തിരുവനന്തപുരം/കണ്ണൂർ: മുഖ്യമന്ത്രി പിണറായി വിജയന്റെയും മുൻ മന്ത്രി പി.എ. മുഹമ്മദ് റിയാസിന്റെയും വസതികളിൽ എൻഫോഴ്സ്മെന്റ് ഡയറക്ടറേറ്റ് (ഇഡി) നടത്തിയ റെയ്ഡ് പൂർത്തിയായി. എന്നാൽ റെയ്ഡിന് പിന്നാലെ സംസ്ഥാനത്തിന്റെ വിവിധ ഭാഗങ്ങളിൽ വൻ സംഘർഷവും സി.പി.ഐ.എം പ്രവർത്തകരുടെ വ്യാപക പ്രതിഷേധവുമുണ്ടായി. തിരുവനന്തപുരത്ത് പിണറായി വിജയന്റെ വാടക വീട്ടിൽ റെയ്ഡ് പൂർത്തിയാക്കി മടങ്ങിയ ഇഡി ഉദ്യോഗസ്ഥരുടെ വാഹനങ്ങൾ സി.പി.ഐ.എം പ്രവർത്തകർ അടിച്ചുതകർത്തു.

തിരുവനന്തപുരത്ത് പരക്കെ അക്രമം; പോലീസ് ലാത്തിവീശി

തിരുവനന്തപുരത്ത് റെയ്ഡ് കഴിഞ്ഞ് മടങ്ങുകയായിരുന്ന ഇഡി സംഘത്തിന്റെ മൂന്ന് വാഹനങ്ങളുടെയും ചില്ലുകൾ സി.പി.ഐ.എം പ്രവർത്തകർ പൂർണ്ണമായി തകർത്തു. ഉദ്യോഗസ്ഥരുടെ കാറുകൾ വളഞ്ഞായിരുന്നു പരക്കെ അക്രമം അഴിച്ചുവിട്ടത്.

കണ്ണൂരിലും കോഴിക്കോട്ടും പരിശോധന പൂർത്തിയായി; രേഖകളൊന്നും ലഭിച്ചില്ല

കണ്ണൂർ പാണ്ടാല്യമുക്കിലെ പിണറായി വിജയന്റെ വീട്ടിലും, മുൻ മന്ത്രി പി.എ. മുഹമ്മദ് റിയാസിന്റെ കോഴിക്കോട്ടെ വസതിയിലും നടന്ന പരിശോധനകൾ അവസാനിപ്പിച്ച് ഇഡി സംഘം മടങ്ങി. രാവിലെ 8.30 ഓടെയാണ് പിണറായിയുടെ കണ്ണൂരിലെ വീട്ടിൽ റെയ്ഡ് ആരംഭിച്ചത്. എന്നാൽ, പരിശോധനയിൽ കേസുമായി ബന്ധപ്പെട്ട യാതൊരുവിധ രേഖകളും കണ്ടെത്താൻ കഴിഞ്ഞിട്ടില്ലെന്ന് ഇഡിയുടെ മഹസറിൽ വ്യക്തമാക്കുന്നുണ്ട്.

കണ്ണൂരിൽ ഇഡി ഉദ്യോഗസ്ഥരെ തടഞ്ഞു; ഒടുവിൽ വഴിതുറന്ന് നേതാക്കൾ

കണ്ണൂർ പാണ്ഡല്യമുക്കിലെ വീട്ടിൽ നിന്ന് പരിശോധന കഴിഞ്ഞ് പുറത്തിറങ്ങിയ ഇഡി ഉദ്യോഗസ്ഥരെ സി.പി.ഐ.എം പ്രവർത്തകർ കൂകിവിളിച്ചാണ് നേരിട്ടത്. വൻ പ്രതിഷേധം കാരണം ഉദ്യോഗസ്ഥർക്ക് ഏറെ നേരം മടങ്ങാൻ കഴിഞ്ഞില്ല. ഉദ്യോഗസ്ഥരെ പുറത്തുവിടില്ലെന്ന നിലപാടിൽ പ്രവർത്തകർ ഉറച്ചുനിന്നതോടെ, അവർക്ക് മടങ്ങാനുള്ള വഴി ഒരുക്കണമെന്ന് ഇഡി സംഘം ജില്ലയിലെ പാർട്ടി നേതാക്കളോട് അഭ്യർത്ഥിച്ചു.

തുടർന്ന് സി.പി.ഐ.എം നേതാവ് എം.വി. ജയരാജൻ ഇടപെട്ട് പ്രവർത്തകരോട് പിന്തിരിഞ്ഞു പോകാൻ ആവശ്യപ്പെട്ട ശേഷമാണ് ഉദ്യോഗസ്ഥർക്ക് മടങ്ങാനായത്.

