തിരുവനന്തപുരം: രോഗലക്ഷണങ്ങളില്ലാത്ത കൊവിഡ് രോഗികളുടെ എണ്ണം വർധിക്കുന്ന സാഹചര്യത്തിൽ കനത്ത ജാഗ്രതാ നിർദ്ദേശവുമായി സംസ്ഥാന സർക്കാർ. ബ്രേക്ക് ദി ചെയിൻ ക്യാംപയിൻ മൂന്നാം ഘട്ടത്തിലേക്ക് കടക്കുകയാണെന്ന് മുഖ്യമന്ത്രി പിണറായി വിജയൻ അറിയിച്ചു. ‘ആരിൽ നിന്നും രോഗം പകരാം’ എന്ന ജാഗ്രത എപ്പോഴുമുണ്ടാകണം. ‘ജീവന്റെ വിലയുള്ള ജാഗ്രത’ എന്നതാണ് മൂന്നാം ഘട്ട ക്യാംപയിൻ.
രോഗികളിൽ 60 ശതമാനത്തോളം പേർ രോഗലക്ഷണമില്ലാത്തവരാണ്. അതിനാൽ കൊവിഡ് വ്യാപനത്തിന്‍റെ ഈ ഘട്ടം ബ്രേക്ക് ദി ചെയ്നിന്‍റെ മൂന്നാം ഘട്ടമായി പ്രധാനജാഗ്രതാ നിർദേശം കൂടി നൽകുകയാണെന്ന് മുഖ്യമന്ത്രി വ്യക്തമാക്കി.
ആരിൽ നിന്നും രോഗം പകരാം എന്നതാണ്. രോഗലക്ഷണമുള്ളവരെ കണ്ടാലറിയാം. അല്ലാത്തവരെ തിരിച്ചറിയാനാകില്ല. ഓരോരുത്തരും ദിവസവും സമ്പർക്കം പുലർത്തുന്ന മാർക്കറ്റുകൾ, തൊഴിലിടങ്ങൾ, വാഹനങ്ങൾ, ആശുപത്രികൾ, പൊതുസ്ഥലങ്ങൾ എന്നിവിടങ്ങളിൽ നിന്ന് ആരിൽ നിന്നും ആർക്കും രോഗം വന്നേക്കാം. അതിനാൽ ഒരാളിൽ നിന്നും രണ്ട് മീറ്റർ അകലം പാലിച്ച് സ്വയം സുരക്ഷിതവലയം തീർക്കാൻ എല്ലാവരും ശ്രദ്ധിക്കണം. ഇടപഴകുന്ന എല്ലാ സ്ഥലങ്ങളിലും ചുറ്റും രണ്ട് മീറ്റർ അകലം ഉറപ്പാക്കണം. ഈ സുരക്ഷിതവലയത്തിൽ നിന്ന് മാസ്ക് ധരിച്ചും, സോപ്പ്, സാനിറ്റൈസർ എന്നിവ ഉപയോഗിച്ചും കണ്ണി പൊട്ടിക്കുന്നത് ശക്തമാക്കണം. ആൾക്കൂട്ടം അനുവദിക്കരുത്. രോഗവ്യാപനത്തിന്‍റെ ഈ ഘട്ടത്തിൽ വലിയ തോതിൽ പലയിടത്തും മരണമുണ്ടാകുന്നു. ഈ ഘട്ടത്തിലും മരണനിരക്ക് കുറയ്ക്കാനാകുന്നത് ജാഗ്രത കൊണ്ട് തന്നെയാണ്. ഈ ജാഗ്രതയ്ക്ക് നമ്മുടെ ജീവന്റെ വിലയുണ്ട്. അതിനാൽ ജീവന്റെ വിലയുള്ള ജാഗ്രത എന്ന മുദ്രാവാക്യം എല്ലാവരും ഏറ്റെടുക്കണം-മുഖ്യമന്ത്രി പറഞ്ഞു
ആരിൽ നിന്നും കോവിഡ് പകരാം; കനത്ത ജാഗ്രതാ നിർദ്ദേശവുമായി സർക്കാർ
കടുവാ സിനിമകള്‍ക്കെതിരെ യഥാര്‍ത്ഥ കുറുവച്ചന്‍
തന്റെ ജീവിതത്തെ അധികരിച്ച് പ്രഖ്യാപിക്കപ്പെട്ട ചിത്രങ്ങള്‍ പുറത്തിറക്കാന്‍ അനുവദിക്കില്ലെന്ന് പാലാ സ്വദേശി കുരുവിനാക്കുന്നേല്‍ കുറുവച്ചന്‍. പൃഥ്വിരാജിനെയും സുരേഷ് ഗോപിയെയും കേന്ദ്ര കഥാപാത്രങ്ങളാക്കി പ്രഖ്യാപിച്ച ചിത്രങ്ങള്‍ക്കെതിരെയാണ് നിലപാട് വ്യക്തമാക്കിയിരിക്കുന്നത്. രണ്ട് ചിത്രങ്ങളുമായും യോജിക്കാനാകില്ല. തന്റെ ജീവിതം സിനിമയാക്കാനുള്ള അനുമതി വര്‍ഷങ്ങള്‍ക്ക് മുന്‍പേ രണ്‍ജി പണിക്കര്‍ക്ക് നല്‍കിയയതാണ്. താന്‍ എഴുതിക്കൊടുത്തതല്ലെങ്കിലും വാക്കാല്‍ സമ്മതം നല്‍കിയതാണ്. അതിനാല്‍ പ്രഖ്യാപിച്ച രണ്ടും എടുക്കാന്‍ താന്‍ സമ്മതിക്കില്ല. തന്റെ വേഷം മിനിമം മോഹന്‍ലാലെങ്കിലും ചെയ്യണമെന്ന ആഗ്രഹവും കുറുവച്ചന്‍ പങ്കുവെയ്ക്കുന്നു. ഒരു ഉന്നത പൊലീസ് ഉദ്യോഗസ്ഥനുമായി കുറുവച്ചന്‍ നടത്തിയ വര്‍ഷങ്ങള്‍ നീണ്ട നിയമ പോരാട്ടമാണ് ചിത്രങ്ങള്‍ക്ക് ആധാരമാക്കുന്നത്. യഥാര്‍ത്ഥ കുറുവച്ചന്‍ രംഗത്തെത്തിയതോടെ ഇദ്ദേഹത്തിന്റെ പേരും ജീവിതവും പ്രമേയമാക്കി പ്രഖ്യാപിച്ച ചിത്രങ്ങള്‍ നിയമക്കുരുക്കിലാകും. നേരത്തേ ഷാജി കൈലാസ് ചിത്രമായ ‘കടുവ’യ്ക്ക് അനുകൂലമായി കോടതി വിധിയുണ്ടായിരുന്നു. എന്നാല്‍ ഈ സിനിമയും നിയമക്കുരുക്കില്‍പ്പെടുന്ന തരത്തിലേക്കാണ് കാര്യങ്ങള്‍ നീങ്ങുന്നത്.
