കോൺഗ്രസ് നേതാവ് കെ വി തോമസ് ശനിയാഴ്ച നടത്താൻ തീരുമാനിച്ചിരുന്ന വാർത്താസമ്മേളനം മാറ്റിവച്ചു. സോണിയ ഗാന്ധി ഫോണിൽ വിളിച്ച് ആവശ്യപ്പെട്ടതിനാൽ ശനിയാഴ്ച തിരുവനന്തപുരത്ത് കേന്ദ്രനേതാക്കളുമായി ചർച്ചയ്ക്ക് പോകും. സോണിയ ഗാന്ധിയോട് ഒരുപാട് കടപ്പാടുണ്ട്. അവർ പറഞ്ഞാൽ പറ്റില്ലെന്ന് പറയില്ല. ഒരുപാട് കാര്യങ്ങൾ പറയാനുള്ളതുകൊണ്ടാണ് വാർത്താസമ്മേളനം വിളിച്ചത്. എന്നാൽ തിരുവനന്തപുരത്ത് പോകാൻ ആവശ്യപ്പെട്ടതുകൊണ്ടാണ് വാർത്താസമ്മേളനം മാറ്റിവെച്ചതെന്ന് കെ വി തോമസ് കൊച്ചിയിൽ മാധ്യമങ്ങളോട് പറഞ്ഞു.

ദുഃഖങ്ങളും പരിഭവങ്ങളും ഉണ്ടായിട്ടുണ്ട്. അതുകൊണ്ടാണ് പല പരിപാടികളിൽനിന്നും വിട്ടുനിന്നത്. മാധ്യമങ്ങളിൽ പല പ്രചാരണങ്ങളും നടന്നു. കോർപ്പറേഷൻ തെരഞ്ഞെടുപ്പിലടക്കം ധാരാളം വൈകാരിക പ്രശ്‌നങ്ങൾ നേരിട്ടതായും കെ വി തോമസ് പറഞ്ഞു.

English Summary : Press conference changed; KV Thomas said that Sonia Gandhi called

ഗൂഡല്ലൂര്‍: തമിഴ്‌നാട് മസിനഗുഡിയില്‍ കാട്ടാനയെ തീകൊളുത്തി കൊന്നു. ജനവാസ കേന്ദ്രത്തിലെത്തിയ കാട്ടാനയുടെ നേര്‍ക്ക് ഇരുചക്ര വാഹനത്തിന്റെ ടയറിനുള്ളില്‍ പെട്രോള്‍ നിറച്ചു തീകൊളുത്തി എറിയുകയായിരുന്നു.  ചെവിയില്‍ കുരുങ്ങിയ തീ പിടിച്ച ടയറുമായി ഓടിയ ആനയ്ക്ക് ഗുരുതരമായി പൊള്ളലേല്‍ക്കുകയായിരുന്നു. സംഭവത്തില്‍ റിസോര്‍ട്ടുടമകളായ രണ്ട് പേരെ വനംവകുപ്പ് കസ്റ്റഡിയിലെടുത്തു.  ക്രൂരമായ  ദൃശ്യങ്ങള്‍ സമൂഹമാദ്ധ്യമങ്ങളിലൂടെ പ്രചരിക്കുന്നുണ്ട്.

ഗുരുതര പരുക്കേറ്റ നിലയില്‍ മസിനഗുഡി- സിങ്കാര റോഡില്‍  കാട്ടാനയെ കഴിഞ്ഞയാഴ്ച വനംവകുപ്പ് കണ്ടെത്തുകയായിരുന്നു. ചെവിക്കു ചുറ്റും ചീഞ്ഞളിഞ്ഞ് അവശയായിരുന്നു ആന. മുറിവേറ്റ ഭാഗത്തുനിന്ന് രക്തവും പഴുപ്പും ഒഴുകുന്നുണ്ടായിരുന്നു. കടുവയോ മറ്റോ ആക്രമിച്ചതാകാമെന്നാണു കരുതിയിരുന്നത്. പിന്നീട് ഈ ആനയ്ക്കു ഭക്ഷണത്തില്‍ മരുന്നുവച്ചു നല്‍കിയെങ്കിലും കഴിഞ്ഞദിവസം ചരിഞ്ഞു.

