കോട്ടയം: അമേരിക്കയില്‍ കോട്ടയം സ്വദേശി കോവിഡ് ബാധിച്ച് മരിച്ചു. ന്യൂയോര്‍ക്ക് പബ്ലിക് ലൈബ്രറിയിലെ മുന്‍ ജീവനക്കാരനും റോക്ലാന്‍ഡ് കൗണ്ടി വാലി കോട്ടജിലെ താമസക്കാരനുമായ പൊന്‍കുന്നം സ്വദേശി പടന്നമാക്കല്‍ മാത്യു ജോസഫ് (78) ആണ് മരിച്ചത്.

അമ്പതുവര്‍ഷമായി അമേരിക്കയില്‍ സ്ഥിരതാമസമാണ് മാത്യു ജോസഫ്. സംസ്‌കാരം ന്യൂയോര്‍ക്കില്‍ കോവിഡ് പ്രോട്ടോക്കോള്‍ അനുസരിച്ച് നടത്തും. ഈരാറ്റുപേട്ട കൂട്ടക്കല്ല് വെട്ടത്ത് റോസക്കുട്ടിയാണ് ഭാര്യ. ഡോ. ജിജോ ജോസഫ് (ന്യൂയോര്‍ക്ക്), ഡോ. ജിജി അഞ്ജലി ജോസഫ് എന്നിവര്‍ മക്കളാണ്. അബി (ഫിലാഡല്‍ഫിയ) മരുമകനാണ്.
ഇതോടെ അമേരിക്കയില്‍ കോവിഡ് ബാധിച്ചു മരിച്ച മലയാളികളുടെ എണ്ണം 12 ആയി. മരിച്ചവരില്‍ 11 പേരും ന്യൂയോര്‍ക്കില്‍ ഉള്ളവരാണ്. നാല് സ്ത്രീകളടക്കം 16 പേര്‍ക്ക് രോഗം സ്ഥിരീകരിച്ചിട്ടുണ്ട്.

തിരുവനന്തപുരം: ലോക്ക് ഡൗണ്‍ പ്രഖ്യാപിച്ച ശേഷം വൈദ്യുതി ബോര്‍ഡിന്റെ നഷ്ടം 225 കോടി രൂപയായി. ഉപയോഗിക്കാത്ത വൈദ്യുതിക്ക് കായകുളം എന്‍.ടി.പി.സി നിലയത്തിന് അടക്കം നിശ്ചിത ചാര്‍ജ് കൊടുക്കുന്നതു കൂടി കൂട്ടിയാല്‍ നഷ്ടം ഇരട്ടിക്കും. ലോക്ക് ഡൗണ്‍ ഏര്‍പ്പെടുത്തി 20 ദിവസമാകുമ്പോള്‍ വൈദ്യുതി വില്‍ക്കാത്തതു മൂലം മാത്രം കെഎസ്ഇബിക്കു വരുന്നനഷ്ടം 280 കോടി രൂപയാകും. വൈദ്യുതി ഉപയോഗത്തിലെ ഗണ്യമായ കുറവാണ് ഇതിനുകാരണം. വൈദ്യുതി വില്‍പന കുറഞ്ഞതോടെ ദിനംപ്രതി ശരാശരി 14 കോടി രൂപയാണു നഷ്ടം. വൈദ്യുതി ബില്‍ ഇനത്തിലും മറ്റും 45 കോടി രൂപയാണ് വൈദ്യുതി ബോര്‍ഡിനു ദിവസവും കിട്ടിക്കൊണ്ടിരുന്നത്.

