കുട്ടികളിലെ ഈ അപകടസൂചനകൾ നിങ്ങൾ അവഗണിക്കുന്നുണ്ടോ? മാതാപിതാക്കൾ അറിഞ്ഞിരിക്കേണ്ട അടിയന്തര സാഹചര്യങ്ങൾ

കുട്ടികളിലെ ആരോഗ്യപ്രശ്നങ്ങൾ കൃത്യസമയത്ത് തിരിച്ചറിയുന്നതിലുണ്ടാകുന്ന താമസം ഗുരുതരമായ പ്രത്യാഘാതങ്ങൾക്കും മരണത്തിനും വരെ കാരണമായേക്കാമെന്ന് പഠനങ്ങൾ. ‘ദ ലാൻസെറ്റ് ചൈൽഡ് ആൻഡ് അഡോളസന്റ് ഹെൽത്ത്’ (The Lancet Child & Adolescent Health) നടത്തിയ പുതിയ പഠനത്തെ തുടർന്നാണ് മാതാപിതാക്കൾക്കായി ഈ മുന്നറിയിപ്പ് നൽകുന്നത്.

കുട്ടികളിലെ അടിയന്തര ചികിത്സ ആവശ്യമുള്ള ചില സാഹചര്യങ്ങളും അവയുടെ ലക്ഷണങ്ങളും താഴെ പറയുന്നവയാണ്:

1. കഠിനമായ നിർജ്ജലീകരണം (Severe Dehydration): വയറിളക്കവും ഛർദ്ദിയും കുട്ടികളിൽ വേഗത്തിൽ നിർജ്ജലീകരണം ഉണ്ടാക്കാം. അമിതമായ ക്ഷീണം, വായ വറ്റിവരളുക, കുഴിഞ്ഞ കണ്ണുകൾ, മൂത്രത്തിന്റെ അളവ് കുറയുക എന്നിവയാണ് പ്രധാന ലക്ഷണങ്ങൾ. ഇത് രക്തസമ്മർദ്ദം കുറയാനും വൃക്കരോഗങ്ങൾക്കും കാരണമായേക്കാം.

2. ആസ്ത്മയും ശ്വസനതടസ്സവും: കുട്ടി ശ്വാസമെടുക്കാൻ ബുദ്ധിമുട്ടുകയോ, ശ്വാസം മുട്ടുമ്പോൾ ശബ്ദം (Wheezing) കേൾക്കുകയോ ചെയ്യുന്നുണ്ടെങ്കിൽ ഉടൻ വൈദ്യസഹായം തേടണം. ചികിത്സ വൈകുന്നത് ശ്വാസകോശത്തിന്റെ പ്രവർത്തനത്തെ ബാധിച്ചേക്കാം.

3. പനിയും അപസ്മാരവും (Febrile Seizures): കുട്ടികളിൽ പനി പെട്ടെന്ന് കൂടുമ്പോൾ അപസ്മാരം (കോച്ചി വലിവ്) വരാൻ സാധ്യതയുണ്ട്. ശരീരം വിറയ്ക്കുകയോ കണ്ണുകൾ മുകളിലേക്ക് തിരിയുകയോ ബോധക്ഷയം ഉണ്ടാവുകയോ ചെയ്താൽ ഇത് ഗൗരവമായി കാണണം.

4. കടുത്ത അലർജി (Anaphylaxis): ഭക്ഷണം, മരുന്നുകൾ അല്ലെങ്കിൽ ഷഡ്പദങ്ങളുടെ കുത്ത് എന്നിവയിലൂടെ അലർജി ഉണ്ടാകാം. കണ്ണുകൾക്കും ചുണ്ടിനും ചുറ്റുമുള്ള വീക്കം, ശ്വാസതടസ്സം, ശരീരം ചുവന്നു തടിക്കുക എന്നിവ കണ്ടാൽ അടിയന്തര ചികിത്സ നൽകണം.

5. തലയ്ക്കേൽക്കുന്ന പരിക്കുകൾ: വീഴ്ചകൾക്ക് ശേഷം കുട്ടി തുടർച്ചയായി ഛർദ്ദിക്കുകയോ, അമിതമായി മയങ്ങുകയോ, അസാധാരണമായി പെരുമാറുകയോ ചെയ്താൽ അത് തലച്ചോറിലെ ആന്തരിക രക്തസ്രാവത്തിന്റെ ലക്ഷണമാകാം.

വിദഗ്ധരുടെ അഭിപ്രായം: കുട്ടികൾക്ക് അവരുടെ അസ്വസ്ഥതകൾ കൃത്യമായി പറയാൻ കഴിയാത്ത സാഹചര്യങ്ങളിൽ മാതാപിതാക്കളുടെ നിരീക്ഷണം നിർണ്ണായകമാണെന്ന് ശിശുരോഗ വിദഗ്ധനായ ഡോ. ശതദീപ ഗോസ്വാമി പറയുന്നു. ലക്ഷണങ്ങൾ കണ്ടാലുടൻ സ്വയം ചികിത്സ ഒഴിവാക്കി ഡോക്ടറെ സമീപിക്കുന്നത് കുട്ടിയുടെ ജീവൻ രക്ഷിക്കാൻ സഹായിക്കും.

child health new research