പൃഥ്വിരാജ് നിര്‍മ്മാതാവും നായകനുമാകുന്ന ‘ഡ്രൈവിംഗ് ലൈസന്‍സിന്റെ ടീസര്‍ പുറത്തിറങ്ങി. പൃഥ്വിരാജും സുരാജ് വെഞ്ഞാറമൂടുമാണ് ചിത്രത്തിലെ പ്രധാന കഥാപാത്രങ്ങളെ അവതരിപ്പിക്കുന്നത്. ഹരീന്ദ്രന്‍ എന്നു പേരുള്ള സൂപ്പര്‍ സ്റ്റാറിന്റെ വേഷത്തിലാണ് പൃഥ്വിരാജ് ചിത്രത്തിലെത്തുന്നത്. ഈ താരത്തിന്റെ കടുത്ത ആരാധകനായുള്ള വെഹിക്കിള്‍ ഇന്‍സ്‌പെക്ടറുടെ വേഷമാണ് സുരാജ് അവതരിപ്പിക്കുന്നത്. ‘9’ന് ശേഷം വീണ്ടും പൃഥിരാജ് നായകനും നിര്‍മ്മാതാവുമാകുന്ന ചിത്രമാണ് ഡ്രൈവിംഗ് ലൈസന്‍സ്. സംവിധായകന്‍ ലാലിന്റെ മകന്‍ ജീന്‍ പോളാണ് ചിത്രം സംവിധാനം ചെയ്യുന്നത്. ലക്ഷ്വറി കാറുകളോട് ആഭിമുഖ്യമുള്ള സിനിമാതാരമായാണ് പൃഥ്വിരാജ് ചിത്രത്തിലെത്തുന്നത്. പൃഥിയുടെയും സുരാജിന്റെ കഥാപാത്രങ്ങള്‍ തമ്മിലുള്ള സംഘര്‍ഷങ്ങളാണ് ചിത്രത്തിന്റെ ആധാരം. ദീപ്തി സതി, മിയ ജോര്‍ജ് എന്നിവരാണ് നായികമാരായി എത്തുന്നത്. പൃഥിരാജിന്റെ ഭാര്യയായാണ് ദീപ്തി വേഷമിടുന്നത്. സച്ചി തിരക്കഥയൊരുക്കുന്ന ചിത്രത്തിന്റെ ഛായാഗ്രഹണം നിര്‍വഹിക്കുന്നത് അലക്‌സ് ജെ പുളിക്കലാണ്. പൃഥിരാജ് പ്രൊഡക്ഷന്‍സിനൊപ്പം ലിസ്റ്റിന്‍ സ്റ്റീഫനും ചേര്‍ന്നാണ് ചിത്രം നിര്‍മ്മിക്കുന്നത്. ചിത്രം ഈതമാസ 20 ന് ചിത്രം തിയേറ്ററുകളിലെത്തും.

“മറ്റൊരു കടവിൽ ” ! പേര് സൂചിപ്പിക്കും പോലെതന്നെ2013 ൽ ഇറങ്ങിയ ഹിറ്റ് ഷോർട്ട് ഫിലിം കുളിസീന് രണ്ടാം ഭാഗം എത്തുന്നു! രാഹുൽ കെ ഷാജി സംവിധാനം ചെയ്ത് ആർ ജെ മാത്തുക്കുട്ടിയും വൈഗയും അഭിനയിച്ച് യൂട്യൂബിൽ തരംഗം സൃഷ്ടിച്ച ഷോർട്ട് ഫിലിമായിരുന്നു കുളിസീൻ. ഏഴ് വർഷങ്ങൾക്കിപ്പുറം ഏരിയ ഹെന്ന പ്രൊഡക്ഷൻസിന്റെ ബാനറിൽ സുനിൽ നായർ(ന്യൂയോർക്ക്) നിർമ്മിച്ച് രാഹുൽ കെ ഷാജിയുടെ സംവിധാനത്തിൽ രണ്ടാം ഭാഗം ഒരുങ്ങുമ്പോൾ, സിനിമ സീരിയൽ താരം സ്വാസികയും, സംവിധായകൻ ജുഡ് ആന്തണി ജോസഫും, സിനിമതാരം അൽതാഫ് മനാഫും ആണ് പ്രധാന കഥാപാത്രങ്ങളെ അവതരിപ്പിക്കുന്നത്.