പൃഥ്വിരാജ് നായകനാകുന്ന ചിത്രം ഷാജി കൈലാസാണ് സംവിധാനം ചെയ്യുന്നത്. 8 വര്‍ഷത്തെ ഇടവേളയ്ക്ക് ശേഷമാണ് അദ്ദേഹം മലയാളത്തില്‍ ചിത്രമൊരുക്കുന്നത്. തന്റെ 250ാം ചിത്രത്തില്‍ കടുവാക്കുന്നേല്‍ കുറുവച്ചന്‍ എന്ന കഥാപാത്രമായി സുരേഷ് ഗോപിയെത്തുന്നുവെന്നായിരുന്നു മറ്റൊരു പ്രഖ്യാപനം. മാത്യൂസ് തോമസാണ് സംവിധാനം. എന്നാല്‍ ഈ സിനിമയ്‌ക്കെതിരെ ഷാജി കൈലാസ് ചിത്രത്തിന്റെ തിരക്കഥാകൃത്ത് ജിനു എബ്രഹാം എറണാകുളം ജില്ലാ കോടതിയെ സമീപിച്ചു. ഷാജി കൈലാസ് സംവിധാനം ചെയ്യാനിരിക്കുന്ന പൃഥ്വിരാജ് സുകുമാരന്‍ ചിത്രം ‘കടുവ’ എന്ന സിനിമക്കായി തയ്യാറാക്കിയ കഥാപാത്രത്തിന്റെ പേരും കഥാപശ്ചാത്തലവും സുരേഷ് ഗോപി ചിത്രത്തിനായി ഉപയോഗിക്കുന്നുവെന്ന് ചൂണ്ടിക്കാട്ടിയായിരുന്നു സംവിധായകന് ജിനു കോടതിയെ സമീപിച്ചത്. പകര്‍പ്പവകാശ ലംഘനം ഹര്‍ജിയില്‍ ചൂണ്ടിക്കാട്ടിയിരുന്നു. ഇതേ തുടര്‍ന്ന് കടുവാക്കുന്നേല്‍ കുറുവച്ചന്‍ എന്ന പേര് ഉപയോഗിക്കുന്നതും ഈ നായക കഥാപാത്രത്തെ മുന്‍നിര്‍ത്തി പ്രചരണങ്ങള്‍ നടത്തുന്നതും കോടതി വിലക്കി. കടുവാക്കുന്നേല്‍ കുറുവച്ചന്‍ എന്ന കഥാപാത്രത്തിന്റെ പേര് കോപ്പിറൈറ്റ് ആക്ട് പ്രകാരം രജിസ്റ്റര്‍ ചെയ്തതിന്റെ രേഖകള്‍ ഹര്‍ജിഭാഗം കോടതിയില്‍ ഹാജരാക്കി. കഥാപാത്രത്തിന്റെ പേരടക്കം കടുവയുടെ തിരക്കഥയുടെ എല്ലാ സീനുകളും പ്രത്യേകം രജിസ്റ്റര്‍ ചെയ്തിട്ടുള്ളതായി ഹര്‍ജിക്കാര്‍ കോടതിയെ അറിയിച്ചു. ഇതിന്റെ രേഖകളും ഹാജരാക്കി. ഇവ പരിഗണിച്ചാണ് സുരേഷ്ഗോപി ചിത്രത്തിന് കോടതി വിലക്കേര്‍പ്പെടുത്തിയത്.
ബിഷപ്പ് ഫ്രാങ്കോ മുളയ്ക്കലിന് കൊവിഡ്
ബിഷപ്പ് ഫ്രാങ്കോ മുളയ്ക്കലിന് കൊവിഡ് സ്ഥിരീകരിച്ചു. സമ്പർക്കത്തിലൂടെയാണ് കൊവിഡ് രോഗം ബാധിച്ചതെന്നാണ് റിപ്പോർട്ട്. ബിഷപ്പ് ഫ്രാങ്കോയുടെ അഭിഭാഷകനും ഡോക്ടർക്കും നേരത്തെ കൊവിഡ് സ്ഥിരീകരിച്ചിരുന്നു.
കന്യാസ്ത്രീ പീഡനക്കേസിൽ ജാമ്യത്തിലായിരുന്ന ബിഷപ്പ് ഫ്രാങ്കോ മുളയ്ക്കൽ കേസിൽ തുടർച്ചയായി കോടതിയിൽ ഹാജരാകാതിരുന്നതിനെ തുടർന്ന് കോടതി ജാമ്യം റദ്ദാക്കി അറസ്റ്റ് വാറണ്ട് പുറപ്പെടുവിച്ചിരുന്നു. കോട്ടയം അഡീഷണൽ സെഷൻസ് കോടതിയുടേതായിരുന്നു നടപടി.
കൊവിഡ് ബാധിതന്റെ പ്രാഥമിക സമ്പർക്കത്തിൽ ആയതിനാൽ ഹാജരാകാൻ സാധിക്കില്ലെന്നാണ് കഴിഞ്ഞ തവണ കേസ് പരിഗണിച്ചപ്പോൾ ഫ്രാങ്കോ മുളയ്ക്കൽ കോടതിയെ അറിയിച്ചത്. എന്നാൽ ബിഷപ്പ് ഹൗസ് സ്ഥിതി ചെയ്യുന്ന പ്രദേശം കൊവിഡ് തീവ്രമേഖലയായിരുന്നില്ലെന്ന രേഖകൾ പ്രോസിക്യൂഷൻ കോടതിയിൽ ഹാജരാക്കി. ഇതിന്റെ അടിസ്ഥാനത്തിലാണ് ഫ്രാങ്കോ മുളയ്ക്കലിന്റെ ജാമ്യം റദ്ദാക്കിയത്.
കേസ് ഓഗസ്റ്റ് പതിമൂന്നിന് വീണ്ടും പരിഗണിക്കാനിരിക്കെയാണ് ഫ്രാങ്കോയ്ക്ക് കൊവിഡ് സ്ഥിരീകരിച്ചത്.
സിബിഎസ്ഇ പത്താം ക്ലാസ് ഫലം നാളെ
ന്യൂഡൽഹി : സിബിഎസ്ഇ പത്താം ക്ലാസ് ഫലം നാളെ പ്രഖ്യാപിക്കുമെന്ന് വിദ്യാഭ്യാസ മന്ത്രി രമേശ് പൊഖ്രിയാല്‍ അറിയിച്ചു. ട്വിറ്ററിലൂടെയാണ് അദ്ദേം ഇക്കാര്യം അറിയിച്ചത്. പന്ത്രണ്ടാം ക്ലാസ് ഫലം കഴിഞ്ഞ ദിവസമാണ് പ്രഖ്യാപിച്ചത്.സിബിഎസ്ഇ പത്താം ക്ലാസ്, പന്ത്രണ്ടാം ക്ലാസ് ഫലങ്ങള്‍ ജൂലൈ 15 ന് മുമ്പ് പ്രഖ്യാപിക്കുമെന്ന് സിബിഎസ്ഇ സുപ്രീം കോടതിയെ അറിയിച്ചിരുന്നു. പറഞ്ഞതിലും രണ്ടു ദിവസം മുമ്പ്, ജൂലൈ 13 ന് പന്ത്രണ്ടാം ക്ലാസ് ഫലം പ്രഖ്യാപിച്ചു. പത്താം ക്ലാസ് ഉടന്‍ അറിയുമെന്ന് അഭ്യൂഹങ്ങള്‍ പടര്‍ന്നെങ്കിലും കൃത്യമായ വിവരം ലഭിച്ചിരുന്നില്ല. ഔദ്യോഗികമായി അറിയിച്ചതോടെ ആശയക്കുഴപ്പം അവസാനിച്ചിരിക്കുകയാണ്.
