മെഗാസ്റ്റാർ ചിരഞ്ജീവി സൂപ്പർ ഹിറ്റ് സംവിധായകൻ ബോബി കൊല്ലിയുമായി വീണ്ടും കൈകോർക്കുന്ന ചിത്രം ചിരു 158 ചിത്രീകരണം പുരോഗമിക്കുന്നു. പ്രശസ്ത പ്രൊഡക്ഷൻ ബാനർ ആയ കെവിഎൻ പ്രൊഡക്ഷൻസിന്റെ ബാനറിൽ വെങ്കട്ട് കെ നാരായണൻ നിർമ്മിക്കുന്ന ഈ ഹൈ-വോൾട്ടേജ് എന്റർടെയ്‌നർ ചിത്രത്തിന് താൽക്കാലികമായി നൽകിയിരിക്കുന്ന പേര് #ചിരുബോബി2 / #ചിരു158 എന്നാണ്. കന്നഡ, തമിഴ്, ഹിന്ദി ഭാഷകളിൽ നിരവധി വൻകിട പ്രോജക്ടുകൾ നൽകിയതിന് ശേഷം കെവിഎൻ പ്രൊഡക്ഷൻസിന്റെ ആദ്യ തെലുങ്ക് സംരംഭം കൂടിയാണ് ഈ ചിത്രം. ഇപ്പോഴിതാ, ചിത്രത്തിന്റെ ഒരു സംഘട്ടന രംഗത്തിന്റെ ചിത്രീകരണവും അതിനായി ചിരഞ്ജീവി കാണിച്ച പ്രതിബദ്ധതയുമാണ് വാർത്തയാവുന്നത്. സിനിമയോടുള്ള തന്റെ അഭിനിവേശം സമാനതകളില്ലാത്തത് എന്തുകൊണ്ടാണെന്ന് മെഗാസ്റ്റാർ ചിരഞ്ജീവി വീണ്ടും തെളിയിക്കുന്ന കാഴ്ച്ചയാണ് ഈ സംഘട്ടന ചിത്രീകരണം കാണിച്ചു തന്നത്.

മഴയിൽ ഉള്ള സംഘട്ടന രംഗം ആണ് വലിയ കാൻവാസിൽ ചിത്രത്തിനായി ഒരുക്കിയത്. 12 മണിക്കൂറോളം നീണ്ട ചിത്രീകരണത്തിനൊടുവിലാണ് ഈ രംഗം പൂർത്തിയായത്. വാൾട്ടെയർ വീരയ്യയുടെ ബ്ലോക്ക്ബസ്റ്റർ വിജയത്തിന് ശേഷം ചിരഞ്ജീവിയും ബോബി കൊല്ലിയും വീണ്ടും ഒന്നിച്ച ഈ ചിത്രത്തിന്റെ സംഘട്ടന രംഗം ഒരുക്കിയത് പ്രശസ്ത സ്റ്റണ്ട് മാസ്റ്റേഴ്സ് രാം-ലക്ഷ്മൺ ടീം ആണ്. ചിരഞ്ജീവിയുടെ കരിയറിലെ തന്നെ ഏറ്റവും വലിയ ആക്ഷൻ ബ്ലോക്കുകളിലൊന്നായി ആണ് ഇത് ചിത്രീകരിച്ചത്. ഈ സംഘട്ടനത്തിനായി രാവിലെ 9 മണിക്ക് ലൊക്കേഷനിൽ എത്തിയ ചിരഞ്ജീവി ഏകദേശം 12 മണിക്കൂർ തുടർച്ചയായി മഴയിൽ ചിത്രീകരിച്ചു. ഒരു ഹ്രസ്വ ഉച്ചഭക്ഷണ ഇടവേള മാത്രം എടുത്ത അദ്ദേഹം, ശാരീരികമായി ബുദ്ധിമുട്ടുള്ള സാഹചര്യങ്ങൾ ഉണ്ടായിരുന്നിട്ടും, ശ്രദ്ധേയമായ ഊർജ്ജത്തോടും കൃത്യതയോടും കൂടി ആ ആക്ഷൻ ഭാഗങ്ങൾ അവതരിപ്പിച്ചു. ചിത്രീകരണ വേളയിൽ അദ്ദേഹം പുലർത്തിയ അച്ചടക്കവും സഹിഷ്ണുതയും മുഴുവൻ യൂണിറ്റിനെയും ആകർഷിക്കുന്ന ഒന്നായിരുന്നു.

ആദ്യ ടേക്ക് മുതൽ അവസാനത്തേത് വരെ ഒരേ ആവേശം നിലനിർത്തിക്കൊണ്ട് ഓരോ ഷോട്ടും തന്റെ മുഴുവൻ പരിശ്രമവും നൽകണമെന്ന് ചിരഞ്ജീവിക്കു നിർബന്ധം ഉണ്ടായിരുന്നു. ഈ കഠിനമായ ഷെഡ്യൂളിലെ അദ്ദേഹത്തിന്റെ സമർപ്പണം, കൂടെയുള്ള അഭിനേതാക്കളിൽ നിന്നും അണിയറപ്രവർത്തകരിൽ നിന്നും ഒരുപോലെ പ്രശംസ പിടിച്ചുപറ്റുകയും ഇന്ത്യൻ സിനിമയിലെ ഏറ്റവും കഠിനാധ്വാനികളായ താരങ്ങളിൽ ഒരാളെന്ന അദ്ദേഹത്തിന്റെ പ്രശസ്തി കൂടുതൽ ശക്തിപ്പെടുത്തുകയും ചെയ്തു.

ആരാധകരെ ത്രസിപ്പിക്കുന്ന ഒരു തിയറ്റർ അനുഭവം വാഗ്ദാനം ചെയ്യുന്ന ഈ വലിയ മഴ സംഘട്ടന രംഗം, ചിത്രത്തിലെ ഒരു ശ്രദ്ധേയമായ നിമിഷമായിരിക്കുമെന്ന് അണിയറ പ്രവർത്തകർ പ്രതീക്ഷിക്കുന്നു. നിർമ്മാണം പൂർണ്ണ വേഗതയിൽ പുരോഗമിക്കുമ്പോൾ, ചിത്രത്തിന്റെ ടൈറ്റിൽ ടീസറും ഉടൻ പുറത്തിറക്കാൻ നിർമ്മാതാക്കൾ തയ്യാറെടുക്കുകയാണ്. ആക്ഷൻ, ഇമോഷൻ, മാസ് അപ്പീൽ എന്നിവ നിറഞ്ഞ ഒരു മെഗാ മാസ് കൊമേഴ്സ്യൽ എന്റർടെയ്നറായി ആണ് ചിത്രം ഒരുങ്ങുന്നത്. മലയാളി താരം അനശ്വര രാജൻ ആണ് നിലവിൽ പ്രേക്ഷകർ ഏറ്റവും പ്രതീക്ഷയോടെ കാത്തിരിക്കുന്ന ഈ തെലുങ്ക് ചിത്രത്തിലെ നായികാ വേഷം ചെയ്യുന്നത്.

