ലക്നൗ: ശവസംസ്കാര ചടങ്ങിനിടെ ശ്മശാനത്തിലെ കെട്ടിടത്തിന്റെ മേല്ക്കൂര തകര്ന്ന് വീണ് 21 പേര് മരിച്ചു. ഉത്തര്പ്രദേശിലെ മുറാദ്നഗറില് ഞായറാഴ്ച ഉച്ചയ്ക്കായിരുന്നു അപകടം. കനത്ത മഴയെത്തുടര്ന്നാണ് മേല്ക്കൂര തകര്ന്നത്. 10 പേരോളം കെട്ടിട അവശിഷ്ടങ്ങള്ക്കിടയില് കുടുങ്ങിയിട്ടുണ്ടെന്നാണു നിഗമനം. 38 പേരെ രക്ഷപ്പെടുത്തി. പരുക്കേറ്റ നിരവധി പേരെ ആശുപത്രിയില് പ്രവേശിപ്പിച്ചു. പൊലീസിന്റെയും അഗ്നിരക്ഷാസേനയുടെയും നേതൃത്വത്തില് രക്ഷാപ്രവര്ത്തനം തുടരുകയാണ്. മരണസംഖ്യ ഇനിയും ഉയരാനാണു സാദ്ധ്യതയെന്ന് ഗാസിയാബാദ് റൂറല് എസ്പി ഇറാജ് രാജ പറഞ്ഞു. അപകടത്തില് മരിച്ചവരുടെ കുടുംബാംഗങ്ങളെ മുഖ്യമന്ത്രി യോഗി ആദിത്യനാഥ് അനുശോചനം അറിയിച്ചു. രണ്ടു ലക്ഷം രൂപ ധനസഹായവും പ്രഖ്യാപിച്ചു.
English Summary : The roof of the cemetery building collapsed, killing 21 people
മരിച്ചവരില് രണ്ട് കുട്ടികളും രണ്ട് സ്ത്രീകളും മൂന്ന് പുരുഷന്മാരും 11 പേര്ക്ക് ഗുരുതരപരിക്ക് വീട്ടില് ആളില്ലാതിരുന്നതിനാല് വന്ദുരന്തം ഒഴിവായി മുഖ്യമന്ത്രി അനുശോചിച്ചു കാഞ്ഞങ്ങാട് സബ്കളക്ടര് അന്വേഷിക്കും
കാസര്കോട്: പാണത്തൂരില് കര്ണാടകത്തില് നിന്നുള്ള വിവാഹപാര്ട്ടി സഞ്ചരിച്ച ബസ് വീടിന് മുകളിലേയ്ക്ക്. മറിഞ്ഞ് രണ്ട് കുട്ടികള് ഉള്പ്പെടെ ഏഴ് പേര് മരിച്ചു. പരിക്കേറ്റ 49 പേരില് 11 പേരുടെ നില ഗുരുതരമാണ്. 56 പേരാണ് ബസിലുണ്ടായിരുന്നത്. അര്ദ്ധമൂല സ്വദേശി നാരായണ നായിക്കിന്റെ മകന് ശ്രേയസ് (13),പുത്തൂര് സ്വദേശി ആദര്ശ്(14) സുള്ള്യ സ്വദേശി രവിചന്ദ്ര (40), ഈശ്വരി (39), ബെല്നാട് സ്വദേശി രാജേഷ് (45) ബണ്ട്വാള് സ്വദേശി ശശിധരപൂജാരി(43) പുത്തൂര് സ്വദേശിനി സുമതി (50) എന്നിവരാണ് മരിച്ചത്. ആറ് പേര് അപകടസ്ഥലത്തും ശശിധര പൂജാരി മംഗലാപുരത്തെ ആശുപത്രിയിലുമാണ് മരിച്ചത്. പാണത്തൂര്- സുള്ള്യ റോഡില് പരിയാരത്ത് ഞായറാഴ്ച ഉച്ചയോടെയാണ് നിയന്ത്രണം വിട്ട് ബസ് മറിഞ്ഞത്. ബസ് മറിഞ്ഞ വീട്ടില് ആളില്ലാതിരുന്നതിനാല് വന്ദുരന്തം ഒഴിവായി. ഗുരുതരമായി പരിക്കേറ്റ രണ്ടുപേര് മംഗലാപുരത്തെ ആശുപത്രിയിലും മറ്റുള്ളവര് കാഞ്ഞങ്ങാട്ടെ വിവിധ ആശുപത്രികളിലും ചികിത്സയിലാണ്. സുള്ള്യയില് നിന്നും പാണത്തൂര് എള്ളു കൊച്ചിയിലേക്ക് വിവാഹത്തിന് വന്ന സംഘമാണ് അപകടത്തില്പ്പെട്ടത്. നിയന്ത്രണംവിട്ട് റോഡിന് താഴെയുള്ള ജോസ് എന്നയാളുടെ വീട്ടിലേക്കാണ് ബസ് മറിഞ്ഞത്. ബസപകടത്തില് മുഖ്യമന്ത്രി പിണറായി വിജയന് അനുശോചനം രേഖപ്പെടുത്തി. പരിക്കേറ്റവര്ക്ക് ചികിത്സാ സൗകര്യം ഏര്പ്പെടുത്തിയിട്ടുണ്ടെന്ന് മുഖ്യമന്ത്രി അറിയിച്ചു. അപകടത്തെക്കുറിച്ച് അന്വേഷിക്കാന് കാഞ്ഞങ്ങാട് സബ് കളക്ടറെ ചുമതലപ്പെടുത്തിയതായി ജില്ലാ കളക്ടര് ഡോ.ഡി.സജിത് ബാബു അറിയിച്ചു. അപകടത്തില്പ്പെട്ടവര്ക്ക് അടിയന്തിര ചികിത്സ ലഭ്യമാക്കാന് ജില്ലാ ഭരണകൂടവും സര്ക്കാരും നടപടികള് സ്വീകരിച്ചു.റവന്യൂ മന്ത്രിയുടെ നിര്ദ്ദേശപ്രകാരം ഡപ്യൂട്ടി ഡി.എം.ഒ വെള്ളരിക്കുണ്ട് താലൂക്ക് ആശുപത്രിയിലും ഡി.എം.ഒ കാഞ്ഞങ്ങാട് ജില്ലാ ആശുപത്രിയിലും അടിയന്തിര നടപടികള്ക്ക് നേതൃത്വം നല്കുന്നുണ്ട്. കൂടുതല് ചികിത്സ ആവശ്യമെങ്കില് ലഭ്യമാക്കാന് ജില്ലാ കളക്ടറോടും ആവശ്യപ്പെട്ടിട്ടുണ്ട്. സര്ക്കാരിന്റെ ഭാഗത്ത് നിന്ന് ആവശ്യമായ എല്ലാ നടപടികളും സ്വീകരിക്കുമെന്ന് റവന്യൂ മന്ത്രി അറിയിച്ചു.
