കൊച്ചി: തിരുവനന്തപുരം, കോഴിക്കോട്  ലൈറ്റ് മെട്രോ പദ്ധതികളിലെ പ്രതിസന്ധിയിൽ സർക്കാരിനെതിരേ വിമർശനവുമായി ഡിഎംആർസി മുഖ്യഉപദേഷ്ടാവ് ഇ.ശ്രീധരൻ. ഡിഎംആർസി വലിയ ദുഃഖത്തോടെയാണ് പദ്ധതിയിൽ നിന്ന് പിന്മാറുന്നതെന്നും  സർക്കാരിന്‍റെ അനാസ്ഥയാണ് പിന്മാറാൻ കാരണം എന്നും കൊച്ചിയിൽ വിളിച്ച വാർത്താ സമ്മേളനത്തിൽ  ശ്രീധരൻ പറഞ്ഞു.

പദ്ധതിയുമായി ബന്ധപ്പെട്ട് ഡിഎംആർസിയുടെ ഭാഗത്ത് ഒരു വീഴ്ചയും ഉണ്ടായിട്ടില്ല. പ്രാഥമിക ജോലികൾ ഉടൻ തുടങ്ങാമെന്ന ഉറപ്പിലാണ് 15 മാസം മുൻപ് ഡിഎംആർസി ലൈറ്റ് മെട്രോയ്ക്കായി രണ്ടു ഓഫീസുകൾ കേരളത്തിൽ തുറന്നത്. മാസം 15 ലക്ഷത്തോളം മുടക്കിയാണ് ഓഫീസുകൾ പ്രവർത്തിച്ചിരുന്നത്. എന്നാൽ 15 മാസം കഴിഞ്ഞിട്ടും കരാർ ഒപ്പിടാൻ സർക്കാർ തയാറായില്ല. പദ്ധതിയുമായി ബന്ധപ്പെട്ട് പതിനഞ്ചോളം യോഗങ്ങളും ചേർന്നിരുന്നു. എന്നാൽ അന്തിമ കരാർ എന്ന നിലയിലേക്ക് സർക്കാർ എത്തിയില്ല. ഏറ്റവും ഒടുവിൽ മുഖ്യമന്ത്രിയെ കാണാൻ സമയം ചോദിച്ചെങ്കിലും അനുവദിച്ചില്ല. പിന്നെ, പിന്മാറുകയല്ലാതെ മറ്റ് മാർഗമില്ലെന്നും പദ്ധതിയിൽ ഇനി ഡിഎംആർസി ഉണ്ടാവില്ലെന്നും അദ്ദേഹം പറഞ്ഞു.

തനിക്കെതിരേ പൊതുമരാമത്ത് മന്ത്രി ജി.സുധാകരൻ നടത്തിയ വിമർശനങ്ങളോട് പ്രതികരിക്കാൻ താത്പര്യമില്ല. ഇ.ശ്രീധരൻ എന്ന വ്യക്തിയുള്ളത് കൊണ്ടാണ് കേരളത്തിലെ ജോലികൾ ഡിഎംആർസി ഏറ്റെടുത്തതെന്നും,  മാർച്ച് പകുതിയോടെ ഡിഎംആർസിയുടെ കേരളത്തിലെ ഓഫീസുകൾ പൂട്ടുമെന്നും ഇ.ശ്രീധരൻ വ്യക്തമാക്കി.

യൂത്ത് കോണ്‍ഗ്രസ് പ്രവര്‍ത്തകന്‍ ഷുഹൈബ് കൊല്ലപ്പെട്ട കേസ് സിബിഐ അന്വേഷിക്കണമെന്ന് ഹൈക്കോടതി. കേസിന്റെ അന്വേഷണം സിബിഐയെ ഏല്‍പ്പിക്കണമെന്നാവശ്യപ്പെട്ട് ഷുഹൈബിന്റെ മാതാപിതാക്കള്‍ നല്‍കിയ ഹര്‍ജിയിലാണ് ജസ്റ്റിസ് കമാല്‍ പാഷയുടെ ഉത്തരവ്. സിബിഐയ്ക്ക് കേസ് കൈമാറേണ്ട ആവശ്യമില്ല എന്ന സർക്കാരിന്റെ വാദത്തിനാണ് ഇതോടെ തിരിച്ചടിയായത്.

