മലയാളികളുടെ പ്രിയ നടി അപർണദാസ് വിവാഹിതയാകുന്നു. നടൻ ദീപക്ക് പറമമ്പോളാണ് വരൻ. ഇരുവരുേടതും പ്രണയവിവാഹമെന്നാണ് സിനിമാ മേഖലയിൽ നിന്ന് പുറത്തെത്തുന്ന വാർത്തകൾ. അപർണയുടെ വിവാഹത്തിന്റെ ക്ഷണക്കത്തും ഇതിനോടകം തന്നെ ചർച്ചയായി മാറിയിട്ടുണ്ട്. ഏപ്രിൽ 24ന് വടക്കാഞ്ചേരി തേവർക്കാട് കൺവൻഷണൽ സെന്ററിൽ വച്ചാണ് വിവാഹം. കണ്ണൂർ സ്വദേശിയാണ് നടൻ ദീപക്.
ഞാൻ പ്രകാശൻ എന്ന ചിത്രത്തിലൂടെയാണ് ഫഹദ് ഫാസിലിന്റെ നായികയായി അപർണ അഭിനയ രംഗത്തേക്ക് കടന്നെത്തുന്നത്.
പിന്നീട് മനോഹരം എന്ന ചിത്രത്തിൽ ദീപക്കിനൊപ്പം ഒന്നിച്ച് അഭിനയിച്ചിരുന്നു. ദിലീപിന്റെ നിർമാണത്തിലെത്തിയ വിനീത് ശ്രീനിവാസൻ ചിത്രം മലർവാടി ആട്സ് എന്ന ചിത്രത്തിലൂടെയാണ് ദീപക് സിനിമയിലേക്ക് എത്തുന്നത്. നിവിൻ പോളി, അജുവർഗീസ് ഉൾപ്പടെ യുവനിരയെ സമ്മാനിച്ച ചിത്രത്തിൽ ദീപക് പ്രധാന വേഷം കൈകാര്യം ചെയ്തിരുന്നു. വിജയ് ചിത്രം ബീസ്റ്റിലൂടെ തമിഴകത്ത് കാൽവച്ച അപർണയ്ക്ക് തമിഴിലും നിരവധി ആരാധക പിന്തുണയുണ്ട്. ആദികേശവയിലൂടെ തെലുങ്കിലും അപർണ അരങ്ങേറ്റം കുറിച്ചു. സീക്രട്ട് ഹോം എന്ന ചിത്രമാണ് അവസാനമായി അപർണയുടേതായി റിലീസിനെത്തിയ ചിത്രം.
തട്ടത്തിൻ മറയത്ത്, തിര, ഡി കമ്പനി, കുഞ്ഞിരാമായണം, രക്ഷാധികാരി ബൈജു, വിശ്വവിഖ്യാതരായ പയ്യന്മാർ, ക്യാപ്റ്റൻ, ബി.ടെക്ക്, കണ്ണൂർ സ്ക്വാഡ് തുടങ്ങി അടുത്തിടെ വമ്പൻ ഹിറ്റായ മഞ്ഞുമ്മൽ ബോയ്സിൽ വരെ ദീപ്ക് പ്രധാനവേഷം ചെയ്തു. വിനീത് ശ്രീനിവാസൻ ചിത്രം ‘വര്‍ഷങ്ങള്‍ക്ക് ശേഷം’ ആണ് നടന്റെ പുതിയതായി റിലീസിനൊരുങ്ങുന്ന ചിത്രം.