നടി ജമീല മാലിക്ക് (73) അന്തരിച്ചു. പൂനെ ഫിലിം ഇന്സ്റ്റിറ്റ്യൂട്ടില് പഠിച്ച ആദ്യ മലയാളി വനിതയാണ് ജമീല. 1970-80 കാലഘട്ടത്തില് മലയാളം, തമിഴ് ഭാഷകളില് സജീവമായിരുന്നു ജമീല.
‘റാഗിംഗ്’ ആയിരുന്നു ആദ്യത്തെ സിനിമ. പാണ്ഡവപുരം, ആദ്യത്തെ കഥ, രാജഹംസം, ലഹരി തുടങ്ങി ഏതാനും ചിത്രങ്ങളില് നായികയായി. വിന്സെന്റ്, അടൂര് ഭാസി, പ്രേംനസീര്, രാഘവന് എന്നിവരോടൊത്ത് അഭിനയിച്ചിട്ടുണ്ട്.
ലക്ഷ്മി, അതിശയരാഗം എന്നീ തമിഴ് ചിത്രങ്ങളിലും നായികയായി. ‘നദിയെ തേടിവന്ന കടല്’ എന്ന സിനിമയില് ജയലളിതയോടൊപ്പം പ്രധാന കഥാപാത്രത്തെ അവതരിപ്പിച്ചു. തമിഴ്, തെലുങ്ക്, മലയാളം, കന്നഡ ഭാഷകളിലായി അമ്പതോളം ചിത്രങ്ങളില് അഭിനയിച്ചു. ദൂരദര്ശന്റെ സാഗരിക, കയര്, മനുഷ്യബന്ധങ്ങള് തുടങ്ങിയ സീരിയലുകളിലും അഭിനയിച്ചു. നിരവധി ഹിന്ദി ചിത്രങ്ങള്ക്ക് ഡബ്ബും ചെയ്തിട്ടുണ്ട്.
കോണ്ഗ്രസ് നേതാവും മുനിസിപ്പല് കൗണ്സിലറുമായിരുന്ന കൊല്ലം ജോനകപ്പുറത്ത് മാലിക് മുഹമ്മദിന്റേയും തങ്കമ്മയുടേയും മകളാണ്. തിരുവനന്തപുരം പാലോടാണ് ജമീല താമസിച്ചിരുന്നത്. പൂന്തുറയിലെ ബന്ധു വീട്ടില്വച്ചാണ് മരണം സംഭവിച്ചത്. മൃതദേഹം തിരുവനന്തപുരം മെഡിക്കല് കോളജ് മോര്ച്ചറിയില് സൂക്ഷിച്ചിരിക്കുയാണ്.
