‘മലൈക്കോട്ടെ വാലിബൻ’ എന്ന് പേരിട്ടിരുന്ന ചിത്രത്തിന്റെ ഓരോ അപ്ഡേറ്റും വലിയ ആവേശത്തോടെയാണ് ആരാധകർ സ്വീകരിക്കുന്നത്. സിനിമപ്രേക്ഷകരുടെ ഏറെ നാളത്തെ കാത്തിരിപ്പിന് വിരാമമിട്ടുകൊണ്ടാണ് ലിജോ ജോസ് പെല്ലിശ്ശേരി സംവിധാനം ചെയ്യുന്ന മോഹൻലാൽ ചിത്രത്തിന്റെ ടൈറ്റിൽ പ്രഖ്യാപനം അടുത്തിടെ നടന്നത്. ഇപ്പോൾ ഇതാ ചിത്രത്തിന്റെ ഏറ്റവും പുതിയ അപ്ഡേറ്റ് പുറത്തുവന്നിരിക്കുകയാണ്.
ആട് 2ലെ ചെകുത്താൻ ലാസറിനെ അവതരിപ്പിച്ച് പ്രേക്ഷക പ്രീതിനേടിയ ഹരിപ്രശാന്ത് വർമ്മ മോഹൻലാലിനോപ്പം ചിത്രത്തിന്റെ ഭാഗമാകും. ‘ഞാൻ സിനിമ കാണാൻ ആരംഭിച്ചതിന് തന്നെ കാരണം ഈ മനുഷ്യനാണ്. അന്നുമുതലേ ഞാൻ ബഹുമാനിക്കുന്നയാൾ. ഈ ഇതിഹാസത്തിനൊപ്പം സ്ക്രീൻ പങ്കിടാൻ എനിക്കു അവസരം നൽകിയ ദൈവത്തിനും മലൈക്കോട്ടെ വാലിബന്റെ മുഴുവൻ അണിയറ പ്രവർത്തകർക്കും എന്റെ നന്ദി. മോഹൻലാലിനോപ്പമുള്ള ചിത്രം പങ്കുവെച്ചുകൊണ്ടാണ് പ്രശാന്ത് സോഷ്യൽ മീഡിയയിൽ പോസ്റ്റ്‌ ചെയ്തിരിക്കുന്നത്.
സമീപകാലത്ത് മലയാള സിനിമ സ്വാദകർക്കിടയിൽ വലിയ ആവേശമുണ്ടാക്കിയ പ്രഖ്യാപനമായിരുന്നു ലിജോ ജോസ് പെല്ലിശ്ശേരിയുടെ മോഹൻലാൽ ചിത്രം. രാജസ്ഥാനിൽ പൂർണ്ണമായും ചിത്രികരിക്കുന്ന സിനിമയിൽ മറാഠി നടി സോണാലി കുൽക്കർണിയും ഹരീഷ് പേരടിയും കഥാപാത്രങ്ങളെ അവതരിപ്പിക്കുന്നുണ്ട്. ജോൺ മേരി ക്രീയേറ്റീവ് ലിമിറ്റഡിനോടൊപ്പം മാക്സ് ലാബ് സിനിമാസ്, ആമേൻ മൂവി മോൺസ്റ്ററി, സെഞ്ച്വറി ഫിലിംസ് എന്നിവർ ചേർന്നാണ് ഈ ചിത്രം നിർമ്മിക്കുനത്. അതെ സമയം ജിത്തു ജോസെഫിന്റെ ‘റാം’ എന്ന സിനിമയിലാണ് മോഹൻലാൽ ഇപ്പോൾ അഭിനയിച്ചു കൊണ്ടിരിക്കുന്നത്. കോവിഡ് കാലത്ത് മുടങ്ങിയ ചിത്രത്തിന്റെ വിദേശ ഷെഡ്യൂളാണ് ഇപ്പോൾ പുരോഗമിക്കുന്നത്.