സംസ്ഥാനവ്യാപക പ്രതിഷേധം: കണ്ണൂരിലെ പിണറായി വിജയന്റെ വീടിന് മുന്നിൽ ആരംഭിച്ച പ്രതിഷേധം നിമിഷങ്ങൾക്കകം സി.പി.ഐ.എം സംസ്ഥാനവ്യാപക പ്രതിഷേധമായി മാറ്റുകയായിരുന്നു. കേന്ദ്ര ഏജൻസിയുടെ നടപടിക്കെതിരെ വൻ ജനരോഷമാണ് പാർട്ടി പ്രവർത്തകർ ഉയർത്തുന്നത്.

ബോളിവുഡ് താരം രൺവീർ സിംഗ് മൈസൂരുവിലെ പ്രശസ്തമായ ചാമുണ്ഡേശ്വരി ക്ഷേത്രത്തിൽ സന്ദർശനം നടത്തി പ്രത്യേക പൂജകൾ പ്രാർത്ഥനകളും നടത്തി. ‘കാന്താര’ സിനിമയിലെ ദൈവത്തെ അനുകരിച്ചതുമായി ബന്ധപ്പെട്ട കേസിൽ കർണാടക ഹൈക്കോടതി നൽകിയ നിർദ്ദേശത്തെ തുടർന്നാണ് താരത്തിന്റെ ഈ ക്ഷേത്രദർശനം.

കഴിഞ്ഞ വർഷം ഗോവയിൽ നടന്ന അന്താരാഷ്ട്ര ചലച്ചിത്രമേളയുടെ (IFFI) സമാപന ചടങ്ങിൽ വെച്ച് ‘കാന്താര’ സിനിമയിലെ ഋഷഭ് ഷെട്ടിയുടെ പ്രകടനത്തെ രൺവീർ അനുകരിക്കുകയും ‘ദൈവത്തെ’ മോശമായി പരാമർശിക്കുകയും ചെയ്തു എന്നതായിരുന്നു വിവാദം. ഇത് തങ്ങളുടെ മതവികാരത്തെ വ്രണപ്പെടുത്തിയെന്ന് കാണിച്ച് ഒരു അഭിഭാഷകൻ നൽകിയ പരാതിയിലാണ് താരത്തിനെതിരെ കേസെടുത്തത്.

തുടർന്ന് കേസ് റദ്ദാക്കണമെന്ന് ആവശ്യപ്പെട്ട് രൺവീർ സിംഗ് കർണാടക ഹൈക്കോടതിയെ സമീപിക്കുകയായിരുന്നു. തന്റെ ഭാഗത്തുനിന്നുണ്ടായ തെറ്റിന് താരം കോടതിയിൽ നിരുപാധികം മാപ്പപേക്ഷിക്കുകയും പുതുക്കിയ സത്യവാങ്മൂലം സമർപ്പിക്കുകയും ചെയ്തു. ഇത് സ്വീകരിച്ച ഹൈക്കോടതി, താരത്തിനെതിരെയുള്ള നിയമനടപടികൾ അവസാനിപ്പിക്കുന്നതിന്റെ ഭാഗമായി നാലാഴ്ചയ്ക്കകം മൈസൂരു ചാമുണ്ഡി ഹിൽസിലെ ചാമുണ്ഡേശ്വരി ദേവിയെ ദർശിച്ചു പ്രായശ്ചിത്തം ചെയ്യാൻ നിർദ്ദേശിക്കുകയായിരുന്നു.

ചൊവ്വാഴ്ച രാവിലെ 7.30-ഓടെ തികച്ചും സാധാരണക്കാരനായ ഒരു ഭക്തനെപ്പോലെയാണ് രൺവീർ ക്ഷേത്രത്തിലെത്തിയത്. മാസ്ക് ധരിച്ചിരുന്നതിനാൽ തുടക്കത്തിൽ ആർക്കും താരത്തെ തിരിച്ചറിയാൻ സാധിച്ചില്ല. തുടർന്ന് ഗർഭഗൃഹത്തിന് സമീപമെത്തി മാസ്ക് മാറ്റിയപ്പോഴാണ് ക്ഷേത്ര ജീവനക്കാരും പൂജാരിമാരും താരത്തെ തിരിച്ചറിഞ്ഞത്. പത്ത് മിനിറ്റോളം ക്ഷേത്രത്തിനുള്ളിൽ ചിലവഴിച്ച താരം, അർച്ചന ഉൾപ്പെടെയുള്ള പ്രത്യേക വഴിപാടുകൾ നടത്തിയാണ് മടങ്ങിയത്.

