മലയാളികളുടെ പ്രിയ നായിക സലീമ അർബുദത്തെ അതിജീവിച്ച് വീണ്ടും ക്യാമറയ്ക്ക് മുന്നിലെത്തുന്നു. ‘നഖക്ഷതങ്ങൾ’, ‘ആരണ്യകം’ തുടങ്ങിയ ചിത്രങ്ങളിലൂടെ ശ്രദ്ധേയയായ സലീമയുടെ നിലവിലെ അവസ്ഥയെക്കുറിച്ച് നടി സീമ ജി. നായർ പങ്കുവെച്ച വൈകാരികമായ കുറിപ്പാണ് ഇപ്പോൾ ചർച്ചയാകുന്നത്. ചെന്നൈയിൽ വെച്ച് സലീമയെ കണ്ടുമുട്ടിയ വിശേഷങ്ങളാണ് സീമ പങ്കുവെച്ചത്.
കുറച്ചു കാലം മുൻപ് സലീമയ്ക്ക് ഓറൽ ക്യാൻസർ ബാധിച്ചിരുന്നു. എന്നാൽ കൃത്യമായ ചികിത്സയിലൂടെ അവർ ഇപ്പോൾ രോഗമുക്തയായിരിക്കുകയാണ്. നിലവിൽ തമിഴ് സീരിയലുകളിൽ അഭിനയിക്കുന്നുണ്ടെങ്കിലും മലയാള സിനിമയിലേക്കുള്ള തിരിച്ചു വരവാണ് സലീമ ആഗ്രഹിക്കുന്നത്. രോഗം ബാധിച്ച സമയത്ത് നടൻ വിനീത്, ശ്വേത മേനോൻ തുടങ്ങിയ ചുരുക്കം ചിലർ മാത്രമാണ് അവരെ സഹായിച്ചതെന്നും സീമ കുറിപ്പിൽ പറയുന്നു.
സലീമ കിടപ്പിലാണെന്ന തരത്തിലുള്ള തെറ്റായ പ്രചാരണങ്ങൾ ഒഴിവാക്കണമെന്ന് സീമ അഭ്യർത്ഥിച്ചു. “അവർക്ക് ഇപ്പോൾ മുന്നോട്ടുള്ള യാത്രയിൽ പണം അത്യാവശ്യമാണ്. സിനിമയിലോ സീരിയലിലോ അവർക്ക് വേണ്ടത് അഭിനയിക്കാനുള്ള അവസരങ്ങളാണ്,” സീമ ജി. നായർ കുറിച്ചു. മലയാളത്തെയും മലയാളികളെയും ഇത്രയേറെ സ്നേഹിക്കുന്ന സലീമയ്ക്ക് നല്ലൊരു വേഷത്തിലൂടെ മലയാളത്തിലേക്ക് മടങ്ങിവരാൻ കഴിയട്ടെ എന്നാണ് സിനിമാ ലോകം ആശംസിക്കുന്നത്.
Actress Saleema Recovers from Cancer
