പത്തനംതിട്ട: അമേരിക്കയില്‍ മലയാളി കുടുംബത്തിലെ മൂന്നാമത്തെയാളും കോവിഡ് ബാധിച്ച് മരിച്ചു. തിരുവല്ല പുറമറ്റം വെള്ളിക്കര മാളിയേക്കല്‍ വീട്ടില്‍ ഏലിയാമ്മ ജോസഫ് ആണ് ന്യൂയോര്‍ക്കില്‍ മരിച്ചത്.
ഏലിയാമ്മയുടെ ഭര്‍ത്താവ് കെ.ജെ ജോസഫ്, അദ്ദേഹത്തിന്റെ സഹോദരന്‍ ഈപ്പന്‍ ജോസഫ് എന്നിവര്‍ കോവിഡ് ബാധിച്ച് ന്യൂയോര്‍ക്കില്‍ മരിച്ചിരുന്നു.ഏലിയാമ്മയുടെ രണ്ടു മക്കളും കോവിഡ് ബാധിച്ച്ന്യൂയോര്‍ക്കില്‍ ചികിത്സയിലാണ്.

കൊച്ചി: കളമശേരി മെഡിക്കല്‍ കോളേജിലെ കോവിഡ് ഐസൊലേഷന്‍ വാര്‍ഡുകളില്‍ രോഗികള്‍ക്ക് മരുന്നും ഭക്ഷണവുമായി ഇനി റോബോട്ട് എത്തും. നടന്‍ മോഹന്‍ലാലിന്റെ വിശ്വശാന്തി ഫൗണ്ടേഷനാണ്  മെഡിക്കല്‍ കോളേജിന് സ്വയം നിയന്ത്രിത റോബോട്ടിനെ നല്‍കിയത്.

കര്‍മ്മി-ബോട്ട്  എന്ന് പേരിട്ടിരിക്കുന്ന റോബോട്ടിന് 25 കിലോഗ്രാം ഭാരം വരെ കൊണ്ടുപോകാനാവും. കോവിഡ് രോഗികളെ പരിചരിക്കുന്നത് വഴി ആരോഗ്യപ്രവര്‍ത്തകര്‍ക്ക് രോഗം പകരുന്നത് തടയുക എന്ന ലക്ഷ്യത്തോടെയാണ് റോബോട്ട് അവതരിപ്പിച്ചിരിക്കുന്നത്.കേരള സ്റ്റാര്‍ട്ടപ്പ് മിഷന്‍ മെയ്ക്കര്‍ വില്ലേജിലെ അസിമോവ് റോബോട്ടിക്സ് എന്ന സ്ഥാപനമാണ് റോബോട്ട് വികസിപ്പിച്ചത്.

ഐസൊലേഷന്‍ വാര്‍ഡിലേയ്ക്ക് മരുന്നും ഭക്ഷണവും മറ്റും എത്തിക്കാനും മാലിന്യങ്ങള്‍ തിരികെ കൊണ്ടുപോകാനുമാകും സ്വയംനിയന്ത്രിത റോബോട്ടിനെ ഉപയോഗിക്കുക. വിശ്വശാന്തി ഫൗണ്ടേഷന്‍ ഭാരവാഹികള്‍ ജില്ലാ കളക്ടര്‍ എസ്.സുഹാസിന് റോബോട്ടിനെ കൈമാറി.

രോഗിയുടെ താപനില അളക്കുന്നതും ഇനി മുതല്‍ കര്‍മ്മി റോബോട്ട് ആയിരിക്കും. ഈ റോബോട്ടിന്റെ ഇരുവശത്തുമുള്ള കാമറകള്‍ വഴി രോഗിക്ക് ഡോക്ടറുമായി വീഡിയോ കോള്‍ ചെയ്യാനും രോഗവിവരം അറിയാനും കഴിയും.അള്‍ട്രാവയലറ്റ് രശ്മികള്‍ കൊണ്ട് സ്വയം അണുവിമുക്തമാക്കാനും അണുനാശിനി ചുറ്റും തളിക്കാനും ഈ റോബോട്ടിന് സാധിക്കും.