Actor Ranveer Singh visits Chamundeshwari Temple in Mysuru, kantara issue

തിരുവനന്തപുരം: ലോകപ്രസിദ്ധമായ ശ്രീപത്മനാഭസ്വാമി ക്ഷേത്രത്തില്‍ നിന്ന് വജ്രവും സ്വര്‍ണവും ഉള്‍പ്പെടെയുള്ള അമൂല്യവസ്തുക്കള്‍ മോഷണം പോയതായി പൊലീസ് കണ്ടെത്തല്‍. നൂറ്റാണ്ടുകള്‍ പഴക്കമുള്ള നിധിശേഖരമുള്ള ക്ഷേത്രത്തില്‍ നിന്ന് ഇടയ്ക്കിടെ വിലപിടിപ്പുള്ള വസ്തുക്കള്‍ കാണാതാകുന്നുണ്ടെന്ന അതിഗുരുതരമായ സാഹചര്യം ചൂണ്ടിക്കാട്ടി സംസ്ഥാന പൊലീസ് മേധാവി (ഡി.ജി.പി) ആഭ്യന്തര സെക്രട്ടറിക്ക് റിപ്പോര്‍ട്ട് നല്‍കി. ഇന്റലിജന്‍സ് മേധാവി സമര്‍പ്പിച്ച റിപ്പോര്‍ട്ടിന്റെ അടിസ്ഥാനത്തിലാണ് ഡി.ജി.പി സര്‍ക്കാരിന് കത്ത് നല്‍കിയത്.

ശ്രീകോവിലിനുള്ളില്‍ സൂക്ഷിക്കുന്ന അതീവ വിലപിടിപ്പുള്ള വജ്രാഭരണമായ ‘വൈര നാമം’ കുറച്ചുനാളുകളായി കാണാനില്ല. ആറുമാസം മുന്‍പ് ഇത് അറ്റകുറ്റപ്പണിക്കായി കൊണ്ടുപോയെന്നാണ് രേഖകളിലുള്ളത്.

ഭക്തര്‍ വഴിപാടായി സമര്‍പ്പിച്ച സ്വര്‍ണത്തില്‍ ഏകദേശം 78 ഗ്രാമോളം കുറവുള്ളതായി കണ്ടെത്തിയിട്ടുണ്ട്.

അറ്റകുറ്റപ്പണിക്കെന്ന പേരില്‍ കൊണ്ടുപോയ സ്വര്‍ണവിളക്ക് ആറുമാസം കഴിഞ്ഞിട്ടും ക്ഷേത്രത്തില്‍ തിരിച്ചെത്തിച്ചിട്ടില്ലെന്ന് പൊലീസ് റിപ്പോര്‍ട്ടില്‍ വ്യക്തമാക്കുന്നു.

ക്ഷേത്രത്തിലെ അമൂല്യവസ്തുക്കളുടെ സംരക്ഷണത്തിനായി കര്‍ശന സുരക്ഷാ നിര്‍ദേശങ്ങളുമായി ഡി.ജി.പി

നിലവറയ്ക്ക് പുറത്തുള്ള മുഴുവന്‍ സ്വര്‍ണവും വെള്ളിയും എത്രയും വേഗം സുരക്ഷിതമായ സ്ട്രോങ് റൂമിലേക്ക് മാറ്റണം.

വിശ്വാസികള്‍ സംഭാവനയായി നല്‍കുന്ന മുഴുവന്‍ വസ്തുക്കളും ലോക്കറുകളിലേക്ക് മാറ്റി, അവയ്ക്ക് കര്‍ശനമായ പൊലീസ് കാവല്‍ ഏര്‍പ്പെടുത്തണം.

സുരക്ഷാപരിശോധന കൂടാതെ ഒരാളെപ്പോലും ക്ഷേത്രത്തിനുള്ളിലേക്ക് പ്രവേശിപ്പിക്കരുത്.

ഈ വിഷയത്തില്‍ സര്‍ക്കാര്‍ അടിയന്തരമായി ഇടപെട്ട് കര്‍ശനമായ നടപടികള്‍ സ്വീകരിക്കണമെന്നാണ് പൊലീസ് ആവശ്യപ്പെട്ടിരിക്കുന്നത്. ക്ഷേത്ര സുരക്ഷയെ സംബന്ധിച്ച് വലിയ ആശങ്ക ഉയര്‍ത്തുന്നതാണ് നിലവിലെ കണ്ടെത്തലുകള്‍.

