നടി പാര്‍വതി തിരുവോത്തിനെ സമൂഹ മാദ്ധ്യമങ്ങളിലൂടെ അപമാനിക്കുകയും നടിയെ കുറിച്ച് ബന്ധുക്കള്‍ക്ക് മോശം സന്ദേശങ്ങള്‍ അയയ്ക്കുകയും ചെയ്ത, അഭിഭാഷകനും സംവിധായകനുമെന്ന് അവകാശപ്പെടുന്ന പാലക്കാട് നെന്‍മാറ സ്വദേശി കിഷോര്‍ (40 ) പിടിയില്‍. തിരുവനന്തപുരത്തു വെച്ചാണ് ഇയാള്‍ പിടിയിലായത്.
പാര്‍വതിയെ മോശമായി ചിത്രീകരിക്കുന്ന സന്ദേശങ്ങള്‍ പിതാവിനും സഹോദരനും ഇയാള്‍ പല പ്രാവശ്യം അയച്ചതായി പൊലീസ് പറയുന്നു. പാര്‍വതിയുടെ കോഴിക്കോട്ടുള്ള വീട്ടിലെത്തിയും കിഷോര്‍ മോശമായി സംസാരിച്ചിട്ടുണ്ട്. പാര്‍വ്വതിയുടെ സഹോദരനെ ഫേസ്ബുക്ക് മെസഞ്ചര്‍ വഴിയാണ് യുവാവ് ബന്ധപ്പെട്ടത്. പാര്‍വതിയെ കുറിച്ച് അത്യാവശ്യകാര്യം സംസാരിക്കാനുണ്ടെന്ന് പറഞ്ഞായിരുന്നു തുടക്കം. പാര്‍വതി എവിടെയാണെന്നും മറ്റും തിരക്കിയപ്പോള്‍ പാര്‍വതി അമേരിക്കയിലാണെന്ന് സഹോദരന്‍ മറുപടി നല്‍കി. എന്നാല്‍ പാര്‍വതി അമേരിക്കയില്‍ അല്ലെന്നും കൊച്ചിയില്‍ ഉണ്ടെന്നും ഏതോ മാഫിയ സംഘത്തില്‍പ്പെട്ട് പ്രശ്നത്തിലാണെന്നും ഇയാള്‍ സഹോദരനോട് പറഞ്ഞു. പാര്‍വതിയുമായി താന്‍ പ്രണയത്തിലാണെന്നു പോലും ഇയാള്‍ പറഞ്ഞു.
