കുടുംബാംഗങ്ങള്‍ക്കും സുഹൃത്തുക്കള്‍ക്കുമൊപ്പമിരിന്നു ദൃശ്യം 2 കണ്ട് മോഹന്‍ലാല്‍

ദൃശ്യം 2 കുടുംബാംഗങ്ങള്‍ക്കും സുഹൃത്തുക്കള്‍ക്കുമൊപ്പം ആസ്വദിച്ച് മലയാളത്തിന്റെ പ്രിയ താരം മോഹന്‍ലാല്‍. ചെന്നൈയിലെ തന്റെ വീട്ടില്‍ ഒരുക്കിയ ഹോം തിയറ്ററിലാണ് സിനിമ കണ്ടത്.

ഭാര്യ സുചിത്ര മകന്‍ പ്രണവ്, അടുത്ത സുഹൃത്തും സംവിധായകനുമായ പ്രിയദര്‍ശന്‍ എന്നിവരും മോഹന്‍ലാലിനൊപ്പം ഉണ്ടായിരുന്നു.സിനിമ കണ്ടതിനു ശേഷം ചിത്രത്തിന്റെ വിജയാഘോഷവും ഉണ്ടായിരുന്നു.

മോഹന്‍ലാലിന്റെ സുഹൃത്തായ സമീര്‍ ഹംസയുടെ പിറന്നാള്‍ ആഘോഷവും തുടര്‍ന്ന് നടന്നു. ഡിസംബര്‍ 19-ന് റിലീസ് ചെയ്ത ചിത്രത്തിന് വലിയ സ്വീകാര്യതയാണ് ലഭിക്കുന്നത്. നിരവധി പ്രേക്ഷകരാണ് സിനിമ കണ്ട് മികച്ച അഭിപ്രായം രേഖപ്പെടുത്തുന്നത്.

English Summary : Mohanlal with family and friends watching Drishyam 2

കൊച്ചി: ജസ്ന തിരോധാന കേസ് ഇനി സിബിഐ അന്വേഷിക്കും. കേസ് അന്വേഷിക്കാന്‍ തയ്യാറാണെന്ന് ഹൈക്കോടതിയെ സിബിഐ അറിയിച്ചു. ഇതോടെ കോടതി കേസ് ഡയറിയും മറ്റ് കേസ് ഫയലുകളും സിബിഐക്ക് കൈമാറാന്‍ നിര്‍ദേശിച്ചു. കേസ് ഡയറി കൈമാറേണ്ടത് . സി ബി ഐ തിരുവനന്തപുരം യൂണിറ്റിനാണ്.

സംസ്ഥാന സര്‍ക്കാര്‍ കേസന്വേഷണത്തിന് വാഹന സൗകര്യം അടക്കം നല്‍കണമെന്നും സി ബി ഐ കോടതിയില്‍ ആവശ്യപ്പെട്ടു.എന്തോ ഗുരുതരമായി ജസ്നയുടെ കാര്യത്തില്‍ സംഭവിച്ചിട്ടുണ്ടന്ന് കേന്ദ്ര സര്‍ക്കാരിനായി ഹാജരായ അഡീഷണല്‍ സോളിസിറ്റര്‍ കോടതിയില്‍ പറഞ്ഞു. അന്തര്‍ സംസ്ഥാന ബന്ധം ജസ്നയുടെ തിരോധാനത്തിന് ഉണ്ടെന്ന് കരുതുന്നതായി സിബിഐ കോടതിയില്‍ പറഞ്ഞു.