അത് ഇപ്പോള്‍ അഞ്ചുകോടി രൂപയായി കുറഞ്ഞു. ഉപഭോക്താക്കള്‍ക്ക് വൈദ്യുതി ബില്‍തുക അടയ്ക്കാന്‍ സാവകാശം നല്‍കിയതോടെയാണ് ദൈനംദിന വരുമാനത്തില്‍ കുറവുണ്ടായത്. കേന്ദ്ര സര്‍ക്കാരിന്റെ കോവിഡ് പാക്കേജില്‍ വൈദ്യുതി പ്രസരണ വിതരണ കമ്പനികളെയും ഉള്‍പ്പെടുത്തണമെന്ന ആവശ്യം ശക്തമായിരിക്കുയാണ്. വന്‍തോതില്‍ വൈദ്യുതി ഉപയോഗിക്കുകയും ഉയര്‍ന്നനിരക്കു നല്‍കുകയും ചെയ്തിരുന്ന ഷോപ്പിംഗ് മാളുകള്‍ ഉള്‍പ്പെടെയുള്ള വാണിജ്യ സ്ഥാപനങ്ങളും വ്യവസായ സ്ഥാപനങ്ങളും അടച്ചിട്ടതോടെ വൈദ്യുതി ഉപയോഗം ഗണ്യമായി കുറഞ്ഞു. ഈവര്‍ഷം ശരാശരി 83 യൂണിറ്റ് വരെയായിരുന്ന പ്രതിദിന ഉപയോഗം. മാര്‍ച്ച് 19ന് 85.12 ദശലക്ഷം യൂണിറ്റു വരെ ഉപഭോഗം എത്തിയിരുന്നു. ലോക്ഡൗണിന് മുമ്പുള്ള ശരാശരി വൈദ്യുതി ഉപയോഗം 82.53 ദശലക്ഷം യൂണിറ്റായിരുന്നു.
ഇത് ലോക്ക് ഡൗണ്‍ കാലമായതോടെ വൈദ്യുതി ഉപയോഗം ശരാശി 67.58 ദശലക്ഷം യൂണിറ്റായി കുറഞ്ഞു. കഴിഞ്ഞവര്‍ഷം ഇതേ ദിവസങ്ങളിലെ ഉപയോഗം 88 ദശലക്ഷം യൂണിറ്റായിരുന്നു. വൈദ്യുതി ഉപയോഗത്തിലെ കുറവ് 18.12 ശതമാനം. ദൈനംദിന ഉപയോഗത്തില്‍ കുറവു വന്നത് 18.12 ശതമാനം. കഴിഞ്ഞവര്‍ഷം മാര്‍ച്ച്, ഏപ്രില്‍ മാസങ്ങളില്‍ ശരാശരി 88 ദശലക്ഷം യൂണിറ്റ് വൈദ്യുതി ഉപയോഗം എത്തിയിരുന്നു. ഈ വര്‍ഷം അത് 67.58 ദശലക്ഷം യൂണിറ്റായി കുറഞ്ഞു. ഉല്‍സവങ്ങളും ആഘോഷങ്ങളും ഇല്ലാതായതാണ് മറ്റൊരു കാരണം. ഇതു നികത്താന്‍ കേന്ദ്ര സഹായം കൂടിയേ തീരൂവെന്നാണ് വിലയിരുത്തല്‍.

