By admin 
ഹൈദരാബാദ്: പ്രശസ്ത തെലുങ്ക് ചലച്ചിത്ര നിർമ്മാതാവ് അല്ലു അരവിന്ദ്, സൂപ്പർസ്റ്റാർ അല്ലു അർജുൻ എന്നിവരുമായി കൂടിക്കാഴ്ച നടത്തി നടനും ദേശീയ ചലച്ചിത്ര വികസന കോർപ്പറേഷൻ (NFDC) ചെയർമാനുമായ കൃഷ്ണകുമാർ. ഹൈദരാബാദ് നന്ദഗിരി ഹിൽസിലുള്ള ഇവരുടെ വസതിയിൽ വെച്ചായിരുന്നു കൂടിക്കാഴ്ച. തനിക്ക് അവിടെ നിന്നും വളരെ ഹൃദ്യമായ സ്വീകരണമാണ് ലഭിച്ചതെന്ന് കൃഷ്ണകുമാർ തന്റെ സോഷ്യൽ മീഡിയ പേജുകളിലൂടെ പങ്കുവെച്ചു.
സിനിമാ വ്യവസായത്തിന്റെ നിലവിലെ അവസ്ഥകളെക്കുറിച്ചും ഈ മേഖല നേരിടുന്ന പ്രധാന വെല്ലുവിളികളെക്കുറിച്ചും അവർ ദീർഘനേരം സംസാരിച്ചു. ചലച്ചിത്ര രംഗത്തിന്റെ ഭാവി വളർച്ചയ്ക്ക് സഹായകരമാകുന്ന ഒട്ടനവധി കാര്യങ്ങളും ആശയങ്ങളും ഈ കൂടിക്കാഴ്ചയിൽ പങ്കുവെക്കാൻ സാധിച്ചതായി കൃഷ്ണകുമാർ അറിയിച്ചു.
എൻ.എഫ്.ഡി.സി ചെയർമാനായി ചുമതലയേറ്റ ശേഷം ഇന്ത്യൻ സിനിമാ മേഖലയിലെ വിവിധ പ്രമുഖരുമായി കൃഷ്ണകുമാർ ചർച്ചകൾ നടത്തിവരികയാണ്. പ്രാദേശിക സിനിമകളുടെ ആഗോളതലത്തിലുള്ള വളർച്ചയ്ക്കും ചലച്ചിത്ര നയങ്ങൾ കൂടുതൽ മെച്ചപ്പെടുത്തുന്നതിനും കേന്ദ്ര സർക്കാർ മുൻകൈയെടുക്കുന്ന സാഹചര്യത്തിലാണ് തെലുങ്ക് സിനിമാ ലോകത്തെ പ്രമുഖരുമായുള്ള ഈ കൂടിക്കാഴ്ച.
NFDC Chairman Krishna Kumar Meets Allu Arjun and Producer Allu Aravind