By admin തിരുവനന്തപുരം: സംസ്ഥാനത്തെ ഈ വർഷത്തെ എസ്എസ്എൽസി, ഹയർ സെക്കൻഡറി പരീക്ഷാ ഫലങ്ങൾ പ്രഖ്യാപിക്കുന്ന തീയതികൾ വിദ്യാഭ്യാസ മന്ത്രി വി. ശിവൻകുട്ടി അറിയിച്ചു. എസ്എസ്എൽസി പരീക്ഷാ ഫലം മേയ് 15ന് പ്രഖ്യാപിക്കും. ഹയർ സെക്കൻഡറി, വൊക്കേഷണൽ ഹയർ സെക്കൻഡറി ഫലങ്ങൾ മേയ് 22ന് പുറത്തുവിടും.
ഫലപ്രഖ്യാപനം നടന്നാലുടൻ തന്നെ ഉത്തരക്കടലാസുകളുടെ പുനർ മൂല്യനിർണയത്തിനുള്ള അപേക്ഷകൾ സ്വീകരിച്ചു തുടങ്ങും. മേയ് അവസാനത്തോടെ പുനർ മൂല്യനിർണയ ഫലവും പ്രഖ്യാപിക്കുമെന്ന് മന്ത്രി വ്യക്തമാക്കി. ഇതിനു പിന്നാലെ തന്നെ പരീക്ഷാ സർട്ടിഫിക്കറ്റുകളുടെ വിതരണവും ആരംഭിക്കുന്നതാണ്.
കൂടാതെ, ഹയർ സെക്കണ്ടറി, വൊക്കേഷണൽ ഹയർ സെക്കണ്ടറി രണ്ടാം വർഷ ഇംപ്രൂവ്മെന്റ് പരീക്ഷാ ഫലം മേയ് എട്ടിനും, ഒന്നാം വർഷ പരീക്ഷാ ഫലം ജൂൺ 10 നും പ്രഖ്യാപിക്കും. പരീക്ഷാ ഫലങ്ങൾ ഓൺലൈനായി പരിശോധിക്കാനുള്ള സൗകര്യം വിദ്യാഭ്യാസ വകുപ്പിന്റെ ഔദ്യോഗിക വെബ്സൈറ്റുകളിൽ ലഭ്യമാകും.
പ്രധാന തീയതികൾ ചുരുക്കത്തിൽ:
- എസ്എസ്എൽസി ഫലം: മേയ് 15
- ഹയർ സെക്കൻഡറി (പ്ലസ് ടു) ഫലം: മേയ് 22
- രണ്ടാം വർഷ ഇംപ്രൂവ്മെന്റ് ഫലം: മേയ് 8
- ഒന്നാം വർഷ (പ്ലസ് വൺ) ഫലം: ജൂൺ 10