മറ്റൊരു കടവിൽ സംഗീത സാന്ദ്രമാക്കാൻ, സിനിമ സംഗീത സംവിധായകൻ രാഹുൽ രാജ് എത്തുന്നു എന്നതാണ് പ്രധാന ആകർഷണം. തിരക്കഥ സംഭാഷണം ഒരുക്കുന്നത് സുമേഷ് മധു . കഥ – രാഹുൽ കെ ഷാജി,സുമേഷ് മധു . ക്യാമറ – രാജേഷ് സുബ്രമണ്യം, എക്സി.പ്രൊഡ്യൂസർ – ഷാജി കോമത്താട്ട്. എഡിറ്റ് – അശ്വിൻ കൃഷ്ണ, പ്രൊഡക്ഷൻ കൺട്രോളർ ലിബിൻ വർഗീസ്. സ്റ്റിൽസ് – ജിഷ്ണു കൈലാസ്. ക്രിയേറ്റീവ് സപ്പോർട്ട് – വിനീത് പുള്ളാടൻ, നകുൽ കെ ഷാജി, ശ്രീലാൽ. ചീഫ് അസ്സോ. ഡയറക്ടർ – റാബി ഫന്നേൽ. ചീഫ് അസ്സോ. ക്യാമറാമാൻ – ശരത്ത് ഷാജി. ക്യാരക്ടർ ഡ്രോയിംഗ്സ് – വിപിൻ കുമാർ കൊച്ചേരിൽ. പബ്ളിസിറ്റി ഡിസൈൻ – അനീഷ് ലെനിൻ. 2020 ആദ്യമാസങ്ങളിൽ തന്നെ കുളിസീൻ 2, യൂട്യൂബിൽ തരംഗം സൃഷ്ടിക്കാൻ എത്തുമെന്ന് പ്രതീക്ഷിക്കാം!

മലയാള സിനിമയിലെ എക്കാലത്തെയും സൂപ്പര്‍ ഹിറ്റി സിനിമകള്‍ ഒരുക്കിയ കൂട്ടുകെട്ടായിരുന്നു സിദ്ദിഖ്-ലാല്‍. അവരുടെ സൗഹൃദം പോലെ സിനിമയും സൂപ്പര്‍ ഹിറ്റുകളായിരുന്നു. റാംജി റാവു സ്പീക്കിംഗ് എന്ന സിനിമയായിരുന്നു ഇരുവരും ചേര്‍ന്ന് സംവിധാനം ചെയ്ത ആദ്യ ചിത്രം. പിന്നീട് ഇന്‍ ഹരിഹര്‍ നഗര്‍, ഗോഡ് ഫാദര്‍, വിയറ്റ്‌നാം കോളനി, കാബൂളിവാല, മന്നാര്‍ മത്തായി സ്പീക്കിംഗ്, കിംഗ് ലയര്‍ എന്നിവയായിരുന്നു സിദ്ദിഖ്-ലാല്‍ കൂട്ടുകെട്ടില്‍ പിറന്ന സിനിമകള്‍. സിദ്ദിഖിനൊപ്പം ഇനിയൊരു സിനിമയുണ്ടാകാനുള്ള സാധ്യത ഇല്ലെന്ന് തുറന്ന് പറഞ്ഞിരിക്കുകയാണ് ലാല്‍. ‘സിദ്ദിഖിനൊപ്പം ഇനിയൊരു സിനിമയ്ക്കുള്ള സാധ്യതയില്ല. ഞങ്ങള്‍ തമ്മിലുള്ള അകലം വളരെ വലുതാണ് ഇപ്പോള്‍. ഞങ്ങല്‍ ദിവസവും കാണുന്ന ആളുകള്‍ വേറെ, സംസാരിക്കുന്ന വിഷയങ്ങള്‍ വേറെ. പണ്ട് ഉണ്ടായിരുന്ന കെമിസ്ട്രി എവിടെയോ നഷ്ടമായിരിക്കുന്നു. രണ്ട് പേരും അവസാനം ഒന്നിച്ച് പ്രവര്‍ത്തിച്ച കിങ് ലയര്‍ എന്ന സിനിമയോടെ ഇക്കാര്യം കൂടുതല്‍ ബോധ്യമായി.’
‘രണ്ട് വര്‍ഷം ഒരുമിച്ച് ഇരുന്നാല്‍ പോലും റാം ജി റാവു സ്പീക്കിങ്ങ്, ഗോഡ് ഫാദര്‍ പോലുള്ള ഒരു സിനിമ സാധ്യമാവുമെന്ന് തോന്നുന്നില്ല. പണ്ട് തങ്ങള്‍ക്കിടയില്‍ പരസ്പര ബഹുമാനമായിരുന്നില്ല, സൗഹൃദമായിരുന്നു. ആ സ്വാതന്ത്ര്യം ഇന്നില്ല, സംസാരിക്കുന്നത് പോലും തേച്ച് മിനുക്കിയ ഭാഷയിലാണ്. അതൊരു വലിയ മാറ്റമാണ്. തമ്മില്‍ കാണാറുള്ളത് വല്ല വിവാഹ ചടങ്ങുകള്‍ പോലുള്ളവയില്‍ മാത്രമായി മാറി’.