സി ബി ഐ അന്വേഷണം ആവശ്യപ്പെട്ട് ഹര്‍ജി നല്‍കിയത് ജസ്നയുടെ സഹോദരന്‍ ജെയ്‌സ് ജോണ്‍, കെ എസ് യു സംസ്ഥാന പ്രസിഡന്റ് അഭിജിത് എന്നിവരാണ്. 2018 മാര്‍ച്ച് 22 നാണ് കോളേജിലേക്ക് പോയ ജസ്നയെ കാണാതാകുന്നത്. ജസ്നയുടെ തിരോധാനം അന്വേഷിച്ചത് പത്തനംതിട്ട മുന്‍ എസ്പിയും വിരമിച്ച ഉദ്യോഗസ്ഥനുമായ കെ ജി സൈമണ്‍ ആയിരുന്നു. . ഇതിനിടെ ചില ഉദ്യോഗസ്ഥരുടെ പേരില്‍ ജസ്നയെ കണ്ടെത്തി എന്ന തരത്തിലുള്ള വാര്‍ത്തകളും പ്രചരിച്ചെങ്കിലും ഇക്കാര്യത്തില്‍ പൊലീസ് ഔദ്യോഗിക സ്ഥിരീകരണം നടത്തിയിട്ടില്ല.

English Summary : CBI to probe Jasna’s disappearance

പാലക്കാട്: അട്ടപ്പാടി മേഖലയില്‍ ഷിഗെല്ല രോഗബാധ സ്ഥിരീകരിച്ചു. അഗളി മേലേ ഈരിലെ ആദിവാസി ദമ്പതികളുടെ ഒന്നര വയസ്സുകാരനിലാണ് രോഗബാധ സ്ഥിരീകരിച്ചത്. വിദഗ്ധ ചികിത്സക്കായി കുഞ്ഞിനെ കോഴിക്കോട് മെഡിക്കല്‍ കോളേജ് ആശുപത്രിയിലേയ്ക്ക് മാറ്റി. കടുത്ത പനിയും വയറിളക്കവുമുണ്ടായതിനെ തുടര്‍ന്നാണ് വെള്ളിയാഴ്ച കുട്ടിയെ അട്ടപ്പാടി ആശുപത്രിയില്‍ പ്രവേശിപ്പിച്ചത്. ഷിഗെല്ല രോഗ ലക്ഷണങ്ങള്‍ പ്രകടിപ്പിച്ചതോടെ തിങ്കളാഴ്ച കോഴിക്കോട് മെഡിക്കല്‍ കോളേജ് ആശുപത്രിയില്‍ പ്രവേശിപ്പിക്കുകയായിരുന്നു. എന്നാല്‍ മറ്റാര്‍ക്കും രോഗലക്ഷണങ്ങളില്ല. അതിനാല്‍തന്നെ നിലവില്‍ ആശങ്കപ്പെടേണ്ട സാഹചര്യമില്ലെന്ന് ജില്ല മെഡിക്കല്‍ ഓഫീസര്‍ അറിയിച്ചു.

English Summary : Shigella disease in tribal boy in Attappadi

കൊച്ചി: ബിജെപിയില്‍ ചേരുമെന്ന് മെട്രോമാന്‍ ഇ ശ്രീധരന്‍. പാര്‍ട്ടി ആവശ്യപ്പെട്ടാല്‍ നിയമസഭാ തെരഞ്ഞെടുപ്പില്‍ മത്സരിക്കുമെന്നും ശ്രീധരന്‍ അറിയിച്ചു.

ഒമ്പത് വര്‍ഷത്തെ അനുഭവത്തിന്റെ വെളിച്ചത്തിലാണ് രാഷ്ട്രീയ പ്രവേശനം. കേരളത്തില്‍ ഒരു കാര്യവും നടക്കുന്നില്ല. കേരളത്തിന് നീതി ഉറപ്പാക്കാന്‍ ബിജെപി അധികാരത്തില്‍ വരണമെന്നും ശ്രീധരന്‍ മാദ്ധ്യമങ്ങളോടു പറഞ്ഞു.
ഇ ശ്രീധരന്‍ ബിജെപിയില്‍ ചേരുമെന്ന് പാര്‍ട്ടി സംസ്ഥാന അദ്ധ്യക്ഷന്‍ കെ സുരേന്ദ്രനാണ് ആദ്യം അറിയിച്ചത്. നിയമസഭാ തെരഞ്ഞെടുപ്പിന് മുമ്പ് പാര്‍ട്ടി നടത്തുന്ന പ്രചാരണ പരിപാടിയായ വിജയയാത്രയില്‍ ഇ ശ്രീധരന്‍ പങ്കെടുക്കുമെന്ന് സുരേന്ദ്രന്‍ വാര്‍ത്താ സമ്മേളനത്തില്‍ പറഞ്ഞു.

