മലയാളത്തിലെ സൂപ്പര്‍ഹിറ്റ് ചിത്രങ്ങളില്‍ ഒന്നായിരുന്നു ദൃശ്യം. മോഹന്‍ലാല്‍-ജീത്തു ജോസഫ് ചിത്രത്തിന്റെ നിരവധി ഇന്ത്യന്‍ ഭാഷകളിലും  സിംഹള ഭാഷയിലും റീമേക്ക് ചെയ്തിരുന്നു. ഇപ്പോള്‍ ചൈനീസ് പതിപ്പിന്റെ നിര്‍മ്മാണം പൂര്‍ത്തിയാക്കി തിയേറ്ററുകളില്‍ എത്താനൊരുങ്ങുകയാണ്.
 

ക്രിസ്മസ് റിലീസ് ആയി ഈ മാസം 20ന് റിലീസ് ചെയ്യപ്പെടാന്‍ ഇരിക്കുന്ന ചിത്രത്തിന്റെ ട്രെയിലർ പുറത്തെത്തി. ‘ഷീപ്പ് വിത്തൗട്ട് എ ഷെപ്പേര്‍ഡ്’ എന്നാണ് ദൃശ്യം ചൈനീസ് റീമേക്കിന്റെ പേര്.

യാങ് സിയാവോയാണ് മോഹന്‍ലാല്‍ മലയാളത്തില്‍ അവതരിപ്പിച്ച കഥാപാത്രത്തെ ചൈനീസില്‍ അവതരിപ്പിക്കുന്നത്. ‘ലീ’ എന്നാണ് നായക കഥാപാത്രത്തിന്റെ പേര്. സാം ക്വ ആണ് സംവിധായകന്‍. രണ്ട് മിനിറ്റ് ദൈര്‍ഘ്യമുള്ള ട്രെയിലർ ആണ് പുറത്തെത്തിയിരിക്കുന്നത്.

പ്രക്ഷകരുടെ ഇഷ്ട താരജോഡികളാണ് പൂര്‍ണിമയും ഇന്ദ്രജിത്തും. വിവാഹ വാര്‍ഷികത്തില്‍ ഇന്ദ്രജിത്തിനൊപ്പമുള്ള ആദ്യ ചിത്രം പങ്കുവെച്ച് പൂര്‍ണിമ. അമ്മ മല്ലിക സുകുമാരന്‍ വര്‍ഷങ്ങള്‍ക്ക് മുന്‍പ് പകര്‍ത്തിയ ചിത്രമാണ് പൂര്‍ണിമ ഇന്‍സ്റ്റഗ്രാമിയില്‍ പങ്കുവെച്ചത്. ഒപ്പം പ്രണയകാല ഓര്‍മ്മകളും. പൂര്‍ണിമയുടെ ഹൃദയം തൊടുംകുറിപ്പ് സോഷ്യല്‍ മീഡിയയില്‍ ശ്രദ്ധ നേടുകയാണ്.

”അന്നാണ് അവന്‍ എന്നോട് വിവാഹാഭ്യര്‍ത്ഥന നടത്തിയത്. ഒരുമിച്ചുള്ള ആദ്യചിത്രം പകര്‍ത്തിയ ദിവസം. എനിക്ക് 21, അവന് 20. ഞാന്‍ നടിയും അവന്‍ വിദ്യാര്‍ത്ഥിയും. ഈ ദിവസം എനിക്ക് വ്യക്തമായി ഓര്‍മ്മയുണ്ട്. എത്രമാത്രം പ്രണയത്തിലായിരുന്നു നമ്മള്‍. എല്ലാം ഇന്നലെ കഴിഞ്ഞപോലെ തോന്നുന്നു…

‘ഈ ചിത്രം പകര്‍ത്തിയത് മറ്റാരുമല്ല, അമ്മ മല്ലികയാണ്. ഈ ചിത്രമെടുക്കുമ്പോള്‍ ഞങ്ങളുടെ തലയില്‍ എന്തായിരുന്നുവെന്ന് അമ്മക്ക് അറിയാമായിരുന്നോ എന്നെനിക്ക് അതിശയമാണ്. അമ്മയെ ഇപ്പോള്‍ നന്നായി അറിയാവുന്നത് കൊണ്ട്, അത് അറിയാമായിരുന്നു എന്നാണിപ്പോള്‍ തോന്നുന്നത്. മൂന്ന് വര്‍ഷത്തെ പ്രണയവും പതിനേഴ് വര്‍ഷത്തെ ദാമ്പത്യവും. വിവാഹവാര്‍ഷികാശംസകള്‍.” പൂര്‍ണിമ കുറിച്ചു.

