ഇന്ന് ശബരിമലയിൽ ദർശനത്തിനെത്തിയ യുവതിയെ വട്ടപ്പാറയില്‍ അയ്യപ്പഭക്തരും ബിജെപി പ്രവർത്തകരും ചേർന്ന് തടഞ്ഞു. കോഴിക്കോട് സ്വദേശി ബിന്ദുവിനെയാണ് തടഞ്ഞത്. പ്രതിക്ഷേധം ശക്തമായതോടെ ബിന്ദു മലകയറാതെ മടങ്ങുന്നു.
ഇന്ന് രാവിലെയാണ് ബിന്ദു എരുമേലി പൊലീസ് സ്റ്റേഷനിലെത്തി മലകയറാൻ പൊലീസ് സംരക്ഷണം ആവശ്യപ്പെട്ടത്. തുടര്‍ന്ന് ഇവരെ മുണ്ടക്കയം സ്റ്റേഷനിലേക്ക് കൊണ്ടുപോയി. അവിടെ നിന്ന് എരുമലേയിലെത്തിച്ച് പമ്പയിലേക്ക് ബസില്‍ വിടാൻ പോലീസ് തീരുമാനിക്കുകയായിരുന്നു. ഇവർ സഞ്ചരിച്ച കെ എസ് ആർ ടി സി ബസ് കണമലയ്ക്ക് സമീപം ആളുകൾ തടയുകയായിരുന്നു.
അതേസമയം, ശബരിമല യുവതീപ്രവേശവിധി റദ്ദാക്കണമെന്ന റിട്ട് ഹര്‍ജിയില്‍ എന്നു വാദം കേള്‍ക്കുമെന്ന് സുപ്രീംകോടതി നാളെ തീരുമാനിക്കും.
ഹരിശ്രീ അശോകന്റെ മകനും നടനുമായ അർജുൻ അശോകന്റെ വിവാഹ നിശ്ചയം കഴിഞ്ഞു. കൊച്ചി തമ്മനം സ്വദേശിനി നിഖിതയാണ് വധു. ഇൻഫോപാർക്കിൽ സോഫ്റ്റ്‌വെയർ എൻജിനീയറാണ് നിഖിത. വിവാഹം ഡിസംബർ രണ്ടാം തിയതി നടക്കും.
പറവ, ബി.ടെക് എന്നീ ചിത്രങ്ങളിൽ ശ്രദ്ധേയ വേഷം കൈകാര്യം ചെയ്തിട്ടുണ്ട് അർജുൻ. അമൽ നീരദ് ചിത്രം വരത്തനിൽ അർജുൻ ചെയ്ത ജോണി എന്ന നെഗറ്റീവ് റോൾ ഏറെ ശ്രദ്ധ നേടിയിരുന്നു..
ഡെന്മാര്‍ക്ക് ഓപ്പണിലെ ഫൈനലിൽ ഇന്ത്യന്‍ താരം സൈന നേവാളിന് തോല്‍വി. തായ്‌വാന്റെ ലോക ഒന്നാം നമ്പര്‍ താരം തായി സു യിങ്ങിനോടാണ് സൈന തോറ്റത്.
ഒന്നിനെതിരേ രണ്ടു ഗെയിമുകള്‍ക്കായിരുന്നു സൈനയുടെ തോല്‍വി. ആദ്യ ഗെയിം കൈവിട്ട ശേഷം തിരിച്ചുവന്ന് സൈന അതേ സ്‌കോറില്‍ രണ്ടാം ഗെയിം സ്വന്തമാക്കിയിരുന്നു എന്നാൽ മൂന്നാം ഗെയിമില്‍ സൈന വീണ്ടും പരാജയപ്പെട്ടു. സ്കോർ 13-21, 21-13, 6-21.