English Summary : Seven killed as Kasargod bus overturns
ബുധനാഴ്ച ആദ്യ ഘട്ട വാക്സിന് വിതരണം തുടങ്ങിയേക്കും .വാക്സിന്വിതരണം നിയന്ത്രിതരീതിയില് കോവിഷീല്ഡ് വാക്സിന് 70.42 ശതമാനം ഫലപ്രാപ്തി കോവിഷീല്ഡ് ഡോസിന് 250 രൂപയും കൊവാക്സിന് 350 രൂപയും വില ആദ്യഘട്ടത്തില് 30 കോടി ഇന്ത്യക്കാരെ വാക്സിനേറ്റ് ചെയ്യും
ന്യൂഡല്ഹി: കോവിഡ് മഹാമാരിയെ നേരിടാന് രണ്ട് വാക്സിനുകള്ക്ക് അടിന്തരഅനുമതി നല്കാന് ഡിജിസിഐ തീരുമാനിച്ചു. ഓക്സ്ഫഡ് സര്വകലാശാലയും വിദേശമരുന്ന് കമ്പനിയായ ആസ്ട്രാസെനക്കയും ചേര്ന്ന് വികസിപ്പിച്ച്, പുനെ സിറം ഇന്സ്റ്റിറ്റ്യൂട്ട് ഉല്പാദിപ്പിച്ച കൊവിഷീല്ഡിനും ഇന്ത്യയില് തദ്ദേശീയമായി വികസിപ്പിച്ച കൊവാക്സിനുമാണ് അടിയന്തര ഉപയോഗ അനുമതി. നിയന്ത്രിതമായ രീതിയിലാകും വാക്സിന് വിതരണം.
വിദഗ്ദ്ധസമിതി നല്കിയ റിപ്പോര്ട്ട് പരിഗണിച്ചാണ് ഡിജിസിഐ യോഗം അന്തിമതീരുമാനമെടുത്തത്. കഴിഞ്ഞദിവസം നല്കിയ റിപ്പോര്ട്ട് ഇന്നലെ പുലര്ച്ചെ വരെ നീണ്ട യോഗം വിശദമായി ചര്ച്ച ചെയ്തു. തുടര്ന്ന് രാവിലെ ഡല്ഹിയില് നടത്തിയ വാര്ത്താസമ്മേളനത്തിലാണ് വാക്സിന് അനുമതി നല്കിയതായി ഡിജിസിഐ അറിയിച്ചത്. കോവിഷീല്ഡ് വാക്സിന് 70.42 ശതമാനം ഫലപ്രാപ്തി കണ്ടെത്തിയതായി ഡിജിസിഐ വ്യക്തമാക്കി. ഈ വാക്സിനുകള് 2 മുതല് 3 വരെ ഡിഗ്രി സെല്ഷ്യസില് സൂക്ഷിക്കണം.
കൊവിഷീല്ഡ് ഡോസിന് 250 രൂപ കമ്പനി നിര്ദ്ദേശിച്ചു. കൊവാക്സിന് 350 രൂപയാണ് ഭാരത് ബയോടെക്ക് നിര്ദേശിച്ചിരിക്കുന്നത്. ബുധനാഴ്ചയോടെ ആദ്യ ഘട്ട വാക്സിന് വിതരണം തുടങ്ങുമെന്നാണ് റിപ്പോര്ട്ട്. ഭാരത് ബയോടെക്കിന്റെ കൊവാക്സിന്റെ മൂന്നാംഘട്ടപരീക്ഷണം നവംബര് മദ്ധ്യത്തോടെയാണ് തുടങ്ങിയത്. രണ്ട് ഡോസ് വീതം നല്കേണ്ട കൊവാക്സിന്റെ ഉപയോഗ ഇടവേള 28 ദിവസമാണ്.
ഇതോടൊപ്പം അഹമ്മദാബാദ് ആസ്ഥാനമായി പ്രവര്ത്തിക്കുന്ന കാഡില ഹെല്ത്ത്കെയര് ലിമിറ്റഡ് എന്ന കമ്പനിക്ക് മൂന്നാംഘട്ട ക്ലിനിക്കല് പരീക്ഷണം തുടങ്ങാനുള്ള അനുമതിയും നല്കി. ബയോടെക്നോളജി വകുപ്പാണ് ഈ പരീക്ഷണത്തിന് ഫണ്ട് ചെയ്യുന്നത്.