കുഞ്ഞ് സന്തോഷം പങ്കുവച്ച് നടി നമിതയും കുടുംബവും
പ്രേക്ഷകരുടെ പ്രിയപ്പെട്ട താരമാണ് നമിത പ്രമോദ്. മിനിസ്ക്രീനിലൂടെ വെള്ളിത്തിരയിലെത്തി തന്റേതായ സ്ഥാനം സൃഷ്ടിക്കുകയുമായിരുന്നു നമിത. മലയാളത്തിൽ മാത്രമല്ല തെന്നിന്ത്യൻ സിനിമ ലോകത്തും തന്റേതായ ഇടം കണ്ടെത്തിയിട്ടുണ്ട് താരം. സോഷ്യൽ മീഡിയയിൽ സജീവമാണ് നമിത. ഇപ്പോഴിത തന്റെ ജീവിതത്തിലെ പുതിയ വിശേഷം പങ്കുവെച്ചിരിക്കുകയാണ് താരം.നമിത ഇൻസ്റ്റഗ്രാമിൽ പങ്കുവെച്ച കുടുംബ സമേതമുളള ചിത്രമാണ് ഇപ്പോൾ സോഷ്യൽ മീഡിയയിൽ വൈറലാകുന്നത്. കുഞ്ഞ് സന്തോഷമെന്ന് കുറിച്ചു കൊണ്ടായിരുന്നു താരം പുതിയ വിശേഷം പ്രേക്ഷകരുമായി പങ്കുവെച്ചത്. ഒത്തിരി സ്നേഹവും സ്വപ്നവും സാമാധനവും ഓർമകളുമൊക്കെ നിറഞ്ഞ ഒരു കുഞ്ഞ് സന്തോഷം. കുറച്ച് തട്ടിപ്പും കുറെ സ്നേഹവും! ഞങ്ങൾ പുതിയ വീട്ടിലേയ്ക്ക് മാറി.നിങ്ങളുടെ പ്രാർത്ഥനകളിൽ ഒപ്പം ഓർക്കണം…. പുതിയ വീടിന്റെ ചിത്രം പങ്കുവെച്ച് കൊണ്ട് നമിത കുറിച്ചു. താരത്തിന്റെ ഇൻസ്റ്റഗ്രാം പോസ്റ്റ് വൈറലായിട്ടുണ്ട്. നമിതക്കും കുടുംബത്തിനും എല്ലാവിധ ആശംസകളുമയി ആരാധകർ എത്തിയിട്ടുണ്ട്.പുതിയ വീട്ടിലെ അടുക്കളയിൽ നിന്നുള്ള ചിത്രവും സ്വീകരണ മുറിയിൽ നിന്നുളള ചിത്രങ്ങളുമാണ് താരം പങ്കുവെച്ചിരിക്കുന്നത്. വീട് ഗംഭീരമായിട്ടുണ്ടെന്നാണ് ആരാധകർ പറയുന്നത്. സിമ്പിൾ ലുക്കിലാണ് നമിത പ്രത്യക്ഷപ്പെട്ടിരിക്കുന്നത്. പച്ച കരകളുള്ള കേരള സാരിയായിരുന്നു നടിയുടെ വേഷം. സാരിയ്ക്ക് ചേരുന്ന ആഭരണങ്ങളായിരുന്നു താരം ധരിച്ചിരുന്നത്. ഏഴാം ക്ലാസ്സിൽ പഠിക്കുമ്പോഴാണ് നമിത പ്രേക്ഷകരുടെ മുന്നിൽ എത്തുന്നത്. വേളാങ്കണ്ണി മാതാവ് എന്ന സീരിയലിൽ മാതാവിന്റെ വേഷം ചെയ്തു കൊണ്ടായിരുന്നു തുടക്കം.പിന്നീട് അമ്മേ ദേവി, എന്റെ മാനസ പുത്രി എന്നീ സീരിയലുകളിലും ശ്രദ്ധേയമായ വേഷങ്ങൾ ചെയ്തു. രാജേഷ് പിള്ള സംവിധാനം ചെയ്ത ട്രാഫിക് എന്ന ചിത്രത്തിൽ റിയ എന്ന കഥാപാത്രമാണ് സിനിമയിൽ ആദ്യമായി ചെയ്തത്. ആദ്യമായി നായികാ വേഷം ലഭിച്ചത് സത്യൻ അന്തിക്കാട് സംവിധാനം ചെയ്ത പുതിയ തീരങ്ങളിലാണ്. ചിത്രത്തിൽ നിവിൻ പോളിയുടെ നായികയായിട്ടാണ് എത്തിയത്. . തുടർന്ന് ദിലീപ്, കുഞ്ചാക്കോ ബോബൻ ഫഹദ്, പൃഥ്വിരാജ് തുടങ്ങിയ മുൻനിര നായകന്മാരുടെ നായികയായി അഭിനയിച്ചിട്ടുണ്ട്.
പദ്മനാഭസ്വാമി ക്ഷേത്രഭരണത്തില്‍ രാജകുടുംബത്തിന് അവകാശമെന്ന് സുപ്രീംകോടതി
ന്യൂഡൽഹി : പതിറ്റാണ്ടുകള്‍ നീണ്ട നിയമപ്പോരാടത്തിനൊടുവില്‍ തിരുവനന്തപുരത്തെ പദ്മനാഭസ്വാമി ക്ഷേത്രത്തിന്റെ ഉടമസ്ഥാവകാശതര്‍ക്കത്തില്‍ രാജകുടുംബത്തിന് അനുകൂല വിധി നല്‍കി സുപ്രീംകോടതി. ശ്രീ പദ്മനാഭസ്വാമി ക്ഷേത്രത്തിന്റെ ഭരണം താത്കാലിക ഭരണസമിതിക്ക് കൈമാറി സുപ്രീംകോടതി ഉത്തരവിട്ടു. ഹൈക്കോടതി വിധിക്കെതിരെ രാജകുടുംബം സമര്‍പ്പിച്ച അപ്പീല്‍ അംഗീകരിച്ച സുപ്രീംകോടതി ക്ഷേത്രത്തിന്റെ നടത്തിപ്പില്‍ രാജകുടുംബത്തിനുള്ള അവകാശം ഇല്ലാതാവുന്നില്ലെന്ന് വ്യക്തമാക്കി.