കൊച്ചി മെട്രോയ‌്ക്ക‌് അനുബന്ധമായി വൈദ്യുതി ഉപയോഗിച്ച‌് ഓടുന്ന ഓട്ടോറിക്ഷകൾ സർവീസ‌് ആരംഭിക്കുന്നതു സംബന്ധിച്ച കരാറിൽ കൊച്ചി മെട്രോ റെയിൽ ലിമിറ്റഡും (കെഎംആർഎൽ) കൈനറ്റിക‌് ഗ്രീൻ എനർജി ആൻഡ‌് പവർ സൊല്യൂഷൻസും ഒപ്പുവച്ചു. പ്രകൃതിസൗഹൃദ ഗതാഗതമാർഗങ്ങൾ ഏർപ്പെടുത്തുന്നതിന്റെ ഭാഗമായാണ‌് വൈദ്യുതി ഓട്ടോകൾ ഏർപ്പെടുത്തുന്നത‌്. ഡ്രൈവർമാർക്ക‌് പരിശീലനം നൽകിയശേഷമാകും സർവീസ‌് ആരംഭിക്കുക.
ആദ്യഘട്ടത്തിൽ 20 ഓട്ടോകളാണ‌് ഉണ്ടാകുക. ആലുവ, കളമശേരി, ഇടപ്പള്ളി, കലൂർ, എംജി റോഡ‌്, മഹാരാജാസ‌് സ‌്റ്റേഷനുകൾ കേന്ദ്രീകരിച്ചാകും ഇവയുടെ സർവീസ‌്. ഒരുതവണ ചാർജ‌് ചെയ‌്താൽ 70 കിലോമീറ്റർവരെ ഓട്ടോ ഓടും. മൂന്നുവർഷത്തേക്കാണ‌് കൈനറ്റിക്കിന‌് ലൈസൻസ‌് നൽകിയിരിക്കുന്നത‌്. ഓട്ടോറിക്ഷാ ഡ്രൈവർമാരുടെ സംഘടനകൾചേർന്ന‌് രൂപീകരിച്ച സൊസൈറ്റിയുടെ സഹകരണത്തോടെയാണ‌് സർവീസ‌് നടത്തുന്നത‌്. യാത്രക്കാരുടെ സുരക്ഷയ‌്ക്കായി ജിപിഎസ‌് സംവിധാനവും ഓട്ടോകളിൽ ഏർപ്പെടുത്തിയിട്ടുണ്ട‌്. മെട്രോയുടെ ഫീഡർ സർവീസെന്ന‌് സൂചിപ്പിക്കുന്ന സ‌്റ്റിക്കർ ഓട്ടോകളിൽ ഉണ്ടാകും.
ആരാധകർ കാത്തിരുന്ന പ്രണയജോഡി ദീപിക രൺവീർ വിവാഹ തീയതി പ്രഖ്യാപിച്ചു. നവംബർ 14, 15 തിയതികളായാണ് തങ്ങളുടെ വിവാഹ ചടങ്ങുകൾ നടക്കുക എന്ന് താരങ്ങൾ ട്വിറ്ററിലൂടെ അറിയിച്ചു. വിവാഹ തീയതി പുറത്തുവിട്ടെങ്കിലും വിവാഹസ്ഥലം തുടങ്ങി മറ്റു വിവരങ്ങളൊന്നും പുറത്തുവിട്ടിട്ടില്ല.
സഹ സംവിധായികയായി നടി അന്ന രേഷ്മാ രാജന്‍. പെൻ & പേപ്പർ ക്രിയേഷൻസിന്റെ ബാനറിൽ വലിയ ക്യാൻവാസിൽ ഒരുങ്ങുന്ന ജയറാം ലിയോ തദ്ദേവൂസ് ചിത്രം ലോനപ്പന്റെ മാമോദ്ദീസയിലാണ് അന്ന സഹ സംവിധായകയായത്. ചിത്രത്തിന്റെ ഷൂട്ടിംഗ് പൂർത്തിയായി, സംവിധായകൻ സിദ്ധിഖിന്റെ S ടാകീസ് ചിത്രം തിയേറ്ററിൽ എത്തിക്കും.
