‘ഞാനൊരു പൃഥ്വിരാജ് ഫാന്‍, ഞാനൊരു സിനിമ സംവിധാനം ചെയ്താല്‍ നായകനായി പൃഥ്വിരാജ് വരണം എന്നാണ് ആഗ്രഹം,” ഗോകുല്‍ സുരേഷിന്റെതാണ് വാക്കുകള്‍. സ്‌കൂള്‍കാലം മുതല്‍ താന്‍ പൃഥ്വിരാജ് സുകുമാരന്റെ ആരാധകനാണെന്നും റിലീസിന്റെ അന്നു തന്നെ ചിത്രങ്ങള്‍ തിയേറ്ററില്‍ പോയി കാണാന്‍ ശ്രമിക്കാറുണ്ടെന്നും ഗോകുല്‍ പറയുന്നു. ”അച്ഛന്റെ മേല്‍വിലാസം എന്ന സിനിമയും പൃഥ്വിരാജ് സിനിമയും റിലീസ് ചെയ്ത ദിവസം ഞാന്‍ തിയേറ്ററില്‍ പോയി കണ്ടത്, പൃഥ്വിരാജിന്റെ ചിത്രമാണ്,” ഗോകുല്‍ സുരേഷ് പറഞ്ഞു. ആനീസ് കിച്ചണില്‍ അതിഥിയായെത്തിയപ്പോഴായിരുന്നു ഗോകുല്‍ തന്റെ ആരാധന തുറന്നു പറഞ്ഞത്.

അഭിനയത്തിനൊപ്പം സംവിധാനത്തോടും തനിക്ക് താല്‍പ്പര്യമുണ്ടെന്നും സിനിമയെ കുറിച്ച് കൂടുതല്‍ മനസിലാക്കാന്‍ ശ്രമിക്കുകയാണെന്നും ഗോകുല്‍ പറഞ്ഞു. പത്തു പതിനഞ്ചു വര്‍ഷം കഴിഞ്ഞാല്‍ ചിലപ്പോള്‍ സംവിധാനത്തിലേക്ക് കടക്കുമെന്നും ഗോകുല്‍ പറയുന്നു. ആരായിരിക്കും ഗോകുലിന്റെ സിനിമയിലെ നായകന്‍ എന്ന ആനിയുടെ ചോദ്യത്തിന് സംശയമേതുമില്ലാതെ പൃഥ്വിരാജിന്റെ പേരാണ് ഗോകുല്‍ പറയുന്നത്.

ഗോകുല്‍ നായകനാവുന്ന ‘ഉള്‍ട്ട’ എന്ന ചിത്രത്തിന്റെ പ്രമോഷന് എത്തിയതായിരുന്നു ഗോകുലും പ്രയാഗ മാര്‍ട്ടിനും. ‘ദീപസ്തംഭം മഹാശ്ചര്യം’, ‘നാടന്‍ പെണ്ണും നാട്ടുപ്രമാണിയും’, ‘അച്ഛനെയാണെനിക്കിഷ്ടം’ തുടങ്ങിയ ചിത്രങ്ങളുടെ തിരക്കഥാകൃത്തായ സുരേഷ് പൊതുവാള്‍ സംവിധായകനാവുന്ന ചിത്രമാണ് ‘ഉള്‍ട്ട’. സിപ്പി ക്രീയേറ്റീവ് വര്‍ക്സിന്റെ ബാനറില്‍ ഡോ.സുഭാഷ് സിപ്പിയാണ് ചിത്രം നിര്‍മിക്കുന്നത്. ഗോകുലിനെയും പ്രയാഗയേയും കൂടാതെ അനുശ്രീയും ചിത്രത്തില്‍ ഒരു പ്രധാന കഥാപാത്രത്തെ അവതരിപ്പിക്കുന്നുണ്ട്.

അമ്മയാകാന്‍ ഒരുങ്ങുന്ന സന്തോഷം പങ്കുവച്ച് പ്രിയ നടി ദിവ്യാ ഉണ്ണി. തന്റെ വളകാപ്പിന്റെ ചിത്രങ്ങള്‍ പങ്കുവച്ചാണ് താരം സന്തോഷ വാര്‍ത്ത ആരാധകരെ അറിയിച്ചത്.  ഇന്‍സ്റ്റഗ്രാം പേജിലൂടെയാണ് ചിത്രങ്ങല്‍ പങ്കുവച്ചത്. മൂന്നാമതും അമ്മയാകുന്നതിന്റെ സന്തോഷത്തിലാണ് താരം.