രചന, സംവിധാനം: ബോബി കൊല്ലി, പ്രൊഡക്ഷൻ ബാനർ: കെവിഎൻ പ്രൊഡക്ഷൻസ്, നിർമ്മാതാവ്: വെങ്കട്ട് കെ നാരായണ, സംഗീതം: തമൻ എസ്,
തിരക്കഥാകൃത്തുക്കൾ: കോന വെങ്കട്ട്, കെ ചക്രവർത്തി റെഡ്ഡി, അഡീഷണൽ തിരക്കഥാകൃത്തുക്കൾ: ഹരി മോഹന കൃഷ്ണ, വിനീത് പൊട്ലൂരി,
ഛായാഗ്രഹണം: വിജയ് കാർത്തിക് കണ്ണൻ, എഡിറ്റർ: ആന്റണി റൂബൻ, പ്രൊഡക്ഷൻ ഡിസൈൻ: അവിനാഷ് കൊല്ല, വിഎഫ്എക്സ് സൂപ്പർവൈസർ: യുഗന്ദർ ടി, സംഭാഷണങ്ങൾ: ഭാനു-നന്ദു, ചീഫ് കോ-ഡയറക്ടർമാർ: ബെല്ലംകൊണ്ട സത്യം, പൂസല രാധാകൃഷ്ണ, കോ-ഡയറക്ടർ: വി. ക്രാന്തി ചക്രവർത്തി, എക്സിക്യൂട്ടീവ് പ്രൊഡ്യൂസർ: ശരണ്യ പൊട്ല, മാർക്കറ്റിംഗ്ഃ ഹാഷ്ടാഗ് മീഡിയ, പിആർഒ: ശബരി

ദുൽഖർ സൽമാനെ നായകനാക്കി, നവാഗതനായ രവി നെലകുടിറ്റി സംവിധാനം ചെയ്യുന്ന, SLV സിനിമാസ് നിർമ്മിക്കുന്ന ചിത്രത്തിന്റെ ടൈറ്റിൽ, ഫസ്റ്റ് ലുക്ക് എന്നിവ നാളെ പുറത്ത് വിടും. നാളെ രാവിലെ 10.08 ന് ആണ് ടൈറ്റിലും പോസ്റ്ററും പുറത്തുവിടുക. “Love Will Spark Again” എന്ന ടാഗ് ലൈനോടെയാണ് ചിത്രത്തിൻ്റെ ടൈറ്റിൽ പുറത്ത് വരിക എന്നാണ് സൂചന. DQ41 എന്ന് താത്കാലികമായി അറിയപ്പെടുന്ന ചിത്രം SLV സിനിമാസിന്റെ ബാനറിൽ സുധാകർ ചെറുകുരിയാണ് നിർമ്മിക്കുന്നത്. SLV സിനിമാസ് നിർമ്മിക്കുന്ന പത്താമത്തെ ചിത്രമാണിത്. പൂജ ഹെഗ്‌ഡെയാണ് ചിത്രത്തിലെ നായിക. ദുൽഖർ സൽമാൻ – പൂജ ഹെഗ്ഡെ ടീം ആദ്യമായി ഒന്നിക്കുന്ന ചിത്രം കൂടിയാണിത്.

ദുൽഖർ സൽമാൻ്റെ കരിയറിലെ നാൽപത്തിയൊന്നാം ചിത്രമായ DQ41 ഒരു പ്രണയ കഥയാണ് പറയുന്നത് എന്നാണ് റിപ്പോർട്ട്. ചിത്രത്തിൻ്റെ അവസാന ഷെഡ്യൂൾ ഇപ്പോൾ പുരോഗമിക്കുകയാണെന്നാണ് വിവരം. മലയാളത്തിലും തെലുങ്കിലും ഒരുപോലെ വമ്പൻ വിജയങ്ങളുമായി തിളങ്ങി നിൽക്കുന്ന ദുൽഖർ സൽമാൻ നായകനായി അഭിനയിക്കുന്ന അഞ്ചാമത്തെ തെലുങ്ക് ചിത്രമാണിത്.

സംവിധായകൻ രവി നെലകുടിറ്റി തന്നെയാണ് DQ41 രചിച്ചിരിക്കുന്നതും. വമ്പൻ ബജറ്റിലും കാൻവാസിലും, ഉയർന്ന സങ്കേതിക നിലവാരത്തിൽ ഒരുക്കുന്ന ഈ ചിത്രത്തിൽ മികച്ച അഭിനേതാക്കളുടെയും സാങ്കേതിക വിദഗ്ധരുടെയും ഒരു വലിയ നിര തന്നെ ഭാഗമാകുന്നുണ്ട്. തെലുങ്ക്, മലയാളം, ഹിന്ദി, കന്നഡ, തമിഴ് ഭാഷകളിൽ വമ്പൻ റിലീസ് ആയാണ് ചിത്രം ഒരുക്കുന്നത്.

ബിഗ് ബഡ്ജറ്റ് മലയാളം ആക്ഷൻ ത്രില്ലർ ചിത്രമായ ‘ഐ ആം ഗെയിം’, പവൻ സാദിനേനി ഒരുക്കുന്ന തെലുങ്ക് ചിത്രമായ ‘ആകാശം ലോ ഓക താര’ എന്നിവയാണ് ദുൽഖർ സൽമാൻ നായകനായി എത്തുന്ന അടുത്ത റിലീസുകൾ.

രചന, സംവിധാനം: രവി നെലക്കുടിറ്റി, നിർമ്മാതാവ്: സുധാകർ ചെറുകുരി, ബാനർ: SLV സിനിമാസ്, സഹനിർമ്മാതാവ്: ഗോപിചന്ദ് ഇന്നാമുറി, സിഇഒ: വിജയ് കുമാർ ചഗന്തി, സംഗീതം: ജി വി പ്രകാശ് കുമാർ, ഛായാഗ്രഹണം: അനയ് ഓം ഗോസ്വാമി, പ്രൊഡക്ഷൻ ഡിസൈനർ: അവിനാഷ് കൊല്ല, മാർക്കറ്റിംഗ്: ഫസ്റ്റ്ഷോ, പിആർഒ – ശബരി.

വിഷ്ണു വിശാൽ, ഐശ്വര്യ ലക്ഷ്മി എന്നിവരെ പ്രധാന കഥാപാത്രങ്ങളാക്കി ചെല്ല അയ്യാവു സംവിധാനം ചെയ്ത സ്പോർസ് ഡ്രാമ ചിത്രം ‘ഗാട്ട കുസ്തി 2’ ഗംഭീര വിജയം നേടി കുതിപ്പ് തുടരുകയാണ്. ഇപ്പോഴിതാ ചിത്രത്തിലെ ചിൽ മമ്മി എന്ന ഗാനത്തിൻ്റെ വീഡിയോ പുറത്ത് വിട്ടിരിക്കുകയാണ് അണിയറ പ്രവർത്തകർ. മോഹൻ രാജൻ വരികൾ രചിച്ച ഗാനം ആലപിച്ചത് മിത്രൻ ഷെൻബഗരാജ് ആണ്. ഷോൺ റോൾഡൻ ആണ് ഗാനത്തിന് ഈണം നൽകിയത്. ജൂലൈ മൂന്നിന് തീയേറ്ററുകളിൽ എത്തിയ ചിത്രത്തിന് വലിയ പ്രശംസയാണ് പ്രേക്ഷകർ നൽകുന്നത്. ചിത്രം കേരളത്തിലെ തീയേറ്ററുകളിൽ എത്തിച്ചത് E4 എൻ്റർടെയിൻമെൻ്റ്. വേൽസ് ഫിലിം ഇന്റർനാഷ്നലും വിഷ്ണു വിശാല്‍ സ്റ്റുഡിയോസും ചേർന്നാണ് ചിത്രം നിർമ്മിച്ചത്.

പ്രേക്ഷകർക്കൊപ്പം നിരൂപകരും പ്രശംസിക്കുന്ന ചിത്രം ബ്ലോക്ക്ബസ്റ്റർ വിജയത്തിലേക്കാണ് കുതിക്കുന്നത്. ഇതിനോടകം വിഷ്ണു വിജയ്‌യുടെ കരിയറിലെ തന്നെ മികച്ച വിജയങ്ങളിൽ ഒന്നായി ചിത്രം മാറിക്കഴിഞ്ഞു. കേരളത്തിലെ തിയേറ്ററുകളിലും നിറഞ്ഞ സദസ്സുകളിലാണ് ചിത്രം പ്രദർശിപ്പിക്കുന്നത്.

