തിരുവനന്തപുരം: സംസ്ഥാനത്ത് കാത്തിരിപ്പിന് വിരാമമിട്ട് തെക്കുപടിഞ്ഞാറൻ കാലവർഷം (എടവപ്പാതി) അടുത്ത 4-5 ദിവസങ്ങൾക്കുള്ളിൽ കേരളത്തിൽ എത്തിച്ചേരുമെന്ന് കേന്ദ്ര കാലാവസ്ഥ വകുപ്പ് അറിയിച്ചു. നിലവിൽ കാലവർഷം കേരള തീരത്തോട് അടുക്കുന്നതിനായുള്ള അനുകൂല സാഹചര്യങ്ങളാണ് നിലനിൽക്കുന്നത്.

ഇന്ന് (മെയ് 30) ഒടുവിൽ ലഭിച്ച വിവരമനുസരിച്ച്, തെക്കുപടിഞ്ഞാറൻ കാലവർഷം തെക്കുപടിഞ്ഞാറൻ അറബിക്കടൽ, തെക്കുകിഴക്കൻ അറബിക്കടൽ എന്നിവയുടെ കൂടുതൽ ഭാഗങ്ങളിലേക്കും ലക്ഷദ്വീപ്, കന്യാകുമാരി പ്രദേശം, ബംഗാൾ ഉൾക്കടലിന്റെ ഭൂരിഭാഗം മേഖലകളിലേക്കും വ്യാപിച്ചിട്ടുണ്ട്.

ചക്രവാതചുഴികളും ന്യൂനമർദ്ദ പാത്തിയും

കാലവർഷത്തിന്റെ വരവ് ശക്തമാക്കിക്കൊണ്ട് നിലവിൽ മൂന്ന് ചക്രവാതചുഴികൾ (Cyclonic Circulations) സജീവമായി നിലനിൽക്കുന്നുണ്ട്:

1. മധ്യ-കിഴക്കൻ ബംഗാൾ ഉൾക്കടലിനും തെക്കുകിഴക്കൻ ബംഗാൾ ഉൾക്കടലിനും മുകളിലായി ഒന്ന്.
2. തെക്കുകിഴക്കൻ അറബിക്കടലിനും സമീപപ്രദേശങ്ങൾക്കും മുകളിലായി രണ്ടാമത്തേത്.
3. തെക്കുപടിഞ്ഞാറൻ അറബിക്കടലിനും സമീപപ്രദേശങ്ങൾക്കും മുകളിലായി മൂന്നാമതൊരു ചക്രവാതചുഴി കൂടി നിലനിൽക്കുന്നു.

കൂടാതെ, മധ്യ-കിഴക്കൻ ബംഗാൾ ഉൾക്കടലിലെ ചക്രവാതചുഴിയിൽ നിന്ന് തുടങ്ങി കന്യാകുമാരി പ്രദേശം വഴി ലക്ഷദ്വീപ് വരെ നീളുന്ന ഒരു ന്യൂനമർദ്ദ പാത്തിയും (Trough) അന്തരീക്ഷത്തിൽ രൂപപ്പെട്ടിട്ടുണ്ട്.

വരും ദിവസങ്ങളിലെ മഴ മുന്നറിയിപ്പ്

കാലവർഷ മുന്നോടിയായി സംസ്ഥാനത്ത് വരും ദിവസങ്ങളിൽ മഴ ശക്തമാകും. മെയ് 30 മുതൽ ജൂൺ 3 വരെ കേരളത്തിലും മാഹിയിലും ഒറ്റപ്പെട്ട ശക്തമായ മഴയ്ക്ക് (Heavy Rainfall) സാധ്യതയുണ്ടെന്ന് കാലാവസ്ഥ വകുപ്പ് മുന്നറിയിപ്പ് നൽകുന്നു.

