ഇന്ന് ജൂൺ 5. സർബത്ത് എന്ന ഞങ്ങളുടെ ഹ്രസ്വചിത്രം നിങ്ങൾക്ക് മുന്നിലെത്തിയിട്ട് ഇന്നേയ്ക്ക് ഒരു വർഷം പൂർത്തിയാകുന്നു. വളരെ വലിയ സ്വീകാര്യതയായിരുന്നു എല്ലാവരും ഞങ്ങൾക്ക് നൽകിയത്. മലയാളത്തിന് പുറമേ കന്നഡ, തമിഴ്, തെലുങ്ക്, ഹിന്ദി എന്നീ ഭാഷകളിലേയ്ക്കും സർബത്ത് ഒരുക്കുവാൻ ഞങ്ങൾക്ക് കഴിഞ്ഞു. എല്ലാ ഭാഷകളിലും വലിയ തോതിലുള്ള സെലിബ്രിറ്റി സപ്പോർട്ടോട് കൂടി റിലീസ് ചെയ്ത കേവലം അഞ്ച് മിനിട്ട് മാത്രം ദൈർഘ്യമുള്ള ഈ ചെറുചിത്രം ലക്ഷക്കണക്കിന് ആളുകളിലേയ്ക്ക് വളരെ പെട്ടെന്ന് എത്തിപ്പെടുകയുണ്ടായി. നേരിട്ടു വിളിച്ചഭിപ്രായമറിയിച്ചും, മെസ്സേജുകളയച്ചും, ഷെയർ ചെയ്തുമൊക്കെ ഭാഷാഭേദമെന്യേ പ്രമുഖരടക്കം നിരവധി ആളുകൾ അന്ന് സർബത്ത് ഏറ്റെടുത്തു. അതിനും പുറമേ പിന്നീടുള്ള നാളുകളിൽ നിരവധി പുരസ്കാരങ്ങളും സർബത്തിനെ തേടിയെത്തി. ഒരു ഷോർട്ട് ഫിലിമിന് കിട്ടാവുന്ന ഏറ്റവും വലിയ അംഗീകാരങ്ങളായ് ഇവയെയെല്ലാം ഞാൻ കാണുന്നു.

ഒന്നാം ലോക്ക് ഡൗണിൻ്റെ പരിമിതിയിൽ നിന്നു കൊണ്ടാണ് അന്ന് ഞങ്ങൾ സർബത്ത് ഒരുക്കിയത്.

നന്ദിയോടെ ഓർക്കുവാൻ ഏറെപ്പേരുണ്ട്. ആദ്യമായ് ഓർക്കേണ്ടത് ഈ ആശയം എന്നോട് പങ്കു വച്ച സുഹൃത്തും, സർബത്തിൻ്റെ രചയിതാവുമായ വിവേക് മോഹനെയാണ്. ഒരുമിച്ച് ധാരാളം പരസ്യചിത്രങ്ങൾ ഒരുക്കിയ ബന്ധമുണ്ട് ഞങ്ങൾക്കിടയിൽ. പിന്നെ, ശബ്ദം കൊണ്ടും രൂപം കൊണ്ടും സർബത്തിൽ നിറഞ്ഞു നിന്ന ഞങ്ങളുടെ നടൻ, പ്രിയപ്പെട്ട ബാദുക്ക, നിർമ്മാണത്തിൽ എൻ്റെയൊപ്പം പങ്കാളിയായ ടീം മീഡിയ പ്രൊഡക്ഷൻസ് സാരഥി സാഗർ അയ്യപ്പൻ. സാഗർ തന്നെയായിരുന്നു ചിത്രത്തിൻ്റെ ഛായാഗ്രഹണവും നിർവ്വഹിച്ചത്. വളരെ മനോഹരമായി സൗണ്ട് ഡിസൈൻ ചെയ്ത മനോജ് മാത്യു, ഹൃദയത്തിൽ തട്ടുന്ന പശ്ചാത്തല സംഗീതമൊരുക്കിയ ആനന്ദ് മധുസൂദനൻ, എഡിറ്റർ രാജേഷ് കോടോത്ത്, അസോസിയേറ്റ് ഡയറക്ടറായ് തോളോട് തോൾ ചേർന്ന് നിന്ന രതീഷ് എസ്, കലാസംവിധാനം ഒരുക്കിയ അഖിൽ കുമ്പിടി, സിനി സ്പേസ് ഗിരീഷ് കൊടുങ്ങല്ലൂർ, പിന്നെ വിവിധ ഭാഷകളിൽ ശബ്ദം നൽകിയവർ, പോസ്റ്റർ ഒരുക്കിയ പാസിയോ അഡ്വർടൈസിംഗിലെ മിഥുൻ മുരളീധരൻ, മറ്റെല്ലാ ക്രൂ മെംമ്പേർഴ്സ്, മീഡിയ, സെലിബ്രിറ്റീസ്, പി.ആർ.ഒ വർക്ക് ചെയ്ത പി. ആർ. സുമേരൻ, നിങ്ങളോരോരുത്തരും അങ്ങനെ ഒരുപാട് ഒരുപാട് പേർ….