ഐശ്വര്യ ലക്ഷ്മി, വിഷ്ണു വിശാൽ എന്നിവരും അവരുടെ മകളും അടങ്ങുന്ന കുടുംബത്തിൽ സംഭവിക്കുന്ന രസകരമായ കാര്യങ്ങളാണ് ഇപ്പൊൾ പുറത്ത് വന്ന ചിൽ മമ്മി എന്ന ഗാനത്തിൻ്റെ ഹൈലൈറ്റ്. ആദ്യാവസാനം പ്രേക്ഷകരെ ഏറെ രസിപ്പിക്കുകയും ആവേശം കൊള്ളിക്കുകയും ചെയ്യുന്ന ഒരു പക്കാ ഫാമിലി എൻ്റർടെയ്നർ ആയാണ് ഈ സ്പോർട്സ് ഡ്രാമ കഥ പറയുന്നത്.

സൂപ്പർ വിജയം നേടിയ ആദ്യ ഭാഗത്തിൻ്റെ കഥയുടെ തുടർച്ച ആയാണ് ഈ രണ്ടാം ഭാഗം എത്തിയിരിക്കുന്നത്. എല്ലാത്തരം പ്രേക്ഷകരെയും ആകർഷിക്കുന്ന തരത്തിൽ, ഗുസ്തി രംഗങ്ങൾ, ആക്ഷൻ, ഫാമിലി കോമഡി, ഫാമിലി ഡ്രാമ, ഇമോഷൻ എന്നിവയെല്ലാം കോർത്തിണക്കിയാണ് ചിത്രം കഥ പറയുന്നത്. രമ്യ കൃഷ്ണൻ, മോക്ഷ, കരുണാസ്, കാളി വെങ്കട്, യോഗി ബാബു, കരുണാകരൻ, മുനിസ്കാന്ത്, സാറ എന്നിവരാണ് ചിത്രത്തിലെ മറ്റ് പ്രധാന താരങ്ങൾ.

നിർമ്മാണം: ഡോക്ടർ ഇഷാരി കെ ഗണേഷ്, വിഷ്ണു വിശാൽ, കോ പ്രൊഡ്യൂസേഴ്സ് : ശുഭ്ര, ആര്യൻ രമേശ്, ഇഷാൻ സക്സേന, ഛായാഗ്രഹണം: കെ.എം. ഭാസ്കരൻ, സംഗീതം: ഷോൺ റോൾഡൻ , എഡിറ്റർ: ഭരത് വിക്രമൻ, ആർട്ട് ഡയറക്ടർ: ജയചന്ദ്രൻ, കോസ്റ്റ്യൂം ഡിസൈനർ: രുചി മുനൊത്ത്, സബ്ടൈറ്റിൽ: സാജിദ് അലി, പബ്ലിസിറ്റി ഡിസൈനർ : വിയാക്കി, മാർക്കറ്റിംഗ് ആൻഡ് പ്രൊമോഷൻ : സിദ്ധാർഥ് ശ്രീനിവാസ്, പ്രൊഡക്ഷൻ എക്സിക്യൂട്ടീവ് : ബി ജയ് ഗണേഷ്, എ ആർ ചന്ദ്രമോഹൻ, എക്സിക്യൂട്ടീവ് പ്രൊഡ്യൂസർ: സീതാറാം, ക്രിയേറ്റീവ് പ്രൊഡ്യൂസർ : ശ്രാവന്തി സായ്‌നാഥ്, പിആർഒ : ശബരി

മലയാളികൾക്കും തമിഴ്-തെലുങ്ക് സിനിമാപ്രേമികൾക്കും ഏറെ പ്രിയങ്കരിയായ നടി സ്വാതി റെഡ്ഡി (കളേഴ്സ് സ്വാതി) വീണ്ടും വിവാഹിതയായി. പ്രശസ്ത തെലുങ്ക് സംവിധായകൻ ശ്രീകാന്ത് നഗോതിയാണ് വരൻ. അടുത്ത ബന്ധുക്കളും സുഹൃത്തുക്കളും മാത്രം പങ്കെടുത്ത ലളിതമായ ചടങ്ങിലായിരുന്നു വിവാഹം.

തന്റെ ഇൻസ്റ്റാഗ്രാം പേജിലൂടെ സ്വാതി തന്നെയാണ് വിവാഹവാർത്ത പുറത്തുവിട്ടത്. ഭർത്താവിന്റെ കൈകോർത്തുപിടിച്ചുള്ള ചിത്രങ്ങൾ പങ്കുവെച്ചുകൊണ്ട് “ഹിച്ച്ഡ്. 08-07-2026” (വിവാഹിതരായി) എന്ന് സ്വാതി കുറിച്ചു. സിനിമാരംഗത്തെ പ്രമുഖരും ആരാധകരും ഉൾപ്പെടെ നിരവധി പേരാണ് താരത്തിന് ആശംസകളുമായി രംഗത്തെത്തുന്നത്.

ശ്രീകാന്ത് നഗോതി സംവിധാനം ചെയ്ത ‘മന്ത് ഓഫ് മധു’ എന്ന ചിത്രത്തിൽ സ്വാതി അഭിനയിച്ചിരുന്നു. ഈ സിനിമയുടെ ചർച്ചകൾക്കിടയിലും ഷൂട്ടിംഗ് വേളയിലുമാണ് ഇരുവരും തമ്മിൽ അടുത്ത സുഹൃത്തുക്കളാകുന്നത്. സിനിമയോടുള്ള താല്പര്യം ഇവരെ കൂടുതൽ അടുപ്പിക്കുകയും പിന്നീട് ഈ സൗഹൃദം പ്രണയത്തിലേക്കും വിവാഹത്തിലേക്കും വഴിമാറുകയായിരുന്നു.

സ്വാതിയുടെ രണ്ടാം വിവാഹമാണിത്. 2018-ൽ പൈലറ്റായ വികാസ് വാസുവിനെ സ്വാതി വിവാഹം കഴിച്ചിരുന്നുവെങ്കിലും 2023-ൽ ഇവർ പരസ്പര സമ്മതത്തോടെ വിവാഹമോചിതരായി. തുടർന്ന് സിനിമയിൽ നിന്ന് ചെറിയൊരു ഇടവേളയെടുത്ത താരം ‘പഞ്ചതന്ത്രം’, ‘മന്ത് ഓഫ് മധു’ എന്നീ ചിത്രങ്ങളിലൂടെ ശക്തമായ തിരിച്ചുവരവ് നടത്തി. വ്യക്തിജീവിതത്തിലെ പ്രതിസന്ധികളെയെല്ലാം അതിജീവിച്ച് ജീവിതത്തിലെ പുതിയൊരു അധ്യായത്തിലേക്ക് കടന്ന പ്രിയനടിക്ക് വലിയ പിന്തുണയാണ് സോഷ്യൽ മീഡിയയിൽ ആരാധകർ നൽകുന്നത്.

‘സുബ്രഹ്മണ്യപുരം’, ‘അഷ്ടാ ചമ്മ’, ‘സ്വാമി രാ രാ’ തുടങ്ങിയ തെന്നിന്ത്യൻ ചിത്രങ്ങളിലൂടെ ശ്രദ്ധേയയായ സ്വാതി, ലിജോ ജോസ് പെല്ലിശ്ശേരി സംവിധാനം ചെയ്ത ‘ആമേൻ’, ‘നോർത്ത് 24 കാതം’, ‘മോസയിലെ കുതിരമീനുകൾ’ എന്നീ മലയാള സിനിമകളിലും മികച്ച പ്രകടനം കാഴ്ചവെച്ചിട്ടുണ്ട്.