വെള്ളിയാഴ്ച ഉച്ചയോടെയാണ് ആനയുടെ ദേഹത്ത് തീകൊളുത്തുന്നതിന്റെ ദൃശ്യങ്ങള്‍ പുറത്തുവന്നത്. ദിവസങ്ങള്‍ക്കു മുന്‍പ് മരവകണ്ടി ഡാമിലെ വെള്ളത്തില്‍ ഒരു ദിവസം മുഴുവന്‍ ഈ ആന ഇറങ്ങിനിന്നതു കണ്ടവരുണ്ട്. വേദന രൂക്ഷമാകുമ്പോഴാണ് ആന വെള്ളത്തിലിറങ്ങുന്നതെന്ന് നാട്ടുകാര്‍ പറഞ്ഞു.

പോസ്റ്റ്‌മോര്‍ട്ടം പരിശോധനയിലാണ് കാട്ടാന ക്രൂരമായ ആക്രമണത്തിന് ഇരയായതായി കണ്ടെത്തിയത്. കാട്ടാനയുടെ ഇടതു ചെവി മുറിഞ്ഞ് രക്തം വാര്‍ന്നിരുന്നു.

തിരുവനന്തപുരം:നിയമസഭാ തിരഞ്ഞെടുപ്പ് പ്രഖ്യാപനം ഫെബ്രുവരി 15ന് ശേഷം ഉണ്ടാകുമെന്ന് മുഖ്യ തിരഞ്ഞെടുപ്പ് ഓഫിസർ ടിക്കാറാം മീണ.പ്രഖ്യാപനം ഉണ്ടാകുന്ന ദിവസം മുതൽ പെരുമാറ്റച്ചട്ടം നിലവിൽവരും. ഏപ്രിൽ 30നകം തെരഞ്ഞെടുപ്പ് നടപടികൾ പൂർത്തിയാക്കും. കേരളത്തിൽ തെരഞ്ഞെടുപ്പ് ഒറ്റഘട്ടമായി നടത്താനാണ് സാധ്യത. ചെറിയ സംസ്ഥാനമായതിനാൽ ഒറ്റഘട്ടം മതിയെന്നാണ് തീരുമാനം.

തെരഞ്ഞെടുപ്പ് കമ്മിഷൻ ഇപ്പോൾ അസം, ബംഗാൾ സംസ്ഥാനങ്ങൾ സന്ദർശിക്കുകയാണ്. അതിനുശേഷം കേരളത്തിലെത്തും. അപ്പോൾ രാഷ്ട്രീയ പാർട്ടികൾക്ക് ആവശ്യങ്ങൾ ഉന്നയിക്കാമെന്നു ടിക്കാറാം മീണ പറഞ്ഞു.അന്തിമ വോട്ടർ ഇന്ന് പ്രസിദ്ധീകരിക്കും. വോട്ടർപട്ടികയിൽ പേരു ചേർക്കാൻ തുടർന്നും അവസരം ഉണ്ടാകുമെന്നും മീണ പറഞ്ഞു.

English Summary :Meena hints that the assembly elections are in April and will be held in a single phase

ന്യൂഡൽഹി :കാർഷികനിയമങ്ങൾ പിൻവലിക്കില്ലെന്ന പിടിവാശി കേന്ദ്രം തുടരുന്ന സാഹചര്യത്തിൽ കർഷകപ്രക്ഷോഭം  രാഷ്ട്രീയപോരാട്ടമായി മാറും. എൻഡിഎയും ബിജെപിയും ഒഴികെയുള്ള പാർടികൾ ഇതിനകം കർഷകപ്രക്ഷോഭത്തിന്‌ പിന്തുണ പ്രഖ്യാപിച്ചു‌.

പ്രക്ഷോഭം സ്വതന്ത്രമായി ഉയർന്നുവന്നതാണെങ്കിലും രാഷ്ട്രീയസ്വഭാവമുള്ള ആവശ്യങ്ങളാണ്‌ കർഷകർ ഉയർത്തുന്നത്‌. സമരം അവസാനിപ്പിക്കാൻ രാഷ്ട്രീയതീരുമാനമാണ്‌ കേന്ദ്രം എടുക്കേണ്ടതും.

