കൊച്ചി: സംസ്ഥാനത്തെ വിചാരണ തടവുകാര്‍ക്കും റിമാന്‍ഡ് പ്രതികള്‍ക്കും ഹൈക്കോടതി പ്രത്യേക ജാമ്യം അനുവദിച്ചു. കോവിഡ് വ്യാപനത്തിന്റെ പശ്ചാത്തലത്തിലാണ് നടപടി. ഏഴ് വര്‍ഷത്തിന് താഴെ ശിക്ഷ ലഭിക്കാവുന്ന കുറ്റം ചുമത്തപ്പെട്ടവരില്‍ സ്ഥിരം കുറ്റവാളികള്‍ അല്ലാത്ത പ്രതികള്‍ക്കാണ് ജാമ്യം അനുവദിച്ചത്. ഏപ്രില്‍ 30വരെയാണ് ജാമ്യം ലഭിക്കുക. സംസ്ഥാനത്ത് 54 ജയിലുകളിലായി കഴിയുന്ന 8400ഓളം തടവുകാരില്‍ 1000ത്തോളം പേര്‍ക്കാണ് ഇതിന്റെ പ്രയോജനം ലഭിക്കുക.
ജാമ്യത്തില്‍ പുറത്തിറങ്ങിയതിന് ശേഷം താമസസ്ഥലത്തിന് അടുത്തുള്ള പൊലീസ് സ്റ്റേഷനില്‍ റിപ്പോര്‍ട്ട് ചെയ്യാനും ഹൈക്കോടതി നിര്‍ദ്ദേശിച്ചു. കൊവിഡ് വ്യാപനം തടയുന്നതിനായി രാജ്യത്താകെ ലോക് ഡൗണ്‍ പ്രഖ്യാപിച്ചതിന്റെ പശ്ചാത്തലത്തിലാണ് ഹൈക്കോടതി ഫുള്‍ ബൈഞ്ച് വിചാരണ തടവുകാരുടെ പ്രശ്‌നം പ്രത്യേകമായി പരിഗണിച്ചത്. കോടതികള്‍ അടച്ച സാഹചര്യത്തില്‍ ജാമ്യഹര്‍ജികള്‍ പരിഗണിക്കാന്‍ സാധിക്കില്ല. തുടര്‍ന്നാണ് വിവിധ കേസുകളില്‍ റിമാന്‍ഡില്‍ കഴിയുന്ന പ്രതിള്‍ക്കും വിചാരണ തടവുകാര്‍ക്കും ഏപ്രില്‍ 30വരെ ഇടക്കാല ജാമ്യം അനുവദിക്കുന്നത്. അതേ സമയം ലോക്ഡൗണ്‍ നടപടികള്‍ ലംഘിച്ചാല്‍ ജാമ്യം റദ്ദാക്കി തിരികെ ജയിലലിടക്കാനും ഹൈക്കോടതി നിര്‍ദേശിക്കുന്നു.

ന്യൂഡല്‍ഹി: കോവിഡ് 19ന്റെ പശ്ചാത്തലത്തില്‍ രാജ്യത്ത് 21 ദിവസം ലോക്ക്ഡൗണ്‍ ആയിരുന്നിട്ടും ഏപ്രില്‍ 1 മുതല്‍ സംസ്ഥാനത്ത് പ്രവര്‍ത്തിക്കുന്ന പത്ത് ബാങ്കുകളെ നാല് വലിയ ബാങ്കുകളായി ലയിപ്പിക്കാനുള്ള പദ്ധതിയുമായി മുന്നോട്ട് പോകാന്‍ റിസര്‍വ് ബാങ്ക് തീരുമാനം. ലയിപ്പിക്കുന്ന ബാങ്കുകളുടെ ശാഖകള്‍ അടുത്ത മാസം മുതല്‍ സംയോജിപ്പിച്ച പുതിയ ബാങ്കുകളായി പ്രവര്‍ത്തിക്കും. മെഗാ ബാങ്ക് ഏകീകരണ പദ്ധതി പുരോഗതിയിലാണെന്നും ഏപ്രില്‍ 1 മുതല്‍ പ്രാബല്യത്തില്‍ വരുമെന്നും ധനമന്ത്രി നിര്‍മ്മല സീതാരാമന്‍ വ്യാഴാഴ്ച വ്യക്തമാക്കിയതിനെ തുടര്‍ന്നാണ് റിസര്‍വ് ബാങ്കിന്റെ പ്രസ്താവന.