പൃഥ്വിരാജ് സുകുമാരനും പാർവതി തിരുവോത്തും കേന്ദ്ര കഥാപാത്രങ്ങളായി എത്തുന്ന ‘ഐ നോബഡി’ എന്ന ചിത്രത്തിന്റെ പകർപ്പവകാശം സംരക്ഷിക്കുന്നതിനായി ബഹുമാനപ്പെട്ട മദ്രാസ് ഹൈക്കോടതി ജോൺ ഡോ (അശോക് കുമാർ) ഉത്തരവ് പുറപ്പെടുവിച്ചു. ചിത്രത്തിന്റെ നിർമ്മാതാക്കൾക്കുവേണ്ടി അഡ്വ. സ്വേത ശ്രീധർ ഹാജരായ ഹർജിയിലാണ് കോടതി ഈ ഉത്തരവ് നൽകിയത്.

Original Application No. 684 of 2026, C.S. (Comm. Div.) No. 197 of 2026 എന്ന കേസിലാണ് ബഹുമാനപ്പെട്ട ജസ്റ്റിസ് കെ. കുമരേഷ് ബാബു 2026 ജൂലൈ 8-ന് ഉത്തരവ് പുറപ്പെടുവിച്ചത്.

ചിത്രത്തിന്റെ അനധികൃത ചിത്രീകരണം (കാംകോർഡിംഗ്), റെക്കോർഡിംഗ്, പകർപ്പെടുക്കൽ, അപ്‌ലോഡ്, പ്രക്ഷേപണം, വിതരണം, പങ്കുവെക്കൽ എന്നിവയുൾപ്പെടെ പകർപ്പവകാശ ലംഘനവുമായി ബന്ധപ്പെട്ട എല്ലാ പ്രവർത്തനങ്ങളും ഈ ഉത്തരവിലൂടെ വിലക്കിയിട്ടുണ്ട്.

കോടതി ഉത്തരവ് ബാധകമാകുന്നവർ:

• തിയേറ്ററുകളിലോ പ്രിവ്യൂ ഷോകളിലോ പ്രമോഷണൽ പ്രദർശനങ്ങളിലോ ചിത്രത്തിന്റെ അനധികൃത വീഡിയോ ചിത്രീകരണം അല്ലെങ്കിൽ റെക്കോർഡിംഗ് നടത്തുന്നവർ.
• കേബിൾ ഓപ്പറേറ്റർമാർ, എം.എസ്.ഒ. (MSO), ഇന്റർനെറ്റ് സേവനദാതാക്കൾ (ISP), ഡി.ടി.എച്ച്. ഓപ്പറേറ്റർമാർ എന്നിവർ പൈറേറ്റഡ് ഉള്ളടക്കം പ്രക്ഷേപണം ചെയ്യുകയോ, അറിയിപ്പ് ലഭിച്ചിട്ടും അത് തടയുന്നതിൽ വീഴ്ച വരുത്തുകയോ ചെയ്യുന്ന സാഹചര്യങ്ങൾ.
• പൈറേറ്റഡ് കോപ്പികൾ അപ്‌ലോഡ് ചെയ്യുകയോ ഹോസ്റ്റ് ചെയ്യുകയോ ലിങ്ക് നൽകുകയോ വിതരണം ചെയ്യുകയോ ചെയ്യുന്ന വെബ്സൈറ്റുകൾ, മൊബൈൽ ആപ്പുകൾ, ടോറന്റ് സൈറ്റുകൾ, സ്ട്രീമിംഗ് പ്ലാറ്റ്ഫോമുകൾ, സോഷ്യൽ മീഡിയ അക്കൗണ്ടുകൾ.
• വാട്ട്സ്ആപ്പ് ഉൾപ്പെടെയുള്ള മെസേജിംഗ് പ്ലാറ്റ്ഫോമുകളിലൂടെയോ സോഷ്യൽ മീഡിയയിലൂടെയോ മറ്റ് മാർഗങ്ങളിലൂടെയോ പൈറേറ്റഡ് ലിങ്കുകളോ കോപ്പികളോ പ്രചരിപ്പിക്കുന്നവർ.
• പൈറേറ്റഡ് DVD, VCD അല്ലെങ്കിൽ മറ്റ് ഡിജിറ്റൽ, ഭൗതിക പകർപ്പുകൾ നിർമ്മിക്കുകയോ വിൽക്കുകയോ വിതരണം ചെയ്യുകയോ ചെയ്യുന്നവർ.

ലംഘനം കണ്ടെത്തുന്ന മുറയ്ക്ക് തന്നെ, പ്രത്യേക കോടതി ഉത്തരവുകൾ വാങ്ങേണ്ടതില്ലാതെ പൈറേറ്റഡ് വെബ്സൈറ്റുകൾ, ലിങ്കുകൾ, മറ്റ് ഉള്ളടക്കങ്ങൾ എന്നിവ ബ്ലോക്ക് ചെയ്യുന്നതിനും നീക്കം ചെയ്യുന്നതിനും ഇന്റർനെറ്റ് സേവനദാതാക്കൾക്കും ബന്ധപ്പെട്ട അധികാരികൾക്കും ആവശ്യമായ നടപടി സ്വീകരിക്കാൻ ഈ ഉത്തരവ് നിർമ്മാതാക്കൾക്ക് അധികാരം നൽകുന്നുണ്ട്.

സിനിമാറ്റോഗ്രാഫ് ആക്ട്, 1952 (ഭേദഗതി ചെയ്ത പ്രകാരം), കോപ്പിറൈറ്റ് ആക്ട്, 1957, ഇൻഫർമേഷൻ ടെക്നോളജി ആക്ട്, 2000 എന്നിവ പ്രകാരം സിനിമയുടെ പൈറസി, അനധികൃത ചിത്രീകരണം, പ്രക്ഷേപണം, വിതരണം എന്നിവ ഗുരുതരമായ കുറ്റകൃത്യങ്ങളാണ്. ഇത്തരം കുറ്റകൃത്യങ്ങളിൽ ഏർപ്പെടുന്നവർക്ക് തടവും കനത്ത പിഴയും നഷ്ടപരിഹാരവും ഉൾപ്പെടെയുള്ള സിവിൽ, ക്രിമിനൽ നിയമനടപടികൾ നേരിടേണ്ടിവരും.

‘ഐ നോബഡി’ സിനിമയുടെ ഏതെങ്കിലും പൈറേറ്റഡ് അല്ലെങ്കിൽ അനധികൃത പതിപ്പ് റെക്കോർഡ് ചെയ്യുകയോ അപ്‌ലോഡ് ചെയ്യുകയോ ഹോസ്റ്റ് ചെയ്യുകയോ പങ്കുവെക്കുകയോ വിതരണം ചെയ്യുകയോ ചെയ്യുന്ന ഏതൊരു വ്യക്തിക്കെതിരെയും, ഗ്രൂപ്പുകൾക്കെതിരെയും, വെബ്സൈറ്റുകൾക്കും ആപ്പുകൾക്കും മറ്റ് സേവനദാതാക്കൾക്കുമെതിരെയും യാതൊരു വിട്ടുവീഴ്ചയും കൂടാതെ ശക്തമായ നിയമനടപടികൾ സ്വീകരിക്കുമെന്ന് ചിത്രത്തിന്റെ നിർമ്മാതാക്കൾ അറിയിച്ചു.

ചിത്രവുമായി ബന്ധപ്പെട്ട പൈറസി ശ്രദ്ധയിൽപ്പെടുന്ന സാഹചര്യത്തിൽ പൊതുജനങ്ങളും, തിയേറ്റർ ഉടമകളും, സിനിമാ മേഖലയിലെ സംഘടനകളും, ഡിജിറ്റൽ പ്ലാറ്റ്ഫോമുകളും ബന്ധപ്പെട്ട വിവരങ്ങൾ ഉടൻ തന്നെ നിർമ്മാതാക്കളെയോ അധികാരികളെയോ അറിയിച്ച് സഹകരിക്കണമെന്നും നിർമ്മാതാക്കൾ അഭ്യർഥിച്ചു.