ശ്രീ പദ്മനാഭസ്വാമി ക്ഷേത്രം ഒരു പൊതുക്ഷേത്രമായി തുടരുമെന്നും എന്നാല്‍ അത്തിന്റെ നടത്തിപ്പില്‍ രാജകുടുംബത്തിനും അവകാശമുണ്ടെന്നുമാണ് സുപ്രീംകോടതി പറയുന്നത്.
പുതിയ ഭരണസമിതിയെ ക്ഷേത്രഭരണം ഏല്‍പിക്കണം എന്നാണ് സുപ്രീംകോടതിയുടെ ഉത്തരവ്. ജില്ലാ ജഡ്ജി അധ്യക്ഷനായ ഒരു താത്കാലിക സമിതി തത്കാലത്തേക്ക് ക്ഷേത്ര ഭരണം തുടരണം. തുടര്‍ന്ന് രാജകുടുംബ പ്രതിനിധിയും സംസ്ഥാന സര്‍ക്കാര്‍ പ്രതിനിധിയും അടങ്ങിയ പുതിയ ഭരണസമിതിയെ ഇനി തെരഞ്ഞെടുക്കണം.
2014-ലെ സുപ്രീംകോടതിയുടെ ഇടക്കാല വിധിയുമായി താരത്മ്യം ചെയ്യുമ്ബോള്‍ രാജകുടുംബത്തിന് അനുകൂലമായ രീതിയില്‍ കേസ് മാറി മറിഞ്ഞതായാണ് വിധിയില്‍ നിന്നും വ്യക്തമാവുന്നത്. ക്ഷേത്രത്തിന്‍്റെ ഭരണസംവിധാനവും പൊതുസ്ഥിതിയും പഠിക്കാന്‍ സുപ്രീംകോടതി നിയോഗിച്ച അമിക്കസ് ക്യൂറി നല്‍കിയ റിപ്പോര്‍ട്ടില്‍ രാജകുടുംബത്തിനെതിരെ രൂക്ഷവിമര്‍ശനമുണ്ടായിരുന്നു.
സിഎജി വിനോദ് റായിയും ക്ഷേത്രത്തിന്റെ നടത്തിപ്പില്‍ പല അപാകതകളുമുണ്ടെന്ന് റിപ്പോര്‍ട്ട് നല്‍കിയിരുന്നു. ഇത്രയും പ്രതികൂല ഘടകങ്ങള്‍ ഉണ്ടായിട്ടും ക്ഷേത്രഭരണത്തില്‍ പങ്കാളിയാവാന്‍ സാധിച്ചത് രാജകുടുംബത്തിന് വലിയ വിജയമായിരിക്കും നല്‍കുക. രാജ്യത്തെ വിവിധ രാജകുടുംബങ്ങളുടെ നിയന്ത്രണത്തിലുള്ള ക്ഷേത്രങ്ങളുടെ നടത്തിപ്പിലും ഈ വിധി നിര്‍ണായകമാവും.ക്ഷേത്ര നടത്തിപ്പില്‍ രാജകുടുംബത്തിനുള്ള അവകാശം ആചാരത്തിന്റെ ഭാഗമാണെന്നും ആ ആചാരം തുടരുമെന്നുമാണ് സുപ്രീംകോടതി വ്യക്തമാക്കുന്നത്.
ശ്രീപദ്മനാഭസ്വാമി ക്ഷേത്രത്തിന്‍്റെ ഉടമസ്ഥതയെ ചൊല്ലി സംസ്ഥാന സര്‍ക്കാരും രാജകുടുംബവും തമ്മില്‍ നിലനിന്ന തര്‍ക്കത്തിനാണ് വര്‍ഷങ്ങള്‍ നീണ്ട നിയമപ്പോരാട്ടത്തിനൊടുവില്‍ പരമോന്നത നീതിപീഠം വ്യക്തത വരുത്തുന്നത്. ക്ഷേത്ര ഉടമസ്ഥത ആര്‍ക്ക്? ക്ഷേത്ര ഭരണം എങ്ങനെ വേണം? രാജകുടുംബത്തിന് അവകാശമുണ്ടോ? സ്വത്തിന്റെ അവകാശം ആര്‍ക്ക്? ബി നിലവറ തുറക്കണോ? തുടങ്ങി വിവിധ നിയമപ്രശ്നങ്ങള്‍ക്കും തര്‍ക്കങ്ങള്‍ക്കുമാണ് സുപ്രീംകോടതി ഇന്നു തീര്‍പ്പ് കല്‍പിക്കുന്നത്.
ജസ്റ്റിസ് ആര്‍.എം.ലോധ, ജസ്റ്റിസ് എ.കെ.പട്നായിക് എന്നിവരടങ്ങിയ ബെഞ്ചാണ് പദ്മനാഭസ്വാമി ക്ഷേത്ര കേസ് ആദ്യം പരിഗണിച്ചത്. വിചാരണയ്ക്കിടെ ഇരുവരും വിരമിച്ചതോടെ ജസ്റ്റിസ് യു.യു.ലളിത്, ജസ്റ്റിസ് ഇന്ദുമല്‍ഹോത്ര എന്നിവരടങ്ങിയ ബെഞ്ചാണ് കേസില്‍ ഇപ്പോള്‍ വിധി പറയുന്നത്.
ക്ഷേത്രഭരണം സംസ്ഥാന സര്‍ക്കാരിന് വിട്ടു കൊടുത്തു കൊണ്ട് 2011-ല്‍ കേരള ഹൈക്കോടതി പുറപ്പെടുവിച്ച വിധിക്കെതിരെയാണ് തിരുവിതാംകൂര്‍ രാജകുടുംബും സുപ്രീംകോടതിയെ സമീപിച്ചത്. ക്ഷേത്രഭരണം രാജാവിനാണെന്നും രാജാവിന്‍്റെ അനന്തരാവകാശിക്ക് കേസിന്‍്റെ നടത്തിപ്പ് കൈമാറാനാവില്ലെന്നും ഹൈക്കോടതി അന്നു വിധിച്ചിരുന്നു. ക്ഷേത്രത്തിലേയും നിലവറകളിലേയും അമൂല്യവസ്തുക്കളുടെ കണക്കെടുക്കണമെന്നും ജസ്റ്റിസ് സിഎന്‍ രാമചന്ദ്രനും ജസ്റ്റിസ് കെ.സുരേന്ദ്രമോഹനും അധ്യക്ഷനായ ബെഞ്ച് അന്നു വിധിച്ചു.
ഈ വിധിയെ ചോദ്യം ചെയ്ത് രാജകുടുംബം സുപ്രീംകോടതിയെ സമീപിച്ചതോടെയാണ് പദ്മനാഭസ്വാമി ക്ഷേത്രത്തെ ചൊല്ലിയുള്ള നിയമപ്പോരാട്ടം പരമോന്നത നീതിപീഠത്തില്‍ ആരംഭിച്ചത്. ക്ഷേത്ര സ്വത്ത് പ്രതിഷ്ഠക്ക് അവകാശപ്പെട്ടതാണെന്നും അതു നോക്കി നടത്താനുള്ള അവകാശം തങ്ങള്‍ക്കാണെന്നും രാജകുടുംബം കോടതിയില്‍ വാദിച്ചു. ക്ഷേത്ര സ്വത്തില്‍ തങ്ങള്‍ അവകാശം ഉന്നയിക്കുന്നില്ലെന്നും പദ്മനാഭസ്വാമി ക്ഷേത്രം പൊതുക്ഷേത്രം തന്നെയാണെന്നും രാജകുടുംബം പദ്മനാഭസ്വാമി ദാസന്‍മാരാണെന്നും കോടതിയില്‍ അവര്‍ വ്യക്തമാക്കിയിരുന്നു.