ഭോപാല്‍: കോവിഡ് കാലത്ത് കാര്‍ വീടാക്കി പ്രതിരോധ പ്രവര്‍ത്തനത്തില്‍ ഏര്‍പ്പെട്ട് ഭോപ്പാലിലെ ഒരു ഡോക്ടര്‍. ഭോപ്പാല്‍ ജെ.ബി ആശുപത്രിയില്‍ ജോലിചെയ്യുന്ന ഡോ. സചിന്‍ നായക് ആണ് കോവിഡ് ബാധിതരെ ചികിത്സിച്ചശേഷം സ്വന്തം കാര്‍ വീടാക്കി ജീവിക്കുന്നത്.
തനിക്ക് രോഗബാധയുണ്ടെങ്കില്‍ വീട്ടുകാര്‍ക്കും മറ്റുള്ളവര്‍ക്കും അവ പകരാതിരിക്കാനുള്ള മുന്‍കരുതലിന്റെഭാഗമായാണ് ഡ്യൂട്ടിക്ക് ശേഷം കാറില്‍ താമസിക്കുന്നതെന്ന് ഡോക്ടര്‍ പറയുന്നു.
ആശുപത്രി ഡ്യൂട്ടി കഴിഞ്ഞ ശേഷം വീട്ടിലേക്ക് പോകില്ല, പകരം കാറില്‍ തന്നെ കഴിഞ്ഞുകൂടും. ആശുപത്രിക്ക് സമീപം തന്നെയാണ് കാര്‍ പാര്‍ക്ക് ചെയ്തിരിക്കുന്നതും. കാറിനുള്ളില്‍ സചിന് ദിവസേന ഉപയോഗിക്കാനുള്ള വസ്ത്രങ്ങളും മറ്റു അവശ്യ വസ്തുക്കളും കൂടാതെ പുസ്തകങ്ങളും സൂക്ഷിച്ചുവെച്ചിട്ടുണ്ട്.
ഡ്യൂട്ടിക്ക് ശേഷം പുസ്തകങ്ങള്‍ വായിക്കും. ഭാര്യയോടും മക്കളോടും വിഡിയോ കോള്‍ വഴിയാണ് സംസാരിക്കുന്നത്. കഴിഞ്ഞ ഒരാഴ്ചയായി സചിന്‍ കാറിനുള്ളില്‍ തന്നെയാണ് കഴിയുന്നത്.
ഭോപാലില്‍ കോവിഡ് ബാധ ആദ്യം റിപ്പോര്‍ട്ട് ചെയ്തപ്പോള്‍ പേടിയൊന്നും തോന്നിയിരുന്നില്ല. എന്നാല്‍ ദിവസംതോറും രോഗബാധിതരുടെ എണ്ണം കൂടിവന്നതോടെയാണ് കാറിനുള്ളില്‍ താമസിക്കാന്‍ തീരുമാനിച്ചതെന്ന് ഡോക്ടര്‍ പറയുന്നു. മധ്യപ്രദേശ് മുഖ്യമന്ത്രി ശിവരാജ് സിങ് ചൗഹാന്‍ സമൂഹമാധ്യമങ്ങളില്‍ ഡോക്ടറെ പ്രശംസിച്ച് പങ്കുവെച്ച ചിത്രം ഇതിനോടകം വൈറലായിട്ടുണ്ട്.

തിരുവനന്തപുരം: ലോക്ക് ഡൗണില്‍ കേരളത്തില്‍ കുടുങ്ങിയ റഷ്യന്‍ സംഘത്തിന്റെ യാത്ര വീണ്ടുംമുടങ്ങി. 164 പേരടങ്ങുന്ന സംഘത്തിന്റെ യാത്രയാണ് മുടങ്ങിയത്. ഇന്നലെ ഉച്ചയ്ക്ക് 1.30ന് തിരുവനന്തപുരം വിമാനത്താവളത്തില്‍ നിന്ന് പോകാനിരുന്നതായിരുന്നു സംഘം. എന്നാല്‍ റഷ്യയില്‍ നിന്ന് വിമാനം എത്താത്തതിനാലാണ് യാത്ര മുടങ്ങിയത്. സമാന അവസ്ഥയില്‍ നേരത്തെയും ഇവരുടെ യാത്ര മുടങ്ങിയിരുന്നു.

നിരീക്ഷണ കാലാവധി കഴിഞ്ഞ് രോഗബാധയില്ലെന്ന് തെളിയിക്കുന്ന ആരോഗ്യ വകുപ്പിന്റെ സര്‍ട്ടിഫിക്കറ്റ് ഉള്ളവര്‍ക്കാണ് യാത്രയ്ക്ക് അനുമതി നല്‍കിയിരുന്നത്. റഷ്യയില്‍ നിന്നെത്തുന്ന പ്രത്യേക വിമാനത്തിലാണ് ഇവരെ തിരിച്ചയക്കുകയെന്നായിരുന്നു വിവരം. എന്നാല്‍ വിമാനം എത്താത്തതിനെ തുടര്‍ന്ന് ഇവരുടെ യാത്ര വീണ്ടും മുടങ്ങുകയായിരുന്നു.