തനി നാട്ടിൻപുറത്തുകാരനായ ലോനപ്പൻ എന്ന കഥാപാത്രമായാണ് ജയറാം ചിത്രത്തിൽ എത്തുന്നത്.
വിജയ് ആൻ്റണിയുടെ ആദ്യത്തെ മാസ്സ് ആക്ഷന്‍ എൻ്റര്‍ടൈനറായ തിമിരു പുടിച്ചവന് നവംബര്‍ 9 മുതല്‍ കേരളത്തില്‍ പ്രദര്‍ശനത്തിനെത്തുന്നു. വിജയ് ആൻ്റണി നായകനായി അഭിനയിക്കുന്നതോടൊപ്പം സംഗീത സംവിധാനവും നിർവഹിച്ചിരിക്കുന്നു എന്നതാണ് ഈ ചിത്രത്തിന്റെ പ്രത്യേകത . നിവേദാ പെത്തുരാജാണ് നായിക . ഒരു സാധാരണ പോലീസുകാരനായ മുരുകവേല്‍ എന്ന നായക കഥാപാത്രത്തിന്‍റെ അത്യുന്നത പദവികള്‍ കീഴടക്കാനുള്ള സാഹസിക യാത്രയാണ് തിമിരു പുടിച്ചവന്‍റെ ഇതിവൃത്തം .
വിജയ് ആൻ്റണി ഫിലിം കോർപറേഷന് വേണ്ടി ഫാത്തിമാ വിജയ് ആൻ്റണി നിർമ്മിച്ച ഉദ്വേഗ ഭരിത ആക്ഷന്‍ വിനോദ ചിത്രമായ തിമിരു പുടിച്ചവൻ പ്രകാശ് ഫിലിംസ് കേരളത്തിൽ റിലീസ് ചെയ്യന്നു .നമ്പ്യാര്‍ എന്ന സിനിമയിലൂടെ ശ്രദ്ധേയനായ ഗണേശാ ആണ് സംവിധായകന്‍.ഒരു സംഭവ കഥയുടെ ചലച്ചിത്രാവിഷ്ക്കാരമത്രേ തിമിരു പുടിച്ചവന്. തിരുനെല്‍വേലി,ചെന്നൈ എന്നിവിടങ്ങളാണ് കഥാ പശ്ചാത്തലം .
സംവിധായകൻ ഗണേശായോട് ചിത്രത്തെക്കുറിച്ച് ആരായവേ..
“ഞാൻ ശ്രീകാന്തിനെ നായകനാക്കി സംവിധാനം ചെയ്ത നമ്പ്യാർ എന്ന സിനിമയുടെ സംഗീത സംവിധായകൻ വിജയ് ആൻറണി ആയിരുന്നു. ആ സിനിമ നടക്കുമ്പോൾ അദ്ദേഹത്തോട് പറഞ്ഞ കഥയാണ് തിമിരു പുടിച്ചവൻ .ഒരു സംഭവ കഥയെ ആസ്പദമാക്കിയാണ് അന്ന് ഞാനീ കഥ വിവരിച്ചത് . കഥ ഇഷ്ടപ്പെടവേ അന്ന് തന്നെ അത് സ്ക്രിപ്റ്റാക്കാൻ പറഞ്ഞു. പിന്നീടു തിരക്കുകൾക്കിടയിൽ പല പ്രോജക്റ്റുകളും മാറ്റിവെച്ചു കൊണ്ട് വിജയ് ആൻറണി അഭിനയിച്ചതും അദ്ദേഹം തന്നെ ഈ സിനിമ നിർമ്മിക്കാൻ തയ്യാറായതും സ്ക്രിപ്റ്റിലും, മുരുകവേൽ എന്ന പോലീസ് ഇൻസ്‌പെക്ടർ നായക കഥാപാത്രത്തോടുള്ള ആത്മവിശ്വാസത്താലുമാണ്.
