ഹിപ്ഹോപ്പ് തമിഴ ആദി സംവിധാനം ചെയ്ത് നായകനാകുന്ന മീസയേ മുറുക്ക് 2 സെപ്റ്റംബർ 25 ന് ആഗോള റിലീസായി എത്തും. ചിത്രം കേരളത്തിൽ വിതരണത്തിന് എത്തിക്കുന്നത് ബ്രൈറ്റ് സ്ക്രീൻ. ഡ്രീം ബിഗ് ഫിലിംസ് ആണ് കേരളത്തിൽ ബ്രൈറ്റ് സ്ക്രീനിൻ്റെ വിതരണ പങ്കാളി. അവ്നി മൂവീസിന്റെ ബാനറിൽ സുന്ദർ സി.യും ഖുശ്ബുവും ചേർന്നാണ് ചിത്രം നിർമ്മിക്കുന്നത്. ബെൻസ് മീഡിയ പ്രൈവറ്റ് ലിമിറ്റഡ് ബാനറിൽ എ സി എസ് അരുൺകുമാറും ചിത്രത്തിൻ്റെ നിർമ്മാണ പങ്കാളിയാണ്. എക്സിക്യൂട്ടീവ് പ്രൊഡ്യൂസർ : ആനന്ദിത സുന്ദർ.

2017ൽ പുറത്തിറങ്ങി വലിയ വിജയമായി മാറിയ ‘മീസയേ മുറുക്ക്’ എന്ന ചിത്രത്തിന്റെ രണ്ടാം ഭാഗമാണ് ‘മീസയേ മുറുക്ക് 2’. ഹിപ്ഹോപ്പ് തമിഴാ ആദി രചനയും സംവിധാനവും നിർവഹിച്ച് പ്രധാന കഥാപാത്രത്തെ അവതരിപ്പിക്കുന്ന ചിത്രം ഒരു മ്യൂസിക്കൽ കോമഡി-ഡ്രാമ ആയാണ് ഒരുക്കിയിരിക്കുന്നത് എന്നാണ് ചിത്രത്തിൻ്റെ ട്രെയ്‌ലർ സൂചിപ്പിക്കുന്നത്.

ആദ്യ ഭാഗത്തിൽ നിന്ന് വ്യത്യസ്തമായ കഥയും കഥാപാത്രങ്ങളുമായാണ് ‘മീസയേ മുറുക്ക് 2’ എത്തുന്നത്. ആദ്യ ചിത്രത്തിന്റെ കഥയുമായി രണ്ടാം ഭാഗത്തിന് നേരിട്ട് യാതൊരു ബന്ധവുമില്ല എന്നാണ് റിപ്പോർട്ട്. മൂന്ന് വ്യത്യസ്ത കാലഘട്ടങ്ങളിലൂടെയാണ് പുതിയ ചിത്രത്തിന്റെ കഥ സഞ്ചരിക്കുന്നത്.

ഹിപ്ഹോപ്പ് തമിഴാ ആദിക്കൊപ്പം കേതിക ശർമ്മ, ചൈത്ര ജെ. ആചാർ, യോഗി ബാബു, ഹർഷത് ഖാൻ, കരുണാസ്, നാസർ , ആടുകളം നരേൻ, രമ്യ രംഗനാഥൻ, ഷാ രാ തുടങ്ങിയവർ ചിത്രത്തിൽ പ്രധാന വേഷങ്ങളിൽ എത്തുന്നു.

ചിത്രത്തിന്റെ ഔദ്യോഗിക ട്രെയിലറും സമൂഹ മാധ്യമങ്ങളിൽ മികച്ച പ്രതികരണം നേടിയിരുന്നു. തമിഴ്നാട്ടിൽ വലിയ പ്രതീക്ഷയോടെ എത്തുന്ന ചിത്രത്തിന് കേരളത്തിലും മികച്ച റിലീസ് ആണ് ലഭിക്കുക. ചിത്രത്തിലെ ഗാനങ്ങളും പശ്ചാത്തല സംഗീതവും ഒരുക്കിയിരിക്കുന്നത് ഹിപ്ഹോപ്പ് തമിഴാ ആദി തന്നെയാണ്. ചിത്രത്തിലെ ‘പോടാ പഠിച്ചിരിക്കേൻ’, ‘ഗോയിന്ദമ്മ’ തുടങ്ങിയ ഗാനങ്ങൾ ഇതിനോടകം പുറത്തിറങ്ങി ശ്രദ്ധ നേടിയിട്ടുണ്ട്.

ബാലാജി സുബ്രഹ്മണ്യം ഛായാഗ്രഹണം നിർവഹിക്കുന്ന ചിത്രത്തിന്റെ എഡിറ്റിങ് ഫെന്നി ഒലിവറും തിരുമലൈ രാജനും ചേർന്നാണ് നിർവഹിക്കുന്നത്. ക്രിയേറ്റീവ് പ്രൊഡ്യൂസർ : അശ്വിൻ രാം, കോസ്റ്റ്യൂം ഡിസൈനർ: പൂർണ്ണിമ രാമസ്വാമി, ആർട്ട് : വി എസ് ദിനേഷ് കുമാർ, പ്രൊഡക്ഷൻ ഡിസൈനർ : വിഘ്നേഷ് രതിരൻ, പ്രൊഡക്ഷൻ എക്സിക്യൂട്ടീവ്; പി ബാലഗോപി, നൃത്തം: ബാബ ഭാസ്കർ, സന്തോഷ്, രഘു താപ്പ, ആക്ഷൻ : ആക്ഷൻ സന്തോഷ്, സൗണ്ട് മിക്സിംഗ്: കണ്ണൻ ഗണപത്, സിഇഒ : ആർ മദൻ കുമാർ, പിആർഒ : ശബരി

ടൊറന്റോ അന്താരാഷ്ട്ര ചലച്ചിത്രമേളയിലെ മിഡ്നൈറ്റ് മാഡ്നസ് വിഭാഗത്തിൽ പ്രദർശിപ്പിച്ച ആദ്യ മലയാള ചിത്രമായി സംജാദ് സംവിധാനം ചെയ്ത ‘ഹാഫ്’; പ്രദർശനത്തിനും ചോദ്യോത്തര സെഷനും ആവേശകരമായ പ്രതികരണം

ടൊറന്റോ അന്താരാഷ്ട്ര ചലച്ചിത്രമേളയിൽ (ടിഫ്) ചരിത്രനേട്ടവുമായി സംജാദ് സംവിധാനം ചെയ്ത മലയാള ചിത്രം ‘ഹാഫ്’. മിഡ്നൈറ്റ് മാഡ്നസ് വിഭാഗത്തിൽ പ്രദർശിപ്പിച്ച ആദ്യ മലയാള ചിത്രമായ ‘ഹാഫി’ന്റെ പ്രദർശനത്തിന് തിയറ്ററിൽ ലഭിച്ച ആവേശകരമായ പ്രതികരണം ചിത്രത്തിന്റെ അണിയറപ്രവർത്തകരെയും അമ്പരപ്പിച്ചു. സെപ്റ്റംബർ 18ന് നടന്ന വേൾഡ് പ്രീമിയറിന് പിന്നാലെ നടന്ന ചോദ്യോത്തര സെഷനിലും പ്രേക്ഷകരുടെ ആവേശം പ്രകടമായി.