നിയമസഭാ തെരഞ്ഞെടുപ്പില്‍ മത്സരിക്കണമെന്ന ആവശ്യം ഇ ശ്രീധരനെ അറിയിച്ചിട്ടുണ്ടെന്ന് സുരേന്ദ്രന്‍ പറഞ്ഞു. താന്‍ ചേരുന്നത് കൊണ്ടുമാത്രം ബിജെപിയുടെ വോട്ട് ഇരട്ടിയാകുമെന്നും ശ്രീധരന്‍ പറഞ്ഞു.

പാലാ: പ്രശസ്ത സംഗീത സംവിധായകന്‍ ഐസക് തോമസ് കൊട്ടുകാപ്പള്ളി (72) അന്തരിച്ചു. മികച്ച പശ്ചാത്തല സംഗീതത്തിനുള്ള ദേശീയ പുരസ്‌കാരം നേടിയ ഐസക് തോമസ് കൊട്ടുകാപ്പള്ളി അരങ്ങിനോടും അഭിനയത്തോടും അടങ്ങാത്ത പ്രണയം കാത്തുസൂക്ഷിച്ചിരുന്നയാളാണ്. മലയാളത്തിന് പുറമെ കന്നഡ,ഹിന്ദി സിനിമകളിലും പ്രവര്‍ത്തിച്ചിട്ടുണ്ട്. ഗിരീഷ് കാസറവള്ളിയുടെ ദേശീയ അവാര്‍ഡ് നേടിയ ചിത്രം തായി സഹേബയിലൂടെയാണ് കൊട്ടുകാപ്പള്ളി സിനിമയില്‍ അരങ്ങേറുന്നത്.  സലിം അഹമ്മദ് സംവിധാനം ചെയ്ത ആദാമിന്റെ മകന്‍ അബുവിലെ പശ്ചാത്തല സംഗീതത്തിലൂടെ  2010 ല്‍ ദേശീയ അവാര്‍ഡിനര്‍ഹനായി. കുട്ടിസ്രാങ്ക്, മാര്‍ഗം, സഞ്ചാരം, പുണ്യം അഹം തുടങ്ങി നിരവധി ചിത്രങ്ങളുടെ പശ്ചാത്തല സംഗീതം നിര്‍വ്വഹിച്ചു. നാലുതവണ സംസ്ഥാന അവാര്‍ഡും നേടി.പുനെ ഫിലിം ഇന്‍സ്റ്റിറ്റ്യൂട്ടില്‍ സംവിധാനം പഠിച്ചശേഷം അരവിന്ദന്റെ സംവിധാന സഹായിയായാണ് സിനിമയിലെത്തുന്നത്. മുന്‍ എംപി ജോര്‍ജ് തോമസ് കൊട്ടുകാപ്പള്ളിയുടെ മകനാണ് ഐസക് തോമസ്. ചിത്രയാണ് ഭാര്യ.

ശബ്ദവും നിശബ്ദതയും ചേരുന്നതാണ് ഐസക് തോമസ് കൊട്ടുകാപ്പള്ളിക്കു സംഗീതം. കുട്ടിക്കാലം മുതല്‍ കേട്ട ശബ്ദങ്ങളില്‍ പലതും അദ്ദേഹം ഒരു നോട്ടുപുസ്തകത്തില്‍ കുറിച്ചിട്ടിട്ടുണ്ട്. മനസിലെ നിശബ്ദതയുമായി അവ ചേര്‍ത്ത് സിനിമയില്‍ അദ്ദേഹം തീര്‍ത്തത് വിസ്മയതാളങ്ങളാണ്.

