സംസ്ഥാനത്ത് 2 പേര്‍ക്ക് കൂടി സിക്ക വൈറസ് സ്ഥിരീകരിച്ചതായി ആരോഗ്യ വകുപ്പ് മന്ത്രി വീണാ ജോര്‍ജ് അറിയിച്ചു. പൂന്തുറ സ്വദേശിക്കും (35), മറ്റൊരു സ്വകാര്യ ആശുപത്രിയില്‍ ചികിത്സ തേടിയ ശാസ്തമംഗലം സ്വദേശിനിക്കുമാണ് (41) സിക്ക വൈറസ്സ്ഥിതികരിച്ചത്.

തിരുവനന്തപുരം മെഡിക്കല്‍ കോളേജിലെ വൈറോളജി ലാബില്‍ നടത്തിയ പരിശോധനയിലാണ് പൂന്തുറ സ്വദേശിക്ക് സിക്ക വൈറസ് സ്ഥിരീകരിച്ചത്.കോയമ്പത്തൂര്‍ ലാബില്‍ നടത്തിയ പരിശോധനയിലാണ് ശാസ്തമംഗലം സ്വദേശിനിക്ക് സിക്ക വൈറസ് സ്ഥിരീകരിച്ചത്.തിങ്കളാഴ്ച മുതലാണ് മെഡിക്കല്‍ കോളേജില്‍ സിക്ക വൈറസ് പരിശോധന ആരംഭിച്ചത്.15 സാമ്പിളുകളാണ് ആദ്യദിനം പരിശോധിച്ചത്. അതില്‍ ഒരാള്‍ക്ക് ഡെങ്കിപ്പനി സ്ഥിരീകരിച്ചു.ബാക്കി 13 പേരുടെ പരിശോധനാഫലം നെഗറ്റീവാണ്.ഇതോടെ സംസ്ഥാനത്ത് സിക്ക  വൈറസ് സ്ഥിരീകരിച്ചവരുടെ എണ്ണം 21 ആയി. ജില്ലാ മെഡിക്കല്‍ ഓഫീസറോട് സ്ഥലം സന്ദര്‍ശിച്ച് പ്രതിരോധ നടപടികള്‍ ഊര്‍ജിതമാക്കാന്‍ മന്ത്രി നിര്‍ദേശം നല്‍കി.പ്രധാനമായും ഈഡിസ് കൊതുകുകള്‍ പരത്തുന്ന രോഗമാണ് സിക്ക.കൊതുകു കടിയില്‍ നിന്നും രക്ഷനേടുകയാണ് സിക്കയെ പ്രതിരോധിക്കാനുള്ള പ്രധാന മാര്‍ഗം.

അതിനാല്‍ തന്നെ സ്വന്തം വീടും പരിസരവും എല്ലാവരും വൃത്തിയായി സൂക്ഷിക്കേണ്ടതാണ്.
വെള്ളം കെട്ടിനില്‍ക്കാതെ വീടും പരിസരവും സ്ഥാപനങ്ങളും സംരക്ഷിക്കേണ്ടതാണ്.
ഇന്‍ഡോര്‍ പ്ലാന്റുകള്‍, ഫ്രിഡ്ജിന്റെ ഡ്രേ എന്നിവ ആഴ്ചയിലൊരിക്കല്‍ വൃത്തിയാക്കണം.
 പനി, ചുവന്ന പാടുകള്‍, പേശി വേദന, സന്ധി വേദന, തലവേദന തുടങ്ങിയ ലക്ഷണങ്ങള്‍ കണ്ടാല്‍ എല്ലാവരും ചികിത്സ തേടേണ്ടതാണെന്ന് മന്ത്രി വ്യക്തമാക്കി.