അതേസമയം ഗള്‍ഫില്‍ നിന്നുള്ള പ്രവാസികളുടെ നാട്ടിലേക്കുള്ള മടക്കയാത്ര വൈകും. ഏപ്രില്‍ 15 മുതല്‍ യുഎഇയില്‍ നിന്ന് ഇന്ത്യയിലേക്ക് സര്‍വ്വീസ് നടത്താനുള്ള തീരുമാനം ഫ്ളൈ ദുബായി മരവിപ്പിച്ചു. ദുബായിയുടെ ബജറ്റ് എയര്‍ലൈനായ ഫ്ലൈദുബായി ഏപ്രില്‍ പതിനഞ്ചു മുതല്‍ കോഴിക്കോട് നെടുമ്പാശ്ശേരി ഉള്‍പ്പെടെ ഇന്ത്യയിലെ ഏഴ് കേന്ദ്രങ്ങളിലേക്ക് സര്‍വ്വീസ് നടത്തുമെന്ന് അറിയിച്ചിരുന്നു. എന്നാല്‍ സര്‍വ്വീസ് നടത്താനുള്ള തീരുമാനം ഫ്ളൈ ദുബായ് പിന്നീട് മരവിപ്പിക്കുകയായിരുന്നു.

തിരുവനന്തപുരം: സംസ്ഥാനത്ത് പുതുതായി ഒമ്പതുപേര്‍ക്ക് കോവിഡ് ബാധ സ്ഥിരീകരിച്ചതായി മുഖ്യമന്ത്രി പിണറായി വിജയന്‍ വാര്‍ത്തസമ്മേളനത്തില്‍ അറിയിച്ചു. കണ്ണൂരില്‍ നാലുപേര്‍ക്കും ആലപ്പുഴ രണ്ട്, കാസര്‍കോട്, പത്തനം തിട്ട, തൃശൂര്‍ ഒന്ന് വീതവുമാണ് പുതുതായി രോഗം സ്ഥിരീകരിച്ചത്.

വിദേശത്തുനിന്നെത്തിയ നാലുപേര്‍ക്കും ഡല്‍ഹി നിസാമുദ്ദീനില്‍ നിന്നെത്തിയ രണ്ടുപേര്‍ക്കുമാണ് കോവിഡ് ബാധ സ്ഥിരീകരിച്ചത്. സമ്പര്‍ക്കം മൂലം മൂന്നുപേര്‍ക്കും രോഗം ബാധിച്ചു. 13 പേരുടെ പരിശോധന ഫലം നെഗറ്റീവാണെന്നും മുഖ്യമന്ത്രി അറിയിച്ചു. ബുധനാഴ്ച 169 പേരെ ആശുപത്രിയില്‍ പ്രവേശിപ്പിച്ചു.

തിരുവനന്തപുരം, തൃശൂര്‍ ജില്ലകളില്‍നിന്ന് മൂന്നുപേര്‍ വീതവും ഇടുക്കി, കോഴിക്കോട്, വയനാട് ജില്ലകളില്‍നിന്ന് രണ്ടുപേര്‍ വീതവും കണ്ണൂരില്‍ നിന്നും ഒരാള്‍ക്കുമാണ് പരിശോധന ഫലം നെഗറ്റീവായത്. ഇതുവരെ 345 പേര്‍ക്കാണ് സംസ്ഥാനത്ത് രോഗം സ്ഥിരീകരിച്ചത്. 259 പേര്‍ ഇപ്പോള്‍ ചികിത്സയിലുണ്ട്. സംസ്ഥാനത്ത് 1,40,474 പേരാണ് ഇപ്പോള്‍ നിരീക്ഷണത്തിലുള്ളതെന്നും മുഖ്യമന്ത്രി പറഞ്ഞു.