ഫ്രാഗ്രന്റ് നേച്ചർ ഫിലിം ക്രിയേഷൻസിന്റെ ബാനറിൽ ആൻ സജീവും സജീവ് പി.കെയും ചേർന്ന് നിർമ്മിച്ച ചിത്രത്തിന്റെ പ്രദർശനത്തിന് പിന്നാലെ പ്രേക്ഷകരിൽ നിന്ന് മികച്ച പ്രതികരണങ്ങളാണ് ലഭിച്ചത്. സിനിമയെക്കുറിച്ചുള്ള അഭിപ്രായങ്ങളും ചോദ്യങ്ങളും പങ്കുവെച്ച പ്രേക്ഷകർ ചോദ്യോത്തര സെഷനിൽ അണിയറപ്രവർത്തകരുമായി സംവദിക്കുകയും ചിത്രത്തോടുള്ള തങ്ങളുടെ സ്നേഹവും പിന്തുണയും നേരിട്ട് അറിയിക്കുകയും ചെയ്തു.

സംവിധായകൻ സംജാദിനൊപ്പം നിർമ്മാതാക്കളായ ആൻ സജീവും സജീവ് പി.കെയും, പ്രധാന കഥാപാത്രങ്ങളെ അവതരിപ്പിച്ച രഞ്ജിത്ത് സജീവ്, ഐശ്വര്യ രാജ്, സംഗീത സംവിധായകൻ മിഥുൻ മുകുന്ദൻ, സൗണ്ട് ഡിസൈനർ വിഷ്ണു ഗോവിന്ദ് എന്നിവർ ചോദ്യോത്തര സെഷനിൽ പങ്കെടുത്തു. ചിത്രത്തിന്റെ പ്രമേയം, മേക്കിംഗ്, ദൃശ്യാവിഷ്കാരം, സംഗീതം, ശബ്ദരൂപകൽപ്പന, അഭിനേതാക്കളുടെ പ്രകടനം തുടങ്ങിയ വിവിധ ഘടകങ്ങളെക്കുറിച്ച് അവർ പ്രേക്ഷകരുമായി സംവദിച്ചു.

പ്രദർശനത്തിനിടെ തിയറ്ററിൽ നിറഞ്ഞുനിന്ന ആവേശവും കൈയടികളും ചിത്രത്തിന് ലഭിച്ച പ്രേക്ഷകസ്വീകാര്യതയുടെ നേർക്കാഴ്ചയായി. വെരി ട്രി യുലിസ്മാന്റെ ആക്ഷൻ കൊറിയോഗ്രഫിയും ചിത്രത്തിന്റെ സംഗീതവും പ്രേക്ഷകർക്കിടയിൽ ശ്രദ്ധ നേടി. ചിത്രത്തിന്റെ റോ ആയ അവതരണശൈലിയും പ്രത്യേക ശ്രദ്ധ നേടി.

പാപ്പിനുവിന്റെ ഛായാഗ്രഹണവും മഹേഷ് ഭുവനേന്ദിന്റെ എഡിറ്റിംഗും വിഷ്ണു ഗോവിന്ദിന്റെ ശബ്ദസംവിധാനവും ചിത്രത്തിന്റെ അന്തരീക്ഷത്തെ കൂടുതൽ തീവ്രമാക്കുന്നതായി പ്രേക്ഷകർ അഭിപ്രായപ്പെട്ടു. പ്രധാന കഥാപാത്രങ്ങളെ അവതരിപ്പിച്ച രഞ്ജിത്ത് സജീവിന്റെയും ഐശ്വര്യ രാജിന്റെയും പ്രകടനവും ചോദ്യോത്തര സെഷനിൽ പ്രത്യേകം പരാമർശിക്കപ്പെട്ടു.

പ്രവീൺ വിശ്വനാഥും സംജാദും ചേർന്നാണ് ‘ഹാഫി’ന്റെ തിരക്കഥ ഒരുക്കിയിരിക്കുന്നത്. രണ്ട് ഹാഫ്-ബ്ലഡ് വാംപയർമാരെ കേന്ദ്രീകരിച്ചുള്ള വ്യത്യസ്തമായ വാംപയർ ആക്ഷൻ ത്രില്ലറാണ് ചിത്രം. ശക്തമായ ആക്ഷനും ഡാർക്ക് ആറ്റ്മോസ്ഫിയറും ചേർന്ന വേറിട്ടൊരു സിനിമാനുഭവമാണ് ‘ഹാഫ്’ ഒരുക്കുന്നത്.

‘ഹാഫി’ന്റെ ഉത്തരേന്ത്യൻ പ്രദർശനവും വിതരണവും എക്സൽ എന്റർടെയ്ൻമെന്റും എ.എ. ഫിലിംസും ചേർന്നാണ് നിർവഹിക്കുന്നത്. ചിത്രത്തിന്റെ അന്താരാഷ്ട്ര സെയിൽസ് അവകാശം ബെസ്റ്റ് ഫ്രണ്ട് ഫോർഎവർ (ബി.എഫ്.എഫ്.) സ്വന്തമാക്കിയിട്ടുണ്ട്.

മിഡ്നൈറ്റ് മാഡ്നസ് വിഭാഗത്തിലെ ചരിത്രപരമായ അരങ്ങേറ്റത്തിന് പിന്നാലെ ടൊറന്റോ അന്താരാഷ്ട്ര ചലച്ചിത്രമേളയിൽ ‘ഹാഫി’ന് ലഭിച്ച ഈ ആവേശകരമായ സ്വീകരണം ചിത്രത്തിന്റെ അന്താരാഷ്ട്ര യാത്രയിലെ ശ്രദ്ധേയമായ അധ്യായമായി മാറുകയാണ്.

എവർഗ്രീൻ സ്റ്റാർ റഹ്മാൻ നായകനാവുന്ന തെലുങ്ക് സയൻസ് ഫിക്ഷൻ ത്രില്ലർ ചിത്രം ‘ ഹഠാ ‘ ( HATAH ) യുടെ ടീസർ കഴിഞ്ഞ ദിവസം അണിയറക്കാർ പുറത്ത് വിട്ടു. റിലീസ് ചെയ്ത് ഒറ്റ ദിവസം കൊണ്ട് തന്നെ ഒന്നര മില്യണിൽഏറെ കാഴ്ചക്കാരെ ആകർഷിച്ച് യൂട്യൂബിൽ ടീസർ തരംഗമായിരിക്കയാണ് . ‘ അശ്വത്ഥാമ ‘, ‘ 47 Days: The Mystery Unfolds ‘ എന്നീ സാങ്കേതിക മികവാർന്ന സിനിമകളുടെ ഛായഗ്രാഹകനായ അനുഷ് ഗോരക്കാണ് ചിത്രത്തിൻ്റെ രചനയും, ഛായാഗ്രഹണവും സംവിധാനവും നിർവഹിച്ചിരിക്കുന്നത്. ജെസിൻ ജോർജാണ് സംഗീത സംവിധായകൻ. സാങ്കേതികപരമായി ഒട്ടേറെ പുതുമകളും സവിശേഷതകളും ഉള്ള സിനിമയാണ് ‘ ഹഠാ ‘. വാഗമൺ, ഹൈദരാബാദ് എന്നിവിടങ്ങളിലാണ് ചിത്രീകരിച്ചിട്ടുള്ളത്.

