തിരുവനന്തപുരം: ആരോഗ്യമന്ത്രി കെ.കെ. ഷൈലജയ്ക്കെതിരെ ബിജെപി നേതാവ് കെ. സുരേന്ദ്രന്‍റെ പരാതിയിൽ  വിജിലൻസ് അന്വേഷണം. ചികിത്സയ്ക്കുള്ള ധനസഹായം അനധികൃതമായി കൈപ്പറ്റിയെന്ന ആരോപണത്തിൽ വിജിലൻസിന്‍റെ സ്പെഷൽ യൂണിറ്റാണ് അന്വേഷണം നടത്തുന്നത്.

ഷൈലജയുടെ ഭർത്താവിനെ ആശ്രിതരുടെ പട്ടികയിൽ ഉൾപ്പെടുത്തി ധനസഹായം കൈപ്പറ്റിയെന്നാണ് പരാതി. സുരേന്ദ്രന്‍റെ പരാതിയിൽ പ്രാഥമിക അന്വേഷണം നടത്തി 42 ദിവസത്തിനുള്ളിൽ റിപ്പോർട്ട് സമർപ്പിക്കാനാണ് നിർദേശം. കെ.ഇ. ബൈജുവിനാണ് അന്വേഷണ ചുമതല.

മന്ത്രി പദവി ഉപയോഗിച്ച് ഭർത്താവിന്‍റെ ചികിൽസയ്ക്കുള്ള ധനസഹായം അനധികൃതമായി കൈപ്പറ്റിയെന്നും ഷൈലജ 28,800 രൂപയ്ക്കു കണ്ണട വാങ്ങിയെന്നുമാണ് മന്ത്രിക്കെതിരെ ആരോപണം ഉയർന്നിരുന്നത്. ഭർത്താവും മട്ടന്നൂർ മുനിസിപ്പാലിറ്റി മുൻ ചെയർമാനുമായ കെ.ഭാസ്കരൻ സ്വകാര്യ ആശുപത്രിയിൽ ചികിത്സയിലിരിക്കെ അരലക്ഷത്തിലേറെ രൂപയുടെ ചികിൽസാച്ചെലവും സർക്കാരിൽനിന്ന് ഈടാക്കിയതായാണ് ആരോപണം.

ന്യൂഡൽഹി: പാക്ക് ജയിലിൽ വധശിക്ഷ കാത്ത് കഴിയുന്ന ഇന്ത്യൻ പൗരൻ കുൽഭൂഷൻ ജാദവിന്‍റെ പുതിയ വീഡിയോ പാക്കിസ്ഥാൻ പുറത്തുവിട്ടു. ഡിസംബർ 25ന് കുൽഭൂഷണെ കാണാൻ ഭാര്യയ്ക്കും അമ്മയ്ക്കും അനുവാദം നൽകിയിരുന്നു. ഇവരുടെ കൂടികാഴ്ചക്ക് ശേഷം ദിവസങ്ങൾക്കുള്ളിലാണ് പാക്കിസ്ഥാൻ പുതിയ വീഡിയോ പുറത്തുവിട്ടിരിക്കുന്നത്. വീഡിയോയ്ക്ക് ഒപ്പം ഭാര്യയും അമ്മയും കുൽഭൂഷണെ കാണാൻ എത്തിയതിന്‍റെ ചിത്രങ്ങളും പുറത്തുവിട്ടിട്ടുണ്ട്.

തന്നെ കാണാൻ എത്തിയ അമ്മയ്ക്കും ഭാര്യയ്ക്കും ഒപ്പമുണ്ടായിരുന്ന ഇന്ത്യൻ നയതന്ത്ര ഉദ്യോഗസ്ഥനെ കുറ്റപ്പെടുത്തിയാണ് പാക്കിസ്ഥാൻ പുറത്തുവിട്ട പുതിയ വീഡിയോയിൽ കുൽഭൂഷണ്‍ പറയുന്നത്. അമ്മയെ ഭയപ്പെടുത്തുന്ന രീതിയിലായിരുന്ന ഒപ്പമുണ്ടായിരുന്ന നയന്ത്രണ ഉദ്യോഗസ്ഥന്‍റെ പെരുമാറ്റമെന്ന് കുൽഭൂഷണ്‍ പറഞ്ഞു. ഇരുവർക്കും ഒപ്പം വന്ന നയതന്ത്ര ഉദ്യോഗസ്ഥൻ അവരോട് ആക്രോശിക്കുന്നത് കാണാമായിരുന്നു. തന്‍റെ ഭാര്യയുടെയും അമ്മയും കണ്ണുകളിൽ ഭയം നിറഞ്ഞിരിക്കുകയായിരുന്നു. എന്തിനാണ് അവർ പേടിക്കുന്നത്. സംഭവിക്കാനുള്ളത് സംഭവിച്ചു. അവരെ ഭയപ്പെടുത്തിയത് പോലെ തോന്നുന്നുവെന്നും കുൽഭൂഷണ്‍ പറയുന്നു. കൂടാതെ കൂടിക്കാഴ്ചയ്ക്ക് അനുവദിച്ച പാക്കിസ്ഥാന് കുൽഭൂഷണ്‍ നന്ദി പറയുന്നതും വീഡിയോയിലുണ്ട്.