ആരോഗ്യവിഭാഗത്തിന്റെ പരിശോധനയ്ക്ക് ശേഷം കര്‍മ്മി-റോബോട്ടിനെ കളമശേരി മെഡിക്കല്‍ കോളേജിലെ രോഗികളുടെ പരിചരണത്തിനായി കൈമാറുമെന്ന് ജില്ലാ കളക്ടര്‍ എസ്.സുഹാസ് അറിയിച്ചു. പിപിഇ കിറ്റുകള്‍ക്ക് ദൗലഭ്യം നേരിടുന്ന സമയത്ത് റോബോട്ടിനെ ലഭിച്ചത് ഏറെ ആശ്വാസകരമാണെന്നും അദ്ദേഹം പറഞ്ഞു

‌ന്യൂഡല്‍ഹി: രാജ്യത്ത് കോവിഡ് ബാധിതരുടെ എണ്ണം 25000ത്തിലേയ്ക്ക് കടക്കുന്നുവെങ്കിലും രോഗവര്‍ദ്ധനത്തോത് ആറ് ശതമാനമായി കുറഞ്ഞെന്ന് കേന്ദ്ര ആരോഗ്യ മന്ത്രാലയം. രാജ്യത്തെ രോഗബാധിതരുടെ എണ്ണം  ഇപ്പോള്‍ 24,942 ആണ്. കഴിഞ്ഞ 24 മണിക്കൂറിനുള്ളില്‍ 56 പേര്‍ കോവിഡ് ബാധിച്ച് മരിച്ചതായി കേന്ദ്ര ആരോഗ്യ മന്ത്രാലയം വ്യക്തമാക്കി. ഇതോടെ കോവിഡ് മരണം 779 ആയി ഉയര്‍ന്നു. നിലവില്‍ 18,953 പേരാണ് രാജ്യത്ത് കോവിഡ് ബാധിച്ച് ചികിത്സയിലുള്ളത്.  5210 പേര്‍ രോഗ വിമുക്തി നേടി. അതിനിടെ, ആന്ധ്രാപ്രദേശില്‍ കോവിഡ് ബാധിതരുടെ എണ്ണം ആയിരം കടന്നു.

രാജ്യം അടച്ചിട്ടതിലൂടെ കോവിഡ് വ്യാപനം പിടിച്ചു നിര്‍ത്താനായെന്നാണ് ആരോഗ്യ മന്ത്രാലയ വിലയിരുത്തല്‍. ലോക്ക് ഡൗണ്‍ ഒരുമാസം പിന്നിടുമ്പോള്‍ കോവിഡ് രോഗികളുടെ വര്‍ദ്ധനയുടെ തോത് ആറ് ശതമാനമായി കുറഞ്ഞെന്ന് ആരോഗ്യ മന്ത്രാലയത്തിന്റെ പുതിയ കണക്ക് വ്യക്തമാക്കുന്നു. രോഗബാധിതരില്‍ എണ്‍പത് ശതമാനവുമുള്ളത് ഏഴ് സംസ്ഥാനങ്ങളിലാണ്. അതിഥി തൊഴിലാളികളെ മടക്കിയെത്തിക്കാനുള്ള നടപടികളുമായി കൂടുതല്‍ ഉത്തരേന്ത്യന്‍ സംസ്ഥാനങ്ങള്‍ രംഗത്തെത്തി. രോഗികളുടെ വര്‍ദ്ധനത്തോത് ആറ് ശതമാനമായി കുറഞ്ഞു.  

മാര്‍ച്ച് 24ന് രോഗ വ്യാപനത്തോത് 21 ശതമാനമായിരുന്നു. ഇന്നത് 5.8 ശതമാനത്തിലെത്തി. ലോക്ക് ഡൗണ്‍ പ്രഖ്യാപിച്ച ശേഷമുള്ള ഏറ്റവും കുറഞ്ഞ വര്‍ദ്ധനയാണിത്. ലോക്ക് ഡൗണ്‍ അവസാനിക്കുമ്പോഴേക്കും രാജ്യത്തെ രോഗ ബാധിതരുടെ എണ്ണം നാല്പതിനായിരത്തില്‍ താഴെനില്‍ക്കുമെന്നാണ് പ്രതീക്ഷ. എന്നാല്‍, ആശങ്കയുണ്ടാക്കുന്നത് മഹാരാഷ്ട്ര, ഗുജറാത്ത്, ഡല്‍ഹി, മദ്ധ്യപ്രദേശ്, രാജസ്ഥാന്‍, തമിഴ്‌നാട്, ഉത്തര്‍ പ്രദേശ് എന്നീ സംസ്ഥാനങ്ങളിലെ രോഗ വ്യാപനത്തോതിലെ വര്‍ദ്ധനവിലാണ്. രാജ്യത്തെ കോവിഡ് ബാധിതരില്‍ അമ്പത് ശതമാനവും മഹാരാഷ്ട്ര, ഗുജറാത്ത്, ഡല്‍ഹി സംസ്ഥാനങ്ങളിലാണ്.