താൻ വർഷങ്ങളായി നേരിട്ടുകൊണ്ടിരിക്കുന്ന കടുത്ത ശാരീരിക വേദനകളെക്കുറിച്ചും അവഗണനകളെക്കുറിച്ചും തുറന്നുപറഞ്ഞ് നടി അനശ്വര രാജന്റെ സഹോദരിയും സോഷ്യൽ മീഡിയ ഇൻഫ്ലുവൻസറുമായ ഐശ്വര്യ രാജൻ. കൗമാരപ്രായത്തിൽ തുടങ്ങിയ ഡിസ്ക് സംബന്ധമായ പ്രശ്നങ്ങൾ ഇപ്പോൾ ‘ഫൈബ്രോമയാൾജിയ’ (Fibromyalgia) എന്ന കടുത്ത വേദന നൽകുന്ന അവസ്ഥയിൽ എത്തിനിൽക്കുകയാണെന്ന് ഐശ്വര്യ വെളിപ്പെടുത്തി.

16-ാം വയസ്സിൽ ഉണ്ടായ സങ്കീർണ്ണമായ അപ്പെൻഡിസൈറ്റിസ് സർജറിയോടെയാണ് ഐശ്വര്യയുടെ ആരോഗ്യപ്രശ്നങ്ങൾ തുടങ്ങുന്നത്. തുടർന്ന് ഇരുപതാം വയസ്സിൽ കടുത്ത ഡിസ്ക് പ്രൊലാപ്സ് ബാധിച്ചു. “ഡിഗ്രി ഫൈനൽ ഇയർ സമയത്ത് എനിക്ക് 30 മിനിറ്റിൽ കൂടുതൽ ഇരിക്കാൻ പറ്റില്ലായിരുന്നു. നിന്നു കൊണ്ടാണ് ക്ലാസിൽ പങ്കെടുത്തതും പരീക്ഷ എഴുതിയതുമെല്ലാം,” ഐശ്വര്യ പറഞ്ഞു. ലക്ഷങ്ങൾ ചിലവഴിച്ചുള്ള ആയുർവേദ ചികിത്സകളും ഫിസിയോതെറാപ്പിയുമെല്ലാം പരാജയപ്പെടുകയാണുണ്ടായത്.

നിലവിൽ 28 വയസ്സുള്ള ഐശ്വര്യ ഫൈബ്രോമയാൾജിയ എന്ന അവസ്ഥയിലൂടെയാണ് കടന്നുപോകുന്നത്. ശരീരത്തിലെ കോശങ്ങൾക്കെല്ലാം കടുത്ത വേദന നൽകുന്ന അവസ്ഥയാണിത്. ചുണ്ടും ചെവിയും ഒഴികെ ശരീരത്തിൽ എവിടെ തൊട്ടാലും അതിശക്തമായ വേദനയാണ് അനുഭവപ്പെടുന്നത്. പെയിൻ കില്ലറുകൾ പോലും ഇതിന് ആശ്വാസം നൽകുന്നില്ല.

ഈ രോഗാവസ്ഥ തന്റെ പ്രണയബന്ധത്തെപ്പോലും ബാധിച്ചതായി ഐശ്വര്യ തുറന്നുപറഞ്ഞു. “പ്രസവിക്കാൻ പറ്റുമോ എന്നൊക്കെയുള്ള ചോദ്യങ്ങൾ വന്നു. ഗർഭിണിയാകുക എന്നതാണല്ലോ ഒരു പെർഫെക്ട് വുമൺ എന്ന രീതിയിൽ സമൂഹം കാണുന്നത്. അത്തരം ചോദ്യങ്ങൾ കാരണം എനിക്ക് പ്രണയബന്ധം വരെ നഷ്ടമായി. ‘നടുവേദനയുള്ള കുട്ടി’ എന്ന ഐഡന്റിറ്റി എന്നെ വല്ലാതെ വേദനിപ്പിച്ചു. ആരുടെയും സിംപതിക്ക് വേണ്ടിയല്ല ഇതൊന്നും പറയുന്നത്, ഞാൻ ഇപ്പോൾ ഒരു ഹീലിങ് ഘട്ടത്തിലാണ്,” ഐശ്വര്യ വ്യക്തമാക്കി.

Actress Anaswara Rajan’s sister Aishwarya opens up about her painful battle with Fibromyalgia

സോഷ്യൽ മീഡിയയിൽ രേണു സുധിയും കിച്ചുവും തമ്മിലുള്ള തർക്കം മുറുകുന്നതിനിടെ, രേണുവിന് ശക്തമായ ഉപദേശവുമായി എത്തിയിരിക്കുകയാണ് പ്രശസ്ത യൂട്യൂബർ ഹെലൻ ഓഫ് സ്പാർട്ട (ധന്യ). മാനസിക സമാധാനത്തിനും രോഗമുക്തിക്കും വേണ്ടി രേണു സോഷ്യൽ മീഡിയയിൽ നിന്ന് പൂർണ്ണമായി മാറിനിൽക്കണമെന്ന് ഹെലൻ നിർദ്ദേശിച്ചു.

കിച്ചു പങ്കുവെച്ച വീഡിയോയ്ക്ക് പിന്നാലെ രേണു ആക്രോശത്തോടെ മറുപടി നൽകിയതോടെയാണ് ഈ വിഷയം വലിയ ചർച്ചയായത്. ഇതിൽ കിച്ചുവിന്റെ നിലപാടിനെ പിന്തുണച്ചുകൊണ്ടാണ് ഹെലൻ രംഗത്തെത്തിയത്. കിച്ചുവിനെ സ്വന്തം മകനായിട്ടാണ് കാണുന്നതെന്ന് രേണു പറയുമ്പോഴും അവരുടെ പ്രതികരണ രീതിയെ ഹെലൻ വിമർശിച്ചു. “എനിക്കും നിനക്കും അറിയാവുന്ന ഒരുപാട് കാര്യങ്ങളുണ്ട്, എന്നെക്കൊണ്ട് അത് പറയിപ്പിക്കരുത് എന്ന് ഏത് അമ്മയാണ് മകനോട് പറയുക? ഒരമ്മയും അങ്ങനെ പറയില്ല ചേച്ചി,” ഹെലൻ വ്യക്തമാക്കി.

സബ്സ്ക്രിപ്ഷൻ പ്ലാറ്റ്‌ഫോമുകളിലൂടെ ശരീരം പ്രദർശിപ്പിച്ചാൽ വലിയ രീതിയിൽ പണവും സബ്‌സ്‌ക്രൈബേഴ്‌സിനെയും ലഭിക്കുമെങ്കിലും, അത് നൽകുന്ന മാനസിക സമ്മർദ്ദം ചെറുതല്ലെന്ന് ഹെലൻ ഓർമ്മിപ്പിച്ചു. വൈകൃതമുള്ളവരുടെ കമന്റുകൾ മനുഷ്യനെ തളർത്തുമെന്നും അവർ കൂട്ടിച്ചേർത്തു.

