By admin 
ന്യൂഡൽഹി: ഇന്ത്യയിൽ ടിക്ടോക് വെബ്സൈറ്റ് തുറക്കുന്നുവെന്ന് ചില ഉപയോക്താക്കൾ അവകാശപ്പെട്ടതിനെ തുടർന്ന് എക്സിലും റെഡിറ്റിലും ട്രോളുകളുടെ പ്രളയമാണ്. ഗൂഗിൾ പ്ലേ സ്റ്റോറിലും ആപ്പിൾ ആപ്പ് സ്റ്റോറിലും ആപ്പ് ഇപ്പോഴും ലഭ്യമല്ലെങ്കിലും, വെബ്സൈറ്റ് ആക്സസ് ചെയ്യാമെന്ന വാദങ്ങൾ സോഷ്യൽ മീഡിയയിൽ നിറയുകയാണ് .
ടിക്ടോക് വെബ്സൈറ്റ് ഇന്ത്യയിലെ എല്ലാ ഇന്റർനെറ്റ് സേവന ദാതാക്കളിലും ബ്ലോക്ക് ചെയ്തിട്ടുണ്ടെന്ന് ടെലികമ്മ്യൂണിക്കേഷൻസ് വകുപ്പ് (ഡോടി) വ്യക്തമാക്കി. എൻഡിടിവി പ്രോഫിറ്റിന്റെ അപ്ഡേറ്റ് അനുസരിച്ചാണ് ഈ സ്ഥിരീകരണം.
ടിക്ടോകിന്റെ മാതൃകമ്പനിയായ ബൈറ്റ്ഡാൻസിന്റെ ഭാഗത്തുനിന്നും ഇതുവരെ ഔദ്യോഗിക പ്രതികരണമോ സ്ഥിരീകരണമോ ഉണ്ടായിട്ടില്ല.
2020 ജൂണിൽ ഇന്ത്യയിൽ ടിക്ടോക് നിരോധിക്കപ്പെട്ടു. ഗൽവാൻ താഴ്വരയിലെ ചൈനീസ് സൈന്യവുമായുള്ള മാരകമായ ഏറ്റുമുട്ടലിനെ തുടർന്ന് 20 ഇന്ത്യൻ സൈനികർ മരിച്ചതിന്റെ പശ്ചാത്തലത്തിൽ 59 മൊബൈൽ ആപ്പുകൾ നിരോധിച്ചു. ഇലക്ട്രോണിക്സ് ആൻഡ് ഇൻഫർമേഷൻ ടെക്നോളജി മന്ത്രി രവിശങ്കർ പ്രസാദ് ഇതിനെ “ഇന്ത്യയുടെ ഡിജിറ്റൽ സ്ട്രൈക്ക്” എന്ന് വിശേഷിപ്പിച്ചു.