English Summery : Music director Isaac Thomas Kottukappally has passed away

 ടൂൾ കിറ്റ് കേസിൽ മലയാളി അഭിഭാഷകയും പരിസ്ഥിതി പ്രവർത്തകയുമായ നികിത ജേക്കബിന് ഇടക്കാല ജാമ്യം. മൂന്ന് ആഴ്ചത്തേക്ക് അറസ്റ്റ് നടപടികൾ തടഞ്ഞാണ് ബോംബെ ഹൈക്കോടതിയുടെ നടപടി. ഈ കാലയളവിനകം നികിത മുൻകൂർ ജാമ്യത്തിനായി കേസ് പരിധിയിലുള്ള ഡൽഹി കോടതിയെ സമീപിക്കണം.
നികിതയെ അറസ്റ്റ് ചെയ്യുകയാണെങ്കിൽ 25000 രൂപയുടെ ആൾ ജാമ്യത്തിലും തുല്യ തുകയ്‌ക്കുള്ള ആൾജാമ്യത്തിലും വിട്ടയ്ക്കണമെന്നും കോടതി നിർദേശിച്ചു. നികിത ജേക്കബിന് മതപരമായോ, സാമ്പത്തികമായോ, രാഷ്ട്രീയമായോ അജണ്ടകളോ,ഉദ്ദേശങ്ങളോ ഇല്ലായിരുന്നുവെന്നും കോടതി നിരീക്ഷിച്ചു.

കേസിൽ ഡൽഹി കോടതിയാണ് അറസ്റ്റ് വാറന്റ് പുറപ്പെടുവിച്ചതെന്നും ഇടക്കാല സംരക്ഷണം നൽകാൻ ബോംബെ കോടതിക്ക് സാധിക്കില്ലെന്നും ഡൽഹി പൊലീസ് വാദിച്ചിരുന്നു. എന്നാൽ ഈ വാദം കോടതി തള്ളി. കേസിൽ ബോംബ ഹൈക്കോടതിക്കും ഇടക്കാല സംരക്ഷണം നൽകാൻ അധികാരമുണ്ടെന്നും കോടതി നീരിക്ഷിച്ചു.

കർഷക സമരവുമായി ബന്ധപ്പെട്ട് പരിസ്ഥിതി പ്രവർത്തക ഗ്രേറ്റ ട്യൂൻബർഗിന് ട്വീറ്റ് ചെയ്യാൻ ടൂൾകിറ്റ് ഷെയർ ചെയ്തെന്ന കേസിലാണ് മുംബൈയിൽ അഭിഭാഷകയായ നികിതയ്‌ക്കെതിരെ  അറസ്റ്റ് വാറണ്ട് പുറപ്പെടുവിച്ചത്.

English Summary : Toolkit case bombay hc holds nikita jacob’s arrest

കൊച്ചി: മരട് ഫ്ളാറ്റ് പൊളിക്കല്‍ പശ്ചാത്തലമാക്കി കണ്ണന്‍ താമരക്കുളം സംവിധാനം ചെയ്‍ത ചിത്രത്തിന്‍റെ റിലീസിംഗ് എറണാകുളം മുന്‍സിഫ് കോടതി തടഞ്ഞു. ‘മരട് 357’ എന്ന സിനിമയുടെ റിലീസിംഗ് ആണ് തടഞ്ഞിരിക്കുന്നത്. സിനിമയുടെ ട്രെയ്‍ലറുകളോ ഭാഗങ്ങളോ റീലിസ് ചെയ്യരുതെന്നും മുന്‍സിഫ് കോടതിയുടെ ഉത്തരവിലുണ്ട്. മരടിലെ പൊളിച്ച ഫ്ളാറ്റുകളുടെ നിര്‍മാതാക്കള്‍ നല്‍കിയ ഹര്‍ജിയിലാണ് നടപടി. കോടതിയുടെ പരിഗണനയിലിരിക്കുന്ന മരട് കേസിന്‍റെ വിചാരണയെ സിനിമ ബാധിക്കുമെന്നാണ് ഫ്ളാറ്റ് നിര്‍മാതാക്കളുടെ വാദം. സിനിമയുടെ നിര്‍മാതാക്കള്‍ക്ക് നിക്ഷിപ്ത താല്‍പര്യമുണ്ടെന്നും ഹര്‍ജിക്കാര്‍ ആരോപിക്കുന്നു.