അടിയന്തരഘട്ടങ്ങളില് പൂര്ണ പരീക്ഷണങ്ങള് നടത്തിയില്ലെങ്കിലും ചില വാക്സിനുകള്ക്ക് അടിയന്തര ഉപയോഗ അനുമതി നല്കാന് കഴിയുന്ന പുതിയ ഡ്രഗ്സ് & ക്ലിനിക്കല് ട്രയല്സ് നിയമം (2019) ഉപയോഗിച്ചാണ് ഈ രണ്ട് വാക്സിനുകള്ക്കും നിലവില് അടിയന്തരഉപയോഗ അനുമതി നല്കിയിരിക്കുന്നത്.
ആദ്യഘട്ടവാക്സിനേഷന് യജ്ഞത്തില് 30 കോടി ഇന്ത്യക്കാരെയാണ് വാക്സിനേറ്റ് ചെയ്യേണ്ടത്. ഇതില് ഒരു കോടി ആരോഗ്യപ്രവര്ത്തകരും രണ്ട് കോടി പൊലീസുദ്യോഗസ്ഥര്, അങ്കണവാടി പ്രവര്ത്തകര്, സന്നദ്ധസേവകര്, മുന്സിപ്പല് പ്രവര്ത്തകര് എന്നിവരുമാണ് ഉള്പ്പെടുന്നത്. 50 വയസിന് മുകളിലുള്ളവരും ആരോഗ്യസംബന്ധമായ അവശതകളുള്ളവരുമാണ് ബാക്കി 27 കോടിപ്പേര്.
English Summary :Permission for immediate use of two vaccines
മലയാളത്തിന് ഒരുപിടി മികച്ച ചിത്രങ്ങള് സമ്മാനിച്ച രാജീവ് രവി സംവിധാനം ചെയ്യുന്ന നാലാമത്തെ ചിത്രമായ ” തുറമുഖം ” മെയ് 13-ന് പ്രദര്ശനത്തിനെത്തിക്കുന്നു.
നിവിന് പോളിക്കൊപ്പം നിമിഷ സജയന്, ഇന്ദ്രജിത്ത് സുകുമാരന്, ജോജു ജോര്ജ്, പൂര്ണിമ ഇന്ദ്രജിത്ത്, അര്ജുന് അശോകന്, സുദേവ് നായര്, മണികണ്ഠന് ആചാരി തുടങ്ങിയവരാണ് മറ്റു പ്രധാന കഥാപാത്രങ്ങളെ അവതരിപ്പിക്കുന്നത്. ഗോപന് ചിദംബരമാണ് തുറമുഖത്തിന്റെ തിരക്കഥ സംഭാഷണമെഴുതുന്നത്. എഡിറ്റര്- ബി അജിത്കുമാര്, പ്രൊഡക്ഷന് ഡിസൈനര്- ഗോകുല് ദാസ്.
കടലും കരയും മനുഷ്യരും കെട്ടുപിണഞ്ഞു കിടക്കുന്ന കഥാന്തരീക്ഷത്തില് മൂന്ന് കാലഘട്ടങ്ങളുടെ ജീവിതം പകര്ത്തുന്ന ചിത്രമാണ് ‘തുറമുഖം’. തെക്കേപ്പാട്ട് ഫിലിംസിന്റെ ബാനറില് സുകുമാര് തെക്കേപ്പാട്ട് നിര്മ്മിക്കുന്ന മൂന്നാമത്തെ ചിത്രമാണ് ‘തുറമുഖം’.വാര്ത്ത പ്രചരണം-എ എസ് ദിനേശ്.
English Summary : Rajeev Ravi, Nivin Pauly’s ‘Thuramukham’ Eid Release
വിജയ് ആന്റണിയെ നായകനാക്കി ആനന്ദ കൃഷ്ണന് സംവിധാനം ചെയ്യുന്ന ‘വിജയരാഘവന്’ എന്ന പുതിയ ചിത്രത്തിന്റെ ടീസര് ഇന്ന്, (2-1-21) 2021 ജനുവരി രണ്ടാം തിയ്യതി ഉച്ചക്ക് (2:01 PM) രണ്ട് മണി കഴിഞ്ഞ് ഒരു മിനിറ്റിന് റിലീസ് ചെയ്തു. തമിഴിന് പുറമേ തെലുങ്ക്, കന്നഡ, മലയാളം, ഹിന്ദി എന്നീ ഭാഷകളിലും ഈ ചിത്രം നിര്മ്മിക്കുന്നതിനാല് അതാത് ഭാഷകളില് ടീസര് അവതരിപ്പിച്ചിട്ടുണ്ട്.ആത്മികയാണ് നായിക.
ഇന്ഫിനിറ്റി ഫിലിംസ് വെന്ചേര്സ് അവതരിപ്പിക്കുന്ന ചേണ്ടൂര്ഫിലിം ഇന്റര്നാഷണലിന്റെയും ടി ഡി രാജയുടേയും ബാനറില് ടി ഡി രാജയും, ഡി ആര് സഞ്ജയ് കുമാറും ചേര്ന്ന് നിര്മ്മിക്കുന്ന ‘വിജയ രാഘവന്’ എന്ന ചിത്രത്തിന്റെ ഛായാഗ്രഹണം എന് എസ് ഉദയകുമാര് നിര്വ്വഹിക്കുന്നു.
