കാഠ്മണ്ഡു: നേപ്പാളിൽ തിബറ്റ് അതിർത്തിയോട് ചേർന്നുള്ള കേന്ദ്ര ജില്ലകളിലുണ്ടായ ശക്തമായ മിന്നൽപ്രളയത്തിലും മലവെള്ളപ്പാച്ചിലിലും വ്യാപക നാശനഷ്ടം. ദുരന്തത്തിൽ 157 പേർ മരണപ്പെടുകയും 500-ഓളം പേരെ കാണാതാവുകയും ചെയ്തതായി ഭരണകൂടം സ്ഥിരീകരിച്ചു. കാണാതായവരിൽ കൈലാസ് മാനസസരോവർ തീർത്ഥാടനത്തിനെത്തിയ 133 ഇന്ത്യൻ പൗരന്മാരും ഉൾപ്പെടുന്നു.
ഭോട്ടെ കോശി, തൃശൂലി നദികൾ കരകവിഞ്ഞൊഴുകിയതിനെ തുടർന്ന് രസുവ, ധാഡിങ്, നുവാകോട്ട്, ചിത്വാൻ എന്നീ ജില്ലകളിലാണ് പ്രളയം വൻ നാശം വിതച്ചത്. ജനവാസ മേഖലകളിലേക്ക് വെള്ളവും ചെളിയും ഇരച്ചുകയറി നിരവധി വീടുകളും പാലങ്ങളും ഒലിച്ചുപോയി. കൂടാതെ മേഖലയിലെ പത്തിലധികം ജലവൈദ്യുത പദ്ധതികൾക്കും കേടുപാടുകൾ സംഭവിച്ചിട്ടുണ്ട്.
ദുരന്തമേഖലകളിൽ നേപ്പാൾ സൈന്യത്തിന്റെയും പൊലീസിന്റെയും നേതൃത്വത്തിൽ ഊർജ്ജിതമായ തിരച്ചിൽ പുരോഗമിക്കുകയാണ്. രക്ഷാപ്രവർത്തനങ്ങൾക്കായി 12 ഹെലികോപ്റ്ററുകൾ സൈന്യം രംഗത്തിറക്കിയിട്ടുണ്ട്. പരിക്കേറ്റവർക്ക് അടിയന്തര വൈദ്യസഹായം നൽകുന്നതിനായി തൃശൂലിയിൽ സൈനിക മെഡിക്കൽ ക്യാമ്പും ആരംഭിച്ചു.
പ്രതിസന്ധി ഘട്ടത്തിൽ നേപ്പാളിന് പിന്തുണയുമായി ഇന്ത്യ രംഗത്തെത്തി. ഇന്ത്യൻ പ്രധാനമന്ത്രി നരേന്ദ്ര മോദി നേപ്പാൾ പ്രധാനമന്ത്രി ബാലേന്ദ്ര ഷായുമായി ഫോണിൽ സംസാരിച്ച് എല്ലാവിധ സഹായങ്ങളും വാഗ്ദാനം ചെയ്തു. ഇതിന് പിന്നാലെ വ്യോമസേനയുടെ C-130J വിമാനത്തിൽ 10 ടൺ ദുരിതാശ്വാസ സാമഗ്രികളടങ്ങുന്ന ആദ്യഘട്ട സഹായം ഇന്ത്യ നേപ്പാളിലെത്തിച്ചു.
നേപ്പാളിലെ പ്രളയസാഹചര്യം കണക്കിലെടുത്ത് അതിർത്തി സംസ്ഥാനങ്ങളായ ഉത്തർപ്രദേശിലും ബീഹാറിലും കേന്ദ്ര ആഭ്യന്തര മന്ത്രാലയം ഉയർന്ന ജാഗ്രതാ നിർദ്ദേശം നൽകിയിട്ടുണ്ട്. എൻ.ഡി.ആർ.എഫിന്റെയും (NDRF) സശസ്ത്ര സീമാ ബലിന്റെയും (SSB) സംഘങ്ങളെ അതിർത്തി മേഖലകളിൽ ദുരിതാശ്വാസ പ്രവർത്തനങ്ങൾക്കായി വിന്യസിച്ചു.
ഹെൽപ്പ് ലൈൻ നമ്പറുകൾ: നേപ്പാളിൽ കുടുങ്ങിക്കിടക്കുന്ന ഇന്ത്യക്കാർക്കും അവരുടെ ബന്ധുക്കൾക്കുമായി കാഠ്മണ്ഡുവിലെ ഇന്ത്യൻ എംബസി അടിയന്തര ഹെൽപ്പ് ലൈൻ നമ്പറുകൾ പുറത്തിറക്കി:
- ഫോൺ: +977 985 131 6807 or +977 970 910 7500.