ന്യൂഡല്‍ഹി: രാജ്യത്ത് കോവിഡ് ബാധിച്ച് മരിച്ചവരുടെ എണ്ണം 726 ആയി. രോഗം സ്ഥിരീകരിച്ചവരുടെ എണ്ണം 23,452 ലേക്ക് ഉയര്‍ന്നു. കേന്ദ്രആരോഗ്യമന്ത്രാലയം പുറത്തുവിട്ട കണക്കുകള്‍ പ്രകാരം കഴിഞ്ഞ 24 മണിക്കൂറിനിടെ 1752 പേര്‍ക്ക് പുതുതായി രോഗം ബാധിച്ചു. 37 പേര്‍ മരിച്ചു.

അതേ സമയം 4813 പേര്‍ക്ക് രോഗം ഭേദമായി. തമിഴ്‌നാട്ടില്‍ 72 പേര്‍ക്ക് കൂടി ഇന്നലെ കോവിഡ് ബാധിച്ചു. ഇതോടെ രോഗം ബാധിച്ചവരുടെ എണ്ണം1755 ആയി.  ഇന്നലെ സംസ്ഥാനത്ത് രണ്ട് പേരാണ് കോവിഡ് ബാധിച്ച് മരിച്ചത്. കോയമ്പത്തൂരിലും തെങ്കാശിയിലും രോഗബാധിതരുടെ എണ്ണത്തില്‍ വര്‍ദ്ധനവുണ്ടായി. ചെന്നൈയില്‍ മാത്രം 52 പേര്‍ക്ക് കൂടി കോവിഡ് ബാധിച്ചു.

ഡല്‍ഹിയില്‍  ഇന്നലെ 39 ശൂചീകരണ ത്തൊഴിലാളികള്‍ക്ക് കോവിഡ് സ്ഥിരീകരിച്ചു. രണ്ട് മലയാളി ആരോഗ്യപ്രവര്‍ത്തകര്‍ക്കും പുതിയതായി രോഗം സ്ഥിരീകരിച്ചു. ഡല്‍ഹിയില്‍ കോവിഡ് ബാധിതതരുടെ എണ്ണം 2300 കടന്നു. ജീവനക്കാര്‍ക്ക് കോവിഡ് ബാധിച്ചതിനെത്തുടര്‍ന്ന് ഡല്‍ഹിയിലെ ബിജെആര്‍എം ആശുപത്രി അടച്ചു. ഡല്‍ഹിയിലെ ആസാദ്പൂര്‍ പച്ചക്കറി ചന്തയിലെ രണ്ട് കച്ചവടക്കാര്‍ കൂടി കോവിഡ് ബാധിതരായി. ഇതോടെ ഇവിടുത്തെ മൂന്നുറോളം കടകള്‍ അടച്ചു.

മഹാരാഷ്ട്രയില്‍ കോവിഡ് രോഗികളുടെ എണ്ണം 6500 കടന്നു. മുംബൈയില്‍ മാത്രം കോവിഡ് രോഗികള്‍ 4000 ത്തിലേറെയായി. ആകെ മരണം 283 ആയി. മഹാരാഷ്ട്രയില്‍ മന്ത്രി ജിതേന്ദ്ര അവാദിന് കോവിഡ് സ്ഥിരീകരിച്ചു. സുരക്ഷാ ഉദ്യോഗസ്ഥന് കോവിഡ് സ്ഥിരീകരിച്ചതിനെത്തുടര്‍ന്ന് കുടുംബസമേതം ക്വാറന്റൈനില്‍ ആയിരുന്നു മന്ത്രി. രോഗ ലക്ഷണങ്ങള്‍ കണ്ടതിനെത്തുടര്‍ന്ന്  ഇന്നലെയാണ് ഇദ്ദേഹത്തെ ആശുപത്രിയിലേയ്ക്ക് മാറ്റിയത്.

രോഗികളുടെ എണ്ണം ഇരട്ടിക്കുന്ന തോത് പത്ത് ദിവസമായി കുറഞ്ഞു. രോഗ ബാധിതരുടെ എണ്ണം ക്രമാതീതമായി കൂടുന്നത് പിടിച്ചുനിര്‍ത്താന്‍ രാജ്യത്തിനായി. രോഗം ഭേദമാകുന്നവരുടെ തോത് 20 ശതമാനത്തിന് മുകളിലായി. കഴിഞ്ഞ 14 ദിവസത്തില്‍ ഒരാള്‍ക്ക് പോലും രോഗം ബാധിക്കാത്ത ജില്ലകളുടെ എണ്ണം 80 ആയി ഉയര്‍ന്നു. ഒമ്പത് ലക്ഷം പേര്‍ നിരീക്ഷണത്തിലാണ്. അതേസമയം ആവശ്യമുള്ള അത്രയും പരിശോധനകള്‍ നടത്താനുള്ള ശേഷിയിലേക്ക് ഇപ്പോഴും രാജ്യത്തിന് എത്താനായിട്ടില്ലെന്ന് കേന്ദ്രം സമ്മതിച്ചു.