ആദ്യ വിവാഹബന്ധം വേര്‍പ്പെടുത്തിയ ദിവ്യ കഴിഞ്ഞ വര്‍ഷം വീണ്ടും വിവാഹിതയായിരുന്നു. ഹൂസ്റ്റണിലെ ഗുരുവായൂരപ്പന്‍ ക്ഷേത്രത്തില്‍ ഫെബ്രുവരി നാലിനായിരുന്നു ദിവ്യയുടെ വിവാഹം. മുംബൈ മലയാളിയായ അരുണ്‍ കുമാര്‍ മണികണ്ഠനാണ് വരന്‍. എന്‍ജിനീയറായ അരുണ്‍ നാലുവര്‍ഷമായി ഹൂസ്റ്റണിലാണ്. ആദ്യവിവാഹത്തിലെ രണ്ടു കുട്ടികളും ദിവ്യയ്ക്കൊപ്പമാണ്. യുഎസ് നഗരമായ ഹൂസ്റ്റണില്‍ ശ്രീപാദം സ്‌കൂള്‍ ഓഫ് ആര്‍ട്‌സ് എന്ന പേരില്‍ നൃത്തവിദ്യാലയവും നടത്തുന്നുണ്ട് ദിവ്യ.
വിനയന്റെ ‘കല്യാണസൗഗന്ധികം’ എന്ന ചിത്രത്തിലൂടെയാണ് ദിവ്യ നായികയായി അരങ്ങേറ്റം കുറിച്ചത്.

തമിഴ്നാട് മുന്‍ മുഖ്യമന്ത്രി ജയലളിതയുടെ ബയോപിക്കായ ‘തലൈവി’യില്‍ നടി പ്രിയാമണിയും എത്തുന്നു.  ജയലളിതയായി
കങ്കണ റണാവത്ത് എത്തുമ്പോള്‍ തോഴി ശശികല ആയാണ് പ്രിയാമണി വേഷമിടുക.

ആമസോണ്‍ പ്രൈമിന്റെ ‘ദ ഫാമിലി മാന്‍’ എന്ന വെബ് സീരിസിന് ശേഷം രാജേഷ് ആനന്ദ് ലീല ഒരുക്കുന്ന ‘ഡോ. 56’ എന്ന ചിത്രത്തില്‍ സിബിഐ ഓഫീസറായി പ്രിയാമണി എത്തുന്നുണ്ട്. എ.എല്‍ വിജയ് സംവിധാനം ചെയ്യുന്ന തലൈവിയില്‍ എം.ജി.ആര്‍ ആയി അരവിന്ദ് സാമിയാണ് എത്തുന്നത്.

കെ.വി വിജയേന്ദ്രപ്രസാദും രജത് അരോറയും ചേര്‍ന്നാണ് ചിത്രത്തിന്റെ തിരക്കഥ രചിച്ചിരിക്കുന്നത്. കങ്കണയുടെ അമ്പരപ്പിക്കുന്ന മേക്കോവര്‍ ഫസ്റ്റ് ലുക്ക് ടീസറില്‍ ശ്രദ്ധിക്കപ്പെട്ടിരുന്നു. ഇതിനായി പ്രോസ്‌തെറ്റിക് മേക്കപ്പ് ചെയ്യുന്ന കങ്കണയുടെ വീഡിയോയും ചിത്രങ്ങളും പുറത്തെത്തിയിരുന്നു. തമിഴിലും ഹിന്ദിയിലുമായി എത്തുന്ന ചിത്രം അടുത്ത വര്‍ഷം ജൂണ്‍ 26-നാണ് തിയേറ്ററുകളിലെത്തുക.