കോടതി നിർദ്ദേശിച്ചാൽ കേസ് അന്വേഷണം ഏറ്റെടുക്കാമെന്ന നിലപാടാണ് സിബിഐ ഹൈക്കോടതിയിൽ സ്വീകരിച്ചിരുന്നത്. അന്വേഷണം ഏറ്റെടുക്കാൻ ഉത്തരവിടാനുള്ള അധികാരം കോടതിക്കുണ്ടെന്നും സിബിഐ വ്യക്തമാക്കിയിരുന്നു. ഈ ഒരു വിധിന്യായം കൊണ്ടെങ്കിലും രാഷ്ട്രീയ കൊലപാതകങ്ങൾക്ക് അന്ത്യമുണ്ടാകട്ടെ എന്ന ശുഭപ്രതീക്ഷയോടെയാണ് കോടതി സിബിഐ അന്വേഷണം പ്രഖ്യാപിച്ചത്.

സിബിഐ അന്വേഷണം സർക്കാർ എതിർത്തത് സത്യം പുറത്തുവരുമെന്നെ പേടികൊണ്ടാണെന്നും അധികാരംകൊണ്ട് അന്വേഷണം അട്ടിമറിക്കാൻ സാധിക്കില്ലെന്നും കെ സുധാകരൻ പ്രതികരിച്ചു.

കൊച്ചി: യൂത്ത് കോണ്‍ഗ്രസ് നേതാവ് ശുഹൈബിനെ സിപിഎം പ്രവർത്തകർ കൊലപ്പെടുത്തിയ കേസിൽ സർക്കാരിനെതിരേ രൂക്ഷ വിമർശനവുമായി ഹൈക്കോടതി. കേസ് സിബിഐക്ക് വിടണമെന്ന് ആവശ്യപ്പെട്ട് ശുഹൈബിന്‍റെ മാതാപിതാക്കൾ സമർപ്പിച്ച ഹർജിയിലെ വാദത്തിനിടെയാണ് ജസ്റ്റീസ് ബി.കെമാൽപാഷ സർക്കാരിനെതിരേ രൂക്ഷ പരാമർശങ്ങൾ നടത്തിയത്. ശുഹൈബിന്റെ കേസിൽ പോലീസ് ഇനി ഒന്നും ചെയ്യേണ്ടെന്ന് ഹൈക്കോടതി വാക്കാൽ പരാമർശിച്ചു.

കേസ് അന്വേഷണത്തിൽ കടുത്ത അതൃപ്തി പ്രകടിപ്പിച്ച കോടതി കൊലപാതകത്തിന് ഉപയോഗിച്ച ആയുധങ്ങൾ പ്രതികളുടെ സാന്നിധ്യത്തിൽ കണ്ടെടുക്കാൻ പോലീസ് ശ്രമിക്കാതിരുന്നതുതന്നെ സംശയമുണ്ടാക്കുന്നുണ്ടെന്നും കേസിന് പിന്നിലുള്ള എല്ലാവരും കൈകഴുകിയെന്നും നിരീക്ഷിച്ചു.

എന്നാൽ, വാദത്തിനിടെ സർക്കാർ അഭിഭാഷകൻ ഈ ഹർജി പരിഗണിക്കേണ്ടത് ഡിവിഷൻ ബെഞ്ചാണെന്ന് വാദിച്ചത് കോടതിയെ ചൊടിപ്പിച്ചു. താൻ മുൻപും സിബിഐ അന്വേഷണങ്ങൾക്ക് ഉത്തരവിട്ടിട്ടുണ്ടെന്നും അതിനുള്ള അധികാരം കോടതിക്കുണ്ടെന്നും ജസ്റ്റീസ് കെമാൽപാഷ ഓർമിപ്പിച്ചു. ഇതോടെ കേസുമായി ബന്ധപ്പെട്ട തെളിവുകൾ ഹാജരാക്കാൻ സർക്കാർ ഒരാഴ്ചത്തെ സാവകാശം തേടി.