തിരുവനന്തപുരം/കണ്ണൂർ: രാഷ്ട്രീയ കേരളത്തെ ഞെട്ടിച്ചുകൊണ്ട് മുൻ മുഖ്യമന്ത്രിയും നിലവിലെ പ്രതിപക്ഷ നേതാവുമായ പിണറായി വിജയൻ, മുൻ മന്ത്രി മുഹമ്മദ് റിയാസ് എന്നിവരുടെ വസതികളിൽ എൻഫോഴ്‌സ്‌മെന്റ് ഡയറക്ടറേറ്റ് (ഇ.ഡി) മിന്നൽ റെയ്ഡ് നടത്തുന്നു. വിവാദമായ എക്‌സാലോജിക് – സി.എം.ആർ.എൽ. സാമ്പത്തിക ഇടപാടുമായി ബന്ധപ്പെട്ടാണ് പരിശോധന. കേരളത്തിലും കർണാടകത്തിലുമായി സിഎംആർഎല്ലുമായി ബന്ധമുള്ള 12 ഓളം കേന്ദ്രങ്ങളിലാണ് ഒരേസമയം ഇഡി സംഘം പരിശോധന നടത്തുന്നത്.

തിരുവനന്തപുരം ബേക്കറി ജംഗ്ഷനിലുള്ള വാടക വീട്ടിലാണ് ഇഡി പരിശോധന നടത്തുന്നത്. പരിശോധനാ സമയത്ത് പിണറായി വിജയനും മകൾ വീണ വിജയനും അടക്കമുള്ള കുടുംബാംഗങ്ങൾ ഇവിടെയുണ്ടെന്നാണ് സൂചന. കനത്ത സുരക്ഷയിലാണ് ഉദ്യോഗസ്ഥർ വീട്ടിൽ പ്രവേശിച്ചിരിക്കുന്നത്.

കണ്ണൂരിലെ പിണറായിയിലുള്ള വീടും ഇഡി സംഘം വളഞ്ഞിട്ടുണ്ട്. നിലവിൽ ഈ വീട് പൂട്ടിയിട്ട നിലയിലായതിനാൽ ഉദ്യോഗസ്ഥർ പുറത്തുതന്നെ തുടരുകയാണ്.

മുൻ മന്ത്രി മുഹമ്മദ് റിയാസിന്റെ കോഴിക്കോട് കോട്ടൂളിയിലെ വസതിയിലും ഇഡി സംഘം പരിശോധന നടത്തുന്നുണ്ട്.

ബെംഗളൂരുവിലെ എക്‌സാലോജിക് ഓഫീസ്, ആലുവയിലെ സിഎംആർഎൽ ഓഫീസ്, സിഎംആർഎൽ എംഡി ശശിധരൻ കർത്തയുടെ വീട്, കമ്പനിയുടെ മറ്റ് ഉന്നത ഉദ്യോഗസ്ഥരുടെ വസതികൾ എന്നിവടങ്ങളിലും റെയ്ഡ് പുരോഗമിക്കുകയാണ്.

എക്‌സാലോജിക്-സി.എം.ആർ.എൽ ഇടപാടുമായി ബന്ധപ്പെട്ട് കള്ളപ്പണം വെളുപ്പിക്കൽ നിരോധന നിയമപ്രകാരം (പി.എം.എൽ.എ.) ഇ.ഡി രജിസ്റ്റർ ചെയ്ത കേസിന്റെ തുടർനടപടികളും സമൻസുകളും സ്റ്റേ ചെയ്യണമെന്ന് ആവശ്യപ്പെട്ട് സിഎംആർഎൽ നൽകിയ ഹർജി കഴിഞ്ഞ ദിവസം ഹൈക്കോടതി തള്ളിയിരുന്നു. അന്വേഷണവുമായി ഇഡിക്ക് മുന്നോട്ട് പോകാമെന്ന് കോടതി വ്യക്തമാക്കിയതിന് തൊട്ടുപിന്നാലെയാണ് അതീവ രഹസ്യമായി ഇഡി ഈ മിന്നൽ പരിശോധനയിലേക്ക് കടന്നത്. ഡിജിറ്റൽ തെളിവുകളും സാമ്പത്തിക ഇടപാടുകളുടെ രേഖകളും പിടിച്ചെടുക്കാനാണ് ഇഡി സംഘം എത്തിയിരിക്കുന്നത് എന്നാണ് വിവരം.