പിന്നെ, സർബത്തിൻ്റെ ഇത്രയും വലിയൊരു ലോഞ്ചിങ്ങിന് കളമൊരുക്കിയ മലയാളത്തിലെ ഏറ്റവും തിരക്കേറിയ പ്രൊഡക്ഷൻ കൺട്രോളറും, നിർമ്മാതാവുമായ ബാദുക്കയ്ക്കും, ഇന്ത്യൻ ആഡ് ഫിലിം മേക്കേഴ്സ് അസോസിയേഷനിലെ എൻ്റെ പ്രിയപ്പെട്ട സുഹൃത്തും, ഫിലിം മേക്കറുമായ സ്ലീബച്ചേട്ടനും നന്ദി… നന്ദി… നന്ദി. ഒരായിരം നന്ദി.

English Summary :’Sarbath’ is 1 year old, writes director Sooraj Tom

റോഡ് ത്രില്ലര്‍ മൂവി ‘മിഷന്‍ സി’ യുടെ ട്രെയ്ലര്‍ സൂപ്പര്‍ ഹിറ്റായതോടെ നടന്‍ കൈലാഷിന് അപൂര്‍വ്വനേട്ടം. യുവതാരം അപ്പാനി ശരത്തിനെ കേന്ദ്ര കഥാപാത്രമാക്കി പ്രശസ്ത സംവിധായകന്‍ വിനോദ് ഗുരുവായൂര്‍ ആദ്യമായി ഒരുക്കിയ റോഡ് ത്രില്ലര്‍ മൂവി മിഷന്‍ സി റിലീസിനൊരുങ്ങിയിരിക്കുകയാണ്. ഇതിനിടെ ചിത്രത്തിന്‍റെ ട്രെയ്ലര്‍ തരംഗമായതോടെ ചിത്രത്തില്‍ നിര്‍ണ്ണായക കഥാപാത്രം ചെയ്യുന്ന കൈലാഷ് കൂടുതല്‍ ശ്രദ്ധേയനായി. വേറിട്ട കഥാപാത്രങ്ങളിലൂടെ മലയാളികളുടെ മനസ്സില്‍ ഇടം തേടിയ നടനാണ് കൈലാഷ്. ഒന്നിനൊന്ന് മെച്ചപ്പെട്ട കഥാപാത്രങ്ങളായിരുന്നു താരം ചെയ്ത വേഷങ്ങള്‍. മിഷന്‍ സി യില്‍ ഓടുന്ന ബസ്സില്‍ നിന്നുള്ള കൈലാഷിന്‍റെ സാഹസിക രംഗങ്ങള്‍ സോഷ്യല്‍ മീഡിയയില്‍ വലിയ ചര്‍ച്ചയ്ക്ക് ഇടവെച്ചിരുന്നു. ജീവന്‍ പണയപ്പെടുത്തിയുള്ള താരത്തിന്‍റെ അഭിനയമികവിന് വലിയ സ്വീകാര്യതയാണ് ലഭിച്ചത്. ഇതിനിടെ കൈലാഷിനെതിരെ സോഷ്യല്‍ മീഡിയയില്‍ വ്യാപക ട്രോളുകളും ആക്ഷേപങ്ങളും ഉയര്‍ന്നിരുന്നു. എന്നാല്‍ ഈ ട്രെയിലര്‍ റിലീസായതോടെ എല്ലാം കാറ്റില്‍ പറത്തി കൈലാഷ് തിളങ്ങുകയായിരുന്നു. ഒപ്പം താരത്തെ ആരാധകര്‍ ഏറ്റെടുക്കുകയും ചെയ്തു. കൈലാഷിന്‍റെ അഭിനയജീവിതത്തിലെ വഴിത്തിരിവ് കൂടിയായിരുന്നു മിഷന്‍ സി യുടെ ഈ ട്രെയിലര്‍.
ഇതുവരെ ചെയ്ത കഥാപാത്രങ്ങളില്‍ നിന്ന് തനിക്ക് ഏറെ അഭിമാനം തോന്നിയ കഥാപാത്രമാണ് മിഷന്‍ സിയിലേതെന്ന് കൈലാഷ് പറഞ്ഞു. ക്യാപ്റ്റന്‍ അഭിനവ് എന്ന വേഷമാണ് എന്‍റേത്. വേറിട്ടതും വ്യത്യസ്തവുമായ ഒട്ടേറെ കഥാപാത്രങ്ങള്‍ എനിക്ക് ചെയ്യാന്‍ കഴിഞ്ഞിട്ടുണ്ട്. പക്ഷേ മിഷന്‍ സി യിലെ കഥാപാത്രം കൂടുതല്‍ ശ്രദ്ധേയമാണ്. അത് വലിയൊരു ഉത്തരവാദിത്ത്വമാണ്. എനിക്ക് അവസരങ്ങള്‍ തന്ന സംവിധായകരോടും നിര്‍മ്മാതാക്കളോടും എന്നും എനിക്ക് ആ സ്നേഹവും നന്ദിയുമുണ്ട്. പിന്നെ എന്‍റെ ഏറ്റവും പ്രിയപ്പെട്ട പ്രേക്ഷകരോട് ഹൃദയത്തില്‍ നിന്നുള്ള സ്നേഹവും കടപ്പാടും പങ്കുവെയ്ക്കുകയാണെന്നും കൈലാഷ് പറഞ്ഞു. കലാമൂല്യവും ജനപ്രിയവുമായ സിനിമകളിലൂടെ മലയാളികളുടെ പ്രിയതാരമായി മാറിയ കൈലാഷിന് മിഷന്‍ സി കൂടുതല്‍ ഉത്തരവാദിത്വം നല്‍കുന്ന സിനിമയാണ്.