ഈ ദിവസങ്ങളിൽ കേരളം, മാഹി, ലക്ഷദ്വീപ് എന്നിവിടങ്ങളിൽ ഇടിമിന്നലോടും ശക്തമായ കാറ്റോടും കൂടിയ (മണിക്കൂറിൽ 40 മുതൽ 50 കിലോമീറ്റർ വരെ വേഗതയുള്ള) വ്യാപകമായ മഴയ്ക്കാണ് സാധ്യത. പൊതുജനങ്ങൾ ഇടിമിന്നൽ ജാഗ്രതാ നിർദ്ദേശങ്ങൾ പാലിക്കണമെന്നും അധികൃതർ അറിയിച്ചു.

തിരുവനന്തപുരം: കണ്ണൂർ മുൻ അഡീഷണൽ ഡിസ്ട്രിക്റ്റ് മജിസ്‌ട്രേറ്റ് (എ.ഡി.എം) കെ. നവീൻ ബാബുവിന്റെ മരണത്തിൽ സി.ബി.ഐ അന്വേഷണം ആവശ്യപ്പെട്ട് കുടുംബം മുഖ്യമന്ത്രിയെയും ആഭ്യന്തരമന്ത്രിയെയും നേരിൽ കണ്ടു നിവേദനം സമർപ്പിച്ചു. നവീൻ ബാബുവിന്റെ ഭാര്യ മഞ്ജുഷയും സഹോദരൻ പ്രവീൺ ബാബുവും തിരുവനന്തപുരത്തെത്തിയാണ് മുഖ്യമന്ത്രി വി.ഡി. സതീശൻ, ആഭ്യന്തരമന്ത്രി രമേശ് ചെന്നിത്തല എന്നിവരുമായി കൂടിക്കാഴ്ച നടത്തിയത്.

കേസിൽ സിബിഐ അന്വേഷണം വേണമെന്ന ആവശ്യം സർക്കാർ അംഗീകരിക്കാമെന്ന് മന്ത്രിമാർ ഉറപ്പുനൽകിയതായി കൂടിക്കാഴ്ചയ്ക്ക് ശേഷം നവീൻ ബാബുവിന്റെ സഹോദരൻ പ്രവീൺ ബാബു മാധ്യമങ്ങളോട് പറഞ്ഞു. നിഷ്പക്ഷവും നീതിയുക്തവും ശാസ്ത്രീയവുമായ അന്വേഷണം നടത്തി സത്യം പുറത്തുകൊണ്ടുവരണമെന്നത് കേരള സമൂഹവും തങ്ങളും ഏറെ നാളായി കാത്തിരിക്കുന്നതാണെന്നും, ഇതിനാവശ്യമായ എല്ലാ നടപടികളും സ്വീകരിക്കുമെന്ന് മുഖ്യമന്ത്രിയും ആഭ്യന്തരമന്ത്രിയും ഉറപ്പ് നൽകിയിട്ടുണ്ടെന്നും അദ്ദേഹം വ്യക്തമാക്കി.

നിലവിൽ പ്രത്യേക അന്വേഷണ സംഘമാണ് (SIT) ഈ കേസ് അന്വേഷിച്ചിരുന്നത്. എന്നാൽ ഈ അന്വേഷണത്തിനെതിരെ കുടുംബം നേരത്തെ തന്നെ രംഗത്തുവന്നിരുന്നു. കേസ് കേന്ദ്ര ഏജൻസിക്ക് വിടുന്നതിനൊപ്പം, നവീൻ ബാബുവിന്റെ കുടുംബത്തിലെ ഒരംഗത്തിന് ആശ്രിതനിയമനം നൽകുന്ന കാര്യത്തിലും മന്ത്രിമാർ ഇന്ന് അനുകൂലമായ ഉറപ്പ് നൽകിയതായാണ് വിവരം. റാന്നി എം എൽ എ പഴകുളം മധു, കണ്ണൂർ എം.എൽ.എ ടി.ഓ. മോഹൻ, പത്തനംതിട്ട ഡി.സി.സി ജനറൽ സെക്രട്ടറി ലിജു ജോർജ് എന്നിവരും കുടുംബത്തോടൊപ്പം ഉണ്ടായിരുന്നു.