രാജ്യത്തെ കാർഷികമേഖലയിലെ സാമൂഹ്യ, സാമ്പത്തിക വശങ്ങളുമായി ബന്ധപ്പെട്ടതാണ്‌ കർഷകരുടെ ആശങ്കകൾ. കേന്ദ്രത്തിന്റെ നിയമങ്ങൾ സൃഷ്ടിക്കുന്ന ആഘാതം സ്വയം തിരിച്ചറിഞ്ഞാണ്‌ കർഷകർ പോരാട്ടം തുടങ്ങിയത്‌. സമരവേദികളിൽനിന്ന്‌ രാഷ്ട്രീയനേതാക്കൾ വിട്ടുനിന്നത്‌ ഈ പശ്ചാത്തലത്തിലാണ്‌. എന്നാൽ, പ്രക്ഷോഭകരോട്‌ കേന്ദ്രം സ്വീകരിച്ച നിലപാട്‌ ബിജെപിയിതര രാഷ്ട്രീയപാർടികൾ സമരത്തിന്‌ പിന്തുണ പ്രഖ്യാപിക്കാൻ ഇടയാക്കി. ഡിസംബർ എട്ടിന്റെ ഭാരത ഹർത്താലിന്‌ 25 രാഷ്ട്രീയപാർടി പിന്തുണ നൽകി. ഇതിൽ ചില പാർടികൾ മുമ്പ്‌ എൻഡിഎയുടെ ഭാഗമായിരുന്നു. മറ്റു ചില പാർടികൾ പാർലമെന്റിൽ കാർഷികനിയമങ്ങളെ അനുകൂലിച്ചവരാണ്‌.

കേന്ദ്ര ട്രേഡ്‌ യൂണിയനുകളുടെയും ജീവനക്കാരുടെ ഫെഡറേഷനുകളുടെയും പൊതുവേദി കർഷകസമരത്തിന്‌ ഐക്യദാർഢ്യം പ്രഖ്യാപിച്ചു. നവംബർ 26ന്റെ പണിമുടക്കിൽ 30 കോടിയോളം പേർ പങ്കാളികളായി. വരുംദിവസങ്ങളിൽ വിവിധ രാജ്‌ഭവനുകൾക്ക്‌ മുന്നിൽ നടക്കുന്ന ധർണകളിൽ കർഷകരും തൊഴിലാളികളും ബഹുജനങ്ങളും പങ്കെടുക്കും.
ഇന്ന്‌ പത്താംവട്ട ചർച്ചകർഷക നേതാക്കളും കേന്ദ്രമന്ത്രിമാരും തമ്മിലുള്ള പത്താംവട്ട ചർച്ച ബുധനാഴ്‌ച നടക്കും. കാർഷികനിയമങ്ങൾ പിൻവലിക്കുകയെന്ന ആവശ്യത്തിൽ വിട്ടുവീഴ്ച ചെയ്യില്ലെന്ന്‌ സമരസമിതി വ്യക്തമാക്കി. മൂന്ന്‌ കാർഷികനിയമവും വൈദ്യുതിബില്ലും ഇല്ലാതാകണമെന്ന ആവശ്യത്തിന്മേലാണ്‌ നൂറുകണക്കിന്‌ കർഷകസംഘടനകൾ ഒന്നിച്ചിരിക്കുന്നത്‌. ഇതിന്മേൽ വെള്ളം ചേർക്കാൻ കഴിയില്ലെന്നും‌ നേതാക്കൾ പറഞ്ഞു.

സംസ്ഥാനത്ത്‌ പെട്രോൾ, ഡീസൽ വില റെക്കോഡ്  തകർത്ത്‌ കുതിക്കുന്നു. കൊച്ചി നഗരത്തിന് പുറത്ത് ആദ്യമായി ഡീസൽ വില 80 രൂപ കടന്നു. തിരുവനന്തപുരത്ത്‌ 81.26 രൂപയായി. പെട്രോൾ വില ലിറ്ററിന്‌ കൊച്ചിയിൽ 85.50 രൂപയും തിരുവനന്തപുരത്ത്‌ 87.23 രൂപയുമായി.  കോഴിക്കോട് പെട്രോൾ വില 85.66 രൂപയായും ഡീസൽ 79.82 രൂപയായും ഉയർന്നു.ചൊവ്വാഴ്ച പെട്രോളിന്‌ ലിറ്ററിന് 25 പൈസയും ഡീസലിന് 27 പൈസയുമാണ് കൂട്ടിയത്.  