Two more were confirmed to have the Zika virus, and 13 tested negative

കര്‍ണാടക ഗവര്‍ണറായി താവര്‍ചന്ദ് ഗെഹ്‌ലോട്ട് ചുമതലയേറ്റു. ഞായറാഴ്ച രാവിലെ 10.30ന് രാജ്ഭവനിലെ ഗ്ലാസ് ഹൗസില്‍ നടന്ന ചടങ്ങില്‍ ഹൈകോടതി ചീഫ് ജസ്റ്റിസ് അഭയ് ശ്രീനിവാസ ഓഖ സത്യപ്രതിജ്ഞ ചൊല്ലിക്കൊടുത്തു.
രണ്ടാം മോദി മന്ത്രിസഭയില്‍ സാമൂഹിക നീതി മന്ത്രിയായിരുന്ന താവര്‍ചന്ദിനെ മന്ത്രിസഭ പുനഃസംഘാടനത്തില്‍ ഒഴിവാക്കിയാണ് കര്‍ണാടക ഗവര്‍ണറായി നിയമിച്ചത്. 2006 മുതല്‍ 2014 വരെ കര്‍ണാടകയുടെ ചുമതലയുള്ള ബി.ജെ.പി ജനറല്‍ സെക്രട്ടറിയായിരുന്നു.

English Summary:Thawar Chand Gehlot takes over as Governor of Karnataka

തമിഴ്‌നാടിനെ വിഭജിക്കാന്‍ കേന്ദ്രസര്‍ക്കാര്‍ നീക്കമെന്ന റിപ്പോര്‍ട്ടിനെ തുടര്‍ന്ന് തമിഴ്നാട്ടില്‍ എല്ലായിടത്തും വ്യാപക പ്രതിഷേധം. എം.ഡി.എം.കെ പ്രവര്‍ത്തകര്‍ സംസ്ഥാനമൊട്ടുക്കും ധര്‍ണ നടത്തി. ഡി.എം.കെ, ഇടത്, കോണ്‍ഗ്രസ് കക്ഷികളും മറ്റു തമിഴ് സംഘടനകളും പ്രതിഷേധവുമായി രംഗത്തിറങ്ങിയിട്ടുണ്ട്. തമിഴക പടിഞ്ഞാറന്‍ ജില്ലകളായ കോയമ്പത്തൂര്‍, തിരുപ്പൂര്‍, ഈറോഡ്, നാമക്കല്‍, സേലം, ധര്‍മപുരി, നീലഗിരി, കരൂര്‍, കൃഷ്ണഗിരി ജില്ലകള്‍ ഉള്‍പ്പെടുന്ന കൊങ്കുമേഖലയെ പ്രത്യേക കേന്ദ്രഭരണ പ്രദേശമാക്കി മാറ്റുമെന്നാണ് തമിഴ് ദിനപത്രങ്ങളിലെ റിപ്പോര്‍ട്ട്.

പത്രവാര്‍ത്തകള്‍ക്ക് പിന്നാലെ ഇതേ ആവശ്യം ഉന്നയിച്ച് ബിജെപി തമിഴ്‌നാട് ഉപാധ്യക്ഷന്‍ കാരൂര്‍ നാഗരാജന്‍ രംഗത്തെത്തി. കോയമ്പത്തൂരും, ചെന്നൈയും തലസ്ഥാനങ്ങളാക്കി രണ്ട് സംസ്ഥാനം രൂപീകരിക്കണമെന്നാണ് ആവശ്യം. 2024ലെ ലോക്‌സഭാ തെരഞ്ഞെടുപ്പ് മുന്‍നിര്‍ത്തിയാണ് നീക്കമെന്നാണ് റിപ്പോര്‍ട്ടുകള്‍. അണ്ണാ ഡിഎംകെയ്ക്ക് ശക്തമായ സ്വാധീനമുള്ള ഇടമാണ് കൊങ്കുമേഖല. നിലവില്‍ പത്തു ലോക്സഭ, 61 നിയമസഭ മണ്ഡലങ്ങളുണ്ട്. സമീപ മേഖലയിലെ കുറച്ചു മണ്ഡലങ്ങള്‍കൂടി ചേര്‍ത്ത് 90 നിയമസഭാ മണ്ഡലങ്ങളോടെ കേന്ദ്രഭരണ പ്രദേശമാക്കി മാറ്റാന്‍ ചര്‍ച്ച നടക്കുന്നുവെന്നാണ് റിപ്പോര്‍ട്ടുകള്‍.