“സോഷ്യൽ മീഡിയയേക്കാൾ നശിച്ച ഒരു ലോകം ഈ ദുനിയാവിലില്ല. എല്ലാ കുടുംബത്തിലും പ്രശ്നങ്ങളുണ്ടാകും, അതൊക്കെ വന്ന് സോഷ്യൽ മീഡിയയിൽ തുപ്പിക്കഴിഞ്ഞാൽ പിന്നെ എങ്ങനെ ജീവിക്കും? അങ്ങോട്ടും ഇങ്ങോട്ടും ചെളിവാരി എറിഞ്ഞാൽ മാനസിക സംഘർഷം കൂടുമെന്നതല്ലാതെ വേറൊന്നും കിട്ടില്ല. ചികിത്സയുമായി മുന്നോട്ട് പോയി എത്രയും വേഗം സുഖം പ്രാപിക്കാൻ സോഷ്യൽ മീഡിയയിൽ നിന്നും ഒരു ബ്രേക്ക് എടുക്കൂ,” ഹെലൻ രേണുവിനോട് ആവശ്യപ്പെട്ടു.

YouTuber Helen of Sparta Advises Renu Sudhi Amid Controversy with Kichu Sudhi

മലയാള സിനിമാ ലോകത്തിന് അഭിമാനമായി മാറിയ പരീക്ഷണാത്മക ചിത്രം ‘റോട്ടൻ സൊസൈറ്റി’ (Rotten Society) ആഗോളതലത്തിൽ അപൂർവ്വ നേട്ടങ്ങൾ കൈവരിച്ച് മുന്നേറുന്നു. ലോകമെമ്പാടുമുള്ള വിവിധ അന്താരാഷ്ട്ര ചലച്ചിത്ര മേളകളിൽ പ്രദർശിപ്പിച്ച്, ഏറ്റവും കൂടുതൽ പുരസ്കാരങ്ങൾ (150 അവാർഡുകൾ ) കരസ്ഥമാക്കുന്ന ‘ഫൗണ്ട് ഫൂട്ടേജ്’ (Found Footage) ഫീച്ചർ ഫിലിം എന്ന റെക്കോർഡോടെ ചിത്രം അമേരിക്ക ബുക്ക് ഓഫ് റെക്കോർഡ്സിൽ (America Book of Records) ഇടം നേടിയിരിക്കുകയാണ്. ഈ ചരിത്ര നേട്ടത്തിന് പിന്നാലെ, ചിത്രം പ്രമുഖ അമേരിക്കൻ ഒടിടി വിതരണ കമ്പനിയായ പി ഓ വി ഹൊറർ (POV Horror) വഴി 2026 ജൂലൈ 19-ന് ഔദ്യോഗികമായി റിലീസ് ചെയ്യും. എസ്.എസ്. ജിഷ്ണു ദേവ് (S.S. Jishnu Dev) രചനയും സംവിധാനവും നിർവ്വഹിച്ച ‘റോട്ടൻ സൊസൈറ്റി’ ഒരു സോഷ്യൽ സറ്റയർ-ത്രില്ലർ വിഭാഗത്തിൽപ്പെടുന്ന ചിത്രമാണ്.

വരാഹ ഫിലിംസിന്റെ ബാനറിൽ ജിനു സെലിൻ, സ്നേഹൽ റാവു എന്നിവർ നിർമ്മിച്ച ഈ സിനിമയിൽ ടി. സുനിൽ പുന്നക്കാട്, പ്രിൻസ് ജോൺസൺ, സ്നേഹൽ റാവു, ആരാധ്യ, മാനസപ്രഭു, ഗൗതം എസ് കുമാർ, ജിനു സെലിൻ , അഭിഷേക് ശ്രീകുമാർ , ആറ്റുകാൽ രമേശ് , ശിവപ്രസാദ് ജി , സുരേഷ് കുമാർ, ശിവൻ പുന്നക്കാട്, ചാല കുമാർ , അനിൽ കുമാർ, അമൃത് സുനിൽ , ജയചന്ദ്രൻ തലയൽ, ഷാജി ബാലരാമപുരം, വിപിൻ സിദ്ധാർഥ് , വിപിൻ ശ്രീഹരി എന്നിവർ പ്രധാന വേഷങ്ങളിൽ എത്തുന്നു.

ചിത്രത്തിന്റെ പേര് സൂചിപ്പിക്കുന്നത് പോലെ തന്നെ ‘റോട്ടൻ സൊസൈറ്റി’ (Rotten Society) എന്ന സിനിമയുടെ ആഖ്യാന ശൈലി (Narrative Style) തികച്ചും പരീക്ഷണാത്മകവും മലയാള സിനിമയിൽ അധികം കണ്ടിട്ടില്ലാത്തതുമാണ്. കാണാതാകുന്ന ഒരു വാർത്താ റിപ്പോർട്ടറെയും അയാളുടെ ഡിജിറ്റൽ ക്യാമറയെയും ചുറ്റിപ്പറ്റിയാണ് കഥ പുരോഗമിക്കുന്നത്. രാഷ്ട്രീയ ഗൂഢാലോചനകളും ഒരു കൊലപാതകവും റെക്കോർഡ് ചെയ്യപ്പെട്ട ഈ ക്യാമറ ഒരു ഭ്രാന്തന്റെ കൈകളിൽ അകപ്പെടുന്നതും, തുടർന്ന് സമൂഹത്തിലെ വിചിത്രമായ യാഥാർത്ഥ്യങ്ങൾ അയാൾ അതിലൂടെ പകർത്തുന്നതുമാണ് സിനിമയുടെ ഇതിവൃത്തം. രാഷ്ട്രീയ ഗൂഢാലോചനകൾ, ഒരു കൊലപാതകത്തിന്റെ രഹസ്യങ്ങൾ, അധികാര വർഗ്ഗത്തിന്റെ അഴിമതി എന്നിവയെല്ലാം ഈ ഭ്രാന്തൻ കഥാപാത്രത്തിന്റെ ക്യാമറക്കണ്ണിലൂടെയാണ് പ്രേക്ഷകർ കാണുന്നത്. അഴിമതി നിറഞ്ഞ വ്യവസ്ഥിതിയെയും രാഷ്ട്രീയ നാടകങ്ങളെയും കടുത്ത വിമർശനത്തിന് വിധേയമാക്കുന്ന ഒരു സോഷ്യൽ സറ്റയറാണ് ചിത്രം. വലിയ ലൈറ്റിംഗ് സംവിധാനങ്ങളോ സിനിമാറ്റിക് ഗിമ്മിക്കുകളോ ഇല്ലാതെ തികച്ചും റോ (Raw) ആയാണ് ദൃശ്യങ്ങൾ ഒരുക്കിയിരിക്കുന്നത്. പശ്ചാത്തല സംഗീതത്തിന്റെ അതിപ്രസരമില്ലാതെ, ദൃശ്യങ്ങളിലെ സ്വാഭാവിക ശബ്ദങ്ങൾക്കാണ് ഇതിൽ പ്രാധാന്യം നൽകിയിരിക്കുന്നത്. സിനിമയുടെ സിനിമാറ്റോഗ്രാഫി , എഡിറ്റിംഗ് എന്നിവ കൈകാര്യം ചെയ്തിരിക്കുന്നത് സംവിധായകനായ എസ് എസ് ജിഷ്ണു ദേവ് തന്നെയാണ്. ഈ സിനിമയുടെ വിജയത്തിന്റെ നിർണായക ഘടകമായ സൗണ്ട് എഫക്ട്സ് ചെയ്തിരിക്കുന്നതു ഷാബു ആണ്. ഒപ്പം സൗണ്ട് ഡിസൈൻ മികച്ച രീതിയിൽ നിർവഹിച്ചിരിക്കുന്നത് ശ്രീ വിഷ്ണു ജെ എസ് ആണ്.