തിരുവനന്തപുരം:  പിണറായി വിജയന്‍റെ വാക്കുകൾ പാടെ തള്ളി അദ്ദേഹത്തിന്‍റെ പാർട്ടിക്കാർ. കൊടികുത്തൽ സമരങ്ങൾ അനാവശ്യമാണെന്ന മുഖ്യമന്ത്രിയുടെ വാക്കുകൾക്കു വിലനൽകാതെ  കോഴിക്കോട്ട് പുതുപ്പാടിയിൽ ഫാക്ടറിക്കു മുന്നിൽ അതിർത്തി തർക്കം ചൂണ്ടിക്കാട്ടി സിപിഎം പ്രവർത്തകർ കൊടികുത്തി.  ഇതേത്തുടർന്ന് ലാറ്റക്സ് യൂണിറ്റിന്‍റെ പ്രവർത്തനം നിലച്ചെന്നാണ് വിവരം.

മദ്യപിച്ചെത്തിയ ‌പാർട്ടി പ്രവർത്തകർ ഫാക്ടറി പ്രവർത്തിപ്പിക്കാൻ അനുവദിക്കില്ലെന്ന് പറഞ്ഞാണ് കൊടിനാട്ടിയതെന്ന് ഫാക്ടറി ഉടമസ്ഥൻ ആരോപിച്ചു. കൊടികുത്തിയെന്നത് പ്രാദേശിക സിപിഎം നേതൃത്വം സ്ഥിരീകരിക്കുകയും ചെയ്തു.

തിങ്കളാഴ്ച നിയമസഭയിൽ സംസാരിക്കവെയാണ് കൊല്ലത്ത് പ്രവാസിയായ സുഗതൻ ജീവനൊടുക്കിയ സംഭവവുമായി ബന്ധപ്പെട്ട്  കൊടികുത്തൽ സമരങ്ങൾക്കെതിരെ മുഖ്യമന്ത്രി തുറന്നടിച്ചത്. ഓരോ പാർട്ടിയുടേയും വിലപ്പെട്ട സ്വത്താണ് അവരുടെ കൊടിയെന്നും അത് എവിടെയങ്കിലും കൊണ്ടുപോയി നാട്ടുന്നത് ശരിയല്ലെന്നുo  മുഖ്യമന്ത്രി പറഞ്ഞു. ഏത് പാർട്ടിയാണെങ്കിലും കൊടികുത്തുന്ന പ്രവണത ആശാസ്യമല്ലെന്നും ഇത് അവസാനിപ്പിക്കണമെന്നും അദ്ദേഹം പറഞ്ഞിരുന്നു.

ഒടുവിൽ മേഘാലയയും കാവിയിൽ മുങ്ങി . മേഘാലയിൽ മാർച്ച് ആറിന് എൻഡിഎ സർക്കാർ സത്യപ്രതിജ്ഞ ചെയ്ത് അധികാരമേൽക്കും. 17 സീറ്റുള്ള നാഷണല്‍ പീപ്പിള്‍സ്‌ പാര്‍ട്ടിയും (എന്‍.പി.പി) 6 സീറ്റുകളുള്ള യുഡിപിയും ഒരു സ്വതന്ത്ര എംഎല്‍എയും എൻഡിഎയ്ക്ക് പിന്തുണ വാഗ്ദാനം ചെയ്തു . എൻപിപി നേതാവ് കോൺറാഡ് സാംഗ്മയാകും മുഖ്യമന്ത്രിയാവുക‍യെന്നാണ് വിവരം. ചൊവ്വാഴ്ച സാംഗ്മയുടെ നേതൃത്വത്തിലുള്ള സർക്കാർ സത്യപ്രതജ്ഞ ചെയ്ത് അധികാരമേൽക്കും.