സംഗീതം-നിവാസ് കെ പ്രസന്ന,എഡിറ്റര്- വിജയ് ആന്റണി,കോ പ്രൊഡ്യൂസര്സ്-കമല് ബോഹ്റ,ലളിത ധനഞ്ജയന്, ബി പ്രദീപ്, പങ്കജ് ബൊഹ്റ,എസ വിക്രം കുമാര്,ഡിസൈന്- ശിവ ഡിജിറ്റല് ആര്ട്. പി ആര് ഒ- എ എസ് ദിനേശ്.
English Summary : Vijay Antony’s “Vijayaraghavan” teaser release
ഗൃഹാതുരത്വം ഉണർത്തുന്ന ഓർമ്മകളിലേക്ക് മലയാളിയെ എന്നും നയിക്കുന്ന ഒരു അതിമനോഹര ഗാനമാണ് ശ്രീ. കമൽ സംവിധാനം ചെയ്ത അഴകിയ രാവണൻ എന്ന ചിത്രത്തിനു വേണ്ടി ശ്രീ. കൈതപ്രത്തിന്റെ വരികൾക്ക് ശ്രീ. വിദ്യാസാഗർ ഈണം നൽകി ഗാനഗന്ധർവ്വൻ Dr. കെ. ജെ. യേശുദാസും ശബ്നവും ചേർന്നാലപിച്ച ” വെണ്ണിലാചന്ദനക്കിണ്ണം പുന്നമടക്കായലിൽ വീണേ…. ” എന്ന ഗാനം.
എത്ര കേട്ടാലും മതിവരാത്ത , എക്കാലത്തേയും മികച്ച ഈ മെലഡി ഗാനത്തിന്റെ പുതുമ നിറഞ്ഞ ഒരു കവർസോങ്ങ് വീഡിയോ , സോഷ്യൽ മീഡിയയിലൂടെ ഏവർക്കും പ്രിയങ്കരിയായ ഗായിക സന മൊയ്തൂട്ടി ആലപിച്ച് സത്യം ഓഡിയോസിന്റെ യൂട്യൂബ് ചാനലിൽ റിലീസ് ചെയ്തു.
സന മൊയ്തൂട്ടി ആലപിച്ച് സത്യം ഓഡിയോസ് റിലീസ് ചെയ്ത കണ്ണാടി കൂടുംകൂട്ടി.. , കരിമിഴി കുരുവിയെ കണ്ടീല …, ചൂളമടിച്ചു കറങ്ങി നടക്കും…. എന്നീ ഗാനങ്ങളുടെ കവർ യൂട്യൂബിൽ ഇതിനോടകം ജനശ്രദ്ധ ആകർഷിച്ചതാണ്. മികച്ച ദൃശ്യാവിഷ്ക്കാരവും ശബ്ദമിശ്രണവും സനയുടെ വ്യത്യസ്ഥമായ ആലാപനവും കൊണ്ട് “വെണ്ണിലാചന്ദനക്കിണ്ണവും .. ” എല്ലാവർക്കും ഇഷ്ടപെടും.
English Summary : Sana is back with a new cover song
ഗോപി സുന്ദറിന്റെ പുതു വർഷ സന്ദേശ ഗാനം പുറത്തിറങ്ങി. ” ന്യൂ ബിഗിനിങ്ങ്സ് ”എന്ന പേരിൽ ഉള്ള ഈ ആൽബം ഇരുൾ നിറഞ്ഞ ഇന്നലെകൾ മറന്നു കൊണ്ട് പ്രത്യാശയുടെ പുതുവർഷ സൂര്യ കിരണങ്ങൾ നമ്മുടെ മനസ്സുകളിൽ വെളിച്ചം നിറക്കട്ടെ എന്ന പ്രാർഥനയോടെയാണ് ഗോപി സുന്ദർ ഈ ആൽബം സമർപ്പിക്കുന്നത് . പ്രശസ്ത പിന്നണി ഗായകൻ നിരഞ്ജ് സുരേഷ് (പൂമുത്തോളെ ഫെയിം) വരികൾ എഴുതിയ ഈ ഇംഗ്ലിഷ് ഗാനം പാടിയിരിക്കുന്നത് ദേശി രാഗ്,ഉണ്ണിശോ എന്നി ആൽബങ്ങളിലൂടെ പ്രശ്സ്തമായ മെറിൽ ആൻ മാത്യൂ ആണ്. ഗോപി സുന്ദറിൻ്റെ തന്നെ ക്രിസ്തുമസ് കരോൾ പാടിയ മെറിൽ വീണ്ടും ഗോപി സുന്ദർ മ്യൂസിക്ക് കമ്പനിക്ക് വേണ്ടി പാടുന്നു എന്നതും മറ്റൊരു പ്രത്യേകതയാണ്. കൂടാതെ ലോകത്തിന്റെ നാനാ ഭാഗത്തു നിന്നും 62 വിവിധ രാജ്യങ്ങളിലെ ആളുകൾ സമാധാന സന്ദേശവുമായി ഒരേ മനസ്സോടെ പുതുവത്സര ആശംസകൾ ഈ ഗാനത്തിലൂടെ കൈമാറുന്നു എന്നതും ഈ ഗാനത്തിന്റെ മറ്റൊരു സവിശേഷതയാണ്. അടിപൊളി രിതിയിൽ നിന്നു മാറി വെസ്റേറൺ ശൈലിയിൽ ആണ് ഗോപി സുന്ദർ ഈ ഗാനം ചിട്ടപ്പെടുത്തിയിരിക്കുന്നത് . ഈ ഗാനത്തിൻ്റെh ക്രിയേറ്റിവ് ഹെഡ് യൂസഫ് ലെൻസ് മാൻ, ഡി ഒ പി നിതിൻ പി മോഹൻ , എഡിറ്റർ രഞ്ജിത്ത് ടച്ച് റിവർ , ക്രിയേറ്റിവ് സപ്പോർട്ട് ഷൈൻ റായമ്സ് ,ഫൈസൽ നാലകത്ത് ,ഷംസി തിരൂർ , ഷിഹാബ് അലി. ഇരുട്ടു വിണു കഴിഞ്ഞ ഒരു വർഷത്തിൻ്റെ വേദനകൾ മറന്നു , ലോകം മുഴുവൻ പുതുവത്സര സൂര്യന്റെ പോസിറ്റീവ് വെളിച്ചം നിറയട്ടെ എന്ന ആശയമാണ് ഗോപി സുന്ദറിൻ്റെ ഈ ഗാനത്തെ വ്യത്യസ്തമാക്കുന്നത്. “ന്യൂ ബിഗിനിങ്ങ്സ് ” എന്ന ഈ ആൽബത്തിലൂടെ പുതുവർഷ പുലരിയുടെ നന്മ നിറഞ്ഞ ഒരു പ്രഭാതം നമുക്കും സ്വപ്നം കാണാം.