പൗർണമി എൻ്റർപ്രൈസസും എൻ്റർപ്രൈസസും, കെ ഏ പ്രൊഡക്ഷൻസും സംയുക്തമായി നിർമ്മിക്കുന്ന ‘ ഹഠാ ‘ യിലെ മറ്റു അഭിനേതാക്കൾ കുഷൂലു മദ്ദാല , തനൂജ പട്ടുസാമി, നമൃത എം വി എന്നിവരാണ്. ദീപാവലിക്ക് റിലീസിനൊരുങ്ങുന്ന ചിത്രത്തിൻ്റെ അണിയറ സാങ്കേതിക പ്രവർത്തനങ്ങൾ ധൃത ഗതിയിൽ നടന്നു വരുന്നു. ചിത്രത്തെ കുറിച്ചുള്ള കൂടുതൽ വിവരങ്ങൾ വരും ദിവസങ്ങളിൽ വെളിപ്പെടുത്തുമെന്ന് നിർമ്മാതാക്കൾ പറയുന്നു.

സി കെ. അജയ് കുമാർ, പി ആർ ഓ

നടി അഹാന കൃഷ്ണയുടെയും ഛായാഗ്രാഹകൻ നിമിഷ് രവിയുടെയും വിവാഹത്തിന് പിന്നാലെ സോഷ്യൽ മീഡിയയിൽ ഉയരുന്ന വിമർശനങ്ങൾക്കും സൈബർ അധിക്ഷേപങ്ങൾക്കും കൃത്യമായ മറുപടിയുമായി അമ്മ സിന്ധു കൃഷ്ണ. തിരുവനന്തപുരത്തെ റിസോർട്ടിൽ അടുത്ത ബന്ധുക്കളെയും സുഹൃത്തുക്കളെയും മാത്രം പങ്കെടുപ്പിച്ച് വളരെ സ്വകാര്യമായിട്ടായിരുന്നു വിവാഹം നടത്തിയത്.

വിവാഹ ചിത്രങ്ങൾ പുറത്തുവന്നതിന് പിന്നാലെ അഹാനയുടെ ലുക്കിനെയും ഗസ്റ്റ് ലിസ്റ്റിനെയും ചൊല്ലി വൻ വിമർശനങ്ങളാണ് സോഷ്യൽ മീഡിയയിൽ ഉയർന്നത്. സിന്ധു കൃഷ്ണയുടെ അമ്മ വസന്തയെയും സഹോദരീപുത്രി തൻവി സുധീറിനെയും ചടങ്ങിലേക്ക് ക്ഷണിച്ചില്ലെന്നതായിരുന്നു പ്രധാന ആരോപണം.

വിമർശനങ്ങൾ അതിരുവിട്ടതോടെ ഇൻസ്റ്റാഗ്രാമിലൂടെ സിന്ധു കൃഷ്ണ തന്നെ മറുപടിയുമായി രംഗത്തെത്തി. “അഹാനയുടെ മകളുടെ വിവാഹത്തിന് സിന്ധുവിന് ക്ഷണം ഉണ്ടാകട്ടെ” എന്ന് പരിഹസിച്ചയാൾക്ക്, “ആ വലിയ മനസ്സിന് നന്ദിയുണ്ട് കേട്ടോ” എന്നാണ് സിന്ധു മറുപടി നൽകിയത്.

അഹാനയുടെ ബ്രൈഡൽ ലുക്കിനെ പരിഹസിച്ചുകൊണ്ട് “അഹാന എന്താ ക്ലാസിക്കൽ ഡാൻസ് അരങ്ങേറ്റത്തിന് പോവുകയാണോ?” എന്ന് ചോദിച്ച വ്യക്തിയോട് “ഞാനും പോകുന്നുണ്ട്… നിങ്ങൾ വരുന്നുണ്ടോ?” എന്നും സിന്ധു ചോദിച്ചു.

സോഷ്യൽ മീഡിയയിൽ കുറ്റം പറയുന്നവരെ വിമർശിച്ചുകൊണ്ട് ആരാധകരിലൊരാൾ പങ്കുവെച്ച കുറിപ്പിന് “സത്യം” എന്ന് കുറിച്ചും സിന്ധു പിന്തുണ അറിയിച്ചു. മുൻപ് അമ്മൂമ്മയുമായുണ്ടായ വ്യക്തിപരമായ തർക്കങ്ങളെക്കുറിച്ച് അഹാന തന്നെ തുറന്നുപറഞ്ഞിട്ടുണ്ടെങ്കിലും വിവാഹശേഷവും സൈബർ ഇടങ്ങളിൽ ഇത്തരം ചർച്ചകൾ സജീവമായി തുടരുകയാണ്.

Sindhu Krishna’s Fitting Reply to Online Trolls Over Ahaana Krishna’s Wedding Controversies

ടൊറന്റോ അന്താരാഷ്ട്ര ചലച്ചിത്രമേളയിലെ മിഡ്നൈറ്റ് മാഡ്നസ് വിഭാഗത്തിൽ വേൾഡ് പ്രീമിയർ; നാല് പ്രധാന അന്താരാഷ്ട്ര വേദികളിൽ നാല് പ്രീമിയറുകളുമായി ചിത്രം

മലയാള സിനിമകൾക്ക് ആഗോള വേദിയിൽ പുതിയ ഇടം കണ്ടെത്തി സംജാദ് സംവിധാനം ചെയ്ത ‘ഹാഫ്’. റിലീസിന് മുന്നോടിയായി ലോകത്തെ പ്രമുഖ ചലച്ചിത്രമേളകളായ ടൊറന്റോ അന്താരാഷ്ട്ര ചലച്ചിത്രമേള, ഫന്റാസ്റ്റിക് ഫെസ്റ്റ്, ബിയോണ്ട് ഫെസ്റ്റ്, സിറ്റ്ജസ് – ഇന്റർനാഷണൽ ഫന്റാസ്റ്റിക് ചലച്ചിത്രമേള ഓഫ് കാറ്റലോണിയ എന്നിവയിലേക്ക് ചിത്രം തിരഞ്ഞെടുക്കപ്പെട്ടു. വേൾഡ് പ്രീമിയർ, ഇന്റർനാഷണൽ പ്രീമിയർ, വെസ്റ്റ് കോസ്റ്റ് പ്രീമിയർ, യൂറോപ്യൻ പ്രീമിയർ എന്നിങ്ങനെ നാല് പ്രധാന അന്താരാഷ്ട്ര വേദികളിലൂടെയാണ് ‘ഹാഫ്’ പ്രേക്ഷകരിലേക്ക് എത്തുന്നത്.