മലയാളത്തിന്റെ പ്രിയ നടി ഭാമ വിവാഹിതയാവുന്നു. വ്യവസായിയായ അരുണാണ്  വരന്‍.  പ്രണയവിവാഹമല്ല വീട്ടുകാര്‍ തീരുമാനിച്ചുറപ്പിച്ച വിവാഹമാണെന്ന് ഭാമ പറയുന്നു. ജനുവരിയില്‍ വിവാഹം കഴിക്കാനാണ് തീരുമാനിച്ചിരിക്കുന്നതെന്നും ഭാമ പറഞ്ഞു. വനിതയ്ക്ക് നല്‍കിയ അഭിമുഖത്തിലാണ് ഭാമ വിവാഹത്തെ കുറിച്ച് മനസ് തുറന്നത്.
അരുണിന്റെ നാട് ചെന്നിത്തലയിലാണെങ്കിലും വര്‍ഷങ്ങളായി കുടുംബം വിദേശത്താണ്. അച്ഛന്റെ ബിസിനസ്  ദുബായ്യിലാണ്. പ്ലസ് ടു കഴിഞ്ഞാണ് അരുണ്‍ കാനഡയിലേക്ക് പോയത്. ഇപ്പോള്‍ കൊച്ചിയില്‍ സെറ്റില്‍ഡ് ആകാനുള്ള ശ്രമത്തിലാണെന്നും ഭാമ പറയുന്നു.

കോട്ടയത്ത് വെച്ച് വിവാഹവും കൊച്ചിയില്‍ വെച്ച് റിസപ്ഷനും നടത്താനാണ് തീരുമാനം.വലിയ ആര്‍ഭാടമൊന്നും ഇല്ലാതെ വിവാഹം കഴിക്കാനാണ് ആഗ്രഹം. കല്യാണത്തിന് മുന്‍പുള്ള ദിവസങ്ങള്‍ ആഘോഷിക്കുകയാണെന്നും ഭാമ പറയുന്നു.
എനിക്ക് രണ്ട് ചേച്ചിമാരാണ്. ഇരുവരുടേയും വിവാഹം കഴിഞ്ഞു. അതില്‍ ഒരു ചേട്ടന്റെ കൂടെയാണ് അരുണ്‍ പഠിച്ചത്. മാത്രമല്ല ഇരു ഫാമിലിയും തമ്മില്‍ നല്ല അടുപ്പത്തിലുമാണ്. ഒരു ദിവസം ഏട്ടന്റെ കൂടെ അരുണ്‍ വീട്ടില്‍ വന്നു. അരുണിന്റെ പെരുമാറ്റം വീട്ടുകാര്‍ക്കും എനിക്കും ഇഷ്ടമായി. പിന്നെ കഴിഞ്ഞ ജൂണില്‍ അരുണ്‍ വീണ്ടും വീട്ടില്‍ വന്നു.അങ്ങനെ വിവാഹത്തെക്കുറിച്ച് സംസാരിച്ചു- ഭാമ പറയുന്നു.
കാനഡയില്‍ സെറ്റില്‍ഡ് ആണെന്ന് പറഞ്ഞപ്പോള്‍ എനിക്ക് ചെറിയൊരു പേടിയുണ്ടായിരുന്നു.വിദേശത്തു നിന്ന് വിവാഹം കഴിക്കാന്‍ താല്‍പര്യമില്ലായിരുന്നു. നാട്ടിലുള്ള ഒരാളെ മതിയെന്നാണ് തീരുമാനിച്ചത്. പിന്നെ അരുണിനും നാട്ടില്‍ സെറ്റില്‍ഡ് ആകാനാണ് ഇഷ്ടമെന്നറിഞ്ഞപ്പോള്‍ വിവാഹത്തിന് സമ്മതിച്ചു- ഭാമ പറയുന്നു. 2007ല്‍ ലോഹിതദാസ് സംവിധാനം ചെയ്ത നിവേദ്യത്തിലൂടെയാണ് ഭാമ സിനിമാ ലോകത്തേക്ക് എത്തുന്നത്.