സിനിമയുടെ ഏറ്റവും വലിയ പ്രത്യേകത, ഇത് പൂർണ്ണമായും ഫൗണ്ട് ഫൂട്ടേജ് രീതിയിലാണ് ചിത്രീകരിച്ചിരിക്കുന്നത് എന്നതാണ്. കഥാപാത്രങ്ങൾ തന്നെ കൈകാര്യം ചെയ്യുന്ന ക്യാമറകളിൽ നിന്നോ അല്ലെങ്കിൽ യാദൃശ്ചികമായി കണ്ടെടുത്ത വീഡിയോ ക്ലിപ്പുകളിൽ നിന്നോ ഉള്ള ദൃശ്യങ്ങൾ കോർത്തിണക്കിയാണ് ഇത്തരം സിനിമകൾ നിർമ്മിക്കുന്നത്. റിയലിസ്റ്റിക് അനുഭവവും അതീവ ഉദ്വേഗവും (Suspense) പ്രേക്ഷകന് നൽകാൻ ഈ ശൈലിക്ക് കഴിയുന്നു. ഹോളിവുഡിൽ ഹൊറർ സിനിമകൾ ധാരാളമായി ഈ ശൈലി ഉപയോഗിച്ച് അവതരിപ്പിച്ചു കാണാറുണ്ട്. എന്നാൽ റോട്ടൻ സൊസൈറ്റി പോലുള്ള സറ്റയർ വിഭാഗത്തിലെ സിനിമകൾ വളരെ വിരളമാണ്. ഫിലിം ഫെസ്റ്റിവലുകളിൽ റോട്ടൻ സൊസൈറ്റി ശ്രെദ്ധേയമാകാനും കാരണം ഇത് തന്നെയാണ്. നെലസ് അക്കാഡമി അവാർഡ് (നൈജീരിയ ), ടോപ് ഇൻഡീ ഫിലിം അവാർഡ്‌സ് (ജപ്പാൻ ), വെഗാസ് മൂവി അവാർഡ്‌സ് ( യു എസ് എ ) , ന്യൂയോർക് ഒനിറോസ് ഫിലിം അവാർഡ്‌സ്, സെപ്‌സ്റ്റോൺ മൂവി അവാർഡ്‌സ് , പതിനൊന്നാമത് രാജസ്ഥാൻ ഇന്റർനാഷണൽ ഫിലിം ഫെസ്റ്റിവൽ,അഞ്ചാമത് മുംബൈ ഇൻഡീ ഫിലിം ഫെസ്റ്റിവൽ , മൈസൂർ ഇന്റർനാഷണൽ ഫിലിം ഫെസ്റ്റിവൽ , അഹമ്മദാബാദ് ഇന്റർനാഷണൽ ഫിലിം ഫെസ്റ്റിവൽ തുടങ്ങി 100 ലധികം ഫെസ്റ്റിവലുകളിൽ നിന്നാണ് 150 അവാർഡുകൾ നേടി റോട്ടൻ സൊസൈറ്റി ചരിത്രത്തിന്റെ ഭാഗമായി മാറിയത്. പുതുമയാർന്ന ദൃശ്യാവിഷ്കാരത്തിലൂടെയും മൂർച്ചയേറിയ സാമൂഹിക വിമർശനത്തിലൂടെയും രാജ്യാന്തര ജൂറിയുടെ പ്രശംസ പിടിച്ചുപറ്റാൻ യുകെ ഫിലിം റിവ്യു (UK Film Review) തുടങ്ങിയ പ്ലാറ്റ്‌ഫോമുകളിൽ നിന്ന് ചിത്രത്തിന് സാധിച്ചു.

‘റോട്ടൻ സൊസൈറ്റി’ (Rotten Society) എന്ന പരീക്ഷണാത്മക ചിത്രം അതിന്റെ റോ (Raw) ആയ ഫൗണ്ട് ഫൂട്ടേജ് ശൈലിക്കുള്ളിലും ശക്തമായ ദൃശ്യ രൂപകങ്ങളും (Visual Metaphors) ചലച്ചിത്ര കാവ്യഭാവങ്ങളും (Cinematic Poetry) ഒളിപ്പിച്ചുവെച്ചിട്ടുണ്ട്. സിനിമയിലെ ഏറ്റവും ശക്തമായ രൂപകം ഒരു കഥാപാത്രം ക്യാമറയെ ‘ജീസസ്’ എന്ന് വിളിക്കുന്നതാണ്.മനുഷ്യർക്ക് പരസ്പരം സത്യങ്ങൾ ഒളിച്ചുവെക്കാം, എന്നാൽ സർവ്വസാക്ഷിയായ ദൈവത്തിൽ നിന്ന് ഒന്നും മറയ്ക്കാനാവില്ല. ഇവിടെ ക്യാമറ സമൂഹത്തിലെ നന്മകളെയും രാഷ്ട്രീയക്കാരുടെ ക്രൂരമായ കൊലപാതകങ്ങളെയും ഒരേപോലെ ഒപ്പിയെടുക്കുന്ന സർവ്വസാക്ഷിയായ ദൈവമായി മാറുന്നു. ഇരുട്ടിലെ സത്യങ്ങളെ വെളിച്ചത്തുകൊണ്ടുവരുന്ന, ഒടുവിൽ കുറ്റവാളികളുടെ വിധി നിർണ്ണയിക്കാൻ പോകുന്ന ഒരു ആത്യന്തിക നീതിപീഠമായിട്ടാണ് ആ കഥാപാത്രം ഈ ഡിജിറ്റൽ ഉപകരണത്തെ ആരാധിക്കുന്നത്.സമൂഹത്തിലെ ഏറ്റവും വലിയ അഴിമതികളും കപടമുഖങ്ങളും ക്യാമറയിൽ പകർത്തി ലോകത്തിന് കാട്ടിക്കൊടുക്കുന്നത് ഒരു ഭ്രാന്തൻ കഥാപാത്രമാണ്.ബുദ്ധിയുള്ള മനുഷ്യർ സ്വാർത്ഥതയ്ക്കും അധികാരത്തിനും വേണ്ടി അന്ധരായി ജീവിക്കുമ്പോൾ, ഈ ഭ്രാന്തൻ ഒന്നിനെയും ഭയക്കാതെ സത്യത്തിന്റെ പ്രവാചകനായി മാറുന്നു എന്നത് വ്യവസ്ഥിതിക്ക് നേരെയുള്ള കനത്ത പരിഹാസമാണ്. ചത്തൊടുങ്ങുന്ന ജീവനുകളും അഴുകുന്ന വ്യവസ്ഥിതിയും സിനിമയുടെ പേരായ ‘റോട്ടൻ സൊസൈറ്റി’യെ ദൃശ്യപരമായിത്തന്നെ പ്രതിഫലിപ്പിക്കുന്നു. അധികാരമുള്ളവർ സാധാരണക്കാരനെ ചൂഷണം ചെയ്ത് ഇല്ലാതാക്കുന്നതിനെയാണ് ഈ അഴുകലിന്റെ ദൃശ്യങ്ങൾ ഓർമ്മിപ്പിക്കുന്നത്.

