ശബരിമലയിലെ സ്ത്രീ പ്രവേശന വിധി സുപ്രീംകോടതി പുനപരിശോധിക്കാന്‍ കേന്ദ്ര സംസ്ഥാന സർക്കാറുകള്‍ മുന്‍കൈയെടുക്കണമെന്നാവശ്യപ്പെട്ട് സംസ്ഥാന വ്യാപകമായി ശക്തമായ പ്രതിഷേധം. ശബരിമല വിശ്വാസികൾ കേരളത്തിൽ പലയിടത്തും റോഡുകള്‍ തടഞ്ഞു. ശബരിമല സംരക്ഷണ സമിതിയുടെ നേതൃത്വത്തിലായിരുന്നു പ്രതിഷേധസമരം .
തിരുവനന്തപുരം, കൊച്ചി, കോട്ടയം, പാലക്കാട് എന്നിവടങ്ങളിൽ പ്രവർത്തകർ ദേശീയ പാതകൾ ഉപരോധിച്ചു. തിരുവനന്തപുരത്ത് പിഎംജി ഹനുമാന്‍ ക്ഷേത്രത്തിന്മുന്നില്‍ നടത്തിയ പ്രാർത്ഥനാ യജ്‍ഞം ദേവസ്വം ബോർഡ് അനുമതി നിഷേധിച്ചത് ചെറിയ സംഘർഷത്തിനിടയാക്കി .സ്ത്രീ പ്രവേശനത്തില്‍ പ്രതിഷേധിച്ച് അയ്യപ്പഭക്തര്‍ പമ്പ ഗണപതി ക്ഷേത്രത്തിനു മുന്നിൽ ഉപവാസവും ആരംഭിച്ചിട്ടുണ്ട് .കൊച്ചി വൈറ്റിലയിലും പാലക്കാട്ടും കോട്ടയത്തും ഉള്ള പ്രധാന പാതകൾ പ്രവർത്തകർ ഉപരോധിച്ചു .എറണാകുളത്ത് വൈറ്റില ജംക്ഷൻ പ്രതിഷേധക്കാർ ഒരുമണിക്കൂറോളം ഗതാഗതം സ്തംഭിപിച്ചു