ഭാര്യയും അമ്മയും കുൽഭൂഷണുമായി സംസാരിക്കുന്ന ചിത്രമാണ് പാക്കിസ്ഥാൻ പുറത്തുവിട്ടത്. ഇവരോടൊപ്പം ഇന്ത്യൻ ഡെപ്യൂട്ടി ഹൈക്കമ്മീഷണർ ജെ.പി.സിംഗും ഉണ്ടായിരുന്നു.

എന്നാല്‍ പാക്കിസ്ഥാൻ കുൽഭൂഷന്‍റെ ഭാര്യയോടും അമ്മയോടും അപമര്യാദയായാണ് പെരുമാറിയതെന്നു ഇന്ത്യ ആരോപണം ഉയര്‍ത്തിയിരുന്നു. കുൽഭൂഷന്‍റെ ഭാര്യയുടെ താലിമാല വരെ പാക്കിസ്ഥാൻ ഊരിവാങ്ങിച്ചുവെന്നും ഷൂ പോലും ധരിക്കാൻ അനുവദിച്ചില്ലെന്നും ഇന്ത്യ കുറ്റപ്പെടുത്തിയിരുന്നു. മാത്യഭാഷയിൽ കുൽഭൂഷണോട് സംസാരിക്കാൻ ഇരുവരെയും പാക്കിസ്ഥാൻ അനുവദിച്ചില്ല. ഇത് കടുത്ത മനുഷ്യാവകാശ ലംഘനമാണെന്നും ഇന്ത്യ പരാതിപ്പെട്ടിരുന്നു. ഇത് മറികടക്കുന്നതിന് വേണ്ടിയാണ് പാക്കിസ്ഥാൻ പുതിയ വീഡിയോ പുറത്തിറക്കിയിരിക്കുന്നത്.

ബസ് കയറാൻ നിൽക്കുന്ന യുവതിയുടെ കഴുത്തിൽ നിന്നും മാലപൊട്ടിച്ച് യുവാവ്‌ ഓടുന്ന വിഡിയോ സമൂഹമാധ്യമങ്ങളില്‍ വൈറലായിരുന്നു. ഇവനെ കയ്യോടെ പിടികൂടണമെന്നും അതിനായി പോസ്റ്റ് പരമാവധി ഷെയർ ചെയ്യൂ എന്നും ആവശ്യപ്പെട്ടായിരുന്നു പോസ്റ്റ്.

സത്യത്തിൽ ഇത് മീര വാസുദേവും രാജീവ് രാജനും പ്രധാനകഥാപാത്രങ്ങളായെത്തുന്ന സുരേഷ് അച്ചൂസ് സംവിധാനം ചെയ്യുന്ന ഡോക്യുമെന്ററിയുടെ ഷൂട്ടിങ് സെറ്റിൽ നിന്നും ആരോ പകർത്തിയ വിഡിയോ ആണ്. മീരയുടെ മാല പൊട്ടിച്ചോടുന്ന രാജീവിന്റെ ചിത്രങ്ങളാണ് കള്ളനെന്ന രീതിയിൽ പ്രചരിച്ചത്.

സംഭവം സത്യമാണെന്ന് വിശ്വസിച്ചു പോസ്റ്റ് വൈറലായതോടെ രാജീവും അതിന് താഴെ കമന്റുമായി എത്തി. ‘ചേട്ടനെ എനിക്കറിയില്ല, പക്ഷെ ഒരുപാട് നന്ദിയുണ്ട്.. ഞാൻ മണിക്കൂറുകൾ ക്കൊണ്ട് ഇത്രയും പ്രശസ്തനാവുമെന്ന് വിചാരിച്ചില്ല… എന്തായാലും നാളെ റിലീസ് ആവുന്ന ദിവാൻജിമൂല ഗ്രാന്റ് പ്രീ എന്ന സിനിമയെയും ഇങ്ങന്നെ തന്നെ പ്രമോട്ട് ചെയ്ത് തരണേ..പ്ലീസ്- എന്നാണ് രാജിവ് എഴുതിയത്.