മലയാളികളുടെ പ്രിയ നടിയായിരുന്ന ലിസിയും സംവിധായകന്‍ പ്രിയദര്‍ശനും 24 വര്‍ഷത്തെ ദാമ്പത്യ ജീവിതത്തിനുശേഷമാണ് 2014ല്‍ വിവാഹമോചിതരായത്.  സിനിമാ രംഗം ഏറെ ഞെട്ടലോടെയാണ് ഈ വാര്‍ത്ത കേട്ടത്. പലരും ഇരുവരെയും ഒന്നിപ്പിക്കാന്‍ ശ്രമിച്ചെങ്കിലും നടന്നില്ല. 1990 ഡിസംബര്‍ 13 നായിരുന്നു ഇരുവരുടേയും വിവാഹം. വിവാഹത്തോടെ ലിസി സിനിമയില്‍ നിന്ന് മാറി നിന്നിരുന്നു. വിവാഹ വാര്‍ഷിക ദിനത്തില്‍ ഓര്‍മ്മകളെ തിരിച്ചുവിളിക്കുകയാണ് പ്രിയദര്‍ശന്‍.

വേര്‍പിരിഞ്ഞെങ്കിലും വിവാഹവാര്‍ഷിക ദിനത്തില്‍ ഓര്‍മ്മകളെ വീണ്ടും കൂട്ടുവിളിച്ചിരിക്കുകയാണ് പ്രിയദര്‍ശന്‍. ‘ഓര്‍മകള്‍ ഒരിക്കലും മരിക്കില്ല’ എന്ന ക്യാപ്ഷനോടെ തങ്ങളുടെ വിവാഹ തീയതിയും വിവാഹ ഫൊട്ടോയും ഫെയ്‌സ്ബുക്കില്‍ ഷെയര്‍ ചെയ്തിരിക്കുകയാണ് അദ്ദേഹം.

പ്രിയദര്‍ശനുമായി വേര്‍പിരിഞ്ഞ ലിസി സിനിമയിലേക്ക് മടങ്ങിയെത്തുമെന്നായിരുന്നു ഏവരും കരുതിയത്. എന്നാല്‍ കണക്കുകൂട്ടലുകളെ തെറ്റിച്ച് ചെന്നൈയില്‍ ഡബ്ബിംഗ് സ്റ്റുഡിയോ തുടങ്ങി സിനിമ വ്യവസായത്തിലേക്ക് കടക്കുകയായിരുന്നു ലിസി. സ്റ്റുഡിയോ നോക്കി നടത്തുന്നതു തന്നെയാവും തന്റെ മുന്‍ഗണനയെന്നും വേഷങ്ങള്‍ നല്ലതാണെങ്കില്‍ വര്‍ഷത്തില്‍ രണ്ടോ മൂന്നോ സിനിമകള്‍ ചെയ്യണമെന്നാണ് ആഗ്രഹമെന്നും ലിസി പിന്നീട് പറഞ്ഞിരുന്നു.

ഇവര്‍ക്ക് കല്യാണി, സിദ്ധാര്‍ഥ് എന്നീ രണ്ടു മക്കളുണ്ട്. അമ്മയെപ്പോലെ അഭിനയരംഗത്തേക്കാണ് കല്യാണി എത്തിയത്. വിഎഫ്എക്സിലായിരുന്നു സിദ്ധാര്‍ഥ് താല്‍പര്യം പ്രകടിപ്പിച്ചത്. പ്രിയദര്‍ശന്റെ പുതിയ സിനിമയായ ‘മരക്കാര്‍ അറബിക്കടലിന്റെ സിംഹത്തില്‍’ ഇരുവരും അച്ഛനൊപ്പം പ്രവര്‍ത്തിക്കുന്നുണ്ട്. സത്യന്‍ അന്തിക്കാടിന്റെ മകന്‍ അനൂപ് സത്യന്‍ സംവിധാനം ചെയ്യുന്ന ചിത്രത്തിലും കല്യാണി അഭിനയിക്കുന്നുണ്ട്.