1,39,725 പേര്‍ വീടുകളിലും 749പേര്‍ ആശുപത്രികളിലും നിരീക്ഷണത്തിലുണ്ട്. ഇതുവരെ 11,986 സാമ്പിളുകള്‍ പരിശോധനക്ക് അയച്ചു. 10,906 എണ്ണം രോഗബാധയില്ലെന്ന് കണ്ടെത്തി.

ആലപ്പുഴ: ആലപ്പുഴ ജില്ലയില്‍ കോവിഡ് ബാധിച്ച് ചികിത്സയിലായിരുന്ന ഒരാള്‍ക്ക് കൂടി അസുഖം ഭേദമായി. ഹരിപ്പാട് സ്വദേശിയാണ് കോവിഡ് ഭേദമായി ആശുപത്രി വിട്ടത്.

അതേസമയം, പത്തനംതിട്ടയില്‍ കോവിഡ് പരിശോധന നടത്തിയതില്‍ 95 ഫലങ്ങള്‍ കൂടി നെഗറ്റീവായി. തിരുവനന്തപുരത്ത് 142പേരുടെ ഫലം കൂടി നെഗറ്റീവായി. തലസ്ഥാനത്ത് 1000 റാപ്പിഡ് ടെസ്റ്റ് കിറ്റുകള്‍ കൂടിയെത്തി.

കഴിഞ്ഞദിവസം സംസ്ഥാനത്ത് ആറുപേരുടെ പരിശോധന ഫലം നെഗറ്റീവായിരുന്നു. കണ്ണൂര്‍ ജില്ലയില്‍ നിന്നും 4 പേരുടെയും തിരുവനന്തപുരം (മലപ്പുറം സ്വദേശി), കോഴിക്കോട് ജില്ലകളില്‍ നിന്നും ഓരോരുത്തരുടേയും പരിശോധനാ ഫലമാണ് നെഗറ്റീവ് ആയത്. നിലവില്‍ 314പേര്‍ക്കാണ് രോഗം സ്ഥിരീകരിച്ചിട്ടുള്ളത്.

മുംബൈ: ഡോക്ടര്‍മാര്‍ക്കും നഴ്സുമാര്‍ക്കും കൊറോണ സ്ഥിരീകരിച്ചതിനെ തുടര്‍ന്ന് മുംബൈയിലെ വോക്ക്ഹാര്‍ട്ട് ആശുപത്രി അടച്ചു പൂട്ടി. ആശുപത്രിയിലെ മൂന്ന് ഡോക്ടര്‍മാര്‍ക്കും 26 നഴ്സുമാര്‍ക്കുമാണ് വൈറസ് സ്ഥിരീകരിച്ചത്.

നഴ്സുമാര്‍ക്കും ഡോക്ടര്‍മാര്‍ക്കും രോഗം സ്ഥിരീകരിച്ചതിനെ തുടര്‍ന്ന് ബിഎംസിയാണ് ആശുപത്രി അടച്ചു പൂട്ടാന്‍ തീരുമാനിച്ചത്. മാര്‍ച്ച് 27 ന് ഹൃദയാഘാതത്തെ തുടര്‍ന്ന് വോക്ക്ഹാര്‍ട്ട് ആശുപത്രിയില്‍ പ്രവേശിപ്പിച്ച എഴുപതുകാരന് കൊറോണ വൈറസ് ബാധ സ്ഥിരീകരിച്ചിരുന്നു.

ഇയാളില്‍ നിന്നും പരിചരിച്ച നഴ്സിനും, നഴ്സില്‍ നിന്നും സഹപ്രവര്‍ത്തകരിലേക്കും വൈറസ് പടര്‍ന്നു എന്നാണ് സൂചന.നഴ്സുമാരെയും ഡോക്ടര്‍മാരെയും മുംബൈയിലെ വിവിധ ആശുപത്രികളില്‍ പ്രവേശിപ്പിച്ചിട്ടുണ്ട്.