English Summary: Move to divide Tamil Nadu and make it Konkunad

തിരുവനന്തപുരം: കോവിഡിനെ ത്തുടര്‍ന്ന് നിര്‍ത്തിവച്ച തിരുവനന്തപുരം – ബംഗുളുരൂ സര്‍വ്വീസ് കെഎസ്ആര്‍ടിസി പുനനാരംഭിച്ചു. കോവിഡ് മാനദണ്ഡങ്ങളില്‍ ഇളവ് വന്ന സാഹചര്യത്തില്‍ ഇരു സംസ്ഥാനങ്ങളും സര്‍വ്വീസുകള്‍ ആരംഭിക്കാന്‍ തീരുമാനിക്കുകയായിരുന്നു.  ഏപ്രില്‍ 9 മുതല്‍ നിര്‍ത്തി വച്ച സര്‍വ്വീസാണ് പുനരാരംഭിച്ചത്.

തിരുവനന്തപുരത്ത് നിന്നും ഞാറാഴ്ച വൈകുന്നേരം 5 മണിക്കാണ് സര്‍വ്വീസ് ആരംഭിച്ചത്.കൊല്ലം, ആലപ്പുഴ, വൈറ്റില, തൃശ്ശൂര്‍, കോഴിക്കോട് ,സു.ബത്തേരി ,മൈസൂര്‍, മാണ്ഡ്യ വഴിയാണ് ബംഗുളൂരു സര്‍വ്വീസ് ആദ്യ ദിനം സര്‍വ്വീസ് നടത്തിയത്. ആദ്യ ദിവസം തന്നെ മുഴുവന്‍ സീറ്റുകളും റിസര്‍വേഷന്‍ ഫുള്‍ ആയിരുന്നു. കോവിഡ് മാനദണ്ഡങ്ങള്‍ പാലിച്ചാണ് സര്‍വ്വീസുകള്‍ നടത്തുക.

അന്തര്‍ സംസ്ഥാന ഗതാഗതത്തിന് തമിഴ്‌നാട് സര്‍ക്കാര്‍ ഇത് വരെ അനുമതി നല്‍കിയിട്ടില്ല. അത് കൂടി ലഭിച്ചാല്‍ പാലക്കാട് സേലം വഴിയുള്ള ബംഗുളുരു സര്‍വ്വീസ് ആരംഭിക്കാനാകും.

English Summary: KSRTC launches Bangalore service

ലണ്ടന്‍: വിംബിള്‍ഡണ്‍ പുരുഷ സിംഗിള്‍സ് കിരീടം ലോക ഒന്നാം നമ്പര്‍ താരം നൊവാക് ജോക്കോവിച്ചിന്. ഇറ്റലിയുടെ മാറ്റിയോ ബെരറ്റിനിയെ പരാജയപ്പെടുത്തിയാണ് സെര്‍ബിയന്‍ താരം ചാമ്പ്യനായത്. ഒന്നിനെതിരെ മൂന്നു സെറ്റുകള്‍ക്കായിരുന്നു ജോക്കോയുടെ വിജയം. സ്‌കോര്‍: 6-7, 6-4, 6-4, 6-3.
വിജയത്തോടെ ജോക്കോ 20 ഗ്രാന്‍സ്ലാം കിരീടങ്ങളുള്ള റോജര്‍ ഫെഡറര്‍, റഫേല്‍ നദാല്‍ എന്നിവര്‍ക്കൊപ്പമെത്തി. ഈ സീസണില്‍ അപാരഫോമിലുള്ള ജോക്കോവിച്ച് കലണ്ടര്‍ സ്ലാമെന്ന അപൂര്‍വ നേട്ടത്തിലേക്കാണ് റാക്കേറ്റ് വീശുന്നത്. ഓസ്‌ട്രേലിയന്‍ ഓപ്പണ്‍, ഫ്രഞ്ച് ഓപ്പണ്‍, വിംബിള്‍ഡണ്‍ എന്നിവ സെര്‍ബിയന്‍ താരം ഇതിനകം സ്വന്തമാക്കി.