പ്രതിസന്ധികൾക്കിടയിലും തളരാതെ പ്രതീക്ഷയുടെ പുതുനാമ്പുകൾ വിരിയുമെന്ന ശുഭ ചിന്തകൾ നമ്മുടെ മനസ്സുകളിൽ വിരിയട്ടെ എന്ന ആശയമാണ് മെറിൽ ആൻ മാത്യു പാടിയ ഈ ഗാനം..
ഖത്തർ ദോഹയിലെ ബിർള പബ്ലിക് സ്കൂളിൽ ആറാം ക്ലാസ്സ് വിദ്യാർത്ഥിനി മെറിൽ കണ്ണൂർ ആലക്കോട് അറക്കൽ മനോജ് മാത്യു – നിഷ വർഗീസ് ദമ്പതികളുടെ പുത്രിയാണ് . ഗോപി സുന്ദർ മ്യൂസിക്ക് കമ്പനി ആണ് ” ന്യൂ ബിഗിനിങ്ങ്സ് ” ലോകത്തിന് സമർപ്പിക്കുന്നത്.
കൊല്ക്കത്ത:ഇന്ത്യന് ക്രിക്കറ്റ് ടീമിന്റെ മുന് ക്യാപ്റ്റനും ഇന്ത്യന് ക്രിക്കറ്റ് കണ്ട്രോള് ബോര്ഡ് (ബിസിസിഐ) പ്രസിഡന്റുമായ സൗരവ് ഗാംഗുലിയെ നെഞ്ചുവേദനയെ തുടര്ന്ന് ആശുപത്രിയില് പ്രവേശിപ്പിച്ചു. കൊല്ക്കത്തയിലെ വുഡ്ലാന്ഡ്സ് ആശുപത്രിയിലാണ് ഗാംഗുലി ചികിത്സയിലുള്ളത്. വാര്ത്താ ഏജന്സികളായ പിടിഐയും എഎന്ഐയുമാണ് ഇക്കാര്യം ആദ്യം റിപ്പോര്ട്ട് ചെയ്തത്. താരത്തിന് ഹൃദയാഘാതം സംഭവിച്ചതായി ബംഗാള് മുഖ്യമന്ത്രി മമതാ ബാനര്ജി ട്വീറ്റ് ചെയ്തു. ഗാംഗുലിയെ നില തൃപ്തികരമാണെന്ന് ബിസിസിഐ സെക്രട്ടറി ജയ് ഷാ അറിയിച്ചു.
ഗാംഗുലിയെ ആന്ജിയോപ്ലാസ്റ്റിയ്ക്ക് വിധേയനാക്കേണ്ടി വരുമെന്നാണ് വിവരം. ശനിയാഴ്ച രാവിലെ നെഞ്ചുവേദനയുണ്ടെന്ന് പറഞ്ഞതിനു തൊട്ടുപിന്നാലെ ഗാംഗുലിയെ ആശുപത്രിയില് പ്രവേശിപ്പിക്കുകയായിരുന്നുവെന്ന് അദ്ദേഹവുമായി അടുത്ത വൃത്തങ്ങള് എഎന്ഐയോടു വെളിപ്പെടുത്തി. ആന്ജിയോപ്ലാസ്റ്റി വേണ്ടിവരുമെന്ന കാര്യവും ഇവര് തന്നെയാണ് വെളിപ്പെടുത്തിയത്. രാവിലെ പതിവ് വ്യായാമത്തിനിടെയാണ് താരത്തിന് നെഞ്ചുവേദന അനുഭവപ്പെട്ടത്. ഗാംഗുലിയുടെ ചികിത്സയിക്കായി ആശുപത്രി അധികൃതര് ഡോക്ടര്മാരുടെ വിദഗ്ധ സംഘത്തെ ചുമതലപ്പെടുത്തിയിട്ടുണ്ട്. വിശദ പരിശോധനകള്ക്കായി എസ്എസ്കെഎം ആശുപത്രിയില്നിന്ന് ഹൃദ്രോഗ വിദഗ്ധന്റെ സഹായവും തേടി. ‘ഹൃദയാഘാതത്തെ തുടര്ന്ന് സൗരവ് ഗാംഗുലിയെ ആശുപത്രിയില് പ്രവേശിപ്പിച്ച വാര്ത്ത വേദനാജനകമാണ്. എത്രയും വേഗം അദ്ദേഹം പൂര്ണമായും സുഖപ്പെടട്ടെ എന്ന് ആശംസിക്കുന്നു. അദ്ദേഹത്തെയും കുടുംബാംഗങ്ങളെയും എന്റെ പ്രാര്ഥനകള് അറിയിക്കുന്നു’ മുഖ്യമന്ത്രി മമതാ ബാനര്ജി ട്വീറ്റ് ചെയ്തു.