ജനീവ: ലോകത്തെയാകെ ആശങ്കയിലാക്കി കോവിഡ്ബാധിതരുടെ എണ്ണവും മരണസംഖ്യയും കുതിക്കുന്നു.   ഇന്നലെ വരെ ലോകത്ത് കോവിഡ് ബാധിച്ചവരുടെ എണ്ണം 10,15,059 ആയി. ആകെ മരണം 53,167 ആണ്.  2,12,035 പേര്‍ രോഗമുക്തരായി. രോഗബാധിതരുടെ എണ്ണത്തില്‍ യുഎസ് ആണ് മുന്നില്‍ 2,44,877 പേര്‍. യുഎസിലെ മരണസംഖ്യ 6070 ആയി. മരണനിരക്കില്‍ ഇറ്റലിയാണു മുന്നില്‍. 1,15,242 പേര്‍ക്കു രോഗം വന്ന ഇവിടെ 13,915 പേര്‍ക്കു ജീവന്‍ നഷ്ടപ്പെട്ടു.

ഒരു ദിവസം മാത്രം  950 പേര്‍ മരിച്ചതോടെ സ്‌പെയിനില്‍ കോവിഡ് മരണം 10,348 ആയി. രാജ്യത്തു മാത്രമല്ല, ലോകത്തുതന്നെ ആദ്യമായാണ് ഒരു ദിവസം ഇത്രയധികം കോവിഡ് മരണം റിപ്പോര്‍ട്ട് ചെയ്യുന്നത്. സ്‌പെയിനില്‍ രോഗബാധിതര്‍ 1,12,065 ആണ്. ലാറ്റിനമേരിക്കന്‍ കരീബിയന്‍ രാജ്യങ്ങളിലായി ആകെ രോഗികള്‍ 20,000 കവിഞ്ഞു. മരണം 500. ബ്രസീലില്‍ ആണ് ഏറ്റവും കൂടുതല്‍ രോഗികള്‍. ഇക്വഡോറിലെ തുറമുഖ നഗരമായ ഗുവാക്വിലിലെ വീടുകളില്‍ നിന്ന്് സൈന്യം 150 മൃതദേഹങ്ങള്‍ കണ്ടെടുത്തു.
യുകെയില്‍ കോവിഡ് മരണം 24% വര്‍ദ്ധിച്ച് 2921 ആയി.  ആകെ രോഗികള്‍ 33,718. ഇറാനില്‍ മരണം 3,000 കടന്നു.  രാജ്യത്തെ രോഗികള്‍ അരലക്ഷം. ബിസിനസ് സ്ഥാപനങ്ങള്‍ 27% ജീവനക്കാരെ വെട്ടിക്കുറച്ചു. ഇസ്രയേലില്‍ ആരോഗ്യമന്ത്രി യാക്കോവ് ലിറ്റ്സ്മനും (71) ഭാര്യയ്ക്കും കോവിഡ് സ്ഥിരീകരിച്ചു. ലിറ്റ്സ്മനുമായി അടുത്തിടപഴകിയ മൊസാദ് തലവന്‍ യോസി കോയെന്‍, ദേശീയ സുരക്ഷാ ഉപദേഷ്ടാവ് മേര്‍ ബിന്‍ ഷബാത് അടക്കം ഒട്ടേറെ മുതിര്‍ന്ന ഉദ്യോഗസ്ഥരും ഐസലേഷനിലായി. ആകെ രോഗികള്‍ 6857. മരണം 36.