പൃഥ്വിരാജ് നിര്‍മ്മാതാവും നായകനുമാകുന്ന ‘ഡ്രൈവിംഗ് ലൈസന്‍സിന്റെ ടീസര്‍ പുറത്തിറങ്ങി. പൃഥ്വിരാജും സുരാജ് വെഞ്ഞാറമൂടുമാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. ഹരീന്ദ്രന്‍ എന്നു പേരുള്ള സൂപ്പര്‍ സ്റ്റാറിന്റെ വേഷത്തിലാണ് പൃഥ്വിരാജ് ചിത്രത്തിലെത്തുന്നത്. ഈ താരത്തിന്റെ കടുത്ത ആരാധകനായുള്ള വെഹിക്കിള്‍ ഇന്‍സ്‌പെക്ടറുടെ വേഷമാണ് സുരാജ് അവതരിപ്പിക്കുന്നത്. ‘9’ന് ശേഷം വീണ്ടും പൃഥിരാജ് നായകനും നിര്‍മ്മാതാവുമാകുന്ന ചിത്രമാണ് ഡ്രൈവിംഗ് ലൈസന്‍സ്. സംവിധായകന്‍ ലാലിന്റെ മകന്‍ ജീന്‍ പോളാണ് ചിത്രം സംവിധാനം ചെയ്യുന്നത്. ലക്ഷ്വറി കാറുകളോട് ആഭിമുഖ്യമുള്ള സിനിമാതാരമായാണ് പൃഥ്വിരാജ് ചിത്രത്തിലെത്തുന്നത്. പൃഥിയുടെയും സുരാജിന്റെ കഥാപാത്രങ്ങള്‍ തമ്മിലുള്ള സംഘര്‍ഷങ്ങളാണ് ചിത്രത്തിന്റെ ആധാരം. ദീപ്തി സതി, മിയ ജോര്‍ജ് എന്നിവരാണ് നായികമാരായി എത്തുന്നത്. പൃഥിരാജിന്റെ ഭാര്യയായാണ് ദീപ്തി വേഷമിടുന്നത്. സച്ചി തിരക്കഥയൊരുക്കുന്ന ചിത്രത്തിന്റെ ഛായാഗ്രഹണം നിര്‍വഹിക്കുന്നത് അലക്‌സ് ജെ പുളിക്കലാണ്. പൃഥിരാജ് പ്രൊഡക്ഷന്‍സിനൊപ്പം ലിസ്റ്റിന്‍ സ്റ്റീഫനും ചേര്‍ന്നാണ് ചിത്രം നിര്‍മ്മിക്കുന്നത്. ചിത്രം ഈതമാസ 20 ന് ചിത്രം തിയേറ്ററുകളിലെത്തും.

“മറ്റൊരു കടവിൽ ” ! പേര് സൂചിപ്പിക്കും പോലെതന്നെ2013 ൽ ഇറങ്ങിയ ഹിറ്റ് ഷോർട്ട് ഫിലിം കുളിസീന് രണ്ടാം ഭാഗം എത്തുന്നു! രാഹുൽ കെ ഷാജി സംവിധാനം ചെയ്ത് ആർ ജെ മാത്തുക്കുട്ടിയും വൈഗയും അഭിനയിച്ച് യൂട്യൂബിൽ തരംഗം സൃഷ്ടിച്ച ഷോർട്ട് ഫിലിമായിരുന്നു കുളിസീൻ. ഏഴ് വർഷങ്ങൾക്കിപ്പുറം ഏരിയ ഹെന്ന പ്രൊഡക്ഷൻസിന്റെ ബാനറിൽ സുനിൽ നായർ(ന്യൂയോർക്ക്) നിർമ്മിച്ച് രാഹുൽ കെ ഷാജിയുടെ സംവിധാനത്തിൽ രണ്ടാം ഭാഗം ഒരുങ്ങുമ്പോൾ, സിനിമ സീരിയൽ താരം സ്വാസികയും, സംവിധായകൻ ജുഡ് ആന്തണി ജോസഫും, സിനിമതാരം അൽതാഫ് മനാഫും ആണ് പ്രധാന കഥാപാത്രങ്ങളെ അവതരിപ്പിക്കുന്നത്.