ഫ്രാഗ്രന്റ് നേച്ചർ ഫിലിം ക്രിയേഷൻസിന്റെ ബാനറിൽ ആൻ സജീവ് & P.K സജീവ് നിർമ്മിക്കുന്ന ‘ഹാഫി’ന്റെ വേൾഡ് പ്രീമിയർ സെപ്റ്റംബർ 18ന് ടൊറന്റോ അന്താരാഷ്ട്ര ചലച്ചിത്രമേളയിലെ പ്രശസ്തമായ മിഡ്നൈറ്റ് മാഡ്നസ് വിഭാഗത്തിൽ നടക്കും. സെപ്റ്റംബർ 19, 20 തീയതികളിൽ ചിത്രത്തിന് അധിക പ്രദർശനങ്ങളുമുണ്ട്. മൂന്ന് പ്രദർശനങ്ങൾക്കുമുള്ള ടിക്കറ്റുകൾ വിറ്റുതീർന്നത് ചിത്രത്തിന് ലഭിച്ചുകൊണ്ടിരിക്കുന്ന അന്താരാഷ്ട്ര പ്രേക്ഷകശ്രദ്ധയുടെ ശ്രദ്ധേയമായ സൂചനയാണ്. ഹൊറർ, ആക്ഷൻ, ത്രില്ലർ, ഫാന്റസി തുടങ്ങിയ വിഭാഗങ്ങളിലുള്ള സിനിമകൾക്ക് പ്രാധാന്യം നൽകുന്ന മിഡ്നൈറ്റ് മാഡ്നസ് വിഭാഗത്തിലേക്ക് തിരഞ്ഞെടുക്കപ്പെടുന്ന ആദ്യ മലയാള ചിത്രമെന്ന പ്രത്യേകതയും ‘ഹാഫി’നുണ്ട്.

ടൊറന്റോയിലെ വേൾഡ് പ്രീമിയറിന് പിന്നാലെ അമേരിക്കയിലെ ടെക്സസിലെ ഓസ്റ്റിനിൽ നടക്കുന്ന ഫന്റാസ്റ്റിക് ഫെസ്റ്റിലാണ് ചിത്രത്തിന്റെ ഇന്റർനാഷണൽ പ്രീമിയർ. സെപ്റ്റംബർ 19നും 22നും അലാമോ ഡ്രാഫ്റ്റ്ഹൗസ് സൗത്ത് ലാമറിലാണ് പ്രദർശനങ്ങൾ.

തുടർന്ന് ലോസ് ആഞ്ചലസിലെ പ്രശസ്തമായ ബിയോണ്ട് ഫെസ്റ്റിലാണ് ‘ഹാഫി’ന്റെ വെസ്റ്റ് കോസ്റ്റ് പ്രീമിയർ. സെപ്റ്റംബർ 23ന് എയ്റോ തിയേറ്ററിലാണ് പ്രദർശനം. അമേരിക്കയിലെ പ്രധാന ചലച്ചിത്രമേളകളിലൊന്നായ ബിയോണ്ട് ഫെസ്റ്റിലേക്കുള്ള ‘ഹാഫി’ന്റെ തിരഞ്ഞെടുപ്പ് മലയാള സിനിമയിലെ ആക്ഷൻ, ഹൊറർ വിഭാഗങ്ങൾക്ക് ലഭിക്കുന്ന അന്താരാഷ്ട്ര ശ്രദ്ധയെ അടയാളപ്പെടുത്തുന്നു.

‘ഹാഫി’ന്റെ അന്താരാഷ്ട്ര ചലച്ചിത്രമേളാ യാത്രയുടെ അടുത്ത ഘട്ടം സ്പെയിനിലാണ്. സിറ്റ്ജസ് – ഇന്റർനാഷണൽ ഫന്റാസ്റ്റിക് ചലച്ചിത്രമേള ഓഫ് കാറ്റലോണിയയുടെ 2026 പതിപ്പിൽ സിറ്റ്ജസ് കളക്ഷൻ വിഭാഗത്തിലേക്കാണ് ചിത്രം തിരഞ്ഞെടുക്കപ്പെട്ടിരിക്കുന്നത്. വാംപയർ മിത്തോളജി, ആക്ഷൻ, ഹൊറർ എന്നിവ സമന്വയിപ്പിക്കുന്ന ചിത്രത്തിന്റെ പ്രമേയത്തിന് ഏറെ അനുയോജ്യമായ വേദിയാണ് ലോകത്തെ പ്രധാന ഫന്റാസ്റ്റിക് ചലച്ചിത്രമേളകളിലൊന്നായ സിറ്റ്ജസ്. ചിത്രത്തിന്റെ യൂറോപ്യൻ പ്രീമിയറും ഇവിടെ നടക്കും.

മലയാള സിനിമയ്ക്കും സിറ്റ്ജസ് ചലച്ചിത്രമേളയ്ക്കുമിടയിൽ മുൻകാല സാന്നിധ്യമുണ്ട്. ഷാജി എൻ. കരുണിന്റെ ‘പിറവി’ 1989ൽ നിർമ്മിക്കപ്പെട്ട മലയാള ചിത്രമായി സിറ്റ്ജസിന്റെ ഔദ്യോഗിക ആർക്കൈവിൽ രേഖപ്പെടുത്തിയിട്ടുണ്ട്. ഈ പശ്ചാത്തലത്തിൽ ‘ഹാഫി’ന്റെ സിറ്റ്ജസ് തിരഞ്ഞെടുപ്പ് മലയാള സിനിമയുടെ അന്താരാഷ്ട്ര ചലച്ചിത്രമേളാ യാത്രയിലെ മറ്റൊരു പ്രധാന അധ്യായമായി മാറുകയാണ്. 2026ലെ ഔദ്യോഗിക പ്രഖ്യാപനത്തിൽ രണ്ട് ഹാഫ്-ബ്ലഡ് വാംപയർ ട്വിൻസ് നടത്തുന്ന പ്രതികാരത്തിന്റെ കഥയായാണ് ‘ഹാഫി’നെ പരിചയപ്പെടുത്തുന്നത്.

വാംപയർ മിത്തോളജി, റോഡ് ആക്ഷൻ, ഹൊറർ, പ്രതികാരം എന്നിവ സമന്വയിപ്പിക്കുന്ന ചിത്രമാണ് ‘ഹാഫ്’. വ്യത്യസ്തമായ കഥാപശ്ചാത്തലത്തിൽ ഒരുങ്ങുന്ന ചിത്രം, മലയാള സിനിമയിൽ നിന്ന് അന്താരാഷ്ട്ര പ്രേക്ഷകരിലേക്കുള്ള പുതിയൊരു യാത്രയ്ക്കാണ് ഒരുങ്ങുന്നത്.