കോവിഡ് രോഗികള്‍ ലക്ഷങ്ങളായി പെരുകിയതോടെ യുഎസില്‍ മാസ്‌ക്, ഗൗണ്‍, കയ്യുറകള്‍ എന്നീ അടിയന്തര മെഡിക്കല്‍ ഉപകരണങ്ങള്‍ക്ക് ക്ഷാമമുണ്ട്. വെന്റിലേറ്ററുകള്‍ അടക്കം 60 ടണ്‍ മെഡിക്കല്‍ ഉപകരണങ്ങളുമായി റഷ്യന്‍ വിമാനം ബുധനാഴ്ച ന്യൂയോര്‍ക്കിലിറങ്ങി. തിങ്കളാഴ്ച യുഎസ് പ്രസിഡന്റ് ഡോണള്‍ഡ് ട്രംപും റഷ്യ പ്രസിഡന്റ് വ്‌ളാഡിമിര്‍ പുടിനും നടത്തിയ ഫോണ്‍ സംഭാഷണത്തിന്റെ അടിസ്ഥാനത്തില്‍ ഇറക്കുമതിക്കു ധാരണയായിരുന്നു. ഫ്‌ലോറിഡ, ജോര്‍ജിയ, മിസിസിപ്പി, നെവാഡ എന്നീ സംസ്ഥാനങ്ങളിലും വീടിനു പുറത്തിറങ്ങുന്നതിനു നിയന്ത്രണം ഏര്‍പ്പെടുത്തി. ഇതോടെ 80 % അമേരിക്കക്കാരും ലോക്ഡൗണിലായി.
കൊറോണ വൈറസിന്റെ അതിവേഗ വ്യാപനത്തിലും മരണസംഖ്യ ഒരാഴ്ചയ്ക്കിടെ ഇരട്ടിയായതിലും ലോകാരോഗ്യ സംഘടന ആശങ്ക പ്രകടിപ്പിച്ചു.

ന്യൂഡല്‍ഹി: അതിര്‍ത്തികള്‍ തുറക്കണമെന്ന കേരള ഹൈക്കോടതി വിധി സ്‌റ്റേ ചെയ്യണമെന്ന കര്‍ണ്ണാടകത്തിന്റെ ആവശ്യം സുപ്രീം കോടതി തള്ളി. കാസര്‍കോടുള്ള രോഗികളെ മംഗലാപുരത്തേയ്ക്ക് ചികിത്സയ്ക്ക് കൊണ്ടുപോകാന്‍ കര്‍ണാടക അതിര്‍ത്തി തുറന്നു കൊടുക്കണമെന്ന കേരള ഹൈക്കോടതി ഉത്തരവിനെതിരെയാണ് കര്‍ണാടകം സുപ്രീം കോടതിയെ സമീപിച്ചത്.എന്നാല്‍ ഹൈക്കോടതി ഉത്തരവ് പൂര്‍ണമായി നടപ്പാക്കാന്‍ സുപ്രീം കോടതി ഇരുസംസ്ഥാനങ്ങളോടും ആവശ്യപ്പെട്ടതുമില്ല. കാസര്‍കോട് നിന്ന് അടിയന്തര ചികിത്സാ ആവശ്യങ്ങള്‍ക്കായി പോകാന്‍ സൗകര്യം ഒരുക്കണമെന്ന് കോടതി നിര്‍ദ്ദേശിച്ചു. എന്നാല്‍ ഏതൊക്കെ രോഗികളെ കൊണ്ടുപോകാം എന്ന കാര്യത്തില്‍ വ്യക്തതയില്ല.
രോഗികളെ കൊണ്ടുപോകുന്നതിനുള്ള മാര്‍ഗനിര്‍ദേശങ്ങള്‍ ചര്‍ച്ച ചെയ്ത് തയ്യാറാക്കാന്‍ ഇരുസംസ്ഥാനങ്ങളുടെയും ചീഫ് സെക്രട്ടറിമാരോട് സുപ്രീം കോടതി ആവശ്യപ്പെട്ടു. ചീഫ് സെക്രട്ടറിമാര്‍ തയ്യാറാക്കുന്ന മാര്‍ഗരേഖ പരിഗണിച്ച ശേഷം വിഷയത്തില്‍ അന്തിമവിധി സുപ്രീം കോടതി ചൊവ്വാഴ്ച പുറപ്പെടുവിക്കും.