English Summary: Djokovic wins Wimbledon title

തിരുവനന്തപുരം: സര്‍ക്കാറിന്റെ  സൗജന്യ ഭക്ഷ്യക്കിറ്റ് ഈ മാസമില്ല. ആഗസ്റ്റ് ഒന്നുമുതല്‍ ഓണക്കിറ്റ് വിതരണം ആരംഭിക്കേണ്ടതിനാല്‍ ജൂലൈ മാസത്തില്‍ കിറ്റ് വിതരണം നടത്തുന്നത് സപ്ലൈകോക്ക് ബുദ്ധിമുട്ട് സൃഷ്ടിക്കുമെന്ന് കണ്ടാണ് വിതരണം നിര്‍ത്തിയത്. ഓണക്കിറ്റ് വിഭവങ്ങള്‍ സംബന്ധിച്ച് മുഖ്യമന്ത്രി പിണറായി വിജയനുമായി ഭക്ഷ്യമന്ത്രി ജി.ആര്‍. അനില്‍ ഞായറാഴ്ച ചര്‍ച്ച നടത്തും. തുടര്‍ന്ന് അടുത്തയാഴ്ച ഉത്തരവിറങ്ങും.

കുട്ടികള്‍ക്ക് മിഠായിപ്പൊതി കിറ്റിലുണ്ടാകും. 20 മിഠായികള്‍ നല്‍കാനാണ് സപ്ലൈകോ ഭക്ഷ്യവകുപ്പിന് നല്‍കിയിരിക്കുന്ന ശിപാര്‍ശ.

English Summary: Onam kit from August 1; No food kit this month

ഹൈദരാബാദ്: കിറ്റെക്സ് കആദ്യഘട്ടത്തില്‍ 1000 കോടി രൂപ  തെലങ്കാനയില്‍ നിക്ഷേപിക്കും.തെലങ്കാന വ്യവസായ മന്ത്രി കെ ടി രാമറാവുവുമായി നടത്തിയ ചര്‍ച്ചയിലാണ് തീരുമാനം. വാറംഗലിലെ കകാതിയ മെഗാ ടെക്‌സ്‌റ്റൈല്‍ പാര്‍ക്കില്‍ ആരംഭിക്കുന്ന ടെക്‌സ്‌റ്റൈല്‍ അപ്പാരല്‍ പാര്‍ക്കിന്റെ ആദ്യഘട്ടമെന്ന നിലയിലാണ് 1000 കോടി രൂപ നിക്ഷേപിക്കുക. ഇതുവഴി തെലങ്കാനയില്‍ 4000 പേര്‍ക്ക് തൊഴില്‍ ലഭിക്കുമെന്നും കിറ്റെക്‌സ് എം ഡി സാബു ജേക്കബ് അറിയിച്ചു.

കുട്ടികള്‍ക്കുള്ള തുണിത്തരങ്ങള്‍ നിര്‍മ്മിക്കുന്ന ലോകത്തെ രണ്ടാമത്തെ ഏറ്റവും വലിയ കമ്പനിയായ കിറ്റക്‌സിനെ തെലങ്കാനയിലേയ്ക്ക് കൊണ്ടുവരുന്നതില്‍ അതിയായ സന്തോഷമുണ്ട്. പുതിയ ഫാക്ടറി ആരംഭിക്കാന്‍ വാറംഗലിലെ കാകതിയ മെഗാ ടെക്‌സ്‌റ്റൈല്‍ പാര്‍ക്ക് അവര്‍ തെരഞ്ഞെടുത്തു. വളരെ പെട്ടെന്ന് തന്നെ തീരുമാനമെടുത്ത കിറ്റെക്‌സ് എംഡി സാബു എം ജേക്കബിന് നന്ദി പറയുന്നവെന്ന്  കെ ടി രാമറാവു ട്വീറ്റ് ചെയ്തു.

