ഫിലാഡൽഫിയ: ഫിഫ ലോകകപ്പിൽ ബ്രസീൽ ആരാധകർക്ക് വൻ ആശ്വാസം പകർന്ന് സൂപ്പർ താരം നെയ്മറുടെ തിരിച്ചുവരവ്. ഗ്രൂപ്പ് സിയിലെ സ്കോട്ട്ലൻഡിനെതിരെയുള്ള ബ്രസീലിന്റെ നിർണായകമായ അവസാന ഗ്രൂപ്പ് മത്സരത്തിൽ നെയ്മർ കളിക്കുമെന്നു പരിശീലകൻ കാർലോ ആൻസലോട്ടി സ്ഥിരീകരിച്ചു. നോക്കൗട്ട് റൗണ്ട് ലക്ഷ്യമിട്ട് കുതിക്കുന്ന അഞ്ച് തവണത്തെ ലോക ചാമ്പ്യന്മാർക്ക് നെയ്മറുടെ സാന്നിധ്യം വലിയ കരുത്താകും.
പരിക്കിനെത്തുടർന്ന് ടൂർണമെന്റിലെ ആദ്യ മത്സരങ്ങളിൽ നെയ്മർക്ക് കളിക്കാൻ സാധിച്ചിരുന്നില്ല. നിലവിൽ താരം പൂർണ്ണ ഫിറ്റ്നസ് വീണ്ടെടുത്തതായും സ്കോട്ട്ലൻഡിനെതിരെയുള്ള മത്സരത്തിൽ സെലസാവോകൾക്കായി അണിനിരക്കാൻ പൂർണ്ണ സജ്ജനാണെന്നും ആൻസലോട്ടി വ്യക്തമാക്കി.
മൊറോക്കോയ്ക്കെതിരായ ആദ്യ മത്സരത്തിൽ നെയ്മറുടെ അഭാവത്തിൽ ബ്രസീൽ 1-1 ന് സമനിലയിൽ കുരുങ്ങിയിരുന്നു. അതിനുശേഷം ഹെയ്തിക്കെതിരായ മത്സരത്തിലും താരത്തിന് വിശ്രമം അനുവദിച്ചിരുന്നു. എന്നാൽ ഇപ്പോൾ ക്യാമ്പിൽ തിരിച്ചെത്തിയ നെയ്മർ ടീമിനൊപ്പം കഠിന പരിശീലനത്തിലാണെന്നാണ് റിപ്പോർട്ടുകൾ. ടൂർണമെന്റിൽ മുന്നോട്ടുള്ള പ്രയാണത്തിന് സ്കോട്ട്ലൻഡിനെതിരായ മത്സരം ബ്രസീലിന് ഏറെ നിർണായകമാണ്.