കൊച്ചി: നടന്‍ ഷെയിന്‍ നിഗത്തെ സിനിമയില്‍നിന്നും വിലക്കിയിട്ടില്ല എന്ന് നിര്‍മ്മാതാവ് രഞ്ജിത്. രണ്ട് സിനിമകളുടെ നിര്‍മ്മണം മുടങ്ങിയതിനാല്‍ ഈ ചിത്രങ്ങള്‍ക്ക് നഷ്ടമായ ഏഴ് കോടി രൂപ ലഭിക്കാതെ ഷെയിനുമായി സഹകരിക്കേണ്ടതില്ല എന്ന തീരുമാനമാണ് സംഘടന സ്വീകരിച്ചിരിക്കുന്നത് എന്ന് രഞ്ജിത് വ്യക്തമാക്കി.

കടുത്ത നിലപാട് തന്നെ ഷെയിനിനോട് സ്വീകരിക്കാനാണ് പ്രൊഡ്യൂസേഴ്‌സ് അസോസിയേഷന്റെ തീരുമാനം. ഷെയിനിന്റെ പ്രായം കണക്കിലെടുത്ത് തീരുമാനത്തില്‍ മാറ്റം വരുത്താന്‍ ഉദ്ദേശിക്കുന്നില്ല. ഷെയിനിന് മാത്രമല്ല ഇത്തരത്തില്‍ പെരുമാറുന്ന യുവനടന്മാര്‍ക്കുള്ള താക്കീത് കൂടിയാണ് ഇത്.

അമ്മ സംഘടന ഇടപെട്ടിട്ടും തികച്ചും നിഷേധാത്മക നിലപാടാണ് ഷെയിന്‍ സ്വീകരിച്ചത്. ഷെയിനിന്റെ അമ്മ ലൊക്കേഷനില്‍ നേരിട്ടെത്തി സിനിമയുടെ ചിത്രീകരണം മുന്നോട്ട് കൊണ്ടുപോകാന്‍ അവരെ ശ്രമം നടത്തി. കുടുംബം കൂടി ഇടപെട്ടിട്ടും ഷെയിനിന്റെ ഭാഗത്തുനിന്നും മറിച്ചൊരു നിലപാട് ഉണ്ടായില്ല. ഈ നിഷേധാതമക നിലപാട് കണ്ടില്ലെന്ന് നടിച്ച് മുന്നോട്ട് പോകാന്‍ സാധിക്കില്ല എന്നും രഞ്ജിത് വ്യക്തമാക്കി.

സാഹിത്യകാരന്‍ ഉറൂബിന്റെ രാച്ചിയമ്മ എന്ന ചെറുകഥ സിനിമയാവുന്നു. ഛായാഗ്രാഹകന്‍ വേണു  സംവിധാനം ചെയ്യുന്ന ചിത്രത്തില്‍ പാര്‍വ്വതി തിരുവോത്താണ് രാച്ചിയമ്മയായി വേഷഷമിടുന്നത്. ഛായാഗ്രാഹകന്‍ വേണു ആണ് ചിത്രം സംവിധാനം ചെയ്യുന്നത്. 1969 ല്‍ പ്രസിദ്ധീകരിച്ച ചെറുകഥയാണിത്.ആസിഫ് അലിയാണ് നായകന്‍.