തെലങ്കാന സര്‍ക്കാരിന്റെ പ്രത്യേക ക്ഷണം സ്വീകരിച്ചാണ് സാബു ജേക്കബും സംഘവും ഇന്നലെ ഹൈദരാബാദിലെത്തിയത്. മന്ത്രി രാമ റാവുവിനൊപ്പം ഉച്ചഭക്ഷണം കഴിച്ച ശേഷമാണ് ചര്‍ച്ചകള്‍ തുടങ്ങിയത്. സംഘം ഇന്ന് മടങ്ങും. കിറ്റെക്സ് സംഘത്തിനായി തെലങ്കാന സര്‍ക്കാര്‍ പ്രത്യേക വിമാനമയച്ചിരുന്നു.കേരളത്തിലെ പുതിയ നിക്ഷേപ പദ്ധതികളില്‍ നിന്ന് പിന്‍മാറുന്നെന്ന് പ്രഖ്യാപിച്ചതിന് പിന്നാലെയാണ് കിറ്റെക്സിന് തെലങ്കാനയില്‍ നിന്ന് ക്ഷണം ലഭിച്ചത്. മറ്റു സംസ്ഥാനങ്ങളും കിറ്റെക്സിനെ ക്ഷണിച്ചിരുന്നു.

English Summary: Kitex will invest Rs 1,000 crore in Telangana in the first phase

കൊച്ചി: കൊല്ലം നിലമേല്‍ കൈതോട് സ്വദേശിനി എസ് വി വിസ്മയയുടെ മരണവുമായി ബന്ധപ്പെട്ട കേസ് റദ്ദാക്കണമെന്നാവശ്യപ്പെട്ട് ഭര്‍ത്താവ് കിരണ്‍കുമാര്‍ സമര്‍പ്പിച്ച ഹര്‍ജി പിന്‍വലിച്ചു. ഹര്‍ജി ഹൈകോടതി വാദത്തിനെടുത്തപ്പോള്‍ തിരുത്തലുകള്‍ വരുത്താനുണ്ടെന്നും പിന്‍വലിക്കുകയാണന്നും അഭിഭാഷകന്‍ വ്യക്തമാക്കി. തുടര്‍ന്ന് കോടതി ഹര്‍ജി തള്ളി.

തനിക്കെതിരെ തെളിവില്ലന്നും വിസ്മയയുടെ പിതാവിന്റെ മൊഴിയുടെ അടിസ്ഥാനത്തില്‍ മാത്രമാണ് കേസെടുത്തിട്ടുള്ളതെന്നുമാണ് കിരണിന്റെ വാദം. കേസ് റദ്ദാക്കണമെന്ന ഹര്‍ജി അന്വേഷണം പ്രാഥമിക ഘട്ടത്തിലാണന്ന് ചുണ്ടിക്കാട്ടി വിചാരണക്കോടതി തള്ളിയിരുന്നു. തുടര്‍ന്നാണ് കിരണ്‍ ഹൈക്കോടതിയെ സമീപിച്ചത്.
ജൂണ്‍ 21 തിങ്കളാഴ്ച പുലര്‍ച്ചെയാണ് വിസ്മയയെ ഭര്‍തൃവീട്ടില്‍ തൂങ്ങിമരിച്ച നിലയില്‍ കണ്ടെത്തിയത്. രണ്ടാം നിലയിലെ കിടപ്പുമുറിയോട് ചേര്‍ന്ന ശുചിമുറിയുടെ വെന്റിലേഷനിലേഷനിലാണ് വിസ്മയെ തൂങ്ങിയ നിലയില്‍ കണ്ടത്.

English Summary: Vismaya death: Kiran’s plea withdrawn