“ഞാൻ ഇടപെട്ടില്ലായിരുന്നെങ്കിൽ പാക് പ്രധാനമന്ത്രി കൊല്ലപ്പെടുമായിരുന്നു”; ഇന്ത്യ-പാക് യുദ്ധം ഒഴിവാക്കിയത് താനാണെന്ന് ഡൊണാൾഡ് ട്രംപ്

വാഷിംഗ്ടൺ: ഇന്ത്യയും പാകിസ്ഥാനും തമ്മിലുള്ള ആണവയുദ്ധം ഒഴിവാക്കിയത് തന്റെ ഇടപെടലാണെന്ന അവകാശവാദവുമായി അമേരിക്കൻ പ്രസിഡന്റ് ഡൊണാൾഡ് ട്രംപ്. തന്റെ ഇടപെടൽ ഉണ്ടായിരുന്നില്ലെങ്കിൽ പാകിസ്ഥാൻ പ്രധാനമന്ത്രി ഷെഹ്ബാസ് ഷെരീഫ് കൊല്ലപ്പെടുമായിരുന്നു എന്നും ട്രംപ് പറഞ്ഞു. അമേരിക്കൻ കോൺഗ്രസിനെ അഭിസംബോധന ചെയ്ത് സംസാരിക്കുന്ന ‘സ്റ്റേറ്റ് ഓഫ് ദി യൂണിയൻ’ (SOTU 2026) പ്രസംഗത്തിനിടെയായിരുന്നു ട്രംപിന്റെ ഈ വിവാദ പരാമർശം.

2025 മെയ് മാസത്തിൽ പഹൽഗാം ഭീകരാക്രമണത്തിന് പിന്നാലെ ഇരുരാജ്യങ്ങളും തമ്മിലുണ്ടായ സംഘർഷത്തെക്കുറിച്ചായിരുന്നു ട്രംപിന്റെ പരാമർശം. “ഇന്ത്യയും പാകിസ്ഥാനും ഒരു ആണവയുദ്ധത്തിന്റെ വക്കിലായിരുന്നു. ഏകദേശം 3.5 കോടി ജനങ്ങൾ കൊല്ലപ്പെടുമായിരുന്നു. ഞാൻ ഇടപെട്ടില്ലായിരുന്നെങ്കിൽ പാകിസ്ഥാൻ പ്രധാനമന്ത്രിയും കൊല്ലപ്പെടുമായിരുന്നു,” ട്രംപ് അവകാശപ്പെട്ടു.

തന്റെ ഭരണകൂടം സാമ്പത്തികവും വ്യാപാരപരവുമായ സമ്മർദ്ദം ചെലുത്തിയാണ് ഇരുരാജ്യങ്ങളെയും പിന്തിരിപ്പിച്ചതെന്ന് ട്രംപ് വ്യക്തമാക്കി. സംഘർഷം അവസാനിപ്പിച്ചില്ലെങ്കിൽ ഇരുരാജ്യങ്ങൾക്കുമേൽ 200 ശതമാനം താരിഫ് ഏർപ്പെടുത്തുമെന്നും വ്യാപാര കരാറുകൾ റദ്ദാക്കുമെന്നും താൻ മുന്നറിയിപ്പ് നൽകിയിരുന്നതായി അദ്ദേഹം പറഞ്ഞു.

2025 ഏപ്രിൽ 22-ന് പഹൽഗാമിലുണ്ടായ ഭീകരാക്രമണത്തിൽ 26 സാധാരണക്കാർ കൊല്ലപ്പെട്ടിരുന്നു. ഇതിന് മറുപടിയായി പാകിസ്ഥാനിലെ ഭീകരകേന്ദ്രങ്ങൾ ലക്ഷ്യമാക്കി ഇന്ത്യ ‘ഓപ്പറേഷൻ സിന്ദൂർ’ (Operation Sindoor) എന്ന പേരിൽ സൈനിക നടപടി സ്വീകരിച്ചു. ഇതേത്തുടർന്നാണ് മേഖലയിൽ യുദ്ധസമാനമായ സാഹചര്യം നിലവിൽ വന്നത്.

എന്നാൽ, ട്രംപിന്റെ ഈ അവകാശവാദങ്ങളോട് ഇന്ത്യൻ വിദേശകാര്യ മന്ത്രാലയമോ പാകിസ്ഥാനോ ഔദ്യോഗികമായി പ്രതികരിച്ചിട്ടില്ല. സൈനികമായ തീരുമാനങ്ങളും പിൻവാങ്ങലുകളും ഉഭയകക്ഷി ചർച്ചകളിലൂടെയാണ് നടന്നതെന്നാണ് ഇന്ത്യയുടെ നിലപാട്. താൻ അവസാനിപ്പിച്ച ‘എട്ട് യുദ്ധങ്ങളിൽ’ ഒന്നായാണ് ട്രംപ് ഇന്ത്യ-പാക് സംഘർഷത്തെ വിശേഷിപ്പിച്ചത്.