അനാര്‍ക്കലിക്ക് ശേഷം തിരക്കഥാകൃത്തും സംവിധായകനുമായ സച്ചി രചനയും സംവിധാനവും നിര്‍വഹിച്ച ചിത്രം അയ്യപ്പനും കോശിയും തമിഴിലേക്ക് റീമേക്ക് ചെയ്യുന്നു. തമിഴിലെ ഹിറ്റ് സിനിമകളുടെ നിര്‍മ്മാതാവ് കതിരേശനാണ് റീമേക്ക് അവകാശം സ്വന്തമാക്കിയത്. അടുത്തിടെ തീയേറ്ററുകളില്‍ വന്‍ വിജയമായി മാറിയ ചിത്രമാണ് പൃഥ്വിരാജ് ബിജു മേനോന്‍ ഒരുമിച്ചഭിനയിച്ച അയ്യപ്പനും കോശിയും. ഹിറ്റ് സിനിമകളായ ജിഗര്‍ത്തണ്ട, ആടുകളം എന്നീ ചിത്രങ്ങള്‍ നിര്‍മിച്ച കതിരേശന്‍ വലിയ തുകയ്ക്കാണ് അയ്യപ്പനും കോശിയും റീമേക്ക് അവകാശം സ്വന്തമാക്കിയിരിക്കുന്നത്.
തിരക്കഥാകൃത്തും സംവിധായകനുമായ സച്ചി രചനയും സംവിധാനവും ചെയ്ത് രഞ്ജിത്, ശശിധരന്‍ എന്നിവര്‍ ചേര്‍ന്ന് നിര്‍മ്മിച്ചിരുന്ന ചിത്രം ഈ വര്‍ഷത്തെ മലയാളത്തിലെ ബ്ലോക്ബസ്റ്റര്‍ ഹിറ്റുകളില്‍ ഒന്നായിരുന്നു. കേരളത്തിലും ഗള്‍ഫ് നാടുകളിലുമുള്‍പ്പെടെ മികച്ച കളക്ഷന്‍ നേടിയ ചിത്രം ഡിജിറ്റല്‍, ടെലിവിഷന്‍ അവകാശം വിറ്റതിലൂടെയും വന്‍ ലാഭമാണ് നിര്‍മ്മാതാവിന് നേടികൊടുത്തത്.
അയ്യപ്പനും കോശിയും എക്സി: പ്രൊഡ്യൂസറായ അഗ്നിവേഷ് രഞ്ജിത്താണ് ഇത് സംബന്ധിച്ച് സോഷ്യല്‍മീഡിയയിലൂടെ അറിയിച്ചിരിക്കുന്നത്.