Naveen Babu Death Case: Family Submits Memorandum to CM V.D. Satheesan

തിരുവനന്തപുരം: പുതിയ സർക്കാരിന്റെ നയങ്ങളും ഭാവി പദ്ധതികളും വ്യക്തമാക്കിക്കൊണ്ടുള്ള ഗവർണറുടെ നയപ്രഖ്യാപന പ്രസംഗത്തിൽ സ്ത്രീക്ഷേമത്തിനും വികസനത്തിനും കടുത്ത സാമ്പത്തിക പരിഷ്കരണങ്ങൾക്കും മുൻഗണന. സൗജന്യ കെ.എസ്.ആർ.ടി.സി യാത്രയ്ക്ക് പുറമേ സ്ത്രീകളെ ചേർത്തുനിർത്തുന്ന നിരവധി പദ്ധതികളാണ് പ്രസംഗത്തിലുടനീളം പ്രഖ്യാപിച്ചിരിക്കുന്നത്. അതേസമയം, സംസ്ഥാനം നേരിടുന്ന ഗുരുതരമായ സാമ്പത്തിക പ്രതിസന്ധി ജനങ്ങൾക്ക് മുന്നിൽ വ്യക്തമാക്കാൻ ധവളപത്രം പുറത്തിറക്കുമെന്നും സർക്കാർ അറിയിച്ചു.

സ്ത്രീകൾക്കായി വൻ പ്രഖ്യാപനങ്ങൾ; ആർത്തവ അവധിയും തുല്യവേതനവും

പെൺകുട്ടികൾക്കും സ്ത്രീകൾക്കും കൂടുതൽ സൗഹൃദപരമായ അന്തരീക്ഷം ഒരുക്കുകയാണ് ലക്ഷ്യമെന്ന് നയപ്രഖ്യാപനത്തിൽ പറയുന്നു. പ്രധാന പ്രഖ്യാപനങ്ങൾ താഴെ പറയുന്നവയാണ്:

• ആർത്തവ അവധി: സ്കൂൾ വിദ്യാർഥിനികൾക്ക് മാസത്തിൽ 3 ദിവസം വരെ ആർത്തവ അവധി നൽകും. പഠനത്തിൽ പിന്നിലാകാതിരിക്കാൻ വാരാന്ത്യങ്ങളിൽ ക്യാച്ച് അപ്പ് ക്ലാസുകൾ ഒരുക്കും.
• മെൻസ്ട്രൽ ഡിഗ്നിറ്റി: വിദ്യാഭ്യാസ സ്ഥാപനങ്ങളും പൊതുസ്ഥലങ്ങളും സ്ത്രീസൗഹൃദമാക്കാൻ പ്രത്യേക പദ്ധതി. സാനിറ്ററി നാപ്കിനുകൾ, പാദരക്ഷകൾ, മറ്റ് അവശ്യസാധനങ്ങൾ എന്നിവ ലഭ്യമാക്കും.
• തൊഴിലിടങ്ങളിലെ തുല്യത: തൊഴിലിടങ്ങളിൽ സ്ത്രീകൾക്ക് തുല്യവേതനം ഉറപ്പാക്കും. അസംഘടിത മേഖലയിലെ സ്ത്രീകൾക്ക് 6 മാസത്തെ പ്രസവവിധിയും പ്രത്യേക ആനുകൂല്യങ്ങളും നൽകും.
• വനിതാ കർഷക കൺസോർഷ്യം: ഓരോ പഞ്ചായത്തിലും വനിതാ കർഷകരെ കണ്ടെത്തി പ്രോത്സാഹിപ്പിക്കാൻ പ്രത്യേക കൺസോർഷ്യം രൂപീകരിക്കും. എല്ലാ പ്രധാന പട്ടണങ്ങളിലും പൊതുവിശ്രമമുറികൾ ഒരുക്കും.