കൊച്ചി: പ്രൊഡ്യൂസേഴ്‌സ് അസോസിയേഷന്‍ തനിക്ക് ഏര്‍പ്പെടുത്തിയ വിലക്ക് നീങ്ങുമെന്ന് പ്രതീക്ഷിക്കുന്നതായി നടന്‍ ഷെയ്ന്‍ നിഗം. ഒരു വാര്‍ത്താ ചാനലിന് നല്‍കിയ അഭിമുഖത്തിലാണ് ഷെയ്ന്‍ ഇക്കാര്യം വ്യക്തമാക്കിയത്.

നിര്‍മ്മാതാക്കള്‍ക്ക് വിഷമമുണ്ടാകുന്ന തരത്തില്‍ താന്‍ പ്രതികരിച്ചതിന് നടത്തിയ ഖേദപ്രകടനം സ്വീകരിക്കുമെന്നാണ് കരുതുന്നത്. പ്രൊഡ്യൂസേഴ്‌സ് അസോസിയേഷന്‍ യോഗത്തില്‍ തനിക്കും കൂടി അനുകൂലമായ തീരുമാനമുണ്ടാകുമെന്ന് പ്രതീക്ഷിക്കുന്നുണ്ടെന്നും പ്രശ്‌ന പരിഹാരത്തിന് താരസംഘടനയായ അമ്മ ഇടപെടുമെന്ന് കുരുതുന്നുവെന്നും ഷെയ്ന്‍ പ്രതികരിച്ചു. മുടങ്ങിപ്പോയ മൂന്ന് സിനിമകളും പൂര്‍ത്തിയാക്കാന്‍ താന്‍ തയാറാണെന്നും താരം കൂട്ടിച്ചേര്‍ത്തു.

ചലച്ചിത്രമേളയ്ക്കിടെ മാദ്ധ്യമങ്ങളെ കാണുന്നതിനിടെയാണ് ഷെയ്ന്‍ നിര്‍മ്മാതാക്കള്‍ക്കെതിരെ മോശം പരാമര്‍ശനം നടത്തിയത്. സിനിമ മുടങ്ങിയ നിര്‍മ്മാതാക്കളുടെ മനോവിഷമം കാണുമോ എന്ന ചോദ്യത്തിന് നിര്‍മ്മാതാക്കള്‍ക്ക് മനോവിഷമമാണോ മനോരോഗമാണോ എന്നായിരുന്നു താരത്തിന്റെ മറുചോദ്യം.
ഇതോടെ ഇനി ഷെയ്‌നുമായി ചര്‍ച്ചയില്ലെന്ന് പ്രൊഡ്യൂസേഴ്‌സ് അസോസിയേഷന്‍ പ്രഖ്യാപിച്ചു. വിഷയം രമ്യമായി പരിഹരിക്കാന്‍ ഇടപെട്ട ഫെഫ്കയും അമ്മയും ചര്‍ച്ചകളില്‍ നിന്നും പിന്മാറുകയും ചെയ്തു. പ്രതികരണത്തില്‍ ഒറ്റപ്പെട്ട ഷെയ്ന്‍ പിന്നീട് നവമാധ്യമത്തിലൂടെ മാപ്പ് പറഞ്ഞിരുന്നു.

മണിരത്നം സംവിധാനം ചെയ്യുന്ന ബ്രഹ്മാണ്ഡ ചിത്രം ‘പൊന്നിയിന്‍ സെല്‍വനി’ല്‍ നിന്നും നടി കീര്‍ത്തി സുരേഷ് പിന്മാറി. രജനീകാന്തിനെ നായകനാക്കി ശിവ സംവിധാനം ചെയ്യുന്ന ചിത്രത്തില്‍ നായിക വേഷം ചെയ്യുന്നതിനാലാണ് കീര്‍ത്തി ചിത്രത്തില്‍ നിന്ന് പിന്മാറിയതെന്ന് റിപ്പോര്‍ട്ട്.