കൊവിഡ് വാക്സിൻ കണ്ടെത്തിയെന്ന് റഷ്യ ; മനുഷ്യരിലെ പരീക്ഷണം വിജയകരം
കൊവിഡ് വാക്സിൻ കണ്ടെത്തിയെന്ന അവകാശവാദവുമായി റഷ്യയിലെ സെചനോവ് സർവകലാശാല. സർവകലാശാലയിലെ വളണ്ടിയർമാരിലാണ് കൊവിഡ് വാക്സിൻ പരീക്ഷണം നടത്തിയത്. വാക്സിൻ മനുഷ്യരിൽ പരീക്ഷിച്ചു എന്നും പരീക്ഷണം വിജയകരമായിരുന്നു എന്നും മുഖ്യ ഗവേഷക എലെന സ്മോലിയാർചക് പറഞ്ഞു. റഷ്യൻ ന്യൂസ് ഏജൻസിയായ ടാസ് ആണ് വാർത്ത റിപ്പോർട്ട് ചെയ്തത്.
“ഗവേഷണം അവസാനിച്ചു. വാക്സിൻ ഫലപ്രദമാണെന്ന് തെളിഞ്ഞു. ജൂലായ് 15നും 20നും വളണ്ടിയർമാരെ ഡിസ്ചാർജ് ചെയ്യും. ഡിസ്ചാർജ് ആയതിനു ശേഷവും അവർ നിരീക്ഷണത്തിലായിരിക്കും.”- സർവകലാശാലയിലെ ക്ലിനിക്കൽ റിസർച്ച് സെൻ്ററിൻ്റെ ഹെഡ് ആയ എലെന പറഞ്ഞു.
ജൂൺ 18നാണ് വാക്സിൻ മനുഷ്യരിൽ പരീക്ഷിക്കാൻ ആരംഭിച്ചത്. ആദ്യ ഘട്ടത്തിൽ 18 വളണ്ടിയർമാരിലും ജൂൺ 23നു നടന്ന രണ്ടാം ഘട്ടത്തിൽ 20 വളണ്ടിയർമാരിലും വാക്സിൻ പരീക്ഷിച്ചു
ബിഗ് ബോസ് താരം പ്രദീപ് ചന്ദ്രന്‍ വിവാഹിതനായി
ബിഗ് ബോസ് മലയാളം രണ്ടാം സീസണിലൂടെ ശ്രദ്ധേയനായ നടന്‍ പ്രദീപ് ചന്ദ്രന്‍ വിവാഹിതനായി. കരുനാഗപ്പളളി സ്വദേശി അനുപമ രാമചന്ദ്രനെയാണ് നടന്‍ ജീവിതസഖിയാക്കിയത്. ലോക് ഡൗണ്‍ നിയന്ത്രണങ്ങളെല്ലാം പാലിച്ച് അടുത്ത ബന്ധുക്കളുടെയും സുഹൃത്തുക്കളുടെയും സാന്നിദ്ധ്യത്തിലായിരുന്നു വിവാഹം. ബിഗ് ബോസ് താരത്തിന്റെ വിവാഹ ചിത്രങ്ങളെല്ലാം സോഷ്യല്‍ മീഡിയയില്‍ വൈറലായിരിക്കുകയാണ്. പ്രദീപ് വിവാഹിതനായതിന്റെ സന്തോഷം ബിഗ് ബോസിലെ സഹമല്‍സരാര്‍ത്ഥികളെല്ലാം സോഷ്യല്‍ മീഡിയയിലൂടെ പങ്കുവെച്ചിട്ടുണ്ട്.”അങ്ങനെ അവൻ കല്യാണംകഴിച്ചു. ഹോ..അളിയാ.. ഹാപ്പി മാരീഡ് ലെെഫ്. സ്വാഗതം അനുപമളിയോ..ഞങ്ങടെ ഫാമിലിയിലേക്കു…എന്നാണ് വീണാ നായര്‍ പ്രദീപിന്റെ വിവാഹ ചിത്രങ്ങള്‍ പങ്കുവെച്ച് കുറിച്ചിരിക്കുന്നത്. കഴിഞ്ഞ ദിവസമായിരുന്നു താന്‍ വിവാഹിതനാകാന്‍ പോവുന്ന വിവരം നടന്‍ സോഷ്യല്‍ മീഡിയയിലൂടെ അറിയിച്ചത്.തിരുവനന്തപുരം ഇന്‍ഫോസിസ് ജീവനക്കാരിയാണ് അനുപമ. ബിഗ് ബോസില്‍ പങ്കെടുക്കുന്നതിന് മുന്‍പ് അനുപമയുമായുളള വിവാഹലോചന പ്രദീപിന് വന്നിരുന്നു. അന്ന് വീട്ടുകാര്‍ക്കെല്ലാം ഒകെയാവുകയും മുന്നോട്ട് പോവാന്‍ തീരുമാനിക്കുകയും ചെയ്തിരുന്നു. എന്നാല്‍ ആ സമയത്താണ് ബിഗ് ബോസ് വന്നത്. പിന്നാലെ ബിഗ് ബോസില്‍ നിന്ന് പ്രദീപ് പുറത്തായ ശേഷം വിവാഹം ഉറപ്പിക്കുകയായിരുന്നു.എന്റെ ഹൃദയത്തോട് അടുത്തുനില്‍ക്കുന്ന നിങ്ങളെ എല്ലാവരെയും പങ്കെടുപ്പിച്ച് തിരുവനന്തപുരത്ത് വെച്ച് നടത്താന്‍ ആഗ്രഹിച്ചിരുന്ന ചടങ്ങായിരുന്നു ഇതെന്നും എന്നാല്‍ വില്ലനായി എത്തിയ കൊറോണ കാലവും ലോക്ഡോണും നിര്‍ഭാഗ്യവശാല്‍ ഇല്ലാതാക്കിയെന്ന് നടന്‍ കുറിച്ചിരുന്നു. വിദേശത്തുളള ജ്യേഷ്ഠന്‍ ഉള്‍പ്പടെ പ്രിയപ്പെട്ട ഒരുപാട് പേര് കൂടെയില്ലാതെ ആണ് ഈ ചടങ്ങ് നടക്കുന്നത്. എല്ലാവരെയും പ്രത്യേകം പ്രത്യേകം അറിയിക്കാന്‍ പറ്റാത്തതില്‍ ക്ഷമിക്കണം.ഒരു പുതിയ ജീവിതം ആരംഭിക്കാന്‍ പോകുന്ന ഞങ്ങള്‍ക്ക് എല്ലാവരുടെയും അനുഗ്രഹങ്ങളും പ്രാര്‍ത്ഥനകളും പ്രതീക്ഷിക്കുന്നു. എന്നും പ്രദീപ് ചന്ദ്രന്‍ കുറിച്ചിരുന്നു.
