാമിക രാഷ്ട്രമായി മാറിയേക്കാം” എന്ന മുന്നറിയിപ്പോടെയാണ് ട്രെയിലർ ആരംഭിക്കുന്നത്, ഇത് വലിയ ചർച്ചകൾക്ക് വഴിവെച്ചിട്ടുണ്ട്.
അവർ ഞങ്ങളുടെ പെൺമക്കളെ ലക്ഷ്യമിട്ടു, അവരുടെ വിശ്വാസം തകർത്തു. ഇത്തവണ ഞങ്ങൾ മിണ്ടാതിരിക്കില്ല, പോരാടും” എന്ന കുറിപ്പോടെയാണ് നിർമ്മാതാക്കൾ ട്രെയിലർ പുറത്തുവിട്ടിരിക്കുന്നത്.
കഴിഞ്ഞ തവണത്തേതുപോലെ തന്നെ ഇത്തവണയും ചിത്രം വലിയ ചർച്ചകൾക്കും വിവാദങ്ങൾക്കും കാരണമാകുമെന്നാണ് സൂചന.
തെന്നിന്ത്യൻ സിനിമാലോകം ഏറെ കാത്തിരിക്കുന്ന താരവിവാഹമാണ് വിജയ് ദേവരകൊണ്ടയുടേയും രശ്മിക മന്ദാനയുടേയും. ഔദ്യോഗികമായി ഇരുവരും പ്രഖ്യാപിച്ചിട്ടില്ലെങ്കിലും, ഫെബ്രുവരി 26-ന് രാജസ്ഥാനിലെ ഉദയ്പൂരിൽ വെച്ച് വിവാഹം നടക്കുമെന്നാണ് പുറത്തുവരുന്ന റിപ്പോർട്ടുകൾ. ഇപ്പോഴിതാ, വിവാഹ ചടങ്ങുകളുമായി ബന്ധപ്പെട്ട മറ്റൊരു വിവരവും ചർച്ചയാകുകയാണ്.
വിവാഹ വേദിയിൽ അതീവ സ്വകാര്യത ഉറപ്പുവരുത്തുന്നതിനായി അതിഥികൾക്ക് മൊബൈൽ ഫോണുകൾ ഉപയോഗിക്കുന്നതിന് വിലക്കുണ്ടായിരിക്കും എന്നാണ് വിവരം. ചടങ്ങുകളുടെ ചിത്രങ്ങളും വീഡിയോകളും സോഷ്യൽ മീഡിയയിലൂടെ പുറത്തുപോകാതിരിക്കാനാണ് ഇത്തരമൊരു മുൻകരുതൽ സ്വീകരിക്കുന്നത്. ബോളിവുഡ് താരവിവാഹങ്ങളിൽ കണ്ടുവരുന്നതുപോലെ, തികച്ചും സ്വകാര്യമായി ചടങ്ങുകൾ നടത്താനാണ് ഇരുവരും ആഗ്രഹിക്കുന്നത്.
വിവാഹ വീഡിയോയുടെ സംപ്രേക്ഷണ അവകാശം സ്വന്തമാക്കാൻ പ്രമുഖ ഓടിടി (OTT) പ്ലാറ്റ്ഫോം 60 കോടി രൂപ വാഗ്ദാനം ചെയ്തിരുന്നു. എന്നാൽ തങ്ങളുടെ സ്വകാര്യത കച്ചവടം ചെയ്യാൻ താല്പര്യമില്ലെന്ന് വ്യക്തമാക്കി താരങ്ങൾ ഈ വമ്പൻ ഓഫർ നിരസിച്ചതായാണ് റിപ്പോർട്ടുകൾ. രാജസ്ഥാനിലെ ഉദയ്പൂരിലുള്ള ഒരു പൈതൃക കൊട്ടാരത്തിലാകും വിവാഹം നടക്കുക എന്നാണ് റിപ്പോർട്ടുകൾ
അടുത്ത ബന്ധുക്കളും സുഹൃത്തുക്കളും മാത്രമടങ്ങുന്ന ചെറിയ സദസ്സിലായിരിക്കും വിവാഹം. പിന്നീട് ഹൈദരാബാദിൽ വെച്ച് സിനിമാ സുഹൃത്തുക്കൾക്കായി വിരുന്ന് സംഘടിപ്പിക്കുമെന്നും പറയപ്പെടുന്നു.
