ശബരിമല വിധി പുനപരിശോധന ഹര്‍ജി നല്‍കില്ലെന്ന് ദേവസ്വം ബോര്‍ഡ്.പന്തളം കൊട്ടാരം, തന്ത്രികുടുംബം, അയ്യപ്പസേവാസംഘം പ്രതിനിധികൾ യോഗത്തില്‍ നിന്ന് ഇറങ്ങിപ്പോയി . മുഖ്യമന്ത്രിയുമായി ദേവസ്വംബോര്‍ഡ് അംഗങ്ങള്‍ കൂടിക്കാഴ്ച നടത്തിയതിന് ശേഷം  19ന് ചേരുന്ന യോഗത്തില്‍ മാത്രമേ വിഷയം ചര്‍ച്ചചെയ്യൂവെന്ന് ദേവസ്വംബോര്‍ഡ് അറിയിച്ചു .തല്‍ക്കാലം വിധി നടപ്പാക്കരുതെന്നും , ദേവസ്വം ബോര്‍ഡ് റിവ്യൂ ഹര്‍ജി നല്‍കണം എന്നുമായിരുന്നു ചര്‍ച്ചയില്‍ പങ്കെടുത്തവരുടെ പൊതു ആവശ്യം ഇതിൽ ധാരണയാകാത്തതിനെ തുടർന്നാണ് സംഘടനകള്‍ യോഗത്തില്‍ നിന്ന് ഇറങ്ങിപ്പോയത് .ശബരിമലയെ യുദ്ധക്കളമാക്കരുതെന്ന് പന്തളം കൊട്ടാരം പ്രതിനിധി ശശികുമാര വര്‍മ്മ പ്രതികരിച്ചു. 19 ന് വീണ്ടും ചര്‍ച്ച നടത്താനാണ് തീരുമാനം.

നിലയ്ക്കലിൽ വനിതാ മാധ്യമപ്രവർത്തകയെ അയ്യപ്പഭക്തർ മടക്കിഅയച്ചു . ടിവി9 ചാനലിലെ വനിതാമാധ്യമപ്രവര്‍ത്തക ദേവിയെയാണ് സ്ത്രീകള്‍ ഉള്‍പ്പെടെയുള്ള അയ്യപ്പ ഭക്തർ മടക്കി അയച്ചത് .പമ്പയിലെത്തി റിപ്പോര്‍ട്ട് ചെയ്യാനും ദൃശ്യങ്ങള്‍ പകര്‍ത്താനും മാത്രമാണ് എത്തിയതെന്ന് പറഞ്ഞിട്ടും അയ്യപ്പ ഭക്തർ ഇവരെ കടത്തി വിട്ടില്ല .നേരത്തെ മറ്റൊരു മാധ്യമ പ്രവര്‍ത്തകയും പ്രതിഷേധക്കാരുടെ എതിര്‍പ്പിനെ തുടര്‍ന്ന് തിരികെ പോയിരുന്നു. ഇതേസമയം ശബരിമല സ്ത്രീപ്രവേശത്തില്‍  തന്ത്രി കുടുംബവുമായും  പന്തളം കൊട്ടാരം പ്രതിനിധികളുമായി ദേവസ്വം ബോര്‍ഡ് ചർച്ച തുടങ്ങി .

പ്രളയബാധിതര്‍ക്ക് കുടുംബശ്രീ മുഖേന ഒരു ലക്ഷം രൂപ വരെ പലിശരഹിത വായ്പ നല്‍കുന്ന പദ്ധതി പ്രകാരം വായ്പാവിതരണം ആരംഭിച്ചു. ഇതുവരെ 1,44,750 പേരാണ് വായ്പക്ക് അപേക്ഷിച്ചത്. ഇതില്‍ 19,205 അപേക്ഷകള്‍ കുടുംബശ്രീ യൂണിറ്റുകള്‍ സി.ഡി.എസിന് കൈമാറി. ബാങ്കുകള്‍ക്ക് 16,218 അപേക്ഷകള്‍ സമര്‍പ്പിച്ചിട്ടുണ്ട്. ഇതില്‍ 1,401 പേര്‍ക്ക് വായ്പ അനുവദിച്ചു. മൊത്തം 73.47 കോടി രൂപയാണ് ബാങ്കുകള്‍ അനുവദിച്ചത്.

സംസ്ഥാനത്തെ സഹകരണ-വാണിജ്യ ബാങ്കുകളുമായി സഹകരിച്ചാണ് പുനരുജ്ജീവന വായ്പാ പദ്ധതി നടപ്പാക്കുന്നത്. വായ്പയുടെ പലിശ സര്‍ക്കാര്‍ വഹിക്കും. 1.44 ലക്ഷം പേര്‍ക്ക് 957 കോടി രൂപയാണ് ബാങ്കുകളില്‍ നിന്ന് സര്‍ക്കാര്‍ ആവശ്യപ്പെട്ടത്. അര്‍ഹരായ എല്ലാവര്‍ക്കും രണ്ടാഴ്ചകൊണ്ട് വായ്പ ലഭ്യമാക്കാന്‍ കഴിയുമെന്ന് കുടുംബശ്രീ അധികൃതര്‍ പറഞ്ഞു.