പ്രവീൺ വിശ്വനാഥും സംജാദും ചേർന്നാണ് ചിത്രത്തിന്റെ തിരക്കഥ ഒരുക്കിയിരിക്കുന്നത്. രഞ്ജിത്ത് സജീവ്, ഐശ്വര്യ രാജ്, അബ്ബാസ്, അമല പോൾ എന്നിവർ പ്രധാന കഥാപാത്രങ്ങളെ അവതരിപ്പിക്കുന്നു. പാപ്പിനുവാണ് ഛായാഗ്രഹണം. മഹേഷ് ഭുവനേന്ദാണ് എഡിറ്റിംഗ് നിർവഹിക്കുന്നത്. വിഷ്ണു ഗോവിന്ദാണ് ശബ്ദസംവിധാനം. മിഥുൻ മുകുന്ദനാണ് സംഗീതം ഒരുക്കുന്നത്. വെരി ട്രി യുലിസ്മാനാണ് ആക്ഷൻ രംഗങ്ങൾ ഒരുക്കിയത്. മോഹൻദാസാണ് പ്രൊഡക്ഷൻ ഡിസൈൻ നിർവഹിക്കുന്നത്.

ശക്തമായ കഥാശൈലിക്കും വ്യത്യസ്തമായ സിനിമാ അനുഭവങ്ങൾക്കും കലാപരമായ മികവിനും പ്രാധാന്യം നൽകുന്ന ഫ്രാഗ്രന്റ് നേച്ചർ ഫിലിം ക്രിയേഷൻസിന്റെ ബാനറിലാണ് ‘ഹാഫ്’ ഒരുങ്ങുന്നത്. ‘പ്രണയം’, ‘ഖൽബ്’, ‘ഗോളം’ തുടങ്ങിയ ചിത്രങ്ങളിലൂടെ ഉള്ളടക്കകേന്ദ്രിതവും കലാപരമായി മികവുറ്റതുമായ സിനിമകളോടുള്ള തങ്ങളുടെ സമീപനം നിർമ്മാണസ്ഥാപനം ഇതിനോടകം അടയാളപ്പെടുത്തിയിട്ടുണ്ട്.

പ്രേക്ഷകരെ ഒരേസമയം ചിന്തിപ്പിക്കുകയും അനുഭവിപ്പിക്കുകയും ചെയ്യുന്ന വ്യത്യസ്തമായ കഥകൾക്ക് മുൻതൂക്കം നൽകുന്ന ഫ്രാഗ്രന്റ് നേച്ചർ ഫിലിം ക്രിയേഷൻസ്, പുതിയ ആശയങ്ങളെയും സൃഷ്ടിപരമായ പ്രതിഭകളെയും പിന്തുണയ്ക്കുന്നതിലും ശ്രദ്ധ കേന്ദ്രീകരിക്കുന്നു. കഥയുടെ ആത്മാവിനും ദൃശ്യങ്ങളുടെ മികവിനും ഒരുപോലെ പ്രാധാന്യം നൽകുന്ന നിർമ്മാണ സമീപനമാണ് ഓരോ ചിത്രത്തിലും പിന്തുടരുന്നത്.

നിർമ്മാതാക്കളായ ആൻ സജീവ് & P.K സജീവ് ആണ് ഫ്രാഗ്രന്റ് നേച്ചർ ഫിലിം ക്രിയേഷൻസിന് നേതൃത്വം നൽകുന്നത്. സിനിമയെ കേവലം വിനോദമെന്നതിലുപരി പ്രേക്ഷകനെ ചിന്തിപ്പിക്കുകയും ആഴത്തിൽ സ്വാധീനിക്കുകയും ചെയ്യുന്ന കലയായി കാണുന്ന അവരുടെ നിർമ്മാണ സമീപനം ‘ഹാഫി’ലും പ്രതിഫലിക്കുന്നു.

വേൾഡ് പ്രീമിയറിന് മുമ്പുതന്നെ നാല് പ്രധാന അന്താരാഷ്ട്ര ചലച്ചിത്രമേളകളിലേക്ക് തിരഞ്ഞെടുക്കപ്പെട്ട ‘ഹാഫ്’, മലയാള സിനിമയെ ആഗോള പ്രേക്ഷകരിലേക്ക് എത്തിക്കുന്ന ശ്രദ്ധേയമായ ചിത്രമായി മാറുകയാണ്. ടൊറന്റോയിൽ നിന്ന് ആരംഭിച്ച് അമേരിക്കയിലെ ഓസ്റ്റിനിലേക്കും ലോസ് ആഞ്ചലസിലേക്കും തുടർന്ന് സ്പെയിനിലെ സിറ്റ്ജസിലേക്കും നീളുന്ന ചിത്രത്തിന്റെ അന്താരാഷ്ട്ര ചലച്ചിത്രമേളാ യാത്ര, മലയാള സിനിമയുടെ ആഗോള സാധ്യതകൾക്ക് പുതിയൊരു വേദി കൂടിയാണ് തുറക്കുന്നത്.

ദുൽഖർ സൽമാൻ – പവൻ സാദിനേനി ചിത്രം ‘ആകാശംലോ ഒക താര’ ആഗോള റിലീസ് നവംബർ 20ന്

ദുൽഖർ സൽമാനെ നായകനാക്കി പവൻ സാദിനേനി സംവിധാനം ചെയ്യുന്ന പുതിയ തെലുങ്ക് ചിത്രം ‘ആകാശംലോ ഒക താര’ നവംബർ 20, 2026ന് ആഗോള തലത്തിൽ തിയേറ്ററുകളിലെത്തും. തെലുങ്ക്, തമിഴ്, ഹിന്ദി, മലയാളം ഭാഷകളിലായി പാൻ ഇന്ത്യൻ റിലീസായാണ് ചിത്രം പ്രദർശനത്തിനെത്തുന്നത്. റിലീസ് തീയതി അണിയറപ്രവർത്തകർ ഔദ്യോഗികമായി പ്രഖ്യാപിച്ചു. സന്ദീപ് ഗണ്ണവും രമ്യ ഗണ്ണവും ചേർന്നാണ് ചിത്രം നിർമ്മിക്കുന്നത്. തെലുങ്കിലെ പ്രശസ്ത നിർമ്മാണ കമ്പനികളായ ഗീത ആർട്സ്, സ്വപ്ന സിനിമ, ലൈറ്റ്ബോക്സ് മീഡിയ എന്നിവ സംയുക്തമായി ചിത്രം അവതരിപ്പിക്കുന്നു.