ന്യൂഡല്‍ഹി:കോവിഡ് 19 രോഗത്തില്‍ നിന്ന് വിമുക്തി  നേടുന്നവരുടെ എണ്ണത്തില്‍ കേരളം തന്നെ മുന്നില്‍. മഹാമാരിയില്‍ നിന്ന് മുക്തരാകുന്നവരുടെ എണ്ണത്തില്‍ മറ്റുള്ളവരേക്കാള്‍ ദക്ഷിണേന്ത്യന്‍ സംസ്ഥാനങ്ങളും ഡല്‍ഹിയും മുന്നിട്ട് നില്‍ക്കുന്നു.

കേരളത്തില്‍ 73.74 ശതമാനമാണ് കേരളത്തില്‍ രോഗമുക്തരാകുന്നവരുടെ നിരക്ക്.ഡല്‍ഹിയില്‍ 32.2 ശതമാനം പേര്‍ സുഖംപ്രാപിച്ചിട്ടുണ്ട്. മറ്റു ദക്ഷിണേന്ത്യന്‍ സംസ്ഥാനങ്ങളായ തമിഴ്നാട്ടില്‍ 40.63 %, കര്‍ണാടകയില്‍ 31.82 %, തെലങ്കാനയില്‍ 20.52 %, ആന്ധ്രപ്രദേശില്‍ 14.76 % എന്നിങ്ങനെയാണ് രോഗമുക്തി നേടിയവരുടെ നിരക്ക്.

എന്നാല്‍ ഗുജറാത്ത്, ഉത്തര്‍പ്രദേശ്, രാജസ്ഥാന്‍, മദ്ധ്യപ്രദേശ്, മഹാരാഷ്ട്ര എന്നീ സംസ്ഥാനങ്ങളില്‍ രോഗമുക്തി നേടുന്നവരുടെ നിരക്ക് 15 ശതമാനത്തിനും താഴെയാണ്. ഗുജറാത്താണ് ഏറ്റവും പിന്നില്‍. 7.5 ശതമാനം ആളുകള്‍ മാത്രമാണ് ഗുജറാത്തില്‍ ആശുപത്രി വിട്ടത്. മദ്ധ്യപ്രദേശില്‍ 9.29 %, രാജസ്ഥാനില്‍ 12.17 %,മഹാരാഷ്ട്രയില്‍ 13.95% വുമാണ് രോഗം ഭേദമായവര്‍. ഈ സംസ്ഥാനങ്ങളില്‍ രോഗബാധിതരുടെ എണ്ണവും കൂടുതലാണ്. രോഗബാധിതരുടെ എണ്ണത്തിലും മരണനിരക്കിലും മഹാരാഷ്ട്രയും ഗുജറാത്തുമാണ് ആദ്യ രണ്ട് സ്ഥാനങ്ങളില്‍.

6430 പേര്‍ക്ക് രോഗം സ്ഥിരീകരിച്ച മഹാരാഷ്ട്രയില്‍ 840 പേരും 2624 പേര്‍ക്ക് രോഗം സ്ഥിരീകരിച്ച് ഗുജറാത്തില്‍ 258 പേരുമാണ് സുഖംപ്രാപിച്ചത്. 447 കേസുകള്‍ റിപ്പോര്‍ട്ട് ചെയ്ത കേരളത്തില്‍ 324 പേര്‍ ആശുപത്രി വിട്ടു്.ഒരു കുഞ്ഞുള്‍പ്പെടെ മരിച്ചവരുടെ എണ്ണം നാല് മാത്രമാണ്.

അതേ സമയം രോഗംഭേദമാകുന്നവരുടെ കണക്കില്‍ ആഗോള ശരാശരിയേക്കാള്‍ പിന്നിലാണ് ഇന്ത്യ. 27.35 ശതമാനമാണ് ആഗോള ശരാശരി. ഇന്ത്യയില്‍ 19.9 ശതമാനമാണ്. യുഎസില്‍ ഇത് 9.90 ശതമാനം മാത്രമാണ്. ചൈനയില്‍ 93.24 ശതമാനവും ജര്‍മ്മനിയില്‍ 68.53 ശതമാനവുമാണ് രോഗമുക്തിനിരക്ക്.