ചിത്രത്തിന്റെ ചിത്രീകരണം ഡിസംബര്‍ മൂന്നിന് പീരുമേട്ടില്‍ തുടങ്ങും. വേണു തന്നെയാണ് തിരക്കഥയെഴുതിരിക്കുന്നത്. വിവിധ സംവിധായകര്‍ ചേര്‍ന്ന് ഒരുക്കുന്ന ആന്തോളജി വിഭാഗത്തിലുള്ള ചിത്രമാണിത്. ആഷിക് അബു, രാജീവ് രവി, ജയ്.കെ എന്നിവരാണ് മറ്റ് ചിത്രങ്ങള്‍ സംവിധാനം ചെയ്യുന്നത്. പി.കെ പ്രൈമാണ് ചിത്രം നിര്‍മ്മിക്കുന്നത്.

പെണ്ണും ചെറുക്കനും എന്നാണ് ആഷിക് അബു സംവിധാനം ചെയ്യുന്ന ചിത്രത്തിന്റെ പേര്. ഉണ്ണി ആര്‍. രചന നിര്‍വഹിക്കുന്ന ഈ ചിത്രത്തിന്റെ ഛായാഗ്രഹണം നിര്‍വഹിച്ചിരിക്കുന്നത് ഷൈജു ഖാലിദ് ആണ്.

തമിഴ് നടന്‍ വിജയ് സേതുപതി ബോളിവുഡിലേക്ക്് അരങ്ങേറ്റം കുറിക്കുന്നു. ആമിര്‍ ഖാന്‍ നായകനാകുന്ന ‘ലാല്‍ സിങ് ചദ്ദ’യാണ് ആദ്യ ചിത്രം. പ്രധാന കഥാപത്രത്തെയാണ് വിജയ് സേതുപതി അവതരിപ്പിക്കുന്നതെന്നാണ് റിപ്പോര്‍ട്ടുകള്‍. ഫിലിം കംപാനിയന് നല്‍കിയ അഭിമുഖത്തിനിടെയാണ് താരം ഇക്കാര്യം സ്ഥീരീകരിച്ചത്.
പാര്‍വ്വതി, ദീപികാ പദുകോണ്‍, അലിയാ ഭട്ട്, രണ്‍വീര്‍ സിങ്, ആയുഷ്മാന്‍ ഖുറാന, മനോജ് വാജ്‌പേയ്, വിജയ് ദേവരകൊണ്ട എന്നീ താരങ്ങളും പങ്കെടുത്ത സംവാദത്തിനിടെയാണ് ഹിന്ദിയില്‍ സംസാരിക്കാന്‍ പാടുപെടുകയാണെന്ന് സേതുപതി വെളിപ്പെടുത്തിയത്. ഇതോടെ ”അദ്ദേഹം തീര്‍ച്ചയായും ലാല്‍ സിങ് ചദ്ദയില്‍ അഭിനയിക്കുന്നുണ്ട്” എന്ന് മനോജ് വാജ്പേയ് വ്യക്തമാക്കി.
അന്യഭാഷാ ചിത്രങ്ങളില്‍ അഭിനയിക്കാന്‍ ഒരുങ്ങുമ്പോള്‍ ഭാഷയും സംസ്‌ക്കാരവും മനസിലാക്കാന്‍ പ്രയാസമാണെന്നും സേതുപതി പറഞ്ഞു. എന്നാല്‍ ഭാഷ ഒരു വലിയ തടസമല്ല, സൗദി അറേബ്യയില്‍ ആറു മാസം ചിലവഴിച്ചാല്‍ അറബി പഠിക്കാന്‍ പറ്റുമെന്നും സേതുപതി കൂട്ടിച്ചേര്‍ത്തു. അദ്വൈദ് ചന്ദ്രന്‍ ഒരുക്കുന്ന ലാല്‍ സിങ് ചദ്ദയുടെ ഫസ്റ്റ് ലുക്ക് പോസ്റ്റര്‍ അടുത്തിടെയാണ് പുറത്തെത്തിയത്. ചിത്രത്തില്‍ കരീന കപൂറാണ് നായികയായി എത്തുന്നത്. ആമിര്‍ ഖാന്‍ പ്രൊഡക്ഷന്‍സ്, വിയാകോം18 മോഷന്‍ പിക്ചേഴ്സിന്റെ ബാനറില്‍ ആമിര്‍ ഖാനും, കിരണ്‍ റാവും ചേര്‍ന്നാണ് നിര്‍മ്മാണം. ഡിസംബര്‍ 25നാണ് ചിത്രം റിലീസിനെത്തുന്നത്.