പൊതുമേഖലയില്‍ വലിയ ബാങ്കുകള്‍ സൃഷ്ടിക്കുന്നതിനുള്ള ഏകീകരണ പദ്ധതിയുടെ ഭാഗമായി സര്‍ക്കാര്‍ ഉടമസ്ഥതയിലുള്ള 10 ബാങ്കുകളുടെ സംയോജന പദ്ധതി സംബന്ധിച്ച് മാര്‍ച്ച് 4 ന് സര്‍ക്കാര്‍ വിജ്ഞാപനം പുറത്തിറക്കിയിരുന്നു. കൊറോണ വൈറസ് പൊട്ടിപ്പുറപ്പെട്ടതിനെത്തുടര്‍ന്ന് ബാങ്കുകളുടെ ലയന പദ്ധതികള്‍ മാറ്റിവയ്ക്കണമെന്ന് ആവശ്യപ്പെട്ട് ബാങ്ക് ഉദ്യോഗസ്ഥരുടെ യൂണിയനുകള്‍ ഈ ആഴ്ച ആദ്യം പ്രധാനമന്ത്രിക്ക് കത്തെഴുതിയിരുന്നു.

ഓറിയന്റല്‍ ബാങ്ക് ഓഫ് കൊമേഴ്സും യുണൈറ്റഡ് ബാങ്ക് ഓഫ് ഇന്ത്യയും പഞ്ചാബ് നാഷണല്‍ ബാങ്കില്‍ ലയിപ്പിക്കും. കാനറ ബാങ്കിലേക്ക് സിന്‍ഡിക്കേറ്റ് ബാങ്കും അലഹബാദ് ബാങ്കിലേയ്ക്ക് ഇന്ത്യന്‍ ബാങ്കും ലയിപ്പിക്കും. ആന്ധ്ര, കോര്‍പ്പറേഷന്‍ ബാങ്കുകള്‍ യൂണിയന്‍ ബാങ്ക് ഓഫ് ഇന്ത്യയിലേക്ക് ലയിപ്പിക്കും. ഓറിയന്റല്‍ ബാങ്ക് ഓഫ് കൊമേഴ്സിന്റെയും യുണൈറ്റഡ് ബാങ്ക് ഓഫ് ഇന്ത്യയുടെയും ശാഖകള്‍ ഏപ്രില്‍ 1 മുതല്‍ പഞ്ചാബ് നാഷണല്‍ ബാങ്കിന്റെ ശാഖകളായും സിന്‍ഡിക്കേറ്റ് ബാങ്കിന്റെ ശാഖകള്‍ കാനറ ബാങ്കിന്റെ ശാഖകളായും പ്രവര്‍ത്തിക്കുമെന്ന് റിസര്‍വ് ബാങ്ക് അറിയിച്ചു

അലഹബാദ് ബാങ്ക് ശാഖകള്‍ ഇന്ത്യന്‍ ബാങ്കിന്റെ ശാഖകളായി പ്രവര്‍ത്തിക്കുമെന്നും ആന്ധ്ര ബാങ്കിന്റെയും കോര്‍പ്പറേഷന്‍ ബാങ്കിന്റെയും ശാഖകള്‍ അടുത്ത 2020-21 സാമ്പത്തിക വര്‍ഷം ആരംഭം മുതല്‍ യൂണിയന്‍ ബാങ്ക് ഓഫ് ഇന്ത്യയുടെ ശാഖകളായി പ്രവര്‍ത്തിക്കുമെന്നും റിസര്‍വ് ബാങ്ക് അറിയിച്ചു. ലയിപ്പിക്കുന്ന ബാങ്കുകളുടെ നിക്ഷേപകര്‍ ഉള്‍പ്പെടെയുള്ള ഉപഭോക്താക്കളെ ഈ ബാങ്കുകള്‍ ലയിപ്പിച്ച ബാങ്കുകളുടെ ഉപഭോക്താക്കളായി ഏപ്രില്‍ 1 മുതല്‍ കണക്കാക്കുമെന്ന് റിസര്‍വ് ബാങ്ക് അറിയിച്ചു.