നൂതനമായ കഥപറച്ചിൽ രീതിക്കും തന്റേതായ സിനിമാറ്റിക് സമീപനത്തിനും പേരുകേട്ട സംവിധായകൻ പവൻ സാദിനേനി ഒരുക്കുന്ന ചിത്രത്തിൽ ദുൽഖർ സൽമാനൊപ്പം പുതുമുഖം സാത്വിക വീരവല്ലിയാണ് നായികയായി എത്തുന്നത്. ശ്രുതി ഹാസൻ ചിത്രത്തിലെ മറ്റൊരു നിർണ്ണായക കഥാപാത്രത്തെ അവതരിപ്പിക്കുന്നു. ദുൽഖർ സൽമാൻ അവതരിപ്പിക്കുന്ന കൃഷ്ണ എന്ന കേന്ദ്ര കഥാപാത്രത്തിന്റെ ലുക്ക് നേരത്തെ തന്നെ ആരാധകരുടെ ശ്രദ്ധ നേടിയിരുന്നു.

ചിത്രം കണ്ടതിന് ശേഷം ദേശീയ അവാർഡ് ജേതാവും സംഗീത സംവിധായകനുമായ ജി വി പ്രകാശ് കുമാർ സമൂഹ മാധ്യമങ്ങളിലൂടെ ‘ആകാശംലോ ഒക താര’യെ പ്രശംസിച്ചിരുന്നു. ചിത്രം ഗംഭീരമായി വന്നിട്ടുണ്ടെന്നായിരുന്നു അദ്ദേഹത്തിന്റെ പ്രതികരണം. ചിത്രത്തിന്റെ സംഗീത സംവിധായകൻ കൂടിയായ ജി വി പ്രകാശ് കുമാറിന്റെ ഈ പ്രതികരണം റിലീസിന് മുന്നോടിയായി ചിത്രത്തെക്കുറിച്ചുള്ള പ്രേക്ഷക പ്രതീക്ഷകൾക്ക് കൂടുതൽ ആവേശം പകർന്നിട്ടുണ്ട്.

നേരത്തെ ദുൽഖർ സൽമാന്റെ ജന്മദിനത്തോടനുബന്ധിച്ച് ജൂലൈ 28ന് പുറത്തിറങ്ങിയ ചിത്രത്തിലെ ‘കുട്ടി കുട്ടി പൂവേ’ എന്ന ഗാനം വലിയ ശ്രദ്ധ നേടിയിരുന്നു. ദുൽഖർ സൽമാനും സാത്വിക വീരവല്ലിയും അവതരിപ്പിക്കുന്ന കേന്ദ്ര കഥാപാത്രങ്ങളുടെ പ്രണയവും അവരുടെ ജീവിതത്തിലൂടെയുള്ള സിനിമയുടെ സഞ്ചാരവും സംബന്ധിച്ച സൂചനകൾ ഗാനത്തിലൂടെ ലഭിച്ചിരുന്നു. ഗാനത്തിന്റെ ദൃശ്യങ്ങൾക്കൊപ്പം അതിന്റെ മേക്കിങ് ദൃശ്യങ്ങളും ഉൾപ്പെടുത്തിയിരുന്നു.

‘മഹാനടി’, ‘സീതാ രാമം’, ‘ലക്കി ഭാസ്കർ’ തുടങ്ങിയ ചിത്രങ്ങളിലെ ശ്രദ്ധേയമായ പ്രകടനങ്ങളിലൂടെ തെലുങ്ക് സിനിമയിൽ വലിയ സ്വീകാര്യത നേടിയ ദുൽഖർ സൽമാന്റെ അടുത്ത തെലുങ്ക് ചിത്രമെന്ന പ്രത്യേകതയും ‘ആകാശംലോ ഒക താര’യ്ക്കുണ്ട്. പ്രഭാസ് നായകനായ ‘കൽക്കി 2898 എഡി’യിലും ശ്രദ്ധേയമായ അതിഥി വേഷത്തിൽ ദുൽഖർ എത്തിയിരുന്നു. അതിന് ശേഷം ദുൽഖർ അഭിനയിക്കുന്ന തെലുങ്ക് ചിത്രമാണ് ‘ആകാശംലോ ഒക താര’.

രചന, തിരക്കഥ – ഗുന്നം ഗംഗരാജു, കഥ – പവൻ സദിനേനി & വസന്ത് ജുറു, അധിക തിരക്കഥ – വസന്ത് ജുറു, ഛായാഗ്രഹണം – സുജിത് സാരംഗ്, എഡിറ്റർ – പ്രവീൺ കെ.എൽ, പ്രൊഡക്ഷൻ ഡിസൈനർ – ശ്വേത സാബു സിറിൽ, എക്‌സിക്യൂട്ടീവ് പ്രൊഡ്യൂസർ – ചന്തു നിമ്മഗദ്ദ, സഹസംവിധായകൻ – സുരേഷ് പരുച്ചൂരി, ലൈൻ പ്രൊഡ്യൂസർ – യെലെപ്പെട്ടി ശ്രീനിവാസ്, പ്രൊഡക്ഷൻ ടീം – ബത്തലൂരി ലോകേഷ് കുമാർ, ജതിൻ സി.എച്ച്, മുവ്വ ഗോപി, തേജ രാംകി, ഡയറക്ഷൻ വിഭാഗം – ഡിപിവി സന്തോഷ്, ഗയം ഈശ്വർ, സൗരബ് റെഡ്ഡി, സിഎച്ച്. നരസിംഹ റെഡ്ഡി, മഹാംകാളി വിനയ് കുമാർ, ചന്ദ്ര ശേഖർ ഹുഗ്ഗിഹെല്ല, വിശാഖ് പട്ടേൽ കോതപ്പള്ളി, കൊങ്ക രോഹൻ, പ്രീതം ശകുനാല, നിമ്മഗദ്ദ ആസീഷ് പ്രീതം, രാം മോഹൻ കോമണ്ഡൂരി, കോസ്റ്റ്യൂം ഡിസൈനർ – പല്ലവി സിംഗ്, കലാസംവിധാനം – വംശി കൃഷ്ണ, സൗണ്ട് ഡിസൈനർ – സിങ്ക് സിനിമ, പബ്ലിസിറ്റി ഡിസൈനർ – അനിൽ ഭാനു, വിഎഫ്എക്സ് – എഗ്വൈറ്റ് വിഎഫ്എക്സ്, Vfx സൂപ്പർവൈസർ – തൗഫീഖ് ഹുസൈൻ, കളറിസ്റ്റ് – ഷൺമുഖ പാണ്ഡ്യൻ എം, സ്റ്റിൽസ്- സായ് ശശാങ്ക്, മാർക്കറ്റിംഗ് – വാൾസ് ആൻഡ് ട്രെൻഡ്സ്, പിആർഒ – ശബരി

മലയാള സിനിമയിൽ എക്കാലത്തെയും ശ്രദ്ധേയവും ആസ്വാദ്യകരവുമായ നിരവധി ചിത്രങ്ങൾ സമ്മാനിച്ച നടൻ–സംവിധായക കൂട്ടുകെട്ടുകൾ ഉണ്ടായിട്ടുണ്ട്.ജോജു ജോർജിനെ നായകനാക്കി ഷാജി കൈലാസ് സംവിധാനം ചെയ്ത ആക്ഷൻ ത്രില്ലർ ചിത്രം ‘വരവ്’ ഓ ടി ടി യിലും മികച്ച ഹിറ്റ്‌ ആയിരിക്കുകയാണ്. പ്രേക്ഷകർക്ക് തീർച്ചയായും ഇഷ്ടപ്പെടുന്ന 5 നടൻ–സംവിധായക കൂട്ടുകെട്ടുകൾ പരിചയപ്പെടാം:

