By admin 
മലയാളികളുടെ പ്രിയപ്പെട്ട താരദമ്പതികളായ ഗോവിന്ദ് പത്മസൂര്യയും ഗോപിക അനിലും തങ്ങളുടെ പുതിയ അവധിക്കാല യാത്രയുടെ വിശേഷങ്ങൾ ആരാധകരുമായി പങ്കുവെച്ചിരിക്കുകയാണ്. ബോളിവുഡ് ബ്ലോക്ക്ബസ്റ്റർ ചിത്രം ‘കഹോ നാ പ്യാർ ഹെ’യിലൂടെ സിനിമാപ്രേമികൾക്ക് പ്രിയങ്കരമായ തായ്ലൻഡിലെ ‘ക്രാബി’യിലാണ് (Krabi) ഇരുവരും ഇപ്പോൾ ഉള്ളത്.
യാത്രകളെ ഏറെ സ്നേഹിക്കുന്നവരാണ് ജിപിയും ഗോപികയും. തെക്കൻ തായ്ലൻഡിലെ മനോഹരമായ കടൽത്തീരങ്ങൾക്കും ചുണ്ണാമ്പുകല്ല് പാറകൾക്കും പേരുകേട്ട വിനോദസഞ്ചാര കേന്ദ്രമായ ക്രാബിയിൽ നിന്നുള്ള മനോഹരമായ ചിത്രങ്ങളാണ് താരം സോഷ്യൽ മീഡിയയിൽ പങ്കുവെച്ചിരിക്കുന്നത്. സിനിമയെ സ്നേഹിക്കുന്നവർക്ക് എക്കാലത്തും ഓർമനിൽക്കുന്നതാണ് ഹൃതിക് റോഷൻ നായകനായ ചിത്രത്തിലെ ലൊക്കേഷനുകൾ.
“ഒടുവിൽ നമ്മളിവിടെ എത്തിയിരിക്കുന്നു… ‘കഹോ നാ പ്യാർ ഹേ’ എന്ന സിനിമയ്ക്ക് ജീവൻ തുടിച്ച അതേ മണ്ണിൽ! ഒരുപക്ഷേ നമ്മൾ കണ്ടുവളർന്ന സിനിമകളോടുള്ള ഇഷ്ടമായിരിക്കാം… അല്ലെങ്കിൽ കടൽ അതിന്റെ കഥകൾ പറഞ്ഞുതരുന്ന ആ ഒരു രീതിയായിരിക്കാം ഇതിന് കാരണം. ഫ്രാ നാംഗ് മുതൽ ടപ്പ് ഐലൻഡ് വരെ… ഞങ്ങൾ വെറുതെ ചിത്രങ്ങൾക്കായി പോസ് ചെയ്യുകയായിരുന്നില്ല, മറിച്ച് ആ ഫ്രെയിമിന്റെ തന്നെ ഒരു ഭാഗമായി മാറുകയായിരുന്നു,” എന്നാണ് ജിപി ചിത്രങ്ങൾക്കൊപ്പം കുറിച്ചത്.
‘അടയാളങ്ങൾ’ എന്ന ചിത്രത്തിലൂടെ സിനിമയിലെത്തിയ ജിപി പിന്നീട് ഡാഡികൂൾ, പ്രേതം 2, തെലുങ്ക് ചിത്രം ‘അല വൈകുണ്ഠപുരമുലു’ തുടങ്ങിയ ചിത്രങ്ങളിലൂടെയും ടെലിവിഷൻ അവതാരകൻ എന്ന നിലയിലും ശ്രദ്ധേയനായി. ബാലതാരമായി സിനിമയിലെത്തി പിന്നീട് ‘സാന്ത്വനം’ അടക്കമുള്ള ജനപ്രിയ സീരിയലുകളിലൂടെ മിനിസ്ക്രീൻ പ്രേക്ഷകരുടെ പ്രിയങ്കരിയായി മാറിയ താരമാണ് ആയുർവേദ ഡോക്ടർ കൂടിയായ ഗോപിക അനിൽ.
ക്രാബിയിലെ പ്രകൃതിരമണീയമായ സ്ഥലങ്ങളുടെ ഭംഗി ആസ്വദിക്കുന്ന ജിപിയുടെയും ഗോപികയുടെയും പോസ്റ്റ് ഇതിനോടകം തന്നെ ആരാധകർ ഏറ്റെടുത്തുകഴിഞ്ഞു. നിരവധി പേരാണ് യാത്രാചിത്രങ്ങൾക്ക് താഴെ കമന്റുകളുമായി എത്തുന്നത്.
Gp and gopika new travel post