“ആ എളിമ ഒരിക്കലും മറക്കില്ല”..ഗായിക ആശാ ഭോസ്‌ലേയുടെ വിയോഗത്തിൽ അനുശോചനം രേഖപ്പെടുത്തി മുൻ ഓസ്‌ട്രേലിയൻ ക്രിക്കറ്റ് താരം ബ്രെറ്റ് ലീ

പ്രശസ്ത ഗായിക ആശാ ഭോസ്‌ലേയുടെ വിയോഗത്തിൽ അനുശോചനം രേഖപ്പെടുത്തി മുൻ ഓസ്‌ട്രേലിയൻ ക്രിക്കറ്റ് താരം ബ്രെറ്റ് ലീ. സോഷ്യൽ മീഡിയയിൽ പങ്കുവെച്ച വികാരാധീനമായ കുറിപ്പിലൂടെയാണ് താരം തന്റെ പ്രിയപ്പെട്ട ‘ആശാ തായ്‌’ക്കൊപ്പമുള്ള ഓർമ്മകൾ പുതുക്കിയത്.

2006-ൽ ആശാ ഭോസ്‌ലേയ്‌ക്കൊപ്പം ‘യൂ ആർ ദ വൺ ഫോർ മി’ (You’re the One for Me) എന്ന ഗാനം എഴുതാനും അത് റെക്കോർഡ് ചെയ്യാനും സാധിച്ചതിനെ തന്റെ ജീവിതത്തിലെ വലിയ ഭാഗ്യമായി ബ്രെറ്റ് ലീ വിശേഷിപ്പിച്ചു.

“അവരുടെ അസാധാരണമായ പ്രതിഭ മാത്രമല്ല, അവരുടെ ദയയും വിനയവുമാണ് എന്റെ ഉള്ളിൽ എന്നും നിറഞ്ഞുനിൽക്കുന്നത്. ജീവിതത്തിൽ ഇത്രയേറെ നേട്ടങ്ങൾ സ്വന്തമാക്കിയിട്ടും, മറ്റുള്ളവരോട് ഇത്രയധികം സ്നേഹത്തോടും മാന്യതയോടും കൂടി പെരുമാറാൻ അവർക്ക് സാധിച്ചു. ആ പ്രത്യേക വ്യക്തിത്വത്തോടൊപ്പം അല്പസമയം ചെലവഴിക്കാൻ കഴിഞ്ഞത് വലിയൊരു ഭാഗ്യമായി ഞാൻ കരുതുന്നു,” ബ്രെറ്റ് ലീ കുറിച്ചു.

അവരുടെ സംഗീത പൈതൃകം വരും തലമുറകളിലും നിലനിൽക്കുമെന്നതിൽ സംശയമില്ലെന്നും, കുടുംബത്തിന്റെയും സുഹൃത്തുക്കളുടെയും ദുഃഖത്തിൽ പങ്കുചേരുന്നതായും അദ്ദേഹം കൂട്ടിച്ചേർത്തു. ക്രിക്കറ്റ് ലോകവും സംഗീത ലോകവും തമ്മിലുള്ള മനോഹരമായ ഒരു സൗഹൃദത്തിന്റെ അടയാളമായിരുന്നു ബ്രെറ്റ് ലീയും ആശാ ഭോസ്‌ലേയും ഒന്നിച്ച ആ ഗാനം.

Brett Lee Pens Emotional Tribute to the Late Asha Bhosle