English Summary : Ganguly has chest pain; Was admitted to the hospital
ചെന്നൈ : രാഷ്ട്രീയ പ്രവേശനത്തില് നിന്ന് പിന്മാറിയതിനെ തുടര്ന്നുള്ള പ്രതിഷേധങ്ങള്ക്കിടെ നടന് രജനികാന്ത് വിദേശത്തേക്ക്. ജനുവരി 14ന് രജനി സിംഗപ്പൂരിലേക്ക് തിരിക്കും. വിദഗ്ധ പരിശോധനയ്ക്കാണ് യാത്രയെന്ന് താരത്തിന്റെ ഓഫീസ് വ്യക്തമാക്കി. കഴിഞ്ഞ ദിവസം ഹൈദരാബാദില് ഷൂട്ടിംഗിനിടെ രക്തസമ്മര്ദ്ദം ഉയര്ന്നതിനെ തുടര്ന്ന് താരത്തെ ആശുപത്രിയില് പ്രവേശിപ്പിച്ചിരുന്നു. ഇതിന് പിന്നാലെയാണ് രാഷ്ട്രീയത്തിലേക്കില്ലെന്ന പ്രഖ്യാപനം രജനി നടത്തിയത്.ഡോക്ടര്മാരുടെയും കുടുംബത്തിന്റെയും അഭ്യര്ഥന മാനിച്ച് രാഷ്ട്രീയത്തിലേക്കില്ലെന്ന പ്രഖ്യാപനം താരം നടത്തിയതിന് പിന്നാലെ ആരാധകര് വലിയ പ്രതിഷേധം ഉയര്ത്തിയിരുന്നു. താരത്തിന്റെ വീടിന് മുന്നില് ആരാധകര് കുത്തിയിരുന്ന് നിലപാട് മാറ്റണമെന്ന് ആവശ്യപ്പെടുകയും ചെയ്തു. ഇത്തരം പ്രതിഷേധങ്ങള്ക്കിടെയാണ് അദ്ദേഹം ചികിത്സയ്ക്കായി വിദേശത്തേക്ക് പോകുന്നത്. മുന്പ് വൃക്കമാറ്റിവയ്ക്കല് ശസ്ത്രക്രിയയ്ക്ക് വിധേയനായിട്ടുള്ള രജനിയോട് ആരോഗ്യകാര്യത്തില് വലിയ ശ്രദ്ധവേണമെന്നാണ് ഡോക്ടര്മാര് നിര്ദ്ദേശിച്ചിരിക്കുന്നത്.രജനികാന്ത് രാഷ്ട്രീയ പ്രവേശനത്തില് നിന്ന് പിന്മാറിയതോടെ തമിഴ്നാട്ടില് ആരാധകരുടെ വ്യാപക പ്രതിഷേധമാണ് ഉടലെടുത്തത്.
English Summary : Actor Rajinikanth goes abroad for expert examination
തിരുവനന്തപുരം: സംസ്ഥാനത്തെ സിനിമാ തിയേറ്ററുകള് ചൊവ്വാഴ്ച മുതല് തുറന്നു പ്രവര്ത്തിക്കും. പകുതി സീറ്റുകളില് മാത്രമായിരിക്കും കാണികളെ അനുവദിക്കുക. പതിവ് വാര്ത്താ സമ്മേളനത്തിനില് മുഖ്യമന്ത്രിയാണ് ഇക്കാര്യം അറിയിച്ചത്. കോവിഡ് ഭീഷണി നിലനില്ക്കുന്നുണ്ടെങ്കിലും ജനജീവിതം സാധാരണ നിലയില് കൊണ്ടുവരുന്നതിന് വേണ്ടി സര്ക്കാര് ഇളവുകള് ആലോചിക്കുകയാണെന്നും ജനങ്ങളുടെ ഉപജീവന മാര്ഗവും മാനസിക സാമൂഹിക ക്ഷേമവും സംരക്ഷിക്കുന്നതിനാണ് ഇളവുകള് അനുവദിക്കുന്നതെന്നും മുഖ്യമന്ത്രി പറഞ്ഞു. ജനുവരി അഞ്ചുമുതല് തിയേറ്ററുകള് തുറക്കാവുന്നതാണ്. ഒരു വര്ഷത്തോളമായി തിയേറ്ററുകള് പൂര്ണമായി അടഞ്ഞു കിടക്കുകയാണ്. ചലച്ചിത്രരംഗവുമായി ബന്ധപ്പെട്ട് പ്രവര്ത്തിക്കുന്ന ആയിരക്കണക്കിന് ആളുകള് ഇതുമൂലം വലിയ പ്രതിസന്ധിയിലാണ്. ഇത് കണക്കിലെടുത്ത് നിയന്ത്രണങ്ങളോടെ തിയേറ്ററുകള് തുറക്കാന് തീരുമാനിച്ചു. ആകെയുളള സീറ്റിന്റെ പകുതി പേരെ മാത്രമേ പ്രവേശിപ്പിക്കാന് പാടുളളൂ. അതായത് പകുതി ടിക്കറ്റ് മാത്രമേ വില്ക്കാന് പാടൂ. അതോടൊപ്പം ആരോഗ്യവകുപ്പിന്റെ കോവിഡ് മാനദണ്ഡങ്ങള് കര്ശനമായി പാലിക്കുകയും വേണം.’ നിബന്ധനകള് പാലിച്ചില്ലെങ്കില് തിയേറ്ററുകള്ക്കെതിരേ കര്ശന നടപടി ഉണ്ടാകുമെന്ന് മുഖ്യമന്ത്രി മുന്നറിയിപ്പ് നല്കി. കുറേ നാളുകളായി അടഞ്ഞു കിടന്നതുകൊണ്ട് സിനിമാശാലകള് അണുവിമുക്തമാക്കാനുളള നടപടികള് സ്വീകരിക്കണമെന്നും മുഖ്യമന്ത്രി നിര്ദേശിച്ചു
English Summary : Kerala Movie Theaters will open on January 5th
കണ്ണന് താമരക്കുളം സംവിധാനം ചെയ്ത് സെന്തില് കൃഷ്ണ കേന്ദ്ര കഥാപാത്രമാവുന്ന പുതിയ ചിത്രമാണ് ‘ഉടുമ്പ്’. ചിത്രമൊരു ഡാര്ക്ക് ത്രില്ലറാണ്. മലയാള സിനിമയില് അധികം കാണാത്ത ഒരു വിഭാഗമാണിത്. ഡോണുകളുടെയും, ഗാങ്സറ്റര്മാരുടെയും കഥ പറയുന്ന ചിത്രത്തിന്റെ ഷൂട്ടിംഗ് തുടങ്ങിയിട്ട് ഏതാനും ആഴ്ചകളായി. ചിത്രത്തിൻ്റെ ഫസ്റ്റ് ലുക്ക് പോസ്റ്റർ ഏറെ പ്രേക്ഷക ശ്രദ്ധ പിടിച്ചിരുന്നു.ചലച്ചിത്ര താരം ദുൽഖർ സൽമാന്റെ ഫേസ്ബുക്ക് പേജിലൂടെയാണ് കഴിഞ്ഞ ദിവസം പോസ്റ്റർ പുറത്തുവിട്ടിരുന്നത്. ഒരു പക്കാ ഡാർക്ക് മൂഡിൽ സെന്തിൽ, ഹരീഷ് പേരടി, അലന്സിയര്, സാജല് സുദര്ശന് എന്നിവരുടെ മാസ് ലുക്കാണ് പോസ്റ്ററിലുള്ളത്.സൂപ്പര്ഹിറ്റ് ചിത്രങ്ങളായ പട്ടാഭിരാമന്, മരട് 357ന് പിന്നാലെ കണ്ണൻ താമരക്കുളത്തിന്റെ സംവിധാനത്തിൽ അണിയറയില് ഒരുങ്ങുന്ന ത്രില്ലര് ചിത്രമാണ് ഉടുമ്പ്. പുതുമുഖ താരം എയ്ഞ്ചലീന ലെയ്സെന് ആണ് ചിത്രത്തിൽ നായികയാവുന്നത്.എറണാകുളം, തിരുവനന്തപുരം എന്നിവടങ്ങളാണ് ചിത്രത്തിന്റെ പ്രധാന ലൊക്കേഷൻ. കണ്ണന്റെ സംവിധാനത്തിലെ പട്ടാഭിരാമൻ, മരട് 357 എന്നീ ചിത്രങ്ങളിലൂടെ ശ്രദ്ധേയനായ ഛായാഗ്രാഹകന് രവിചന്ദ്രൻ ഛായാഗ്രഹണം നിർവഹിക്കുമ്പോൾ സാനന്ദ് ജോര്ജ് ഗ്രേസ് ആണ് സംഗീതം. നവാഗതരായ അനീഷ് സഹദേവന്, ശ്രീജിത്ത് ശശിധരന് എന്നിവർ ചേര്ന്നാണ് തിരക്കഥ ഒരുക്കിയിരിക്കുന്നത്. 24 മോഷന് ഫിലിംസും കെ.റ്റി മൂവി ഹൗസും ചേര്ന്നാണ് ചിത്രം നിര്മ്മിക്കുന്നത്.പ്രശസ്ത പ്രൊഡക്ഷൻ കൺട്രോളർ ബാദുഷ ചിത്രത്തിന്റെ ലൈൻ പ്രൊഡ്യൂസറാവുന്നു. നിരവധി ചിത്രങ്ങളിലൂടെ ശ്രദ്ദേയനായ വി.ടി ശ്രീജിത്ത് എഡിറ്റിങ് നിര്വഹിക്കുന്നു.ഏറെ വൈലൻസിന് പ്രാധാന്യമുള്ള ചിത്രത്തില് ബ്രൂസ്ലീ രാജേഷ്, ശക്തി ശരവണൻ എന്നിവർ ആക്ഷൻ കൈകാര്യം ചെയ്യുന്നു. പ്രസന്ന സുജിത്ത്, ഷിജു മുപ്പത്തേടം, ശ്രീജിത്ത് ശിവനന്ദൻ എന്നിവർ ചേർന്ന് കൊറിയോഗ്രഫി നിർവഹിക്കുന്നു. കലാ സംവിധാനം- സഹസ് ബാല, അസോസിയേറ്റ് ഡയറക്ടര്- സുരേഷ് ഇളമ്പല്, പ്രൊഡക്ഷന് കണ്ഡ്രോളര്- അഭിലാഷ് അര്ജുന്, ഗാനരചന-രാജീവ് ആലുങ്കൽ, മേക്കപ്പ്- പ്രദീപ് രംഗന്, കോസ്റ്റ്യൂം- സുല്ത്താന റസാഖ്, സ്റ്റില്സ്- ശ്രീജിത്ത് ചെട്ടിപ്പടി, പി.