അതേസമയം ‘പൊന്നിയിന്‍ സെല്‍വന്റെ’ ചിത്രീകരണം കഴിഞ്ഞ ദിവസം തായ്‌ലൻഡ് ല്‍ ആരംഭിച്ചു. കല്‍ക്കി കൃഷ്ണമൂര്‍ത്തിയുടെ നോവല്‍ അടിസ്ഥാനമാക്കിയാണ് ചിത്രം ഒരുക്കുന്നത്. അരുള്‍മൊഴിവര്‍മ്മന്‍ അഥവാ രാജ രാജ ചോളന്‍ ഒന്നാമന്റെ കഥ പറയുന്ന ചിത്രത്തില്‍ വിക്രമാണ് നായകനായി എത്തുന്നത്. ഐശ്വര്യ റായി, വിക്രം, കാര്‍ത്തി, ജയം രവി, ലാല്‍ എന്നിവരാണ് ചിത്രത്തിലെ താരങ്ങള്‍. ‘ചെക്കാ ചിവന്ത വാന’മാണ് ഒടുവില്‍ തിയേറ്ററിലെത്തിയ മണിരത്‌നം ചിത്രം.

ബോളിവുഡില്‍ അരങ്ങേറ്റത്തിനൊരുങ്ങി ആഷിഖ് അബു. ശ്യാം പുഷ്‌കരന്‍ തിരക്കഥയൊരുക്കുന്ന ചിത്രത്തില്‍ ഷാരൂഖ് ഖാനാണ് നായകന്‍. ഷാരൂഖ് ഖാനൊപ്പമുള്ള ചിത്രവും ആഷിക് അബു ഫേസ്ബുക്ക്, ഇന്‍സ്റ്റഗ്രാം അക്കൗണ്ടുകളിലൂടെ പങ്കുവച്ചു.
ഷാരൂഖിന്റെ മുംബൈ ബാന്ദ്രയിലെ വീടായ ‘മന്നത്തി’ല്‍ വച്ചാ് സിനിമയെ സംബന്ധിച്ച് ചര്‍ച്ച നടന്നത്.

ആഷിക് അബുവിന്റെ കഴിഞ്ഞ ചിത്രം ‘വൈറസ്’ കാണാനിടയായ ഷാരൂഖ് ഖാന്‍ അദ്ദേഹത്തെ ചര്‍ച്ചയ്ക്കായി ക്ഷണിക്കുകയായിരുന്നു. ഷാരൂഖിനൊപ്പമുള്ള ചര്‍ച്ച രണ്ടര മണിക്കൂറോളം നീണ്ടെന്നും 2020 അവസാനത്തോടെ ചിത്രീകരണം ആരംഭിക്കുമെന്നും ആഷിക് അബുവിനെ ഉദ്ധരിച്ച് ദി ക്യൂ റിപ്പോര്‍ട്ട് ചെയ്തു. മലയാളത്തില്‍ ചെയ്ത സിനിമകളുടെ റീമേക്ക് ആയിരിക്കില്ല ഷാരൂഖിനെ നായകനാക്കി ബോളിവുഡില്‍ ഒരുക്കുന്നതെന്നും ആഷിക് പ്രതികരിച്ചു.

കേരളത്തില്‍ വലിയ നിരൂപകശ്രദ്ധ നേടിയ ‘വൈറസ്’ ഓണ്‍ലൈന്‍ സ്ട്രീമിംഗിലൂടെ കേരളത്തിന് പുറത്തുള്ള പ്രേക്ഷകരിലേക്കും എത്തിയ ചിത്രമാണ്. ഫിലിം കമ്പാനിയന്‍ പിവിആറുമായി ചേര്‍ന്ന് മുംബൈയില്‍ സിനിമയുടെ പ്രത്യേക സ്‌ക്രീനിംഗും ചര്‍ച്ചയും സംഘടിപ്പിച്ചിരുന്നു. ആഷികിനൊപ്പം പാര്‍വ്വതിയും റിമ കല്ലിങ്കലുമൊക്കെ ഈ പരിപാടിയില്‍ പങ്കെടുത്തിരുന്നു.