ന്യൂഡല്‍ഹി: കൊറോണ വൈറസ് ബാധയുടെ പശ്ചാത്തലത്തില്‍ രാജ്യത്തെ വിവിധ മേഖലകള്‍ വലിയ പ്രതിസന്ധിയാണ് നേരിടുന്നത്. പല മേഖലകള്‍ക്കും കോടികളുടെ നഷ്ടമാണ് കണക്കാക്കുന്നത്.  രാജ്യത്തെ ടീ പ്ലാന്റേഷന്‍ കമ്പനികള്‍ക്ക് 2000 കോടിയുടെ സംയോജിത നഷ്ടമുണ്ടാകുമെന്നാണ് സൂചന. എസ്റ്റേറ്റ് ജീവനക്കാര്‍ക്ക് വൈറസ് ബാധയേല്‍ക്കാനുള്ള സാധ്യത തീരെ കുറവാണെന്ന ന്യായ വാദത്തില്‍ ടീ പ്ലാന്റേഷന്‍ കമ്പനികള്‍ തുറന്നിരുന്നുവെങ്കിലും പ്രധാനമന്ത്രി ലോക്ക് ഡൗണ്‍ പ്രഖ്യാപിച്ചതോടെ അടക്കേണ്ടി വന്നു.
രാജ്യത്ത് 1422 രജിസ്റ്റേര്‍ഡ് എസ്റ്റേറ്റുകളാണ് ഉള്ളത്. ഇത് കൂടാതെ രണ്ടര ലക്ഷത്തിലേറെ മൈക്രോസ്മോള്‍ പ്ലാന്റര്‍മാര്‍ വേറെയുമുണ്ട്. ഇവരെല്ലാം ജീവനക്കാരുടെ സുരക്ഷ മുന്‍നിര്‍ത്തി ഉല്‍പ്പാദനം നിര്‍ത്തിയിരിക്കുകയാണ്. കയറ്റുമതി തടസപ്പെട്ടതും ചരക്ക് ഗതാഗതത്തില്‍ ബുദ്ധിമുട്ട് നേരിട്ടതും ഇതിന് കാരണമാണ്.

ഈ 21 ദിവസം നിയന്ത്രണം തുടര്‍ന്നാല്‍ എല്ലാ കമ്പനികള്‍ക്കുമായി 100 ദശലക്ഷം കിലോഗ്രാം ഉല്‍പ്പാദനം കുറയും. 2000 കോടി മൂല്യം വരും ഇത്. അസമിലും പശ്ചിമ ബംഗാളിലും മാര്‍ച്ച് ഏപ്രില്‍ മാസത്തിലാണ് തങ്ങളുടെ ഉല്‍പ്പാദനത്തിന്റെ 15 ശതമാനവും ഉല്‍പ്പാദിപ്പിക്കുന്നത്.അസമില്‍ നിന്നാണ് രാജ്യത്ത് 50 ശതമാനത്തോളം ഉല്‍പ്പാദനം.

മധുരൈ: നാടന്‍ പാട്ട് കലാകാരിയും തെന്നിന്ത്യന്‍ അഭിനേത്രിയുമായ പാര്‍വൈ മുനിയമ്മ അന്തരിച്ചു. വാര്‍ധക്യസഹജമായ രോഗങ്ങളെ തുടര്‍ന്ന് ദീര്‍ഘനാളായി ചികിത്സയിലായിരുന്നു. മധുരൈയിലെ വീട്ടില്‍ വച്ചായിരുന്നു അന്ത്യം. 83 വയസായിരുന്നു. നിരവധി തമിഴ് സിനിമകളില്‍ പാടി അഭിനയിച്ച മുനിയമ്മ മമ്മൂട്ടി ചിത്രം ‘പോക്കിരിരാജ’യിലും പാടി അഭിനയിച്ചിട്ടുണ്ട്.

ക്ഷേത്രങ്ങളില്‍ നാടന്‍ പാട്ടുകള്‍ പാടിയാണ് മുനിയമ്മ കലാജീവിതം തുടങ്ങുന്നത്. ലക്ഷ്മണ്‍ ശ്രുതി എന്ന ട്രൂപ്പില്‍ അംഗമായതോടെ മുനിയമ്മയുടെ പാട്ടുകള്‍ ശ്രദ്ധ നേടി. വിക്രം നായകനായ ‘ധൂള്‍’ എന്ന ചിത്രത്തിലൂടെയായിരുന്നു ചലച്ചിത്ര പിന്നണിഗാനരംഗത്തും സിനിമയിലേക്കും എത്തുന്നത്.