തമിഴ് ചിത്രം കൊക്റ്റൈൽ റിവ്യൂ
റിവ്യൂ: കൊക്റ്റൈൽ
● ഭാഷ: തമിഴ്
● സമയം: 2 മണിക്കൂർ 8 മിനിറ്റ്
● വിഭാഗം : കോമഡി ത്രില്ലർ
● PREMIERED ON ZEE5 EXCLUSIVE
റിവ്യൂ ബൈ: NEENU SM
● നല്ല കാര്യങ്ങൾ : (അങ്ങനെ പറയാൻ ഒന്നും തന്നെ ഈ ചിത്രത്തിൽ ഇല്ല )
● മോശമായ കാര്യങ്ങൾ:
1. സംവിധാനം
2 . കഥ
3. തിരക്കഥ
4. അഭിനേതാക്കളുടെ പ്രകടനം
5. ഗനങ്ങളും പശ്ചാത്തല സംഗീതവും
● വൺ വേഡ്: വളരെ മോശമായ ഒരു ചിത്രം
● കഥയുടെ ആശയം : നാലു സുഹൃത്തുക്കൾ ചേർന്ന് ഒരു രാത്രി ഫ്ലാറ്റിൽ ഒരു പാർട്ടി നടത്താൻ തീരുമാനിക്കുന്നു. നിർഭാഗ്യവശാൽ, അടുത്ത ദിവസം രാവിലെ എഴുന്നേൽക്കുമ്പോൾ ഒരു പെൺകുട്ടിയുടെ മൃതദേഹം അവരുടെ മുറിയിൽ കാണുന്നു. തുടർന്ന് നിരവധി സംഭവങ്ങളിൽ നിന്ന് അവർ അതിനെ എങ്ങനെ അതിജീവിക്കുന്നു എന്നതാണ് ചിത്രം പറയുന്നത്.
● കഥ, തിരക്കഥ, സംവിധാനം എന്നിവയ്ക്കുള്ള വിശകലനം: സത്യത്തിൽ ഈ സിനിമയെക്കുറിച്ച് പറഞ്ഞാൽ, ഇത് ഒരു സമ്പൂർണ്ണ സമയം പാഴാക്കൽ ചിത്രമാണ്. എന്തുകൊണ്ടാണ് ഇത്തരത്തിലുള്ള പാഴ് ചിത്രങ്ങൾ കൊണ്ടു വരുന്നത് എന്നറിയില്ല . ചിത്രത്തിന്റെ സംവിധായകൻ ആർ‌എ വിജയ മുരുകൻ ആണ് കഥ എഴുതിയത്. ആവശ്യമില്ലാത്ത പൊട്ടാത്തങ്ങൾ എല്ലാം തന്നെ സിനിമയിൽ ഉടനീളം കാണാം. സ്‌ക്രീനിൽ അദ്ദേഹം അവതരിപ്പിക്കാൻ ഉദ്ദേശിക്കുന്ന നർമ്മം വെറുപ്പിക്കുന്നതിന്റെ അങ്ങേ അറ്റമാണ് കൂടാതെ ഒരു തരത്തിലും പൊരുത്തപ്പെടാത്ത കഥ കാഴ്ചക്കാരെ മുഴുവൻ സിനിമയും അലോസരപ്പെടുത്തുന്നു. അടിസ്ഥാനപരമായി, ഈ കഥയ്ക്ക് ഒരു സിനിമയാക്കാനുള്ള ശരിയായ ശക്തിയില്ല, കൂടാതെ ഏകദേശം 2 മണിക്കൂർ ദൈർഘ്യമുള്ളതിനാൽ, മുഴുവൻ സിനിമയും ബോറടിപ്പിക്കുന്നതായിരുന്നു. ഒരു 15 മിനിറ്റിൽ തീരേണ്ട ഹ്രസ്വ ചിത്രത്തെ എടുത്തു സിനിമക്കി 2 മണിക്കൂർ വലിച്ചു നീട്ടി ആളുകളുടെ സമയം പാഴാക്കുന്നു എന്നത് ആർക്കും മനസിലാകും.
മാത്രമല്ല, അവിശ്വസനീയത, ആഴത്തിന്റെ അഭാവം, പ്രവചനാതീതത എന്നിവ കാരണം സിനിമ കാണുന്നതിൽ തുടരാനുള്ള താൽപര്യം കാഴ്ചക്കാർക്ക് നഷ്ടപ്പെടും. തിരക്കഥ തീർത്തും പരാജയമായിരുന്നു , ഓരോ രംഗത്തിന്റെ തുടർച്ചയും വളരെ മോശമായിരുന്നു, കോമഡികൾക്ക് ഒട്ടും നിലവാരമില്ലായിരുന്നു, സിനിമയുടെ അവസാനം വെറും ചവറ്റുകുട്ട പോലെയായിരുന്നു. തിരക്കഥയിൽ എഴുതിയ കാര്യങ്ങൾ വിവിധ ഭാഷകളിലെ നിരവധി സിനിമകളിൽ നാം കണ്ടിരിക്കുന്നതാണ്, മാത്രമല്ല, പുതിയതായി ഒന്നും തന്നെ അനുഭവപ്പെട്ടില്ല. തുടക്കം മുതൽ തന്നെ, പ്രേക്ഷകരെ രസിപ്പിക്കുന്നതിൽ എഴുത്തുകാരൻ ദയനീയമായി പരാജയപ്പെട്ടുവെന്ന് വ്യക്തമാണ്, ഒരു കോമഡി ത്രില്ലർ സ്ഥാപിക്കുകയെന്ന ലക്ഷ്യത്തോടെയാണ് ചിത്രം ഒരുങ്ങിയതെങ്കിലും ഇതിൽ വലിയ കോമഡി കണ്ടെത്താൻ സാധിച്ചില്ല . നർമ്മം, വിശ്വാസവഞ്ചന, സൗഹൃദം, പ്രണയം എന്നിവയാണ് തിരക്കഥയിൽ പ്രധാനമായും ലക്ഷ്യമിട്ട ഘടകങ്ങൾ.
