By admin 
പ്രശസ്ത ഗായികയും ബിഹാർ എംഎൽഎയുമായ മൈഥിലി താക്കൂറും സഹോദരൻ റിഷവ് താക്കൂറും തിരുവനന്തപുരം ശ്രീ പത്മനാഭ സ്വാമി ക്ഷേത്രത്തിൽ ദർശനം നടത്തി. ക്ഷേത്ര ദർശനത്തിന് ശേഷം റിഷവ് താക്കൂർ തന്റെ സോഷ്യൽ മീഡിയ പേജിൽ പങ്കുവെച്ച കുറിപ്പാണ് ഇപ്പോൾ മലയാളികളുടെ ഹൃദയം കവരുന്നത്.
അന്യസംസ്ഥാനക്കാരായിട്ടും, തികച്ചും മലയാളത്തിലാണ് അദ്ദേഹം ദർശനാനുഭവം ആരാധകരുമായി പങ്കുവെച്ചത് എന്നതാണ് ഏറ്റവും ശ്രദ്ധേയം. പത്മനാഭ സ്വാമിയോടുള്ള ഭക്തിയും കേരളത്തോടുള്ള സ്നേഹവും വ്യക്തമാക്കുന്നതാണ് പോസ്റ്റ്.
“കേരളം ഞങ്ങൾക്ക് ഒരു അത്യപൂർവ സമ്മാനം നൽകി — ഭഗവാൻ പദ്മനാഭ സ്വാമിയുടെ ദർശനം. ഭഗവാന്റെ മുന്നിൽ നിൽക്കുമ്പോൾ, മറ്റെല്ലാം മറന്നുപോകുന്നു. ചില അനുഗ്രഹങ്ങൾ നമ്മൾ എന്നും ഹൃദയത്തിൽ കൊണ്ടുനടക്കും. ” എന്നാണ് റിഷവ് താക്കൂർ സോഷ്യൽ മീഡിയയിൽ കുറിച്ചത്.
മലയാളികളല്ലാത്ത ഇവർ ശുദ്ധമായ മലയാളത്തിൽ തങ്ങളുടെ അനുഭവം പങ്കുവെച്ചത് സോഷ്യൽ മീഡിയയിൽ ഇതിനോടകം വലിയ രീതിയിൽ ശ്രദ്ധിക്കപ്പെട്ടിട്ടുണ്ട്. നിരവധി മലയാളികളാണ് പോസ്റ്റിന് താഴെ സന്തോഷവും സ്നേഹവും അറിയിച്ചുകൊണ്ട് കമന്റുകളുമായി എത്തുന്നത്. ഗായിക എന്ന നിലയിൽ രാജ്യത്തൊട്ടാകെ ആരാധകരുള്ള മൈഥിലി താക്കൂർ അടുത്തിടെയാണ് ബിഹാർ നിയമസഭയിലേക്ക് തിരഞ്ഞെടുക്കപ്പെട്ടത്.
Bihar MLA Maithili Thakur and Brother Visit Sree Padmanabhaswamy Temple viral malayalam post