വിജയ് ആൻ്റണി ആദ്യമായി മാസ്സ് ആക്ഷൻ ഹീറോ അവതാരമെടുക്കുന്ന സിനിമയെന്ന സവിശേഷതയുമുണ്ട് തിമിരു പുടിച്ചവന് .തിരുനെൽവേലിയിലെ സാത്വിക മുരുക ഭക്തനായ ഒരു പോലീസ് കോൺസ്റ്റബിൾ മുരുകവേൽ, ഒരു എൻകൗണ്ടറിലൂടെ പ്രമാദമായ ഒരു കേസിന് തുമ്പുണ്ടാക്കുന്നു . ഇതോടെ മുരുകവേൽ ഇൻസ്‌പെക്ടർ പ്രമോഷനോടെ ചെന്നൈയിൽ എത്തുന്നു .
ചെന്നൈയിൽ എത്തി വടപളനി മുരുകന് വൃതമനുഷ്ഠിച്ചു മാല ധരിച്ചു ഭക്തി പൂർവം ഔദ്യോദിക കൃത്യ നിർവഹണം തുടങ്ങുന്നു മുരുകവേൽ . പിന്നീടയാൾ ഔദ്യോദിക ജീവിതത്തിൽ തൻ്റെ കഴിവ് കൊണ്ട് പടിപടിയായി പോലീസ് കമ്മീഷണറായി എത്തുന്നത് വരെയുള്ള വളര്‍ച്ചക്കിടെയുള്ള അസുര സംഹാര പ്രയാണമാണ് കഥാ തന്തു .ഒരു മാസ്സ് സിനിമയാവുമ്പോൾ പലപ്പോഴും ലോജിക്ക് പരിഗണിക്കാറില്ല .
എന്നാൽ ഇതിൽ നായക കഥാപാത്രത്തിൻ്റെ കരിയറിലെ ഓരോ വളർച്ചയും പരിണാമവും ലോജിക്കോടു കൂടിയാണ് അവതരിപ്പിക്കുന്നത് . ഓരോ ഫ്രൈമും ലോജിക്കോട് കൂടിയാണ് ദൃശ്യവല്‍ക്കരിച്ചിരുക്കുന്നത്. വൈകാരികതയും , സാഹസികതയും ,ഉദ്വേഗവും നിറഞ്ഞ റിയലിസ്റ്റിക്കായ ആദ്യന്ത ആക്ഷൻ സിനിമ … എന്ന് വിശേഷിപ്പിക്കാം . നായിക നിവേദാ പെത്തുരാജ് പോലീസ് ഇൻസ്പെക്ടറായി വേഷമിടുന്നു . ഇതിലെ പ്രണയ മുഹൂർത്തങ്ങളും റിയലിസ്റ്റിക്കാണ് .” ഗണേശാ പറഞ്ഞു .
സംഗീത സംവിധായകനില്‍ നിന്നും നടനായി ,നായക നടനായി നാന്‍ ,സലിം, പിച്ചൈക്കാരന്‍, സൈത്താന്‍, യമന്‍ ,കാളി, അണ്ണാദുരൈ എന്നീ സിനിമാകളിലൂടെ മുന്‍ നിര താരമായി മാറിയ വിജയ് ആൻ്റണിയുടെ കരിയറിലെ വലിയ വഴിത്തിരിവായിരിക്കും ഈ സിനിമ എന്നാണ് തമിഴ് സിനിമാ നിരീക്ഷകരുടെ നിഗമനങ്ങള്‍ . അതിന്‍റെ ദൃഷ്ടാന്തമാണ് ചിത്രത്തിന്റെ ട്രൈലറിനും ഗാനങ്ങള്‍ക്കും ആരാധകരില്‍ നിന്നും ലഭിച്ച വന്‍ സ്വീകരണം എന്ന് കരുതപ്പെടുന്നു . അതുകൊണ്ട് തന്നെ പ്രേക്ഷകരും ഏറെ പ്രതീക്ഷയോടെയാണ് തിമിരു പുടിച്ചവനെ കാത്തിരിക്കുന്നത് .
