തിരുവനന്തപുരം: സൈബർ തട്ടിപ്പുകളിൽ നിന്നും വാഹനാപകടങ്ങളിൽ നിന്നും ജനങ്ങൾക്ക് സംരക്ഷണം ഉറപ്പാക്കാൻ പുതിയ മൂന്ന് ഡിജിറ്റൽ സാങ്കേതിക പദ്ധതികൾ ആരംഭിച്ച് കേരള പോലീസ്. പോലീസ് ആസ്ഥാനത്ത് നടന്ന ചടങ്ങിൽ ആഭ്യന്തര, വിജിലൻസ് മന്ത്രി രമേശ് ചെന്നിത്തല പദ്ധതികൾ ഉദ്ഘാടനം ചെയ്തു.
സംസ്ഥാന പോലീസ് മേധാവി രവാഡ എ. ചന്ദ്രശേഖർ ഐ.പി.എസ്, സൈബർ ഓപ്പറേഷൻസ് എ.ഡി.ജി.പി പി. വിജയൻ ഐ.പി.എസ് തുടങ്ങിയ ഉന്നത പോലീസ് ഉദ്യോഗസ്ഥർ ചടങ്ങിൽ പങ്കെടുത്തു.
- സൈബർവാൾ (CyberWall): സൈബർ ഓപ്പറേഷൻസ് എസ്.പി അങ്കിത് അശോകൻ ഐ.പി.എസിന്റെ മേൽനോട്ടത്തിൽ വികസിപ്പിച്ച എ.ഐ അധിഷ്ഠിത ഡിജിറ്റൽ സുരക്ഷാ പ്ലാറ്റ്ഫോം. തട്ടിപ്പ് ഫോൺ കോളുകൾ, എസ്.എം.എസുകൾ, ലിങ്കുകൾ, ബാങ്ക് അക്കൗണ്ടുകൾ, യു.ആർ.എല്ലുകൾ എന്നിവ ജനങ്ങൾക്ക് മുൻകൂട്ടി പരിശോധിക്കാം. STOP – CHECK – VERIFY – ACT എന്ന തത്വമാണ് സൈബർവാൾ മുന്നോട്ട് വെക്കുന്നത്.
- AI-TRACK (അപകട പ്രവചന സംവിധാനം): മുൻകാല അപകട വിവരങ്ങളും ട്രാഫിക് ഡാറ്റയും നിർമ്മിത ബുദ്ധി ഉപയോഗിച്ച് വിശകലനം ചെയ്ത് അപകട സാധ്യതയുള്ള സ്ഥലങ്ങളും സമയങ്ങളും മുൻകൂട്ടി പ്രവചിച്ച് മുൻകരുതൽ ഉറപ്പാക്കുന്ന സംവിധാനം.
- iCoPS ബീറ്റ് & പട്രോൾ മോഡ്യൂൾ: പോലീസ് പട്രോളിംഗും ഫീൽഡ് ഡ്യൂട്ടികളും തത്സമയം നിരീക്ഷിക്കാനും, റേഞ്ച് കുറഞ്ഞ സ്ഥലങ്ങളിൽ ഓഫ്ലൈനായി വിവരങ്ങൾ ശേഖരിക്കാനും സഹായിക്കുന്ന ഡിജിറ്റൽ പ്ലാറ്റ്ഫോം.
കേരള പോലീസിന്റെ POLapp, വാട്ട്സ്ആപ്പ് ബോട്ട്, ടെലഗ്രാം ബോട്ട്, വെബ് പോർട്ടൽ എന്നിവ വഴി സൈബർവാൾ സേവനം പൊതുജനങ്ങൾക്ക് ഉപയോഗിക്കാം