മറ്റൊരു കടവിൽ സംഗീത സാന്ദ്രമാക്കാൻ, സിനിമ സംഗീത സംവിധായകൻ രാഹുൽ രാജ് എത്തുന്നു എന്നതാണ് പ്രധാന ആകർഷണം. തിരക്കഥ സംഭാഷണം ഒരുക്കുന്നത് സുമേഷ് മധു . കഥ – രാഹുൽ കെ ഷാജി,സുമേഷ് മധു . ക്യാമറ – രാജേഷ് സുബ്രമണ്യം, എക്സി.പ്രൊഡ്യൂസർ – ഷാജി കോമത്താട്ട്. എഡിറ്റ് – അശ്വിൻ കൃഷ്ണ, പ്രൊഡക്ഷൻ കൺട്രോളർ ലിബിൻ വർഗീസ്. സ്റ്റിൽസ് – ജിഷ്ണു കൈലാസ്. ക്രിയേറ്റീവ് സപ്പോർട്ട് – വിനീത് പുള്ളാടൻ, നകുൽ കെ ഷാജി, ശ്രീലാൽ. ചീഫ് അസ്സോ. ഡയറക്ടർ – റാബി ഫന്നേൽ. ചീഫ് അസ്സോ. ക്യാമറാമാൻ – ശരത്ത് ഷാജി. ക്യാരക്ടർ ഡ്രോയിംഗ്സ് – വിപിൻ കുമാർ കൊച്ചേരിൽ. പബ്ളിസിറ്റി ഡിസൈൻ – അനീഷ് ലെനിൻ. 2020 ആദ്യമാസങ്ങളിൽ തന്നെ കുളിസീൻ 2, യൂട്യൂബിൽ തരംഗം സൃഷ്ടിക്കാൻ എത്തുമെന്ന് പ്രതീക്ഷിക്കാം!

മലയാള സിനിമയിലെ എക്കാലത്തെയും സൂപ്പര്‍ ഹിറ്റി സിനിമകള്‍ ഒരുക്കിയ കൂട്ടുകെട്ടായിരുന്നു സിദ്ദിഖ്-ലാല്‍. അവരുടെ സൗഹൃദം പോലെ സിനിമയും സൂപ്പര്‍ ഹിറ്റുകളായിരുന്നു. റാംജി റാവു സ്പീക്കിംഗ് എന്ന സിനിമയായിരുന്നു ഇരുവരും ചേര്‍ന്ന് സംവിധാനം ചെയ്ത ആദ്യ ചിത്രം. പിന്നീട് ഇന്‍ ഹരിഹര്‍ നഗര്‍, ഗോഡ് ഫാദര്‍, വിയറ്റ്‌നാം കോളനി, കാബൂളിവാല, മന്നാര്‍ മത്തായി സ്പീക്കിംഗ്, കിംഗ് ലയര്‍ എന്നിവയായിരുന്നു സിദ്ദിഖ്-ലാല്‍ കൂട്ടുകെട്ടില്‍ പിറന്ന സിനിമകള്‍. സിദ്ദിഖിനൊപ്പം ഇനിയൊരു സിനിമയുണ്ടാകാനുള്ള സാധ്യത ഇല്ലെന്ന് തുറന്ന് പറഞ്ഞിരിക്കുകയാണ് ലാല്‍. ‘സിദ്ദിഖിനൊപ്പം ഇനിയൊരു സിനിമയ്ക്കുള്ള സാധ്യതയില്ല. ഞങ്ങള്‍ തമ്മിലുള്ള അകലം വളരെ വലുതാണ് ഇപ്പോള്‍. ഞങ്ങല്‍ ദിവസവും കാണുന്ന ആളുകള്‍ വേറെ, സംസാരിക്കുന്ന വിഷയങ്ങള്‍ വേറെ. പണ്ട് ഉണ്ടായിരുന്ന കെമിസ്ട്രി എവിടെയോ നഷ്ടമായിരിക്കുന്നു. രണ്ട് പേരും അവസാനം ഒന്നിച്ച് പ്രവര്‍ത്തിച്ച കിങ് ലയര്‍ എന്ന സിനിമയോടെ ഇക്കാര്യം കൂടുതല്‍ ബോധ്യമായി.’
‘രണ്ട് വര്‍ഷം ഒരുമിച്ച് ഇരുന്നാല്‍ പോലും റാം ജി റാവു സ്പീക്കിങ്ങ്, ഗോഡ് ഫാദര്‍ പോലുള്ള ഒരു സിനിമ സാധ്യമാവുമെന്ന് തോന്നുന്നില്ല. പണ്ട് തങ്ങള്‍ക്കിടയില്‍ പരസ്പര ബഹുമാനമായിരുന്നില്ല, സൗഹൃദമായിരുന്നു. ആ സ്വാതന്ത്ര്യം ഇന്നില്ല, സംസാരിക്കുന്നത് പോലും തേച്ച് മിനുക്കിയ ഭാഷയിലാണ്. അതൊരു വലിയ മാറ്റമാണ്. തമ്മില്‍ കാണാറുള്ളത് വല്ല വിവാഹ ചടങ്ങുകള്‍ പോലുള്ളവയില്‍ മാത്രമായി മാറി’.