സംവിധാനം വെറും ദുർബലമായിരുന്നു, അതിനാൽ നിർമ്മാണത്തിന്റെ താളം പൂർണ്ണമായും നഷ്ടപ്പെട്ടു, കൂടാതെ സംവിധായകനിൽ നിന്നുള്ള മോശം പ്രകടനത്തിലൂടെ സിനിമ നീങ്ങുമ്പോൾ തീർച്ചയായും കാഴ്ചക്കാരുടെ താൽപ്പര്യം ഇല്ലാതാക്കും. സംവിധായകന് കൂടുതൽ ശ്രമിക്കാൻ കഴിയുമായിരുന്നു, ഹാസ്യ സിനിമ നിർമ്മിക്കുന്നതിൽ കൂടുതൽ പരിചയസമ്പന്നനായ മറ്റൊരാൾ സംവിധാനം ചെയ്തിരുന്നുവെങ്കിൽ ചിലപ്പോൾ സിനിമ മികച്ച രീതിയിൽ അവസാനിക്കാമായിരുന്നു. തുടർന്നുള്ള കഥയിലേക്ക് വരുമ്പോൾ എല്ലാം താറുമാറായി, കഥയും തിരക്കഥയും തമ്മിലുള്ള ബന്ധം വളരെയധികം മടുപ്പിക്കുന്നതാണ്, ഇത് സിനിമയുടെ മറ്റൊരു പ്രധാന പോരായ്മയാണ്.
കഥ സമാനമാണെങ്കിലും, ഇതിവൃത്തത്തെ രസകരമായ ഒരു സിനിമയാക്കാനുള്ള സാധ്യതകളൾ ഉണ്ടായിരുന്നുവെങ്കിലും അഭിനേതാക്കളുടെ മോശം പ്രകടനത്തിലൂടെ കഥ പറഞ്ഞ രീതിയായിരുന്നു പ്രധാന പരാജയം. എന്നിരുന്നാലും, കുറച്ച് സീനുകൾ ചില കോമഡികൾ നൽ‌കിയേക്കാം, പക്ഷേ അതിനർ‌ത്ഥം സിനിമ എവിടെയൊക്കെയോ നന്നായിരുന്നു എന്നല്ല, മുഴുവൻ ആയി നോക്കുമ്പോൾ സിനിമ ഒരു നിഷ്‌ക്രിയത്വമാണ്. മറ്റൊരു പ്രധാന സങ്കീർണത അമിതമായ നടകീയ ഘടകങ്ങളായിരുന്നു, പ്രത്യേകിച്ചും പാട്ടുകളിലേക്ക് നയിക്കുന്ന സാഹചര്യങ്ങൾ. കാമുകിയെ കാണുമ്പോൾ നായകൻ ഒരു ഗാനം ആലപിക്കുക, തെരുവിൽ അപരിചിതരോടൊപ്പം നൃത്തം ചെയ്യുക, മദ്യപിക്കുന്ന സമയത്ത് ഒരു സുഹൃത്തിന്റെ സംഘം പാടുക എന്നിവ അമിതവേഗതയും പ്രകോപിപ്പിക്കലും അനുഭവപ്പെട്ടു, 80 കളിൽ നിർമ്മിച്ചിരുന്നു എങ്കിൽ കളക്ഷൻ വാരികൂട്ടുമായിരുന്നു എന്നു തോന്നിപോയി. (വെറുപ്പിച്ചു കൊല്ലാൻ)
● അഭിനേതാക്കളുടെ പ്രകടനം : അത്ഭുതകരമായി എനിക്ക് തോന്നിയത് യോഗി ബാബു എന്തുകൊണ്ടാണ് ഈ തിരക്കഥയും സിനിമയും തിരഞ്ഞെടുത്തത് എന്നാണ്. സിനിമയിൽ ഒരേയൊരു നല്ല കാര്യം അദ്ദേഹമായിരുന്നു. അദ്ദേഹത്തിന്റെ കുറച്ച് കോമഡികൾ മികച്ചതായിരുന്നു,. മിഥുൻ മഹേഷിന്റെ പ്രകടനം പക്വതയില്ലാത്തതായിരുന്നു, പ്രത്യേകിച്ച് റൊമാന്റിക് രംഗങ്ങളിൽ. നിർണായക രംഗങ്ങളിലും അദ്ദേഹത്തിന്റെ വിവിധ ഭാവങ്ങൾ ഭയങ്കരമായിരുന്നു. കൂടാതെ, പ്രായം എന്ന നിലയിൽ കെവിൻ തീർത്തും തെറ്റായ തിരഞ്ഞെടുപ്പായിരുന്നു, സിനിമയിലെ അദ്ദേഹത്തിന്റെ നിരപരാധിത്വം എല്ലാം കാണാൻ ഭയങ്കരമായിരുന്നു, കൂടാതെ സംഭാഷണത്തിലെ സമയവും ഡെലിവറിയും തെറ്റായിരുന്നു. പാണ്ഡി ആയി കെപി വൈ ബാലയെ അലോസരപ്പെടുത്തുന്നതായിരുന്നു, അദ്ദേഹത്തിന്റെ പ്രകടനം മോശമായിരുന്നു. . ശിവാജി ഷിൻഡെ, മിമി ഗോപി എന്നിവർ ഈ ചിത്രം ചെയ്യാൻ തെറ്റായ ഒരു തിരഞ്ഞെടുപ്പ് നടത്തി.
● സാങ്കേതിക വിഭാഗം:സായ് ഭാസ്‌കറിന്റെ സംഗീത രചനകൾ കൂടുതൽ വാഗ്ദാനം ചെയ്യുന്നില്ല, ഗാനങ്ങൾ ശരാശരിയേക്കാൾ താഴെയായിരുന്നു, അവ സാഹചര്യങ്ങളുമായി പൊരുത്തപ്പെടുന്നില്ല. പശ്ചാത്തല സ്‌കോർ പ്രത്യേകിച്ച് ഹ്ഉമർ സീനുകളിൽ ഒട്ടും നല്ലതായിരുന്നില്ല . ത്രില്ലർ ഏരിയകളിലേക്ക് സിനിമ സമീപിക്കുമ്പോൾ പശ്ചാത്തല സംഗീതം സാധാരണമായിരുന്നു. ട്യൂണുകളൊന്നും രംഗവുമായി പൊരുത്തപ്പെടുന്നില്ല. ആർ‌ജെ രവീയുടെ ഛായാഗ്രഹണം ശരാശരിയായിരുന്നു, മാന്യമായിരുന്നില്ല. ആദ്യ ഗാനത്തിൽ ഉപയോഗിച്ച ലൈറ്റിംഗ് ടെക്നിക്കുകൾ ഭയങ്കരമാണ്, പക്ഷേ വീട്ടിൽ വളർത്തുന്ന പക്ഷിയുടെ ചില ഫ്രെയിമുകൾ മികച്ചതായിരുന്നു. എഡിറ്റിംഗ് മാന്യമായിരുന്നു എസ്. എൻ. ഫാസിൽന്റെ കട്ട് ഇവിടെയും ഇവിടെയും ആയി ചില പൊരുത്തക്കേടുകൾ അനുഭവപ്പെട്ടു.
● നിഗമനം :
മൊത്തത്തിൽ നോക്കുമ്പോൾ ഒരു നല്ല അനുഭവമല്ല ചിത്രം സമ്മാനിക്കുന്നത്. 2 മണിക്കൂർ വെറുതെ പാഴാക്കി എന്നതാണ് സത്യം. ദയവു ചെയ്ത് ഇതു കാണാൻ നിങ്ങളുടെ വിലയേറിയ സമയം പാഴാക്കുന്നതെന്നാണ് എനിക്ക് പറയാൻ ഉള്ളത്. കോമഡി ത്രില്ലർ എന്ന വിഭാഗത്തിനു തന്നെ നാണക്കേടാണ് ഈ ചിത്രം ഇതുപോലുള്ള നാടകങ്ങൾ ദയവു ചെയ്ത് കൊണ്ടുവരാതിരിക്കുക.