രോഗികളുടെ സഞ്ചാരസ്വാതന്ത്ര്യത്തിനു മാത്രമാണ് ഈ ഉത്തരവ് ബാധകം. ചരക്കുനീക്കത്തിന് ബാധകമല്ലെന്നും ജസ്റ്റിസ് എല്‍.നാഗേശ്വര റാവുവിന്റെ അദ്ധ്യക്ഷതയിലുള്ള ബഞ്ച് അറിയിച്ചു.
രാജ്യത്തെ ഏറ്റവും വലിയ കോവിഡ് ഹോട്ട് സ്‌പോട്ടുകളില്‍ ഒന്നാണ് കാസര്‍കോട് എന്നും അതിനാല്‍ കാസര്‍കോട്‌നിന്ന് മംഗലാപുരത്തേക്ക് വാഹനങ്ങള്‍ കടത്തിവിടാനാകില്ലെന്നും കര്‍ണാടക അഡ്വക്കേറ്റ് ജനറല്‍ പറഞ്ഞു.എന്നാല്‍ കര്‍ണാടകയുടെ ഈ നിലപാടു മൂലം രണ്ടു ജീവനുകളാണ് നഷ്ടമായതെന്ന് കേരളത്തിനു വേണ്ടി ഹാജരായ സീനിയര്‍ അഭിഭാഷകന്‍ ജയദീപ് ഗുപ്തയും ഹര്‍ജിക്കാര്‍ക്കു വേണ്ടി ഹാജരായ അഭിഭാഷകന്‍ റോമി ചാക്കോയും വ്യക്തമാക്കി.

കേരള കര്‍ണാടക അതിര്‍ത്തിയായ തലപ്പാടിയില്‍ അടച്ചിട്ട ദേശീയപാത തുറക്കണമെന്ന് കേരള ഹൈക്കോടതി വിധിച്ചിട്ടും നടപ്പാക്കാന്‍ കര്‍ണാടക തയാറായിരുന്നില്ല

തിരുവനന്തപുരം: ഹോട്ടലുകളിലെ പാചകം ചെയ്്തവയുള്‍പ്പെടെയുള്ള ഭക്ഷ്യവസ്തുക്കളുടെ ഓണ്‍ലൈന്‍/ഡോര്‍ വിതരണ സമയപരിധി രാത്രി എട്ടു വരെയാക്കി സര്‍ക്കാര്‍ ഉത്തരവായി. അവശ്യവസ്തുക്കള്‍ വില്‍ക്കുന്ന കടകള്‍ക്കൊപ്പമാണ് ഹോട്ടലുകള്‍ക്കും പ്രവര്‍ത്തിക്കാന്‍ അനുതി നല്‍കിയിരിക്കുന്നത്.

നിലവില്‍ അതിന്റെ പ്രവര്‍ത്തന സമയം രാവിലെ ഏഴു മുതല്‍ വൈകിട്ട് അഞ്ചുവരെയാണ്. എന്നാല്‍ ഓണ്‍ലൈന്‍ വഴി ഭക്ഷണ വിതരണം നടത്തുന്ന ഹോട്ടലുകള്‍ക്ക് എട്ടു മണി വരെ പ്രവര്‍ത്തിക്കാനുള്ള ഇളവ് നല്‍കിക്കൊണ്ടാണ് സര്‍ക്കാര്‍ ഉത്തരവ് ഇറക്കിയത്. ഓണ്‍ലൈന്‍ വിതരണം മാത്രമാണ് രാത്രി എട്ടുവരെ അനുവദിച്ചിരിക്കുന്നത്. കടകള്‍ അഞ്ചു മണിക്ക് തന്നെ അടയ്ക്കണം. ചീഫ് സെക്രട്ടറി ടോം ജോസാണ് ഉത്തരവ് പുറത്തിറക്കിയത്.