1.ജോജു ജോർജ് – ഷാജി കൈലാസ് (വരവ്)
ഷാജി കൈലാസിന്റെ ആക്ഷൻ ഫിലിമോഗ്രഫിയിലേക്ക് ഏറ്റവും പുതുതായി എത്തിയ ചിത്രമാണ് ‘വരവ്’.ജോജു ജോർജ് കാട്ടുങ്കൽ പോൾസൺ എന്ന കഥാപാത്രത്തെ അവതരിപ്പിക്കുന്ന ചിത്രം, വർഷങ്ങൾക്ക് ശേഷം നാട്ടിലേക്ക് തിരിച്ചെത്തുന്ന ഒരാൾ നേരിടേണ്ടിവരുന്ന പഴയ കുറ്റകൃത്യങ്ങളും ശത്രുതകളും വർഷങ്ങളായി നിലനിൽക്കുന്ന സംഘർഷങ്ങളും പറയുന്ന കഥയാണ്.

2.മോഹൻലാൽ – ജീത്തു ജോസഫ്
മലയാളത്തിലെ ത്രില്ലർ സിനിമകളുടെ മുൻനിരയിൽ ഏറെക്കാലമായി തിളങ്ങുന്ന നടൻ–സംവിധായക കൂട്ടുകെട്ട് എന്ന് പറയുമ്പോൾ മോഹൻലാൽ–ജീത്തു ജോസഫ് കൂട്ടുകെട്ട് മുന്നിലെത്തും. ‘ദൃശ്യം’ ഫ്രാഞ്ചൈസി തന്നെ അവരുടെ കൂട്ടുകെട്ട്
പ്രേക്ഷകർക്ക് എന്നും പ്രിയപ്പെട്ടതാണ്.

3.ഫഹദ് ഫാസിൽ – ദിലീഷ് പോത്തൻ
വർഷങ്ങളായി ഏറ്റവും വ്യത്യസ്തവും ശ്രദ്ധേയവുമായ ചിത്രങ്ങൾ സമ്മാനിച്ചുകൊണ്ടിരിക്കുന്ന കൂട്ടുകെട്ടാണ് ഫഹദ് ഫാസിലും ദിലീഷ് പോത്തനും. ഇവരുടെ സിനിമകളിലൂടെ മലയാള സിനിമയുടെ പരിണാമത്തിനും പ്രേക്ഷകർ സാക്ഷ്യം വഹിച്ചു. സാധാരണക്കാരന്റെ ജീവിതത്തിലെ യാഥാർഥ്യപ്രശ്നങ്ങളെ അവതരിപ്പിക്കുമ്പോൾ ഇരുവരും തമ്മിലുള്ള കെമിസ്ട്രി ഏറെ ശ്രദ്ധേയമാണ്.

4.മമ്മൂട്ടി – അമൽ നീരദ്
മമ്മൂട്ടിയും അമൽ നീരദും ഒന്നിക്കുമ്പോൾ മികച്ചൊരു നടന്റെയും സംവിധായകന്റെയും കഴിവുകൾ ഒരുമിക്കുന്ന കാഴ്ചയാണ് പ്രേക്ഷകർക്ക് ലഭിക്കുന്നത്.

മലയാള സിനിമയിൽ ഇത്തരത്തിൽ നിരവധി ശ്രദ്ധേയമായ നടൻ–സംവിധായക കൂട്ടുകെട്ടുകൾ ഉണ്ടായിട്ടുണ്ടെങ്കിലും, ഇപ്പോൾ ഏറ്റവും ചർച്ചയായിരിക്കുന്നത് ജോജു ജോർജ് – ഷാജി കൈലാസ് കൂട്ടുകെട്ട് തന്നെയാണ്.മികച്ച അഭിപ്രായം നേടിയ ‘വരവ്’ ഓ ടി ടി യിലും ഹിറ്റ്‌ അടിച്ചിരിക്കുകയാണ്.

തമിഴ് ചലച്ചിത്ര ലോകത്തെ പ്രിയദമ്പതികളായ സൂര്യയും ജ്യോതികയും തങ്ങളുടെ ഇരുപതാം വിവാഹവാർഷിക വേളയിൽ വിവാഹ വാഗ്ദാനം പുതുക്കി (Vow Renewal). വിദേശത്ത് വച്ച് നടന്ന ലളിതമായ ചടങ്ങിൽ പാശ്ചാത്യ ശൈലിയിലുള്ള ചർച്ച് വെഡ്ഡിങ് രീതിയിലാണ് ഇരുവരും വീണ്ടും ‘വിവാഹിതരായത്’.

വെളുത്ത വെഡ്ഡിങ് ഗൗണിൽ വധുവായി ജ്യോതിക എത്തിയപ്പോൾ, വെള്ള ടക്സീഡോയിൽ അതീവ സുന്ദരനായാണ് സൂര്യ ചടങ്ങിൽ പങ്കെടുത്തത്. മകൻ ദേവിന്റെ കൈപിടിച്ചാണ് ജ്യോതിക വേദിയിലേക്ക് എത്തിയത്; മകൾ ദിയയുടെ കൈപിടിച്ച് സൂര്യയും എത്തി. സഹോദരനും നടനുമായ കാർത്തി ഉൾപ്പെടെയുള്ള അടുത്ത ബന്ധുക്കളും സുഹൃത്തുക്കളും ചടങ്ങിൽ സാക്ഷികളായി.

“ദി സീക്വൽ (The Sequel) – 20 വർഷത്തെ സ്നേഹവും പോരാട്ടങ്ങളും ആഘോഷമാക്കി മാറ്റി വീണ്ടും ഒരു പ്രതിജ്ഞ” എന്ന കുറിപ്പോടെ ജ്യോതികയാണ് ഈ മനോഹരമായ നിമിഷങ്ങളുടെ വീഡിയോ ഇൻസ്റ്റാഗ്രാമിലൂടെ പങ്കുവെച്ചത്. ഇത് പൂർണ്ണതയുള്ള ഒരു ദാമ്പത്യത്തിന്റെ ആഘോഷമല്ലെന്നും, മറിച്ച് പരസ്പരം വിട്ടുവീഴ്ചകൾ ചെയ്യാനും മനസ്സിലാക്കാനും സാധിച്ച അപൂർണ്ണതകളുടെ ആഘോഷമാണെന്നും ജ്യോതിക കുറിച്ചു.

2006 സെപ്റ്റംബർ 11-നായിരുന്നു സൂര്യയുടെയും ജ്യോതികയുടെയും വിവാഹം. ഇരുപത് വർഷത്തെ സന്തുഷ്ടകരമായ ദാമ്പത്യ ജീവിതം പൂർത്തിയാക്കിയ വേളയിൽ പുറത്തുവന്ന ഇവരുടെ ആഘോഷ ചിത്രങ്ങളും വീഡിയോകളും നിമിഷനേരം കൊണ്ടാണ് സോഷ്യൽ മീഡിയയിൽ തരംഗമായി മാറിയത്.