തമിഴ് നടന്‍ ബാല സിംഗ് അന്തരിച്ചു. ഭഷ്യവിഷബാധയെ തുടര്‍ന്ന് ചെന്നൈയിലെ സ്വകാര്യ ആശുപത്രിയില്‍ ചികിത്സയിലിരിക്കെയായിരുന്നു അന്ത്യം. 67 വയസായിരുന്നു. ‘പുതുപ്പേട്ടൈ’ എന്ന ചിത്രത്തിലെ വില്ലന്‍ വേഷത്തിലൂടെ ശ്രദ്ധേയനായ നടനാണ് ബാല സിംഗ്. വില്ലന്‍ കഥാപാത്രങ്ങളിലൂടെ പ്രേക്ഷക പ്രശംസ നേടിയ താരമാണ് ബാല. നാടകത്തിലൂടെയാണ് നടന്‍ സിനിമയിലെത്തിയത്. 1983ല്‍ ‘മലമുകളിലെ ദൈവം’ എന്ന മലയാള ചിത്രത്തിലൂടെയാണ് ബാല വെള്ളിത്തിരയിലേക്കെത്തിയത്. 1995ല്‍ ‘അവതാരം’ എന്ന ചിത്രത്തിലൂടെ തമിഴ് സിനിമയിലേക്ക് അരങ്ങേറ്റം കുറിച്ചു. നൂറോളം തമിഴ് ചിത്രങ്ങളില്‍ അഭിനയിച്ചിട്ടുണ്ട്.
കമല്‍ഹാസന്റെ ‘ഇന്ത്യന്‍’, ‘ഉല്ലാസം’, ‘ദീന’, മലയാളത്തില്‍ ‘കേരള ഹൗസ് ഉടന്‍ വില്‍പനയ്ക്ക്’, ‘മുല്ല’ എന്നീ ചിത്രങ്ങളിലും അഭിനയിച്ചിട്ടുണ്ട്. സൂര്യയുടെ ‘എന്‍ജികെ’, ‘മാഗമുനി’ എന്നിവയാണ് അവസാന സിനിമകള്‍.

കാത്തിരിപ്പിന് വിരാമമിട്ട് മെഗാസ്റ്റാര്‍ മമ്മൂട്ടിയും ലേഡി സൂപ്പര്‍ സ്റ്റാര്‍ മഞ്ജുവാര്യരും ഒന്നിക്കുന്നു. നവാഗതനായ ജോഫിന് ടി ചാക്കോ സംവിധാനം ചെയ്യുന്ന ത്രില്ലര്‍ ചിത്രത്തിലാണ് മമ്മൂട്ടിയോടൊപ്പം മഞ്ജു എത്തുന്നത്. ചിത്രത്തിന് പേരിട്ടിട്ടില്ല.ആന്റോ ജോസഫും ബി ഉണ്ണികൃഷ്ണനും ചേര്‍ന്നാണ് ചിത്രം നിര്മ്മിക്കുന്നത്. എന്നാല്‍ ചിത്രത്തില്‍ മമ്മൂട്ടിയുടെ നായികയായല്ല മഞ്ജു എത്തുക എന്നാണ് റിപ്പോര്‍ട്ടുകള്‍.
ഈ ചിത്രത്തിന്റെ ഷൂട്ടിംഗ് അടുത്ത മാസം അവസാനത്തോടെ ആരംഭിക്കുമെന്നും റിപ്പോര്‍ട്ടുകളുണ്ട്. നിലവില്‍ വണ്‍ എന്ന ചിത്രത്തിന്റെ തിരക്കിലാണ് മമ്മൂട്ടി. പ്രതി പൂവന്‍കോഴി എന്ന ചിത്രമാണ് മഞ്ജുവിന്റെതായി റിലീസിനൊരുങ്ങുന്ന ചിത്രം.