മാറിയ രാഷ്ട്രീയം; കേന്ദ്രവിമർശനം ഒഴിവാക്കി നെഹ്‌റുവിനെ ഉദ്ധരിച്ചു

കഴിഞ്ഞ സർക്കാരിന്റെ കാലത്തെ നയപ്രഖ്യാപനങ്ങളിൽ നിന്ന് വ്യത്യസ്തമായി ഇക്കുറി കേന്ദ്ര സർക്കാരിനെതിരെയുള്ള നേരിട്ടുള്ള വിമർശനങ്ങൾ പൂർണ്ണമായും ഒഴിവാക്കി. ജവഹർലാൽ നെഹ്‌റുവിന്റെ വാക്കുകൾ ഉദ്ധരിച്ചാണ് പ്രസംഗം തുടങ്ങിയതും അവസാനിപ്പിച്ചതും. ‘പൊതുനന്മയ്ക്കായി ഒരുമിച്ചു പ്രവർത്തിക്കുന്നതാണ് ഏറ്റവും നല്ലത്’ എന്ന വാക്കുകളിൽ തുടങ്ങി, ‘ജനങ്ങൾക്ക് വിശ്വാസമുണ്ടാകുമ്പോഴാണ് ഒരു സർക്കാർ ഏറ്റവും നന്നായി പ്രവർത്തിക്കുന്നത്’ എന്ന വരികളോടെ പ്രസംഗം അവസാനിച്ചു. കേന്ദ്രത്തിൽ നിന്ന് അർഹമായ സാമ്പത്തിക വിഹിതം ലഭിക്കുമെന്ന പ്രതീക്ഷയും സർക്കാർ പങ്കുവെച്ചു.

മുൻ സർക്കാരിന് പരോക്ഷ വിമർശനം; ധവളപത്രം വരുന്നു

സംസ്ഥാനം കടുത്ത സാമ്പത്തിക വെല്ലുവിളികളും സാമ്പത്തിക ഞെരുക്കവും നേരിടുകയാണെന്ന് പ്രസംഗത്തിൽ സമ്മതിക്കുന്നുണ്ട്. മുൻ സർക്കാരിന്റെ ധനകാര്യ മാനേജ്‌മെന്റിനെ പരോക്ഷമായി വിമർശിച്ച പ്രസംഗത്തിൽ, നിലവിലെ സാമ്പത്തിക ബാധ്യതകളെക്കുറിച്ച് ജനങ്ങൾക്ക് വ്യക്തത നൽകാൻ ധവളപത്രം പുറത്തിറക്കുമെന്ന് പ്രഖ്യാപിച്ചു. തിരഞ്ഞെടുപ്പ് കാലത്ത് പ്രഖ്യാപിച്ച ‘ഇന്ദിരാ ഗ്യാരന്റികൾ’ നടപ്പാക്കുമെന്ന് ആവർത്തിച്ചെങ്കിലും കെ.എസ്.ആർ.ടി.സി സൗജന്യ യാത്രയുടെ കൂടുതൽ വിശദാംശങ്ങൾ ലഭ്യമാക്കിയിട്ടില്ല. എന്നാൽ, സംസ്ഥാനത്തുടനീളം സ്ത്രീകളുടെ സൗന്യയാത്ര സ്ഥിരമായ അവകാശമാക്കുമെന്ന് സർക്കാർ വ്യക്തമാക്കി.

മറ്റ് പ്രധാന പ്രഖ്യാപനങ്ങൾ ഒറ്റനോട്ടത്തിൽ:

• സാമൂഹ്യ ക്ഷേമം: കോളേജ് വിദ്യാർഥിനികൾക്ക് പ്രതിമാസം 1000 രൂപ വിദ്യാഭ്യാസ സഹായം. ക്ഷേമപെൻഷൻ 3000 രൂപയായി ഉയർത്തും.
• ആരോഗ്യ ഇൻഷുറൻസ്: ഓരോ കുടുംബത്തിനും പ്രതിവർഷം 25 ലക്ഷം രൂപയുടെ സൗജന്യ ആരോഗ്യ ഇൻഷുറൻസ് പരിരക്ഷ.
• യുവജനങ്ങൾക്ക് പലിശരഹിത വായ്പ: സംരംഭകരാകാൻ ആഗ്രഹിക്കുന്ന യുവാക്കൾക്ക് 5 ലക്ഷം രൂപ പലിശരഹിത വായ്പ നൽകും.
• സഹകരണ മേഖലയിലെ കടുത്ത നടപടി: തട്ടിപ്പ് നടന്ന സഹകരണ സംഘങ്ങളിലെ നിക്ഷേപം തിരികെ നൽകാൻ നടപടി സ്വീകരിക്കും. കുറ്റക്കാർക്കെതിരെ കർശന നടപടിയുണ്ടാകും. വിജിലൻസ് സംവിധാനം ഊർജിതമാക്കി അഴിമതി തുടച്ചുനീക്കും.
• ലഹരി വിരുദ്ധ പോരാട്ടം: ലഹരിവ്യാപനം തടയാൻ പ്രത്യേക ‘സ്റ്റേറ്റ് നാർക്കോട്ടിക് എൻഫോഴ്‌സ്‌മെന്റ് ബ്യൂറോ’ സ്ഥാപിക്കും.
• ഐടി, അടിസ്ഥാന സൗകര്യ വികസനം: ഐടി വകുപ്പിനെ ‘കേരള ടെക്ക്’ എന്ന ബ്രാൻഡിൽ പുനർനാമകരണം ചെയ്യും. കേരള ഐടി മിഷൻ ഇനി മുതൽ ‘ഡിജിറ്റൽ ട്രാൻസ്ഫർമേഷൻ മിഷൻ’ ആയി മാറും. സംസ്ഥാനത്തെ എല്ലാ റോഡുകളും ബി.എം, ബി.സി നിലവാരത്തിലേക്ക് ഉയർത്തും.
• തീർഥാടനം, വിദ്യാഭ്യാസം: ക്ഷേത്രങ്ങളെ ബന്ധിപ്പിച്ച് ‘മലബാർ ടെംപിൾ പിൽഗ്രിം’ തീർഥാടന സർക്യൂട്ട് വരും. എല്ലാ ജില്ലകളിലും ആവശ്യാനുസരണം പ്ലസ് ടു സീറ്റുകൾ വർദ്ധിപ്പിക്കും. സപ്ലൈകോ സൂപ്പർമാർക്കറ്റുകൾ ആധുനികവത്കരിക്കുകയും സഞ്ചരിക്കുന്ന മാവേലി, റേഷൻ കടകളുടെ എണ്ണം വർദ്ധിപ്പിക്കുകയും ചെയ്യും.

തിരുവനന്തപുരം: സംസ്ഥാനത്ത് അടുത്ത ദിവസങ്ങളിൽ വ്യാപകമായ മഴയ്ക്ക് സാധ്യതയുണ്ടെന്ന് കേന്ദ്ര കാലാവസ്ഥ വകുപ്പിന്റെ മുന്നറിയിപ്പ്. തെക്കുപടിഞ്ഞാറൻ കാലവർഷം (ഇടവപ്പാതി) കൂടുതൽ പ്രദേശങ്ങളിലേക്ക് വ്യാപിക്കുന്നതിനൊപ്പം കടലിൽ രൂപപ്പെട്ട ചക്രവാതച്ചുഴികളും മഴ ശക്തമാക്കാൻ കാരണമാകും.

കാലാവസ്ഥ വകുപ്പ് പുറപ്പെടുവിച്ച പ്രധാന വിവരങ്ങൾ താഴെ നൽകുന്നു:

കാലവർഷം കൂടുതൽ ഭാഗങ്ങളിലേക്ക്

അടുത്ത 2-3 ദിവസങ്ങൾക്കുള്ളിൽ തെക്കുപടിഞ്ഞാറൻ-തെക്കുകിഴക്കൻ അറബിക്കടൽ, ലക്ഷദ്വീപ് പ്രദേശം, ബംഗാൾ ഉൾക്കടലിന്റെ ഭൂരിഭാഗം പ്രദേശങ്ങൾ (തെക്കുപടിഞ്ഞാറൻ, മധ്യ-കിഴക്കൻ, മധ്യ-പടിഞ്ഞാറൻ, തെക്കുകിഴക്കൻ, വടക്കുകിഴക്കൻ ഭാഗങ്ങൾ) എന്നിവടങ്ങളിലേക്ക് കാലവർഷം കൂടുതൽ മുന്നേറുന്നതിന് അനുകൂലമായ സാഹചര്യമാണ് നിലനിൽക്കുന്നത്.