ഫൗണ്ട് ഫൂട്ടേജ് ചിത്രങ്ങൾക്കായി ആഗോളതലത്തിൽ ശ്രദ്ധേയരായ ‘പി ഓ വി ഹൊറർ’ പ്ലാറ്റ്‌ഫോമിലൂടെ ചിത്രം റിലീസ് ചെയ്യുന്നതോടെ, ലോകമെമ്പാടുമുള്ള സിനിമാ പ്രേമികളിലേക്ക് ഈ മലയാള പരീക്ഷണ ചിത്രം നേരിട്ടെത്തും. വലിയ താരനിരകളില്ലാതെ, ശക്തമായ പ്രമേയവും വേറിട്ട അവതരണ ശൈലിയും കൊണ്ട് അന്താരാഷ്ട്ര തലത്തിൽ മലയാളത്തിന്റെ പെരുമ ഉയർത്തിയ ‘റോട്ടൻ സൊസൈറ്റി’ക്കായി വലിയ പ്രതീക്ഷയോടെയാണ് സിനിമാ ലോകം കാത്തിരിക്കുന്നത്.മലയാള സിനിമ ഇന്ന് ആഗോളതലത്തിൽ ശ്രദ്ധിക്കപ്പെടുന്ന ഒന്നായി മാറിയിട്ടുണ്ടെങ്കിലും, പരീക്ഷണ ചിത്രങ്ങൾക്കും സ്വതന്ത്ര സിനിമകൾക്കും (Independent Cinema) ഇന്നും തിയേറ്ററുകളിലോ മുഖ്യധാര വിപണിയിലോ വലിയ പിന്തുണ ലഭിക്കാറില്ല. ഈയൊരു സാഹചര്യത്തിലാണ് ‘റോട്ടൻ സൊസൈറ്റി’യുടെ വിജയം പ്രസക്തമാകുന്നത്. ശക്തമായ ഒരു ആശയവും വ്യത്യസ്തമായ ആഖ്യാന ശൈലിയും ഉണ്ടെങ്കിൽ ലോകസിനിമയുടെ നെറുകയിൽ മലയാളത്തിന്റെ പതാക പാറിക്കാൻ കഴിയുമെന്ന് ഈ ചിത്രം തെളിയിക്കുന്നു.

ചിത്രത്തിന്റെ കോ പ്രൊഡ്യൂസർ -ഷൈൻ ഡാനിയേൽ, ജലതാ ഭാസ്കരൻ , പബ്ലിസിറ്റി ഡിസൈൻസ് -പ്രജിൻ ഡിസൈൻസ്, സ്റ്റുഡിയോ -ബ്രോഡ്ലാൻഡ് അറ്റ്മോസ്, പി ആർ ഓ -അജയ് തുണ്ടത്തിൽ.

സംഗീത് പ്രതാപ്, ഷറഫുദീൻ എന്നിവരെ കേന്ദ്ര കഥാപാത്രങ്ങളാക്കി നവാഗതനായ ശ്യാമിൻ ഗിരീഷ് ഒരുക്കുന്ന “ഇറ്റ്സ് എ മെഡിക്കൽ മിറക്കിൾ” എന്ന ചിത്രത്തിന്റെ മ്യൂസിക് അവകാശം സ്വന്തമാക്കി പ്രമുഖ സംഗീത/ഓഡിയോ ലേബൽ ആയ തിങ്ക് മ്യൂസിക്. ഡോക്ടർ പോൾസ് എന്റർടൈൻമെന്റ്, ഡ്രീം ബിഗ് ഫിലിംസ് എന്നിവയുടെ ബാനറിൽ ഡോക്ടർ പോൾ വർഗീസ്, സുജിത് ജെ നായർ എന്നിവർ ചേർന്നാണ് ചിത്രം നിർമ്മിക്കുന്നത്. അഖില ഭാർഗവൻ നായികാ വേഷം ചെയ്യുന്ന ചിത്രത്തിന്റെ കഥ, തിരക്കഥ, സംഭാഷണം എന്നിവ രചിച്ചത് നിലീൻ സാന്ദ്രയാണ്.

ഇപ്പൊൾ പോസ്റ്റ് പ്രൊഡക്ഷൻ സ്റ്റേജിൽ ഉള്ള ചിത്രത്തിൻ്റെ ഫസ്റ്റ് ലുക്ക് നേരത്തെ പുറത്ത് വരികയും മികച്ച പ്രേക്ഷക ശ്രദ്ധ നേടുകയും ചെയ്തിരുന്നു. ഏറെ കൗതുകമുണർത്തുന്നതും വ്യത്യസ്തവുമായ ലുക്കിലാണ് ഈ പോസ്റ്ററിൽ ഷറഫുദീൻ, സംഗീത് പ്രതാപ് എന്നിവരെ അവതരിപ്പിച്ചത്. ചിത്രത്തിന്റെ കഥയെ കുറിച്ചും കഥാപാത്രങ്ങളെ കുറിച്ചും പ്രേക്ഷകരിൽ ആകാംഷയും കൗതുകവും നിലനിർത്തിക്കൊണ്ടാണ് ചിത്രത്തിൻ്റെ അപ്ഡേറ്റുകൾ പുറത്ത് വിടുന്നത്.

സംഗീത് പ്രതാപ്, ഷറഫുദീൻ എന്നിവരുടെ കരിയറിലെ തീർത്തും വ്യത്യസ്തവും അവർ ഇതുവരെ ചെയ്യാത്ത തരത്തിലുള്ളതുമായ കഥാപാത്രങ്ങളെയാണ് ഇതിൽ അവതരിപ്പിക്കുന്നത് എന്നാണ് സൂചന. കൊടുങ്ങലൂരും പരിസര പ്രദേശങ്ങളിലും ആയി ചിത്രീകരണം തുടങ്ങിയ “ഇറ്റ്സ് എ മെഡിക്കൽ മിറക്കിൾ”, 55 ദിവസത്തോളം നീണ്ടു നിന്ന ചിത്രീകരണത്തിന് ശേഷം കൊച്ചിയിൽ ആണ് പൂർത്തിയായത്.

കോട്ടയം നസീർ, ആനന്ദ് മന്മഥൻ, കിരൺ പീതാംബരൻ, പാർവ്വതി ആർ കൃഷ്ണ തുടങ്ങി വലിയൊരു താരനിര ചിത്രത്തിൽ അണിനിരക്കുന്നുണ്ട്. ചിത്രത്തിൻ്റെ റിലീസ് സംബന്ധിച്ച വിവരങ്ങൾ വൈകാതെ തന്നെ പുറത്ത് വിടുമെന്നാണ് പ്രതീക്ഷിക്കുന്നത്. ചിത്രം വിതരണം ചെയ്യുന്നത് ഡ്രീം ബിഗ് ഫിലിംസ്.

ഛായാഗ്രഹണം – അഖിൽ സേവ്യർ, എഡിറ്റർ- രാകേഷ് ചെറുമഠം, സംഗീതം- മുജീബ് മജീദ്, സൗണ്ട് ഡിസൈൻ- നിക്സൺ ജോർജ്, മേക്കപ്പ്- റോണക്സ് സേവ്യർ, വസ്ത്രങ്ങൾ- ആരതി ഗോപാൽ, പ്രൊഡക്ഷൻ കൺട്രോളർ – മനോജ് പൂങ്കുന്നം, കലാസംവിധാനം- അപ്പുണ്ണി സാജൻ, ചീഫ് അസ്സോസിയേറ്റ് ഡയറക്ടർ- വിഷ്ണു ദേവ്, അജിത് ജോസ്, വി എഫ് എക്സ്- പിക്ടോറിയൽ വി എഫ് എക്സ്, മാർജ്ജാര വിഎഫ്എക്സ്, അസ്സോസിയേറ്റ് ഡയറക്ടർ-മുബീൻ റാഫി, പ്രോജക്ട് ഡിസൈനർ- അമൃത മോഹൻ,അസ്സോസിയേറ്റ് ക്യാമറാമാൻ- വിശോക് കളത്തിൽ, ഫിനാൻസ് കൺട്രോളർ- ബിബിൻ സേവ്യർ, സ്റ്റിൽസ്- സിനറ്റ് സേവ്യർ, അസിസ്റ്റന്റ് ഡിറക്ടർസ് – ആൽബിൻ ഷാജി, ഷഫീഖ്, ഡിസൈൻസ്- യെല്ലോ ടൂത്സ്, ഡിസ്ട്രിബൂഷൻ – ഡ്രീം ബിഗ് ഫിലിംസ്, ഡിജിറ്റൽ മാർക്കറ്റിങ് – ഒബ്‌സ്‌ക്യൂറ, പിആർഒ – ശബരി