സംസ്ഥാനത്ത് മദ്യവില കുറഞ്ഞു; ജവാന് കടുത്ത ക്ഷാമം

തിരുവനന്തപുരം: കേരളത്തിലെ മദ്യപാനികൾക്ക് ആശ്വാസമായി പ്രമുഖ മദ്യകമ്പനികൾ വില കുറച്ചു. സംസ്ഥാനത്ത് 43 മദ്യ ബ്രാൻഡുകൾക്കാണ് നിലവിൽ വില കുറഞ്ഞിരിക്കുന്നത്. ബെവ്‌കോ ഇന്ന് മുതൽ വില പരിഷ്കരണം നടപ്പാക്കിയതോടെയാണ് ഓൾഡ് പോർട്ട് റം ഉൾപ്പെടെയുള്ള ബ്രാൻഡുകൾക്ക് വില കുറഞ്ഞത്.

ഓഫീസേഴ്സ് ചോയ്സ്, ഓൾഡ് മങ്ക്, ലേമൗണ്ട് ഉൾപ്പെടെയുള്ള ജനകീയ ബ്രാൻഡുകൾക്ക് 500 മില്ലിക്ക് പത്ത് രൂപ വീതമാണ് കുറഞ്ഞത്. ചില ബ്രാൻഡുകൾക്ക് ലിറ്ററിന് 20 രൂപ മുതൽ 50 രൂപ വരെയും കുറഞ്ഞിട്ടുണ്ട്. വിദേശ നിർമിത വിദേശ മദ്യമടക്കം (FMFL) വിവിധ ബ്രാൻഡുകൾക്ക് 10 ശതമാനം മുതൽ 50 ശതമാനം വരെയാണ് വില കുറഞ്ഞത്.

മദ്യക്കമ്പനികളുടെ നിർദ്ദേശപ്രകാരമാണ് വില കുറച്ചതെന്ന് ബീവറേജസ് കോർപ്പറേഷൻ അറിയിച്ചു. ഇതുസംബന്ധിച്ച നിർദ്ദേശം ഇന്ന് ഷോപ്പുകളിൽ എത്തുകയും സോഫ്റ്റ്‌വെയറിൽ പുതുക്കിയ വില രേഖപ്പെടുത്തുകയും ചെയ്തിട്ടുണ്ട്. ചില ബ്രാൻഡുകളുടെ വിൽപനയിൽ ഇടിവുണ്ടായതിനെത്തുടർന്നാണ് സ്വകാര്യ കമ്പനികൾ വില കുറയ്ക്കാൻ തീരുമാനിച്ചത്.

വിലക്കുറവ് നിലവിൽ വരുമ്പോഴും സാധാരണക്കാർ ആശ്രയിക്കുന്ന സർക്കാർ മദ്യമായ ‘ജവാൻ’ റമ്മിന് സംസ്ഥാനത്ത് കടുത്ത ക്ഷാമം നേരിടുകയാണ്. 80 ശതമാനത്തോളം ബവ്‌കോ ഷോപ്പുകളിലും ജവാൻ സ്റ്റോക്കില്ല. തിരുവല്ലയിലെ പ്ലാന്റിൽ ജലലഭ്യത കുറഞ്ഞതിനെത്തുടർന്ന് ഉൽപ്പാദനം പകുതിയായി കുറഞ്ഞതാണ് ഇതിന് കാരണം. നിലവിൽ 490 രൂപയുടെ ഫുൾ ബോട്ടിൽ ചിലയിടങ്ങളിൽ ലഭ്യമാണെങ്കിലും, ഏറെ ആവശ്യക്കാരുള്ള 630 രൂപയുടെ ലിറ്റർ ബോട്ടിൽ കിട്ടാനില്ലാത്ത അവസ്ഥയാണ്.

പാലക്കാട് മേനോൻപാറ പ്ലാന്റിൽ നിന്ന് പുറത്തിറക്കുമെന്ന് പ്രഖ്യാപിച്ച ‘മിന്നൽ മാജിക്’ ബ്രാൻഡി മാസങ്ങൾ പിന്നിട്ടിട്ടും ഇതുവരെ വിപണിയിലെത്തിയിട്ടില്ല.

സ്വകാര്യ മദ്യക്കമ്പനികളെ സഹായിക്കാനാണോ ജവാന് കൃത്രിമ ക്ഷാമം ഉണ്ടാക്കുന്നത് എന്ന ആക്ഷേപവും മദ്യപാനികൾക്കിടയിൽ ഉയരുന്നുണ്ട്. ഏതായാലും പ്രമുഖ ബ്രാൻഡുകളുടെ വില കുറഞ്ഞത് വിപണിയിൽ വലിയ ചലനമുണ്ടാക്കുമെന്നാണ് കരുതുന്നത്.