എന്തു പറയുമ്പോഴും നര്‍മം കലര്‍ത്തി സംസാരിക്കുന്ന ആളാണ് രമേഷ് പിഷാരടി. പിഷാരടിയുടെ സോഷ്യല്‍ മീഡിയ പോസ്റ്റുകളും ആരാധകര്‍ക്ക് ആവേശമാണ്. എല്ലാ ചിത്രങ്ങള്‍ക്കൊപ്പവും കാണും, ചിരിപ്പിക്കുന്നതോ ചിന്തിക്കുന്നതോ ആയ വേറിട്ടൊരു ക്യാപ്ഷന്‍. പിഷാരടി സമൂഹമാധ്യമങ്ങളില്‍ പങ്കുവച്ച ഒരു ചിത്രമാണ് ഇപ്പോള്‍ ചിന്തിപ്പിക്കുന്നത്. വലിയൊരു തിരിച്ചറിവാണ് പിഷാരടി പങ്കുവയ്ക്കുന്നത്.
വെറുതേ പൂത്തുമ്പിയേയും പൂമ്പാറ്റയെയും സംശയിച്ചു, ലോണ്‍ എടുക്കാനുള്ള എലിജിബിലിറ്റി ഇല്ലാതിരുന്നതാണ് ബാല്യത്തെ കൂടുതല്‍ സുന്ദരമാക്കിയത്, എന്നാണ് തന്റെ കുട്ടിക്കാലത്തെ ചിത്രം പങ്കുവച്ചുകൊണ്ട് പിഷാരടി കുറിക്കുന്നത്.
പതിവു പോലെ രസകരമായ കമന്റുകളാണ് പിഷാരടിയുടെ പുതിയ പോസ്റ്റിനും ലഭിക്കുന്നത്. കലങ്ങാത്തവര്‍ ഒന്നില്‍ കൂടുതല്‍ പ്രാവശ്യം വായിച്ച് കലക്കിയെടുക്കേണ്ട അവസ്ഥയാണല്ലോ മനുഷ്യാ എന്നാണ് ഒരു കമന്റ്. ക്യാപ്ഷന്‍ സിംഹമേ, ഏതോ പഴയ ആല്‍ബം കിട്ടിയെന്നു തോന്നുന്നു എല്ലാം കുത്തിപൊക്കികൊണ്ടു വരികയാണല്ലോ, ബാല്യത്തില്‍ കിട്ടാത്ത ലോണ്‍, ഇപ്പോള്‍ എടുത്ത് മുടിച്ചോളൂ എന്നിങ്ങനെ പോവുന്നു ചിത്രത്തിന് താഴെ വരുന്ന കമന്റുകള്‍.
മിമിക്രി വേദികളില്‍ നിന്നായിരുന്നു രമേഷ് പിഷാരടിയുടെയും സിനിമാ അരങ്ങേറ്റം. സലിം കുമാറിന്റെ മിമിക്രി ട്രൂപ്പായ കൊച്ചിന്‍ സ്റ്റാലിയന്‍സില്‍ പ്രവര്‍ത്തിച്ച രമേഷ് പിഷാരടി ശ്രദ്ധ നേടുന്നത് ഏഷ്യാനെറ്റ് പ്ലസില്‍ ധര്‍മജന്‍ ബോള്‍ഗാട്ടിയ്ക്ക് ഒപ്പം അവതരിപ്പിച്ച ബ്ലഫ് മാസ്റ്റേഴ്സ് എന്ന ഹാസ്യപരിപാടിയിലൂടെയാണ്. സ്റ്റേജ് ഷോകളിലും ടെലിവിഷന്‍ പരിപാടികളിലും സജീവമായ താരം 2008-ല്‍ പുറത്തിറങ്ങിയ പോസിറ്റീവ് എന്ന സിനിമയിലൂടെ അഭിനയത്തിലും അരങ്ങേറ്റം കുറിച്ചു.