# സി .കെ .അജയ് കുമാര്‍ , പി ആര്‍ ഒ. https://youtu.be/ly1NUHHTCH0
ശബരിമല സ്ത്രീ പ്രവേശന വിഷയത്തിൽ പമ്പയില്‍ ബുധനാഴ്ച അറസ്റ്റിലായ അയ്യപ്പധര്‍മ സേവാ സംഘം പ്രസിഡന്റ് രാഹുല്‍ ഈശ്വറിന്റെ ജാമ്യാപേക്ഷ പരിഗണിക്കുന്നത് പത്തനംതിട്ട ഫസ്റ്റ് ക്ലാസ് മജിസ്ട്രേറ്റ് മാറ്റിവെച്ചു. കേസ് തിങ്കളാഴ്ച വീണ്ടും പരിഗണിക്കും. 14 ദിവസത്തേക്കാണ് രാഹുലിനെ റിമാന്‍ഡ് ചെയ്തത് .
ജയിലിൽ നിരാഹാര സമരത്തിലുള്ള രാഹുലിന്റെ ആരോഗ്യസ്ഥിതി മോശമാണെന്ന് ബന്ധുക്കൾ കോടതിയെ അറിയിച്ചതിനെ തുടർന്ന് രാഹുലിനെ തിരുവനന്തപുരം മെഡിക്കൽ കോളേജ് ആശുപത്രിയിലേക്ക് മാറ്റി.
ശബരിമല വിശ്വാസികൾക്കെതിരെ സത്യമല്ലാത്ത വാർത്തകൾ കൊടുത്തു എന്നാരോപിച്ച് അജ്ഞാതർ ഏഷ്യാനനെറ്റിന്റെ വെബ്സൈറ്റുകൾ ഹാക്ക് ചെയ്തു . ഏഷ്യാനെറ്റിന്റെ http://asianet.co.in/ http://asianetbroadband.in/, https://www.asianetdigital.co.in/ എന്നീ വെബ്സൈറ്റിലുകളാണ് ഹാക്ക് ചെയ്യപ്പെട്ടത് .ഹാക്ക് ചെയ്തപേജുകളിൽ സാമി ശരണം എന്നും മാധ്യമധർമ്മം പാലിക്കണമെന്നും രേഖപെടുത്തിയിട്ടുണ്ട് . ഹാക്ക് ചെയ്തവരെക്കുറിച്ചുള്ള വിവരങ്ങൾ ഒന്നും ഇതിൽ രേഖപ്പെടുത്തിയിട്ടില്ല .
കാസര്‍കോട്: മഞ്ചേശ്വരം എം.എല്‍.എയും മുസ്ലിം ലീഗ് ദേശീയ എക്സിക്യുട്ടീവ് അംഗവും ആയ പി.ബി അബ്ദുല്‍ റസാഖ്(63) അന്തരിച്ചു. ശനിയാഴ്ച പുലര്‍ച്ചെ സ്വകാര്യ ആശുപത്രിയിൽവച്ചായിരുന്നു അന്ത്യം.
ഹൃദയ സംബന്ധമായ അസുഖത്തെ തുടര്‍ന്ന് വെള്ളിയാഴ്ച രാത്രിയോടെ കാസര്‍കോട്ടെ സ്വകാര്യ ആശുപത്രിയില്‍ പ്രവേശിപ്പിച്ചിരുന്നു.
2011 മുതൽ നിയമസഭാ അംഗമാണ്. 2016-ല്‍ ബിജെപി നേതാവ് കെ.സുരേന്ദ്രനോട് 89 വോട്ടിന്റെ ഭൂരിപക്ഷത്തിൽ വിജയിച്ചാണ് നിയമസഭയിലെത്തിയത്.
പൊതുദര്‍ശനം സ്വവസതിയിൽ നടക്കും. വൈകിട്ട് 6 മണിക്ക് ആലമ്പാടി ജുമാ മസ്ജിദില്‍ ആണ് കബറടക്കം.