മുനിയമ്മ പാടി അഭിനയിച്ച് ധൂളിലെ ”സിങ്കം പോല” എന്ന ഗാനം ഏറെ ശ്രദ്ധ നേടിയിരുന്നു. ‘തൊരണൈ’, ‘കോവില്‍’, ‘തമിഴ്പടം’, ‘മാന്‍കരാട്ടെ’, ‘വെങ്കൈ’, ‘വീരം’, ‘ഒരു സെക്കന്റ് ക്ലാസ് യാത്ര’ തുടങ്ങി മുപ്പത്തിയഞ്ചോളം ചിത്രങ്ങളില്‍ വേഷമിടുകയും ചിലതില്‍ ഗാനം ആലപിക്കുകയും ചെയ്തിട്ടുണ്ട്.

തൃശൂര്‍: കല്യാണ്‍ ജൂവലേഴ്സ് കൊറോണ വൈറസ് (കോവിഡ് 19) പ്രതിരോധപ്രവര്‍ത്തനങ്ങള്‍ക്കായി പത്ത് കോടി രൂപ നല്കും. സര്‍ക്കാരിന്‍റെയും തദ്ദേശ സ്വയംഭരണസ്ഥാപനങ്ങളുടെയും പ്രതിരോധപ്രവര്‍ത്തനങ്ങള്‍ക്കായിരിക്കും കല്യാണ്‍ ജൂവലേഴ്സ് ഈ തുക നല്കുക. ഭക്ഷ്യവസ്തുക്കളും അവശ്യസാധനങ്ങളും എത്തിക്കുന്നതിനാകും മുന്‍ഗണന.

കൊറോണ വൈറസ് ബാധ ആഗോള തലത്തില്‍ മനുഷ്യരാശിക്ക് വലിയ നാശമാണുണ്ടാക്കിയിരിക്കുന്നതെന്ന് കല്യാണ്‍ ജൂവലേഴ്സ് ചെയര്‍മാനും മാനേജിങ് ഡയറക്ടറുമായ ടി.എസ്.കല്യാണരാമന്‍ പറഞ്ഞു. വലിയ വെല്ലുവിളിയുടെ ഈ സമയത്ത് കേന്ദ്ര,സംസ്ഥാന സര്‍ക്കാരുകള്‍ അവര്‍ക്കാകുന്നതെല്ലാം ചെയ്യുന്നുണ്ട്. ഈ പ്രതിസന്ധിയുടെ ഗൗരവം ഉള്‍ക്കൊണ്ടുകൊണ്ടാണ് കല്യാണ ജൂവലേഴ്സ് 10 കോടി രൂപയുടെ സഹായപദ്ധതിയുമായി കൊറോണ പ്രതിരോധ പ്രവര്‍ത്തനങ്ങളില്‍ പങ്കാളികളാകുന്നത്.
തുക അര്‍ഹമായ പദ്ധതികള്‍ക്കായി വിനിയോഗിക്കുമെന്ന് ഉറപ്പുവരുത്തിക്കൊണ്ടായിരിക്കും കല്യാണ്‍ വിവിധ സഹായ ദൗത്യങ്ങളുമായി സഹകരിക്കുക. കൊറോണ വൈറസ് വ്യാപനം മൂലം പ്രതിസന്ധിയിലായവര്‍ക്ക് ഭക്ഷ്യവസ്തുക്കളും അവശ്യസാധനങ്ങളും ലഭ്യമാക്കുന്നതിനായിരിക്കും ആദ്യഘട്ടത്തില്‍ തുക ഉപയോഗപ്പെടുത്തുക. കല്യാണ്‍ ജൂവലേഴ്സിന്‍റെ കാരുണ്യപ്രവര്‍ത്തനങ്ങളുടെ ഭാഗമായാണ് 10 കോടി രൂപ നീക്കിവയ്ക്കുന്നത്.

ലോക്ക് ഡൗണ്‍ മൂലം കല്യാണ്‍ ജൂവലേഴ്സ് ഷോറൂമുകള്‍ അടഞ്ഞു കിടക്കുകയാണെങ്കിലും എണ്ണായിരത്തിലധികം ജീവനക്കാര്‍ക്കും ശമ്പളം പൂര്‍ണമായും നല്കുമെന്ന് കാട്ടി ചെയര്‍മാനും മാനേജിങ് ഡയറക്ടറുമായ ടി.എസ്. കല്യാണരാമന്‍ എല്ലാ ജീവനക്കാര്‍ക്കും കത്തയച്ചിരുന്നു.