പേര് സൂചിപ്പിക്കുന്നത് പോലെ മിഷന്‍ സി പ്രേക്ഷകരെ ത്രില്ലടിപ്പിക്കുന്ന ചിത്രമാണ്. തിരക്കഥാകൃത്തും സംവിധായകനുമായ വിനോദ് ഗുരുവായൂരിന്‍റെ ആദ്യ റോഡ് ത്രില്ലര്‍ മൂവി. ടെററിസ്റ്റുകള്‍ ബന്ദികളാക്കിയ ഓടിക്കൊണ്ടിരിക്കുന്ന ഒരു ടൂറിസ്റ്റ് ബസ്സും അതില്‍ കുടുങ്ങിപ്പോയ ഒരു കൂട്ടം വിദ്യാര്‍ത്ഥികളും, അവരെ രക്ഷപ്പെടുത്താന്‍ എത്തുന്ന പോലീസുകാരുടെയും കമാന്‍റോകളുടെയും സാഹസികവും സംഘര്‍ഷഭരിതവുമായ നിമിഷങ്ങളാണ് സിനിമയുടെ ഇതിവൃത്തം. തുടര്‍ന്ന് ഉണ്ടാകുന്ന ഉദ്യോഗജനകമായ വഴിയിലൂടെയാണ് ചിത്രം വികസിക്കുന്നത്. അപ്പാനി ശരത്ത്, മേജര്‍ രവി, ജയകൃഷ്ണന്‍, കൈലാഷ്, ബാലാജി ശര്‍മ്മ തുടങ്ങി മുപ്പത്തഞ്ചോളം പുതുമുഖ താരങ്ങളും ചിത്രത്തില്‍ അണിനിരക്കുന്നുണ്ട്. രാമക്കല്‍മേടും മൂന്നാറുമായിരുന്നു ചിത്രത്തിന്‍റെ പ്രധാന ലൊക്കേഷനുകള്‍, ഹൃദയഹാരിയായ ഗാനങ്ങളും ചിത്രത്തിന്‍റെ മറ്റൊരു പുതുമയാണ്. എം സ്ക്വയര്‍ സിനിമയുടെ ബാനറില്‍ മുല്ല ഷാജിയാണ് മിഷന്‍ സി നിര്‍മ്മിക്കുന്നത്.
പി ആര്‍ സുമേരന്‍(പി ആര്‍ ഒ)