എന്നാൽ സിനിമയിൽ നിർമാതാക്കൾ പറയുന്ന പോലെ അവരെ അപകീർത്തിപ്പെടുത്തുന്ന ഒരു രംഗം പോലും ഇല്ലന്ന് ചിത്രത്തിൻ്റെ സംവിധായകൻ കണ്ണൻ താമരക്കുളം പറഞ്ഞു.

ഈ മാസം 19ന് തിയറ്ററുകളില്‍ എത്താനിരുന്ന ചിത്രമാണ് മരട് 357. ജയറാം നായകനായ ‘പട്ടാഭിരാമന്’ ശേഷം കണ്ണന്‍ താമരക്കുളം സംവിധാനം ചെയ്‍ത ചിത്രവുമാണ്. ദിനേശ് പള്ളത്തിന്‍റേതാണ് തിരക്കഥ. അനൂപ് മേനോനൊപ്പം ധര്‍മ്മജന്‍ ബോല്‍ഗാട്ടി, ഷീലു എബ്രഹാം, നൂറിന്‍ ഷെരീഫ്, മനോജ് കെ ജയന്‍, ബൈജു സന്തോഷ്, സാജില്‍ സുദര്‍ശന്‍, സെന്തില്‍ കൃഷ്‍ണ, സുധീഷ്, ഹരീഷ് കണാരന്‍, കൈലാഷ്, ശ്രീജിത്ത് രവി, ജയന്‍ ചേര്‍ത്തല, സരയു തുടങ്ങി വലിയ താരനിര അണിനിരക്കുന്നുണ്ട് ചിത്രത്തില്‍. അബാം മൂവീസിന്‍റെ ബാനറില്‍ അബ്രഹാം മാത്യുവും സ്വര്‍ണ്ണലയ സിനിമാസിന്‍റെ ബാനറില്‍ സുദര്‍ശന്‍ കാഞ്ഞിരംകുളവും ചേര്‍ന്നാണ് നിര്‍മ്മാണം.

English Summary : The release of ‘Maradu 357’ has been blocked by the court

കത്വ ഫണ്ട് തട്ടിപ്പിൽ മുസ്ലിം യൂത്ത് ലീഗ് സംസ്ഥാന ജനറൽ സെക്രട്ടറി പി കെ ഫിറോസിനെതിരെ കേസെടുത്തു. മുൻ യൂത്ത് ലീഗ് നേതാവ് യൂസഫ് പടനിലത്തിന്റെ പരാതിയിൽ കുന്നമംഗലം പൊലീസാണ് കേസെടുത്തത്.

ഫണ്ട് തട്ടിപ്പിന് ദേശീയ നേതൃത്വത്തെ പഴിചാരി ഒഴിഞ്ഞുമാറുകയായിരുന്നു ഫിറോസ്. ബാങ്ക് അക്കൗണ്ട് വിവരങ്ങളോ പിരിവിന്റെ കൃത്യമായ കണക്കുകളോ പുറത്തുവിടാനോ യൂത്ത് ലീഗ് നേതൃത്വം തയ്യാറായുമില്ല.

ഫണ്ട് വെട്ടിപ്പ് സംബന്ധിച്ച് പരസ്യ ചർച്ചയ്‌ക്ക് തയ്യാറാകണമെന്ന വെല്ലുവിളി ഏറ്റെടുക്കാൻ ഫിറോസ് വിസമ്മതിച്ചു. ദേശീയ നേതൃത്വത്തെയാണ് ഇക്കാര്യത്തിൽ ചർച്ചയ്ക്ക് വിളിക്കേണ്ടതെന്നായിരുന്നു  ഫിറോസിന്റെ നിലപാട്.

English Summary : Katwa fund fraud: A case has been registered against PK Feroz

തിരുവനന്തപുരത്ത് ആറ്റുകാൽ പൊങ്കാല മഹോത്സവം ഒരുക്കങ്ങൾ പൂർത്തിയായി. 19- മുതൽ 28 വരെയുള്ള ഉത്സവം പൂർണമായും കോവിഡ്‌ മാനദണ്ഡങ്ങൾ പാലിച്ചാകും. 27-ന് രാവിലെ 10.50-നാണ് പൊങ്കാല. കാപ്പുകെട്ടുന്ന ചടങ്ങുമുതൽ പൊങ്കാല, പുറത്തെഴുന്നെള്ളത്ത് എന്നിവയില്‍ ആൾക്കൂട്ടമുണ്ടാകില്ല.