ഇരട്ട ചക്രവാതച്ചുഴി

നിലവിൽ രണ്ട് പ്രദേശങ്ങളിലായി ഉപരിതല ചക്രവാതച്ചുഴി (Cyclonic Circulation) നിലനിൽക്കുന്നുണ്ട്:

1. തെക്കുകിഴക്കൻ അറബിക്കടലിനും സമീപപ്രദേശങ്ങൾക്കും മുകളിലായി രൂപപ്പെട്ട ചക്രവാതച്ചുഴി.
2. മധ്യ-കിഴക്കൻ, തെക്കുകിഴക്കൻ ബംഗാൾ ഉൾക്കടലിന് മുകളിലായുള്ള ചക്രവാതച്ചുഴി.

വരും ദിവസങ്ങളിലെ മുന്നറിയിപ്പ്

• ഒറ്റപ്പെട്ട ശക്തമായ മഴ: മെയ് 28, 29, ജൂൺ 1 തീയതികളിൽ കേരളത്തിലും മാഹിയിലും ഒറ്റപ്പെട്ട ശക്തമായ മഴയ്ക്ക് (Heavy rainfall) സാധ്യതയുണ്ട്.
• വ്യാപക മഴയും കാറ്റും: മെയ് 28 മുതൽ ജൂൺ 1 വരെ കേരളം, മാഹി, ലക്ഷദ്വീപ് എന്നിവിടങ്ങളിൽ ഇടിമിന്നലോടും ശക്തമായ കാറ്റോടും കൂടിയ (മണിക്കൂറിൽ 40 മുതൽ 50 കിലോമീറ്റർ വരെ വേഗതയുള്ള) വ്യാപകമായ നേരിയതോ മിതമായതോ ആയ മഴയ്ക്ക് സാധ്യതയുണ്ട്.

ജാഗ്രതാ നിർദ്ദേശം: ഇടിമിന്നലിനും ശക്തമായ കാറ്റിനും സാധ്യതയുള്ളതിനാൽ പൊതുജനങ്ങൾ ആവശ്യമായ മുൻകരുതലുകൾ സ്വീകരിക്കേണ്ടതാണ്. വരും ദിവസങ്ങളിൽ മഴയുടെ തീവ്രത കൂടാൻ സാധ്യതയുള്ളതിനാൽ താഴ്ന്ന പ്രദേശങ്ങളിലും മലയോര മേഖലകളിലും ഉള്ളവർ പ്രത്യേക ജാഗ്രത പാലിക്കുക.

കോഴിക്കോട്: രണ്ട് പതിറ്റാണ്ടിന്റെ നീണ്ട കാത്തിരിപ്പിനും നിയമപോരാട്ടങ്ങൾക്കും വിരാമമിട്ട് സൗദി ജയിലിൽ നിന്ന് മോചിതനായ അബ്ദുൽ റഹീമിന് ഇനി പുതുജീവിതം. വലിയ പെരുന്നാൾ ദിനത്തിൽ പുലർച്ചെ കരിപ്പൂരിലിറങ്ങിയ റഹീം രാമനാട്ടുകര കോടമ്പുഴയിലെ തറവാട്ടു വീട്ടിൽ തിരിച്ചെത്തി. 20 വർഷങ്ങൾക്ക് ശേഷം തന്റെ പ്രിയപ്പെട്ട ഉമ്മ ഫാത്തിമയെ നേരിൽ കണ്ട റഹീം വികാരഭരിതനായി ഉമ്മയെ കെട്ടിപ്പിടിച്ചു കരഞ്ഞത് കണ്ടുനിന്നവരുടെ കണ്ണുകളെയും ഈറനണിയിച്ചു.