പിണറായി വിജയന്റെ മകൾ ടി. വീണയുടെ ഉടമസ്ഥതയിലുള്ള ഐടി കമ്പനിയായ ‘എക്‌സലോജിക് സൊല്യൂഷൻസിന്’ കരിമണൽ കമ്പനിയായ സിഎംആർഎൽ യാതൊരുവിധ സേവനങ്ങളും ലഭ്യമാക്കാതെ മാസപ്പടിയായി വൻതുക നിയമവിരുദ്ധമായി നൽകിയെന്നാണ് പ്രധാന കണ്ടെത്തൽ. കൈക്കൂലി, നികുതി വെട്ടിപ്പ്, കള്ളപ്പണം വെളുപ്പിക്കൽ എന്നിവ സംബന്ധിച്ച ഗുരുതരമായ ആരോപണങ്ങളാണ് ഇഡി അന്വേഷിക്കുന്നത്.

ചെന്നൈ: തമിഴ് സിനിമാ വ്യവസായത്തിന് വലിയ ആശ്വാസമേകി സംസ്ഥാനത്തെ മുഴുവൻ തീയേറ്ററുകളിലും പ്രതിദിനം അഞ്ച് ഷോകൾ പ്രദർശിപ്പിക്കാൻ അനുമതി നൽകി തമിഴ്‌നാട് സർക്കാർ. മുഖ്യമന്ത്രി സി. ജോസഫ് വിജയ്‌യുടെ നിർദ്ദേശപ്രകാരം പുതിയ തമിഴ് ചിത്രങ്ങൾ റിലീസ് ചെയ്യുന്ന ആദ്യത്തെ ഏഴ് ദിവസങ്ങളിലാണ് അഞ്ച് ഷോകൾ വീതം നടത്താൻ ഔദ്യോഗികമായി അനുമതി നൽകിയിരിക്കുന്നത്.

ഇതുകൂടാതെ പ്രാദേശിക ഉത്സവ ദിവസങ്ങൾ, പൊതു അവധികൾ, ശനിയാഴ്ചകൾ, ഞായറാഴ്ചകൾ എന്നിവയിലും തീയേറ്ററുകൾക്ക് അഞ്ച് ഷോകൾ വീതം പ്രദർശിപ്പിക്കാവുന്നതാണെന്ന് ഉത്തരവിൽ വ്യക്തമാക്കുന്നു.

നിലവിലെ നിയമപ്രകാരം തമിഴ്‌നാട്ടിലെ തിയേറ്ററുകളിൽ സാധാരണയായി പ്രതിദിനം നാല് ഷോകളാണ് അനുവദിച്ചിരുന്നത്. ഉത്സവ ദിനങ്ങളിലോ പൊതു അവധി ദിവസങ്ങളിലോ അഞ്ചാമതായി ഒരു പ്രത്യേക ഷോ നടത്തണമെങ്കിൽ തീയേറ്റർ ഉടമകൾ തദ്ദേശ സ്വയംഭരണ സ്ഥാപനങ്ങളിൽ നിന്നും ലൈസൻസിങ് അതോറിറ്റികളിൽ നിന്നും പ്രത്യേക അനുമതി വാങ്ങണമായിരുന്നു. എന്നാൽ മുഖ്യമന്ത്രി വിജയ്‌യുടെ പുതിയ തീരുമാനത്തോടെ ‘തമിഴ്‌നാട് സിനിമാസ് (റെഗുലേഷൻ) നിയമങ്ങളിൽ’ ഭേദഗതി വരുത്തുകയും, ഇത്തരം പ്രത്യേക ഷോകൾ നടത്തുന്നതിന് ഇനിമുതൽ പ്രത്യേക അനുമതിയോ ലൈസൻസോ വാങ്ങേണ്ടതില്ലെന്ന് വ്യക്തമാക്കുകയും ചെയ്തു.

സിനിമാ വ്യവസായ രംഗത്തെ പ്രമുഖ പ്രതിനിധികൾ അടുത്തിടെ മുഖ്യമന്ത്രി വിജയ്‌യെ നേരിട്ട് കണ്ട് തീയേറ്ററുകളിൽ അഞ്ച് ഷോകൾ അനുവദിക്കണം എന്നതടക്കമുള്ള ആവശ്യങ്ങൾ മുന്നോട്ട് വെച്ചിരുന്നു. പുതിയ സിനിമകളുടെ ആദ്യവാര കളക്ഷൻ വർദ്ധിപ്പിക്കുന്നതിനും റിലീസ് ദിവസങ്ങളിലെ തിക്കും തിരക്കും നിയന്ത്രിക്കുന്നതിനും ഈ ചരിത്രപരമായ തീരുമാനം ഏറെ സഹായകരമാകുമെന്നാണ് തമിഴ് സിനിമാ ലോകത്തിന്റെ വിലയിരുത്തൽ

CM Vijay Permits All Theatres Across State to Screen 5 Shows Per Day