ചെന്നൈ: നടിയും നര്‍ത്തകിയുമായ ശോഭനയുടെ ഫേസ്ബുക്ക് അക്കൗണ്ട് ഹാക്ക് ചെയ്തു. നടി തന്നെയാണ് മറ്റൊരു അക്കൗണ്ടിലൂടെ ഇക്കാര്യം പുറത്തുവിട്ടത്.

ശോഭനയുടെ ഫേസ്ബുക്ക് പേജില്‍ ചില പോസ്റ്റുകള്‍ പ്രത്യക്ഷപ്പെട്ടിട്ടുണ്ട്. എന്നാല്‍ ഇത് ശോഭനയുമായി ബന്ധമില്ലാത്ത പോസ്റ്റുകളാണ് വന്നിരിക്കുന്നത്. അതുകൊണ്ടു തന്നെ അക്കൗണ്ടുകള്‍ ഹാക്ക് ചെയ്യപ്പെട്ടുവെന്നും, വിവരം പൊലീസിനെ അറിയിച്ചിട്ടുണ്ടെന്നും ശോഭന പറയുകയുണ്ടായി.

അക്കൗണ്ട് വീണ്ടെടുത്താല്‍ എല്ലാവരെയും അറിയിക്കുമെന്നും ശോഭന വ്യക്തമാക്കിരിക്കുകയാണ്. ഏറെ നീണ്ടവര്‍ഷത്തെ ഇടവേളയ്ക്കു ശേഷമാണു താരം വീണ്ടും അഭിനയരംഗത്തിലേക്ക് കടന്നു വരുന്നത്. മലയാള ചിത്രമായ ‘വരനെ ആവശ്യമുണ്ട്’ എന്ന ചിത്രത്തിലൂടെയാണ് താരം തിരിച്ചുവരവ് നടത്തിരിക്കുന്നത്.

ടെലിവിഷന്‍ താരം ഷാബുരാജ് അന്തരിച്ചു. കൊല്ലം മെഡിസിറ്റി ആശുപത്രിയില്‍ ചികിത്സയിലിരിക്കെ ഹൃദയാഘാതത്തെ തുടര്‍ന്നായിരുന്നു രാവിലെ 11.30 നായിരുന്നു അന്ത്യം. 42 വയസായിരുന്നു. തിരുവനന്തപുരം കല്ലമ്പലം സ്വദേശിയാണ്. ഏഷ്യാനെറ്റില്‍ സംപ്രേഷണം ചെയ്ത കോമഡി സ്റ്റാര്‍സിലൂടെയാണ് ഷാബുരാജ് ശ്രദ്ധേയനായത്.

തിരുവനന്തപുരം: കോവിഡ് ഭീതി നിലനിന്ന പശ്ചാത്തലത്തില്‍ മാറ്റിവെച്ച എസ്എസ്എല്‍സി, പ്ലസ്ടു പരീക്ഷകള്‍ മേയ് 10ന് ശേഷം നടത്താന്‍ ആലോചന. ലോക്ക് ഡൗണ്‍ മേയ് മൂന്നിന് അവസാനിച്ചാല്‍ പത്ത് ദിവസത്തിനുള്ളില്‍ പരീക്ഷ നടത്തുന്ന കാര്യമാണ് പരിഗണനയിലുള്ളത്.

നാളത്തെ മന്ത്രിസഭാ യോഗത്തില്‍ ഇക്കാര്യങ്ങള്‍ വിശദമായി ചര്‍ച്ച ചെയ്യും. എസ്എസ്എല്‍സി പരീക്ഷ രാവിലെയും പ്ലസ്  ടു പരീക്ഷ ഉച്ചകഴിഞ്ഞും നടത്താനാണ് ആലോചിക്കുന്നത്. പ്ലസ് വണ്‍ പരീക്ഷകള്‍ ഇതിന് ശേഷവും നടത്താനുമാണ് ആലോചന. ഗള്‍ഫിലും ലക്ഷദ്വീപിലും പരീക്ഷാ സെന്ററുകള്‍ ഉണ്ട്. ഇവിടങ്ങളിലെ ലോക്ക്ഡൗണ്‍ കാലാവധിയെ അടിസ്ഥാനമാക്കിയാകും തീരുമാനമെടുക്കുക.