മലയാളക്കരയുടെ പ്രിയ ചാനൽ ഏഷ്യാനെറ്റ് പ്രേക്ഷകർക്കായി ഒരുക്കുന്ന പുതിയ പരമ്പര, പളുങ്ക്. അഗ്നിപുത്രി, കുങ്കുമപ്പൂവ്, പരസ്പരം, ചന്ദനമഴ, നീലക്കുയിൽ തുടങ്ങിയ ഹിറ്റുകൾ പ്രേക്ഷകർക്ക് സമ്മാനിച്ച റോസ് പെറ്റൽസ് എന്റർടൈന്മെന്റ്സ് ഒരുക്കുന്ന പളുങ്ക്, ഈ വരുന്ന നവംബർ 22 തിങ്കളാഴ്ച്ച വൈകീട്ട് 8.30ന് സംപ്രേക്ഷണം ആരംഭിക്കും.
പേരുപോലെ തന്നെ മലയാളിമനസ്സുകളോട് ചേർന്ന് നിൽക്കുന്ന കുടുംബ പരമ്പരയാണ് പളുങ്ക്. കന്നഡ താരം തേജ് ഗൗഡയും, ഖുശി സമ്പത് കുമാറും മുഖ്യ വേഷങ്ങളിലെത്തുന്ന പരമ്പരയിൽ രാജേഷ് ഹെബ്ബാർ, സുബ്രഹ്മണ്യൻ, ലക്ഷ്മിപ്രിയ, ജോളി ഈശോ, ശ്രീജിത്ത് വിജയ് തുടങ്ങി വൻ താരനിരയാണ് അണിനിരക്കുന്നത്.
ചാനൽ പുറത്തുവിട്ട പരമ്പരയുടെ പ്രമോ വീഡിയോകൾ ഇതിനോടകം തന്നെ ജനങ്ങൾ ഏറ്റെടുത്തുകഴിഞ്ഞു. വ്യത്യസ്ഥ സാഹചര്യങ്ങളിൽ ജീവിക്കുന്ന യുവശാസ്ത്രജ്ഞനായ ദീപകിന്റേയും നിള എന്ന ഒരു സാധാരണ പെൺകുട്ടിയുടേയും കഥയാണ് പളുങ്ക്. ദീപക്കിന്റെ മാനസിക വേദനകളിലൂടെയും നിളയുടെ നിഷ്കളങ്കതയിലൂടെയും വികസിക്കുന്ന കഥാ പശ്ചാത്തലത്തിൽ പ്രേക്ഷകപ്രിയ ചേരുവകളെല്ലാം തന്നെ ഉണ്ടായിരിക്കും. ആദ്യ ആഴ്ച്ചകളിൽ തന്നെ റേറ്റിങ് ചാർട്ടിൽ കടുത്ത മത്സരം കാഴ്ച്ചവെയ്ക്കാനൊരുങ്ങുകയാണ് പളുങ്ക്. ഈ മാസം 1ആം തിയ്യതിയായിരുന്നു ഏഷ്യാനെറ്റിൽ ദയ ആരംഭിച്ചത്. തുടങ്ങി ആദ്യ ആഴ്ച്ചകളിൽ തന്നെ പ്രേക്ഷകർക്കിടയിൽ വൻസ്വീകരണമാണ് ഈ പരമ്പരയ്ക്ക് ലഭിക്കുന്നത്.
English Summary: Asianet opens up new dimensions of enjoyment; New series ‘Palunk’ from November 22