കൊല്ലം: യാത്രാദുരിതമുള്ള ഗ്രാമീണറൂട്ടുകളില് സര്വീസ് നടത്താനായി രണ്ട് വാതിലുള്ള 305 മിനി ബസുകൾ വാങ്ങാനൊരുങ്ങി കെ.എസ്.ആർ.ടിസി. ടാറ്റ, അശോക് ലൈലാന്ഡ്, ഐഷര് എന്നീ മൂന്നു കമ്പനികള്ക്കാണ് ടെന്ഡര് കൊടുത്തിരിക്കുന്നത്. ഒക്ടോബറില് ബസുകള് എത്തും. 2001-ല് മിനി ബസുകള് വാങ്ങിയപ്പോള് ബസുകളുടെ പരിപാലനച്ചെലവ് കോര്പ്പറേഷന് ബാധ്യതയായി മാറിയിരുന്നു. സ്പെയര് പാര്ട്സ് കിട്ടാതെ വന്നതാണ് പ്രതിസന്ധിയായത്. എട്ടുവര്ഷം കഴിഞ്ഞപ്പോള് ബസ്സുകള് പിന്വലിച്ചു. ആ ബസുകളെല്ലാം പൊളിച്ചുമാറ്റുകയായിരുന്നു. കൂടുതല് മൈലേജ് കിട്ടുമെന്നതിനാല് ഡീസല് ചെലവ് കുറവാണെന്നതാണ് മിനി ബസുകളുടെ മേന്മ.
പഞ്ചായത്തുകളില് വലിയ ബസുകള്ക്ക് ഓടാന് കഴിയാത്തയിടങ്ങള്ക്കാണ് മുന്ഗണന. ഇത്തരം റൂട്ടുകള് കണ്ടെത്താന് ഡിപ്പോകള്ക്ക് നിര്ദ്ദേശമുണ്ട്. നിലവില് ഉയര്ന്ന ക്ലാസില്നിന്ന് തരം മാറ്റിയ ബസുകളാണ് ഓര്ഡിനറി സര്വീസുകളായി ഓടിക്കുന്നത്. ഡീസല് ചെലവേറിയ ഇവ മിനി ബസ് വരുന്നതോടെ മാറ്റും.പലവിധത്തിലും നഷ്ടത്തിനിടയാക്കുമെന്നാണ് മുമ്പത്തെ അനുഭവം. വേണ്ടത്ര പഠനം നടത്താതെയാണ് വീണ്ടും മിനി ബസുകള് വാങ്ങുന്നതെന്ന് ആക്ഷേപമുണ്ട്. 33 സീറ്റുള്ള ബസുകളാണ് ടാറ്റയില്നിന്ന് വാങ്ങുന്നത്. അശോക് ലൈലാന്ഡില്നിന്ന് 36 സീറ്റുള്ള ബസും ഐഷറില്നിന്ന് 28 സീറ്റുള്ള ബസുമാണ് വാങ്ങുന്നത്. നിലവിലുള്ള റൂട്ടുകളിലും പുതിയ റൂട്ടുകളിലും ബസ് ഓടിക്കും.
KSRTC mini bus will ply through the villages