വീട്ടിൽ തിരിച്ചെത്തിയ റഹീമിനെ സ്വീകരിക്കാനും ഒരുനോക്ക് കാണാനുമായി ബന്ധുക്കളും പ്രദേശവാസികളും ഉൾപ്പെടെ ആയിരക്കണക്കിന് ആളുകളാണ് കോടാമ്പുഴയിലെ വീടിന് മുന്നിൽ തടിച്ചുകൂടിയിരിക്കുന്നത്. നാട്ടിലെത്തിയ ശേഷമുള്ള അബ്ദുൽ റഹീമിന്റെ ആദ്യ പ്രതികരണവും പുറത്തുവന്നു. തന്റെ മോചനത്തിനായി പ്രാർഥിച്ചവർക്കും കൈയയച്ച് സഹായിച്ച ലോകമെമ്പാടുമുള്ള എല്ലാ സുമനസ്സുകൾക്കും അദ്ദേഹം ഹൃദയത്തിൽ തൊട്ട് നന്ദി അറിയിച്ചു.

2006-ൽ സൗദിയിൽ വെച്ചുണ്ടായ മനഃപൂർവമല്ലാത്ത കൈപ്പിഴയെത്തുടർന്ന് വധശിക്ഷയ്ക്ക് വിധിക്കപ്പെട്ട റഹീമിന്റെ മോചനത്തിനായി മലയാളികൾ ഒന്നടങ്കം കൈകോർത്ത് 34.35 കോടി രൂപയാണ് ദയാധനമായി സമാഹരിച്ചത്. തുടർന്ന് വധശിക്ഷ റദ്ദാക്കിയെങ്കിലും കോടതി വിധിച്ച 20 വർഷത്തെ തടവുശിക്ഷാ കാലാവധി പൂർത്തിയാക്കിയാണ് റഹീം ഒടുവിൽ സ്വന്തം മണ്ണിലേക്ക് തിരിച്ചെത്തിയത്. വരും ദിവസങ്ങളിലും റഹീമിനെ കാണാനായി വലിയ ജനപ്രവാഹം ഉണ്ടാകുമെന്നാണ് കരുതുന്നത്. സമാഹരിച്ച തുകയിൽ ബാക്കിയുള്ളത് സംബന്ധിച്ച തീരുമാനങ്ങൾ റഹീം നാട്ടിലെത്തിയ സാഹചര്യത്തിൽ വരും ദിവസങ്ങളിൽ കൈക്കൊള്ളും.

തിരുവനന്തപുരം/കണ്ണൂർ: മുഖ്യമന്ത്രി പിണറായി വിജയന്റെയും മുൻ മന്ത്രി പി.എ. മുഹമ്മദ് റിയാസിന്റെയും വസതികളിൽ എൻഫോഴ്സ്മെന്റ് ഡയറക്ടറേറ്റ് (ഇഡി) നടത്തിയ റെയ്ഡ് പൂർത്തിയായി. എന്നാൽ റെയ്ഡിന് പിന്നാലെ സംസ്ഥാനത്തിന്റെ വിവിധ ഭാഗങ്ങളിൽ വൻ സംഘർഷവും സി.പി.ഐ.എം പ്രവർത്തകരുടെ വ്യാപക പ്രതിഷേധവുമുണ്ടായി. തിരുവനന്തപുരത്ത് പിണറായി വിജയന്റെ വാടക വീട്ടിൽ റെയ്ഡ് പൂർത്തിയാക്കി മടങ്ങിയ ഇഡി ഉദ്യോഗസ്ഥരുടെ വാഹനങ്ങൾ സി.പി.ഐ.എം പ്രവർത്തകർ അടിച്ചുതകർത്തു.