രണ്ടുമാസത്തിൽ പെട്രോളിന് 4.44  രൂപയും ഡീസലിന് 5.09 രൂപയുമാണ് കൂട്ടിയത്. (നവംബർ 18ന്‌ കൊച്ചിയിൽ പെട്രോളിന്‌ 81.16രൂപ, ഡീസലിന്‌ 74.56 രൂപ) 

ആറുമാസത്തിനിടെ പെട്രോളിന്‌ 14. 04 രൂപയും ഡീസലിന്‌ 13.91 രൂപയും കൂട്ടി. (ജൂൺ 5ന്‌ പെട്രോളിന്‌ 71.46, ഡീസലിന്‌ 65.73 രൂപ).അന്താരാഷ്‌ട്ര വിപണിയിൽ എണ്ണയ്‌ക്ക്‌ വില കുറഞ്ഞുനിൽക്കുന്ന സമയത്താണ്‌ ഈ വർധന‌. മുമ്പ്‌ ഡീസലിന്‌ 79ഉം പെട്രോളിന്‌ 85 രൂപയുമായി ഉയർന്ന 2018ഒക്‌ടോബറിൽ‌ അസംസ്‌കൃത എണ്ണയ്‌ക്ക്‌ ബാരലിന്‌ 84 ഡോളർ ഉണ്ടായിരുന്നു. എന്നാൽ ചൊവ്വാഴ്‌ച വെറും 52 ഡോളറാണുള്ളത്‌. കഴിഞ്ഞ വർഷം രണ്ടു തവണയായി കേന്ദ്രസർക്കാർ പെട്രോളിന്‌ 13 രൂപയും ഡീസലിന്‌ 16 രൂപയും എക്‌സൈസ്‌ നികുതി കൂട്ടിയതാണ്‌ വില ഇത്രയും ഉയരാൻ കാരണം.

English Summary : Fuel prices on fire

വാളയാർ: വാളയാറിൽ പ്രായപൂർത്തിയാവാത്ത സഹോദരിമാർ പീഡനത്തിനിരയായി ദൂരൂഹസാഹചര്യത്തിൽ മരിച്ച കേസിൽ പുനർവിചാരണ നടപടിക്രമങ്ങൾക്ക് പാലക്കാട് പോക്സോ കോടതിയിൽ ഇന്ന് തുടക്കം.

സർക്കാർ നൽകിയ ഹർജിയിൽ വിചാരണ കോടതി വിധി റദ്ദാക്കി പുനർവിചാരണയ്ക്ക് ഹൈക്കോടതി അനുമതി നൽകിയിരുന്നു.  പ്രതികളോട് ജനുവരി 20ന് കോടതിയിൽ ഹാജരാകാൻ ഉത്തരവിട്ടിരുന്നു. 

സംസ്ഥാന സർക്കാരും പെൺകുട്ടികളുടെ അമ്മയും പ്രതികളെ വിചാരണ കോടതി വെറുതെ വിട്ട വിധിക്കെതിരെ നൽകിയ ഹർജി പരിഗണിച്ചാണ് ജനുവരി 6ന് ഹൈക്കോടതി വിചാരണ കോടതി വിധി റദ്ദാക്കി പുനർവിചാരണയ്ക്ക് ഉത്തരവിട്ടത്.പ്രതികളായ വി മധു, എം മധു, ഷിബു എന്നിവരാണ് ഇന്ന് കോടതിയിൽ ഹാജരാകേണ്ടത്.കേസിൽ പ്രതിയായിരുന്ന മൂന്നാം പ്രതി പ്രദീപ്കുമാർ ഹൈക്കോടതിയിലെ വിചാരണക്കിടെ ആത്മഹത്യ ചെയ്തിരുന്നു.

പെൺകുട്ടികളുടെ അമ്മയുടെ ആവശ്യ പ്രകാരം കേസ് ക്രൈംബ്രാഞ്ചിന് വിടാൻ സംസ്ഥാന സർക്കാർ തീരുമാനിച്ചിട്ടുണ്ട്.
2017 ജനുവരി മൂന്നിന് 13 വയസ്സുള്ള പെൺകുട്ടിയെയും 54 ദിവസങ്ങൾക്ക് ശേഷം മാർച്ച് നാലിന് 9 വയസ്സുകാരിയായ സഹോദരിയെയും തൂങ്ങി മരിച്ച നിലയിൽ വാളയാറിലെ ഒറ്റമുറി വീട്ടിൽ കണ്ടെത്തുകയായിരുന്നു.

പെൺകുട്ടികൾ പീഢനത്തിനിരയായതായി പോസ്റ്റ്മോർട്ടം റിപ്പോർട്ടിൽ കണ്ടെത്തിയെങ്കിലും പ്രതികളെ മതിയായ തെളിവില്ലെന്ന കാരണത്താൽ പാലക്കാട് പോക്സോ കോടതി 2019 ഒക്ടോബർ 25ന് വെറുതെ വിടുകയായിരുന്നു.

English Summary : Re-trial proceedings in Walayar case from today