English Summery: Mission C trailer ; Kailash won the applause

ആറു കഥകൾ ചേർന്ന” ചെരാതുകൾ” എന്ന ആന്തോളജി സിനിമ ജൂൺ 17-ന് ഒടിടി റിലീസിനെത്തുന്നു. മലയാളത്തിലെ പത്ത് പ്രമുഖ ഒടിടി പ്ളാറ്റ്ഫോമുകൾ വഴിയാണ് ചിത്രം പ്രേക്ഷകസമക്ഷത്തിലെത്തുന്നത്. ചിത്രത്തിന്റെ ട്രെയിലർ, മലയാളത്തിന്റെ പ്രിയ താരങ്ങളായ മമ്മൂട്ടി, സുരേഷ് ഗോപി തുടങ്ങി നാല്പതോളം പ്രമുഖർ ചേർന്നാണ് റിലീസ് ചെയ്തത്. ട്രെയിലറിന് മികച്ച പ്രതികരണമാണ് ലഭിച്ചുകൊണ്ടിരി ക്കുന്നത്. മാമ്പ്ര ഫൗണ്ടേഷന്റെ ബാനറിൽ ഡോ.മാത്യു മാമ്പ്രയാണ് ചെരാതുകൾ നിർമ്മിക്കുന്നത്. ഷാജൻ കല്ലായി, ഷാനുബ് കരുവത്ത്, ഫവാസ് മുഹമ്മദ്, അനു കുരിശിങ്കൽ, ശ്രീജിത്ത് ചന്ദ്രൻ , ജയേഷ് മോഹൻ എന്നീ ആറു സംവിധായകരാണ് ചെരാതുകൾ ഒരുക്കിയിരിക്കുന്നത്. മറീന മൈക്കിൾ , ആദിൽ ഇബ്രാഹിം, മാല പാർവ്വതി, മനോഹരി ജോയ് , ദേവകി രാജേന്ദ്രൻ , പാർവ്വതി അരുൺ , ശിവജി ഗുരുവായൂർ , ബാബു അന്നൂർ എന്നിവർ ചിത്രത്തിൽ കഥാപാത്രങ്ങളാകുന്നു. ജോസ്കുട്ടി ഉൾപ്പടെ ആറു ഛായാഗ്രാഹകരും സി ആർ ശ്രീജിത്ത് അടങ്ങുന്ന ആറു എഡിറ്റേഴ്സും ഒരുമിക്കുന്ന ചിത്രത്തിന്റെ സംഗീതസംവിധാനം മെജ്ജോ ജോസഫ് ഉൾപ്പെടുന്ന ആറു സംഗീതസംവിധായകരും നിർവ്വഹിക്കുന്നു. സൗണ്ട് ഡിസൈൻ – ഷെഫിൻ മായൻ, ഡിജിറ്റൽ മാർക്കറ്റിംഗ് – ഓൺപ്രൊ എന്റർടെയ്ൻമെന്റ്സ്, പി ആർ ഓ – പി. ശിവപ്രസാദ്, അജയ് തുണ്ടത്തിൽ.

English Summary: Cherathukal official trailer

എൻ എൻ ജി ഫിലിംസിന്റെ ബാനറിൽ നിരുപ് ഗുപ്ത നിർമ്മിക്കുന്ന ബോളിവുഡ് ചിത്രമായ “പട്ടാ” യിൽ പ്രശസ്ത ക്രിക്കറ്റർ ശ്രീശാന്ത് നായകനാകുന്നു. ചിത്രത്തിന്റെ രചനയും സംവിധാനവും നിർവ്വഹിക്കുന്നത് തെന്നിന്ത്യൻ സംവിധായകൻ ആർ രാധാകൃഷ്ണനാണ്. ആക്ഷനും സംഗീതത്തിനും പ്രാധാന്യമുളള ഒരു പൊളിറ്റിക്കൽ ത്രില്ലറാണ് പട്ടാ. ശ്രീശാന്തിനൊപ്പം ബോളിവുഡ്‌ഡിലെ പ്രമുഖ താരങ്ങളും അഭിനയിക്കുന്നു.

ബാനർ – എൻ എൻ ജി ഫിലിംസ്, സംവിധാനം – ആർ രാധാകൃഷ്ണൻ , നിർമ്മാണo – നിരുപ് ഗുപ്ത, ഛായാഗ്രഹണം – പ്രകാശ്കുട്ടി, എഡിറ്റിംഗ് – സുരേഷ് യു ആർ എസ് , സംഗീതം – സുരേഷ് പീറ്റേഴ്സ്, സ്പോട്ട് എഡിറ്റിംഗ് – രതിൻ രാധാകൃഷ്ണൻ , കോറിയോഗ്രാഫി – ശ്രീധർ , കല-സജയ് മാധവൻ, ഡിസൈൻസ് – ഷബീർ, പി ആർ ഓ -അജയ് തുണ്ടത്തിൽ .പട്ടായുടെ ചിത്രീകരണം ഉടൻ ആരംഭിക്കും.

English Summary: Bollywood movie “Patta” starring cricketer Sreesanth