ഇരുവരുടെയും പോസ്റ്റിൽ പങ്കുവെച്ചത് ഇങ്ങനെ ;

ഇതൊരു തികഞ്ഞ ദാമ്പത്യത്തിന്റെ ആഘോഷമല്ല. മറിച്ച് പോരായ്മകളുടെയും, വിട്ടുവീഴ്ചകളുടെയും, പരസ്പര ധാരണയുടെയും, ത്യാഗങ്ങളുടെയും, സ്വാർത്ഥതയില്ലാത്ത സ്നേഹത്തിന്റെയും ആഘോഷമാണ്. ഇത് “നമ്മുടെ” ആഘോഷമാണ്. പരസ്പരം വേണ്ടി നമ്മൾ മാറിതീർന്ന ആ മനുഷ്യരുടെ ആഘോഷം.
എത്ര വൈരുദ്ധ്യം നിറഞ്ഞതാണ്-
ഒരിക്കലും നടക്കില്ലെന്ന് കരുതിയ ഒരു സ്വപ്നം, ഇന്ന് എൻ്റെ ജീവിതകാലം മുഴുവൻ ഞാൻ ഓർത്തു സന്തോഷിക്കാൻ പോകുന്ന ഒരു യാഥാർത്ഥ്യമായിരിക്കുന്നു!
ഇതാ എൻ്റെ പ്രതിജ്ഞകൾ –
ഞാൻ എപ്പോഴും സന്തോഷവതിയായിരിക്കുമെന്ന് പ്രതിജ്ഞ ചെയ്യുന്നു — കാരണം ജീവിതത്തിന്റെ നല്ല വശങ്ങൾ മാത്രം കാണാനാണ് ഞാൻ ആഗ്രഹിക്കുന്നത്.
ഞാൻ ജീവിതത്തെ ആഘോഷമാക്കുമെന്ന് പ്രതിജ്ഞ ചെയ്യുന്നു — കാരണം ജീവനുതുല്യം സ്നേഹിക്കുന്നയാൾ സ്വന്തം ജീവനക്കാൾ നിങ്ങളെ ബഹുമാനിക്കുമ്പോൾ, ജീവിതം തന്നെ ഒരു വലിയ സമ്മാനമായി മാറുന്നു.
ഞാൻ ഒരിക്കലും പരാതിപ്പെടില്ലെന്ന് പ്രതിജ്ഞ ചെയ്യുന്നു-
ഞാനെന്തിന് പരാതിപ്പെടണം? ഇത്രയും വിശാലമായ ആകാശത്തിന് പോലും ഭൂമിയെ തൊടാനുള്ള ഭാഗ്യമില്ലല്ലോ! ചുറ്റും നോക്കൂ, നിലനിൽക്കുന്ന സകലതും അപൂർണ്ണമാണ്. ആ ഒഴിവുകൾ നമ്മൾ എങ്ങനെ നികത്തുന്നു എന്നതിലാണ് കാര്യം.
ഞാൻ നന്ദിയുള്ളവളായിരിക്കുമെന്ന് പ്രതിജ്ഞ ചെയ്യുന്നു – കാരണം എല്ലാ പ്രഭാതത്തിലും എന്നെ സംരക്ഷിക്കുന്ന ഒരു പുരുഷൻ്റെ കൈകളിൽ ഞാൻ ഉണരുന്നു, കൂടാതെ എൻ്റെ ജീവിതത്തിന് അർത്ഥവും ജീവിക്കാൻ ഒരു കാരണവും നൽകിയ എൻ്റെ പ്രിയപ്പെട്ട മക്കൾക്കൊപ്പവും.
ഞാൻ ആരോഗ്യവതിയായിരിക്കുമെന്ന് പ്രതിജ്ഞ ചെയ്യുന്നു — കാരണം അത് മാത്രമാണ് നമ്മൾ പടുത്തുയർത്തുന്ന യഥാർത്ഥ സമ്പാദ്യം. എത്ര മനോഹരമായ കോൺക്രീറ്റ് വീടുകൾക്കും ചോർച്ചയും ചിതലുകളും അറ്റകുറ്റപ്പണികളും വേണമല്ലോ.
ഞാൻ ഏറ്റവും നല്ലൊരു അമ്മയായിരിക്കുമെന്ന് പ്രതിജ്ഞ ചെയ്യുന്നു — അത് ഭക്ഷണം വച്ചുണ്ടാക്കുന്നത് കൊണ്ടോ, വൃത്തിയാക്കുന്നത് കൊണ്ടോ, സഹായിക്കുന്നത് കൊണ്ടോ അല്ല, മറിച്ച് എൻ്റെ പുഞ്ചിരി കണ്ട്, തങ്ങളുടെ അപ്പയും അമ്മയും ജീവിച്ച ആ ജീവിതം വീണ്ടും ജീവിക്കാൻ എൻ്റെ മക്കൾ ആഗ്രഹിക്കുന്നത് കൊണ്ടാണ്.
എൻ്റെ സൂര്യ, വഴക്കിടുകയും, പിന്നീട് വീണ്ടും ഇണങ്ങുകയും, ഓരോ തവണയും നിന്നിലേക്ക് കുറച്ചുകൂടി അടുക്കുകയും ചെയ്യുന്ന ആ അപൂർണ്ണയായ ഭാര്യയായി തന്നെ ഞാൻ തുടരുമെന്ന് ഞാൻ പ്രതിജ്ഞ ചെയ്യുന്നു.
നമ്മുടെ സൗഹൃദത്തെ ഞാൻ ഏറ്റവും കൂടുതൽ നെഞ്ചിലേറ്റുമെന്ന് പ്രതിജ്ഞ ചെയ്യുന്നു — കാരണം നിനക്ക് തുല്യനായ, നിന്റെ രഹസ്യങ്ങൾ സൂക്ഷിക്കുന്ന, വർത്തമാനങ്ങൾ പങ്കുവെക്കുന്ന, നിന്റെ ഏറ്റവും നല്ല കൂട്ടുകാരനായ ഒരാളെ കണ്ടെത്തുക എന്നത് അപൂർവ്വമാണ്; അതും നിന്റെ ഭർത്താവും നിന്റെ കുട്ടികളുടെ അച്ഛനുമായ ഒരേയൊരു പ്രത്യേക മനുഷ്യനിൽ തന്നെ ഇവയെല്ലാം കണ്ടെത്തുക എന്നത്!
അതുകൊണ്ട് നമ്മുടെ അടുത്ത ഇരുപത് വർഷങ്ങളിലേക്ക് — തികഞ്ഞ പരസ്പര ധാരണയുള്ള, അപൂർണ്ണരായ നമുക്കായി.

Suriya and Jyotika Renew Wedding