വാൽപാറയിലേക്ക് ഇ-പാസ് നിർബന്ധം; നവംബർ 1 മുതൽ നിയമം പ്രാബല്യത്തിൽ

ആനമലൈ കടുവ സങ്കേതത്തിലെ പ്രശസ്തമായ മലയോര വിനോദസഞ്ചാര കേന്ദ്രമായ വാൽപാറയിലേക്ക് പ്രവേശിക്കുന്ന എല്ലാ സന്ദർശകർക്കും 2025 നവംബർ 1 മുതൽ ഇ-പാസ് നിർബന്ധമാക്കി. പരിസ്ഥിതിലോല പ്രദേശത്തേക്കുള്ള സഞ്ചാരികളുടെ പ്രവേശനം നിയന്ത്രിക്കുന്നതിനായി മദ്രാസ് ഹൈക്കോടതിയുടെ നിർദ്ദേശപ്രകാരമാണ് ഈ നിയമം നടപ്പിലാക്കുന്നത്.

യാത്രക്കാർക്ക് ഔദ്യോഗിക വെബ്സൈറ്റായ www.tnepass.tn.gov.in/home വഴി ഇ-പാസിനായി രജിസ്റ്റർ ചെയ്യാം.

കേരളത്തിൽ നിന്ന് വാൽപാറയിലേക്ക് പ്രവേശിക്കുന്ന സഞ്ചാരികൾക്കായി കോയമ്പത്തൂർ ജില്ലാ അതിർത്തിയിലെ പ്രധാന ചെക്ക്പോസ്റ്റുകളിൽ രജിസ്ട്രേഷനും പരിശോധനാ സൗകര്യങ്ങളും ഏർപ്പെടുത്തിയിട്ടുണ്ട്:

1. ഷോളയാർ അണക്കെട്ടിന്റെ ഇടതു കരയിലെ ചെക്ക്പോസ്റ്റ് (മഴുക്കുപ്പാറ വഴി).
2. ആളിയാർ ചെക്ക്പോസ്റ്റ്.

ഈ കേന്ദ്രങ്ങളിൽ ഇ-പാസ് പരിശോധനയ്ക്കായി റവന്യു, തദ്ദേശ സ്വയംഭരണം, പോലീസ്, വനംവകുപ്പ് ഉദ്യോഗസ്ഥരെ നിയമിച്ചിട്ടുണ്ട്.

മറ്റ് പ്രധാന നിർദ്ദേശങ്ങൾ

സന്ദർശകർ പ്ലാസ്റ്റിക് വസ്തുക്കൾ കൊണ്ടുപോകുന്നതിനും ഉപയോഗിക്കുന്നതിനും കർശന വിലക്ക് ഏർപ്പെടുത്തിയിട്ടുണ്ടെന്നും, നിയമം ലംഘിച്ചാൽ വസ്തുക്കൾ പിടിച്ചെടുക്കുമെന്നും ജില്ലാ കളക്ടറേറ്റ് അറിയിച്ചു.

പ്രധാന ഇളവുകളും നിബന്ധനകളും:

• വാൽപാറ താലൂക്കിൽ രജിസ്റ്റർ ചെയ്ത വാഹനങ്ങൾ ഒരു തവണ മാത്രം ഇ-പാസിനായി രജിസ്റ്റർ ചെയ്താൽ മതി.
• സർക്കാർ ബസുകൾക്കും ഔദ്യോഗിക വാഹനങ്ങൾക്കും ഈ പുതിയ ഇ-പാസ് നിബന്ധനയിൽ ഇളവുണ്ട്.

നീലഗിരി ജില്ല, കൊടൈക്കനാൽ എന്നിവിടങ്ങളിൽ നിലവിലുള്ള ഇ-പാസ് നിബന്ധനകളുടെ തുടർച്ചയായാണ് ഈ നിയമം വാൽപാറയിലേക്കും വ്യാപിപ്പിക്കുന്നത്.