കഴിഞ്ഞ വർഷം ഒക്ടോബറിൽ ഇരുവരുടെയും വിവാഹനിശ്ചയം കഴിഞ്ഞതായും അഭ്യൂഹങ്ങളുണ്ട്. എന്തായാലും താരങ്ങളുടെ ഔദ്യോഗിക പ്രഖ്യാപനത്തിനായി കാത്തിരിക്കുകയാണ് ആരാധകർ.
യൂട്യൂബർമാരിൽ നിന്നുള്ള നിരന്തരമായ സൈബർ ആക്രമണത്തിനെതിരെ മുഖ്യമന്ത്രി പിണറായി വിജയന്റെ സഹായം തേടി മലയാള സീരിയൽ താരം രേഖ രതീഷ്. തനിക്കെതിരെ മോശം തലക്കെട്ടുകൾ നൽകി വ്യാജവാർത്തകൾ പ്രചരിപ്പിക്കുന്ന ഒരു കൂട്ടം യൂട്യൂബർമാർ കാരണം താൻ കടുത്ത മാനസിക സമ്മർദ്ദത്തിലാണെന്നും, തനിക്കെന്തെങ്കിലും സംഭവിച്ചാൽ അതിന് ഉത്തരവാദികൾ ഇവർ മാത്രമായിരിക്കുമെന്നും നടി ഫെയ്സ്ബുക്ക് വീഡിയോയിലൂടെ വെളിപ്പെടുത്തി.
കഴിഞ്ഞ ഒമ്പത് മാസമായി താൻ ജോലിയില്ലാതെ ഫ്ലാറ്റിൽ കഴിയുകയാണെന്നും, ഒമ്പതാം ക്ലാസിൽ പഠിക്കുന്ന മകൻ മാത്രമാണ് കൂടെയുള്ളതെന്നും രേഖ പറയുന്നു. കഴിഞ്ഞ കുറച്ചു മാസങ്ങളായി ചില യൂട്യൂബ് ചാനലുകൾ തന്നെ വ്യക്തിഹത്യ ചെയ്യുന്ന രീതിയിലുള്ള വീഡിയോകൾ പോസ്റ്റ് ചെയ്യുകയാണ്. ഇത് തന്റെ ഉപജീവനത്തെയും ബാധിക്കുന്നുണ്ടെന്നും, ജീവിക്കാൻ അനുവദിക്കാത്ത വിധം സമ്മർദ്ദത്തിലാക്കുകയാണെന്നും നടി പറഞ്ഞു.
“ഇത്തരം ആക്രമണങ്ങൾ കാരണം കേരളത്തിൽ പലർക്കും ജീവൻ നഷ്ടപ്പെടുന്നുണ്ട്. മകന് വേണ്ടി കഷ്ടപ്പെട്ട് ജീവിക്കുന്ന ഒരു സ്ത്രീയാണ് ഞാൻ. എന്നാൽ യൂട്യൂബർമാരുടെ ഈ പ്രവർത്തികൾ കാരണം മുന്നോട്ട് ജീവിക്കാൻ കഴിയാത്ത അവസ്ഥയാണ്. മുഖ്യമന്ത്രി ദയവായി ഇതിൽ ഇടപെടണം. എനിക്ക് വേണ്ടി മാത്രമല്ല, ഇനിയാരും ഇത്തരം അനുഭവങ്ങളിലൂടെ കടന്നുപോകാതിരിക്കാൻ സർക്കാർ ശക്തമായ നടപടി സ്വീകരിക്കണം,” രേഖ വീഡിയോയിൽ അഭ്യർത്ഥിച്ചു.
അടുത്തിടെ രേഖ ഇൻസ്റ്റഗ്രാമിൽ പങ്കുവെച്ച ‘എ ന്യൂ ചാപ്റ്റർ’ എന്ന വീഡിയോയ്ക്ക് താഴെ വ്യാപകമായി മോശം കമന്റുകൾ വന്നിരുന്നു. ഇതിന് പിന്നാലെയാണ് താരം തന്റെ അവസ്ഥ വെളിപ്പെടുത്തി രംഗത്തെത്തിയത്. സുഹൃത്തും നടനുമായ ഈശ്വറുമായുള്ള വീഡിയോ കോൾ ദൃശ്യങ്ങൾ പങ്കുവെച്ചപ്പോൾ, രേഖ അഞ്ചാം വിവാഹത്തിന് ഒരുങ്ങുകയാണെന്ന തരത്തിൽ ചിലർ വ്യാജപ്രചരണങ്ങൾ നടത്തിയിരുന്നു.
