ടൊയോട്ടയുടെ അത്യാഡംബര എംപിവി വെല്ഫയര് സ്വന്തമാക്കി നടന് മോഹന്ലാല്. വെല്ഫയര് അടുത്തിടെയാണ് ഇന്ത്യന് വിപണിയില് എത്തിയത്. ഇന്ത്യന് വാഹന വിപണിയിലേക്ക് പ്രതിമാസം വേറും 60 യൂണിറ്റ് മാത്രമാണ് കമ്പനി അനുവദിച്ചിരിക്കുന്നത്. 79.99 ലക്ഷം രൂപവരുന്ന ഈ വമ്പനെ കേരളത്തില് മോഹന്ലാലിനു പുറമെ രണ്ടുപേര് സ്വന്തമാക്കിയിട്ടുണ്ട്.
ആഡംബര സൗകര്യങ്ങളുള്ള വെല്ഫയര് ഫെബ്രുവരി 26നായിരുന്നു ഇന്ത്യന് വിപണിയിലെത്തിയത്. ദിവസങ്ങള്ക്കകം തന്നെ തന്റെ കാര് സ്വന്തമാക്കിയിരിക്കുകയാണ് മോഹന്ലാല്.
കൊച്ചിയിലെ ടൊയോട്ട ഡീലര്ഷിപ്പില് നിന്നാണ് മോഹന്ലാല് വെല്ഫയര് സ്വന്തമാക്കിയിരിക്കുന്നത്. ഒരു വേരിയന്റില് മാത്രം ലഭിക്കുന്ന വെല്ഫയറിന്റെ കേരള എക്സ്ഷോറൂം വില 79.99 ലക്ഷം രൂപയാണ്.