● റേറ്റിംങ്: 1 /5
ഐശ്വര്യ റായിക്കും മകൾക്കും കോവിഡ്
മുംബൈ: അമിതാബ് ബച്ചനും അഭിഷേക് ബച്ചനും കോവിഡ് സ്ഥിരീകരിച്ചതിന് പിന്നാലെ ഐശ്വര്യ റായിക്കും മകൾ ആരാധ്യയ്ക്കും കോവിഡ്. ഇരുവരും മുംബൈ നാനാവതി ആശുപത്രിയിൽ ചികിത്സയിലാണ്. ജയാ ബച്ചൻ്റെ പരിശോധനാ ഫലം നെഗറ്റീവാണ്. ഇന്നലെ ഐസൊലേഷൻ വാർഡിൽ പ്രവേശിപ്പിച്ച അമിതാഭ് ബച്ചൻ്റെ ആരോഗ്യനില തൃപ്തികരമാണെന്ന് നാനാവതി സൂപ്പർ സപെഷ്യലിറ്റി ആശുപത്രി അധികൃതർ അറിയിച്ചു. ചികിത്സയിൽ കഴിയുന്ന അഭിഷേക് ബച്ചൻ്റെ നിലയും തൃപ്തികരമാണെന്ന് ആശുപത്രി അധികൃതർ അറിയിച്ചു.
സി കെ ആശ എം എൽ എ ക്വാറൻ്റൈനിൽ
കോട്ടയം: വൈക്കം എംഎൽഎ സി കെ ആശ സ്വയം ക്വാറൻ്റൈനിൽ പ്രവേശിച്ചു. ശനിയാഴ്ച കോവിഡ് സ്ഥിരീകരിച്ചു ഒരു അദ്ധ്യാപികയുമായി നേരിട്ട് സമ്പർക്കമുണ്ടായതിനെ തുടർന്നാണിത്. ഫേസ്ബുക്കിലൂടെയാണ് എം എൽ എ ഇക്കാര്യം അറിയിച്ചത്. അദ്ധ്യാപിക വിദ്യാർഥിനിയുടെ വീട്ടിൽ പഠനവിവരം അന്വേഷിച്ചെത്തിയതിൻ്റെ രണ്ടാം ദിവസം വിദ്യാർത്ഥിനിയക്ക് ടി വി കൈമാറുന്നതിൻ്റെ ചടങ്ങിൽ എം എൽ എ യും പങ്കെടുത്തിരുന്നു.
English : CK Asha MLA in Quarantine
സ്വർണക്കടത്ത് കേസിൽ മുഖ്യപ്രതികളിലൊരാളായ സ്വപ്ന സുരേഷ് പിടിയിൽ
തിരുവനന്തപുരം: സംസ്ഥാനത്ത് വൻ വിവാദത്തിന് കാരണമായ സ്വർണ്ണക്കടത്ത് കേസിൽ മുഖ്യപ്രതികളിലൊരാളായ സ്വപ്ന സുരേഷ് പിടിയിൽ. ബെംഗലൂരുവിൽ വച്ചാണ് ഇവരെ കസ്റ്റഡിയിലെടുത്തതെന്നാണ് വിവരം.
കേസിൽ മുൻ കോൺസുലേറ്റ് ജീവനക്കാരായിരുന്ന സരിത്ത് കുമാർ ഒന്നാം പ്രതിയും സ്വപ്ന സുരേഷ് രണ്ടാം പ്രതിയുമാണ്. കൊച്ചി സ്വദേശി, വിദേശത്തുള്ള ഫൈസൽ ഫരീദാണ് മൂന്നാം പ്രതി. സ്വപ്നയുടെ ബിനാമിയെന്ന് സംശയിക്കുന്ന സന്ദീപ് നായർ കേസിലെ നാലാം പ്രതിയാണ്.
സ്വർണക്കടത്തുമായി ബന്ധമില്ലെന്നും മാധ്യമ വാ‍ർത്തകളുടെ അടിസ്ഥാനത്തിലാണ് കസ്റ്റംസ് പ്രതിചേർക്കാൻ ഒരുങ്ങുന്നതെന്നുമാണ് കേരള ഹൈക്കോടതിയിൽ സമർപ്പിച്ച മുൻകൂർ ജാമ്യാപേക്ഷയിൽ സ്വപ്ന പറഞ്ഞത്. അറ്റാഷേ ആവശ്യപ്പെട്ടത് അനുസരിച്ചാണ് സ്വർണം അടങ്ങിയ നയതന്ത്ര ബാഗ് ലഭിക്കാൻ വൈകുന്നതെന്തെന്ന് അന്വേഷിച്ചതെന്നാണ് ഇവരുടെ വാദം. 2019 ൽ കോൺസിലേറ്റിലെ ജോലി അവസാനിപ്പിച്ച സ്വപ്ന, അതിന് ശേഷവും സൗജന്യ സേവനം തുടർന്നുവെന്ന്.
കസ്റ്റംസിന്റെ ആവശ്യപ്രകാരം സ്വപ്നയെയും സന്ദീപിനെയും പിടികൂടാൻ പ്രത്യേക സംഘത്തെ പൊലീസ് നിയോഗിച്ചിരുന്നു.. കൊച്ചി സിറ്റി ഡെപ്യൂട്ടി പോലീസ് കമ്മീഷണര്‍ ജി. പൂങ്കുഴലിയുടെ നേതൃത്വത്തില്‍ പ്രത്യേക പോലീസ് സംഘത്തിന് രൂപം നല്‍കി. പ്രത്യേകസംഘം അന്വേഷണം ആരംഭിച്ച് മണിക്കൂറുകൾക്കകമാണ് മുഖ്യപ്രതിയെ അറസ്റ്റ് ചെയ്തത്. കസ്റ്റംസ്, എന്‍ഐഎ എന്നിവയുമായുള്ള ഏകോപനവും സംഘത്തിനുണ്ട്. സ്ഥാനത്തെവിടെയും ഏതുരീതിയിലുമുള്ള അന്വേഷണം നടത്താന്‍ പ്രത്യേക സംഘത്തിന് അനുമതി നല്‍കിയിരുന്നു. കൊച്ചി കമ്മീഷണര്‍ വിജയ് സാക്കറെയുടെ മേല്‍നോട്ടത്തിലായിരുന്നു അന്വേഷണം. പ്രതികളെ കണ്ടെത്താന്‍ സഹായം തേടി കസ്റ്റംസ് അധികൃതർ കമ്മീഷണർക്ക് ഇ-മെയിലായാണ് അപേക്ഷ സമർപ്പിച്ചിരുന്നത്.
English : Swapna Suresh, one of the main accused in the gold smuggling case, has been arrested