തിരുവനന്തപുരത്ത് പരക്കെ അക്രമം; പോലീസ് ലാത്തിവീശി

തിരുവനന്തപുരത്ത് റെയ്ഡ് കഴിഞ്ഞ് മടങ്ങുകയായിരുന്ന ഇഡി സംഘത്തിന്റെ മൂന്ന് വാഹനങ്ങളുടെയും ചില്ലുകൾ സി.പി.ഐ.എം പ്രവർത്തകർ പൂർണ്ണമായി തകർത്തു. ഉദ്യോഗസ്ഥരുടെ കാറുകൾ വളഞ്ഞായിരുന്നു പരക്കെ അക്രമം അഴിച്ചുവിട്ടത്.

കണ്ണൂരിലും കോഴിക്കോട്ടും പരിശോധന പൂർത്തിയായി; രേഖകളൊന്നും ലഭിച്ചില്ല

കണ്ണൂർ പാണ്ടാല്യമുക്കിലെ പിണറായി വിജയന്റെ വീട്ടിലും, മുൻ മന്ത്രി പി.എ. മുഹമ്മദ് റിയാസിന്റെ കോഴിക്കോട്ടെ വസതിയിലും നടന്ന പരിശോധനകൾ അവസാനിപ്പിച്ച് ഇഡി സംഘം മടങ്ങി. രാവിലെ 8.30 ഓടെയാണ് പിണറായിയുടെ കണ്ണൂരിലെ വീട്ടിൽ റെയ്ഡ് ആരംഭിച്ചത്. എന്നാൽ, പരിശോധനയിൽ കേസുമായി ബന്ധപ്പെട്ട യാതൊരുവിധ രേഖകളും കണ്ടെത്താൻ കഴിഞ്ഞിട്ടില്ലെന്ന് ഇഡിയുടെ മഹസറിൽ വ്യക്തമാക്കുന്നുണ്ട്.

കണ്ണൂരിൽ ഇഡി ഉദ്യോഗസ്ഥരെ തടഞ്ഞു; ഒടുവിൽ വഴിതുറന്ന് നേതാക്കൾ

കണ്ണൂർ പാണ്ഡല്യമുക്കിലെ വീട്ടിൽ നിന്ന് പരിശോധന കഴിഞ്ഞ് പുറത്തിറങ്ങിയ ഇഡി ഉദ്യോഗസ്ഥരെ സി.പി.ഐ.എം പ്രവർത്തകർ കൂകിവിളിച്ചാണ് നേരിട്ടത്. വൻ പ്രതിഷേധം കാരണം ഉദ്യോഗസ്ഥർക്ക് ഏറെ നേരം മടങ്ങാൻ കഴിഞ്ഞില്ല. ഉദ്യോഗസ്ഥരെ പുറത്തുവിടില്ലെന്ന നിലപാടിൽ പ്രവർത്തകർ ഉറച്ചുനിന്നതോടെ, അവർക്ക് മടങ്ങാനുള്ള വഴി ഒരുക്കണമെന്ന് ഇഡി സംഘം ജില്ലയിലെ പാർട്ടി നേതാക്കളോട് അഭ്യർത്ഥിച്ചു.

തുടർന്ന് സി.പി.ഐ.എം നേതാവ് എം.വി. ജയരാജൻ ഇടപെട്ട് പ്രവർത്തകരോട് പിന്തിരിഞ്ഞു പോകാൻ ആവശ്യപ്പെട്ട ശേഷമാണ് ഉദ്യോഗസ്ഥർക്ക് മടങ്ങാനായത്.

സംസ്ഥാനവ്യാപക പ്രതിഷേധം: കണ്ണൂരിലെ പിണറായി വിജയന്റെ വീടിന് മുന്നിൽ ആരംഭിച്ച പ്രതിഷേധം നിമിഷങ്ങൾക്കകം സി.പി.ഐ.എം സംസ്ഥാനവ്യാപക പ്രതിഷേധമായി മാറ്റുകയായിരുന്നു. കേന്ദ്ര ഏജൻസിയുടെ നടപടിക്കെതിരെ വൻ ജനരോഷമാണ് പാർട്ടി പ്രവർത്തകർ ഉയർത്തുന്നത്.