ആർ.ഒ- പി. ശിവപ്രസാദ്, സുനിത സുനില് എന്നിവരാണ് മറ്റ് അണിയറ പ്രവർത്തകർ. കൊവിഡിന് മുമ്പ് കണ്ണന് താമരക്കുളവും തിരക്കഥാകൃത്തുകളായ അനീഷ് സഹദേവനും, ശ്രീജിത്ത് ശശിധരനും ‘ക്വാറി’ എന്ന മറ്റൊരു ചിത്രമാണ് പ്രഖ്യാപിച്ചിരുന്നത്. എന്നാല് ചിത്രീകരണത്തിനായ ആള്ക്കൂട്ടവും, ക്വാറിയും ആവശ്യമായതിനാല് കൊവിഡ് സമയത്ത് ചിത്രീകരണം മാറ്റിവെക്കുകയായിരുന്നു. അതിനാലാണ് ‘ഉടുമ്പ്’ ആദ്യം ചിത്രീകരിക്കുന്നതെന്നും കണ്ണന് താമരക്കുളം വ്യക്തമാക്കി.ഫെബ്രുവരിയോടെ ചിത്രം റിലീസിനെത്തിക്കാനാണ് അണിയറ പ്രവർത്തകരുടെ ശ്രമം.
പി.ശിവപ്രസാദ്
English Summary : Senthil- Kannan Thamarakulam team with dark thriller; Filming of ‘Udumba’ is in progress
പ്രഖ്യാപന ദിനം മുതല് എല്ലാവരും ഏറെ ആകാംക്ഷയോടെ കാത്തിരുന്ന പ്രഭാസ് ചിത്രം രാധേശ്യാമിന്റെ പുതിയ പോസ്റ്റര് പുറത്തിറക്കി. ആരാധകര്ക്കുള്ള പുതുവത്സര സമ്മാനമായാണ് പുതുവര്ഷത്തില് പോസ്റ്റര് പുറത്തിറക്കിയത്. തുവത്സരാശംസകള് നേര്ന്നുകൊണ്ടാണ് പ്രഭാസ് സോഷ്യല് മീഡിയ പേജിലൂടെ പോസ്റ്റര് ആരാധകരുമായി പങ്കുവെച്ചത്.ഈ വര്ഷം പ്രദര്ശനത്തിന് എത്തുന്ന ചിത്രം ഒരു പ്രണയകഥയെ ആസ്പദമാക്കിയാണ് ഒരുക്കിയിരിക്കുന്നത്.രാധാകൃഷ്ണ കുമാര് സംവിധാനം ചെയ്യുന്ന ചിത്രത്തില് വിക്രമാദിത്യ എന്ന കഥാപാത്രത്തെയാണ് പ്രഭാസ് അവതരിപ്പിക്കുന്നത്. നായികയായി ബോളിവുഡ് താരം പൂജ ഹെഗ്ഡെയും എത്തുന്നുണ്ട്.
യുവി ക്രിയേഷന്റെ ബാനറില് ഭൂഷണ് കുമാര്, വംശി, പ്രമോദ് എന്നിവര് ചേര്ന്നാണ് നിര്മ്മിക്കുന്നത്. സച്ചിന് ഖേദേക്കര്, ഭാഗ്യശ്രീ, പ്രിയദര്ശി, മുരളി ശര്മ, സാശാ ചേത്രി, കുനാല് റോയ് കപൂര് എന്നിവരും പ്രധാന വേഷം കൈകാര്യം ചെയ്യുന്നുണ്ട്. തെലുങ്ക്, ഹിന്ദി, തമിഴ്, മലയാളം എന്നീ നാല് ഭാഷകളിലാണ് ചിത്രം നിര്മ്മിക്കുന്നത്. കൂടാതെ, മറ്റുഭാഷകളിലേക്ക് മൊഴിമാറ്റവും ഉണ്ടാകുമെന്ന് അണിയറപ്രവര്ത്തകര് വ്യക്തമാക്കി. ചിത്രത്തിന് സംഗീതം ഒരുക്കുന്നത് തമിഴ് സംഗീത സംവിധായകന് ജസ്റ്റിന് പ്രഭാകരനാണ്. ഛായാഗ്രഹണം: മനോജ് പരമഹംസ, എഡിറ്റിംഗ്: കോട്ടഗിരി വെങ്കിടേശ്വര റാവു,ആക്ഷന്: നിക്ക് പവല്,ശബ്ദ രൂപകല്പ്പന: റസൂല് പൂക്കുട്ടി,നൃത്തം: വൈഭവി,കോസ്റ്റ്യൂം ഡിസൈനര്: തോട്ട വിജയഭാസ്കര്,ഇഖ ലഖാനി, എക്സിക്യൂട്ടീവ് പ്രൊഡ്യൂസര്- എന്. സന്ദീപ്.
English Summary : Radheshyam’s new poster released