ന്യൂഡൽഹി : ഇന്ത്യയുടെ ഔദ്യോഗിക ഭാഷയായ ഹിന്ദി ഐക്യരാഷ്ട്ര സംഘടനയുടെയും ഔദ്യോഗിക ഭാഷയാക്കാനുള്ള ശ്രമത്തെച്ചൊല്ലി വിദേശകാര്യ മന്ത്രി സുഷമ സ്വരാജും മുൻ യുഎൻ ഉദ്യോഗസ്ഥൻ കൂടിയായ കോൺഗ്രസ് നേതാവ് ശശി തരൂരും തമ്മിൽ ലോക്സഭയിലെ ചോദ്യോത്തര വേളയില്‍ വാക്പോര്.

ഹിന്ദി ഐക്യരാഷ്ട്ര സംഘടനയുടെ ഔദ്യോഗിക ഭാഷയാക്കുന്നതുമായി ബന്ധപ്പെട്ട് പിന്തുണ തേടി 129 യുഎൻ അംഗരാജ്യങ്ങളുമായി ചർച്ച നടത്തിവരികയാണെന്ന് സുഷമ സ്വരാജ് എഴുതിത്തയ്യാറാക്കി നൽകിയ മറുപടിയിൽ സഭയെ അറിയിച്ചതിനെ തുടര്‍ന്നാണ് ശശി തരൂർ വിയോജിപ്പ് രേഖപ്പെടുത്തിയത്.

ഇപ്പോഴത്തെ പ്രധാനമന്ത്രിയെയും വിദേശകാര്യ മന്ത്രിയെയും മാത്രം പരിഗണിച്ച് ചിലവേറെ ഉള്ള ഇത്തരമൊരു തീരുമാനമെടുക്കേണ്ടതുണ്ടോ എന്നായിരുന്നു തരൂരിന്റെ ചോദ്യം.

ഹിന്ദി ഇന്ത്യയുടെ ഔദ്യോഗികഭാഷയാണെങ്കിലും ദേശീയ ഭാഷയല്ല. ഇന്ത്യയ്ക്ക് പുറത്ത് ഹിന്ദി സംസാരിക്കുന്നവർ ഇല്ലാത്തതിനാൽ ഹിന്ദി പരിഭാഷയ്ക്കായി പണം ചെലവാക്കുന്നത് മറ്റ് രാജ്യങ്ങളെ ബോധ്യപ്പെടുത്താൻ ബുദ്ധിമുട്ടായിരിക്കു. ഇപ്പോഴത്തെ പ്രധാനമന്ത്രിയും വിദേശകാര്യമന്ത്രിയും ഹിന്ദി സംസാരിക്കുന്നതിൽ സമര്‍ഥരാണെങ്കിലും ഭാവിയിൽ ഈ സ്ഥാനങ്ങളിലെത്തുന്നത് കേരളം, തമിഴ്നാട്, ബംഗാൾ പോലുള്ള സംസ്ഥാനങ്ങളിൽനിന്നുള്ളവരാണെങ്കിൽ അവർ യുഎന്നിൽ ഹിന്ദി സംസാരിക്കണമെന്ന് നിർബന്ധം പിടിക്കാനാകുമോയെന്നായിരുന്നു തരൂരിന്റെ ചോദ്യം.

ഇന്ത്യയിൽ മാത്രമാണ് ഹിന്ദി സംസാരിക്കുന്നതെന്നാണ് കരുതുന്നതെങ്കിൽ അത് തരൂരിന്റെ അറിവില്ലായ്മയാണ് കാണിക്കുന്നതെന്നും നേപ്പാൾ, ഫിജി, സൂരിനാം, ട്രിനിഡാഡ് ആൻഡ് ടുബാഗോ തുടങ്ങിയ രാജ്യങ്ങളിൽ ഹിന്ദി സംസാരിക്കുന്നന്നുണ്ട് എന്നും ഇതിനുള്ള സുഷമയുടെ മറുപടിയായി സുഷമ ചൂണ്ടിക്കാട്ടി.