By admin 
തന്റെ സന്തതസഹചാരിയും പ്രിയ സുഹൃത്തും ചലച്ചിത്ര നിർമ്മാതാവുമായ ആന്റണി പെരുമ്പാവൂരിന് ഹൃദ്യമായ ഭാഷയിൽ ജന്മദിന-വിവാഹവാർഷിക ആശംസകൾ നേർന്ന് നടൻ മോഹൻലാൽ. ആന്റണിയുടെ ജന്മദിനവും അദ്ദേഹത്തിന്റെയും ഭാര്യ ശാന്തിയുടെയും വിവാഹവാർഷികവും ഒരേ ദിവസമാണെന്ന പ്രത്യേകതയുമുണ്ട്. ഇരുവരും ഒന്നിച്ചുള്ള മനോഹരമായ ചിത്രം പങ്കുവെച്ചുകൊണ്ടാണ് താരം ആശംസകൾ കുറിച്ചത്.
“പ്രിയപ്പെട്ട ആന്റണിക്ക് ജന്മദിനാശംസകൾ. സമാധാനവും നല്ല ആരോഗ്യവും സന്തോഷവും നിറഞ്ഞ ഒരു വർഷം ആശംസിക്കുന്നു. ജീവിതത്തിൽ ഒരുപാട് നല്ല നിമിഷങ്ങൾ സമ്മാനിക്കാൻ ഈ വർഷത്തിന് കഴിയട്ടെ,” എന്ന് മോഹൻലാൽ തന്റെ സോഷ്യൽ മീഡിയ പേജുകളിൽ കുറിച്ചു.
വിവാഹവാർഷികം ആഘോഷിക്കുന്ന ആന്റണിക്കും ഭാര്യ ശാന്തിക്കും ആശംസകൾ നേരാനും താരം മറന്നില്ല. “നിങ്ങൾക്കും ശാന്തിക്കും വിവാഹവാർഷിക ആശംസകൾ. ഒരുമിച്ച് കെട്ടിപ്പടുത്ത ജീവിതത്തെ കൃതജ്ഞതയോടെ ഓർക്കാനും, വരാനിരിക്കുന്ന മനോഹരമായ ജീവിതയാത്രയെ ഏറെ ആവേശത്തോടെ വരവേൽക്കാനും നിങ്ങൾക്ക് സാധിക്കട്ടെ,” മോഹൻലാൽ കൂട്ടിച്ചേർത്തു.
മലയാള സിനിമയിലെ തന്നെ ഏറ്റവും മികച്ച സൌഹൃദക്കൂട്ടുകെട്ടുകളിൽ ഒന്നാണ് മോഹൻലാലും ആന്റണി പെരുമ്പാവൂരും തമ്മിലുള്ളത്. വർഷങ്ങൾക്ക് മുമ്പ് വെറും താത്കാലിക ഡ്രൈവറായി എത്തി പിന്നീട് മോഹൻലാലിൻ്റെ നിഴലായി മാറിയ വ്യക്തിയാണ് ആന്റണി. ഇന്ന് മലയാളത്തിലെ ഏറ്റവും വലിയ നിർമ്മാണ കമ്പനികളിലൊന്നായ ‘ആശീർവാദ് സിനിമാസിൻ്റെ’ അമരക്കാരനായ ആന്റണിക്ക് സിനിമാ ലോകത്തുനിന്നും ആരാധകരിൽ നിന്നും നിരവധി പേരാണ് ഇപ്പോൾ ആശംസകളുമായി രംഗത്തെത്തുന്നത്.
Mohanlal Pens Heartfelt Birthday and Anniversary Wishes for Antony Perumbavoor