ഉത്സവനാളുകളിലെ ക്ഷേത്ര ദർശനം, വിളക്കുകെട്ട് എഴുന്നെള്ളത്ത്, പുറത്തെഴുന്നെള്ളത്ത് എന്നിവയ്ക്കും നിയന്ത്രണമുണ്ടായിരിക്കും. പണ്ടാര അടുപ്പിൽ മാത്രമായിരിക്കും പൊങ്കാല. വിശ്വാസികൾ വീടുകളിൽ പൊങ്കാലയിടണം. പൊതുസ്ഥലങ്ങളിൽ പൊങ്കാല ഇടരുത്‌. ക്ഷേത്രത്തിൽ നടക്കുന്ന കാപ്പുകെട്ടിനും കാപ്പ് അഴിക്കലിനും പൂജാരിമാരും പാട്ട് നടത്തുന്ന കുടുംബത്തിന്റെ പ്രതിനിധിയും മാത്രം പങ്കെടുക്കും.

കുത്തിയോട്ടത്തിന് ഒരു കുട്ടി മാത്രം ചൂരൽകുത്തുമെന്ന് ട്രസ്റ്റ്  ഭാരവാഹികൾ അറിയിച്ചു. 

English Summary : Attukal Pongala is only in the Pandara Adupp

ബിഹാറിൽ പതിനൊന്നുകാരിയെ പീഡിപ്പിച്ച്‌ ഗർഭിണിയാക്കിയ കേസിൽ സ്വകാര്യ സ്കൂൾ പ്രിൻസിപ്പലിന്‌ വധശിക്ഷ. ഒരു ലക്ഷം രൂപ പിഴയും ഒടുക്കണം. അരവിന്ദ്‌ എന്ന്‌ അറിയപ്പെടുന്ന രാജ്‌ സിൻഘാനിയയാണ്‌ ശിക്ഷിക്കപ്പെട്ടത്‌. കൂട്ടുപ്രതിയും സ്കൂളിലെ അധ്യാപകനുമായിരുന്ന അഭിഷേക്‌ കുമാറിന്‌ ജീവപര്യന്തം തടവും 50000 രൂപ പിഴയും പ്രത്യേക പോക്‌സോ കോടതി വിധിച്ചു. ഇരയ്‌ക്ക്‌ നഷ്‌ടപരിഹാരം നൽകുന്നതിനുള്ള പദ്ധതിയിൽനിന്ന്‌ പെൺകുട്ടി‌ക്ക്‌ 15 ലക്ഷം രൂപ നൽകാനും കോടതി ഉത്തരവിട്ടു.

2018ൽ പെൺകുട്ടി ഗർഭിണിയാണെന്ന്‌ അറിഞ്ഞ്‌ മാതാപിതാക്കൾ ചോദിച്ചപ്പോഴാണ്‌ അവൾ പീഡനവിവരം പറഞ്ഞത്‌. തുടർന്ന്‌ കേസ്‌ രജിസ്റ്റർ ചെയ്യുകയും കുട്ടി‌ക്ക്‌ സർക്കാർ ആശുപത്രിയിൽ ഗർഭച്ഛിദ്രം നടത്തുകയും ചെയ്തു. ഡിഎൻഎ പരിശോധനയിൽ പ്രതിയുടെ പങ്ക്‌ തെളിഞ്ഞു. പ്രിൻസിപ്പൽ തന്നെ മുറിയിലേക്ക്‌ വിളിച്ച്‌ പീഡിപ്പിച്ചിരുന്നതായി‌ പെൺകുട്ടിയുടെ മൊഴിയിലുണ്ട്‌. വീട്ടിൽ പറഞ്ഞാൽ വീഡിയോ പുറത്തുവിടുമെന്ന്‌ ഭീഷണിപ്പെടുത്തിയിരുന്നു. 

English Summary : School principal sentenced to death for raping 11-year-old girl in Bihar