കേരളത്തിലെ തീയേറ്ററുകളെ കാത്തിരിക്കുന്നത് താരസമ്പന്നമായ ക്രിസ്മസ്. നേരത്തേ പ്രതീക്ഷിക്കപ്പെട്ടതില്‍ നിന്ന് വ്യത്യാസമായി മോഹന്‍ലാല്‍, ഫഹദ് ചിത്രങ്ങള്‍ ക്രിസ്മസ് റിലീസുകളായി തിയേറ്ററുകളില്‍ എത്തില്ലെന്നാണ് പുതിയ റിപ്പോര്‍ട്ടുകള്‍. അതേസമയം മമ്മൂട്ടി, പൃഥ്വിരാജ്, ജയസൂര്യ, ഷെയ്ന്‍ നിഗം ചിത്രങ്ങള്‍ ക്രിസ്മസിന് എത്തും. ഫഹദ് ഫാസില്‍ നായകനാവുന്ന അന്‍വര്‍ റഷീദ് ചിത്രം ട്രാന്‍സ്, മോഹന്‍ലാലിന്റെ സിദ്ദിഖ് ചിത്രം ബിഗ് ബ്രദര്‍ എന്നിവയാണ് റിലീസ് മാറ്റിയ ചിത്രങ്ങള്‍. ബിഗ് ബ്രദര്‍ അടുത്ത ജനുവരിയിലും ട്രാന്‍സ് ഫെബ്രുവരിയിലും എത്തുമെന്നാണ് വിവരം. മമ്മൂട്ടിയെ നായകനാക്കി അജയ് വാസുദേവ് സംവിധാനം ചെയ്യുന്ന ‘ഷൈലോക്ക്’, പൃഥ്വിരാജിനൊപ്പം സുരാജ് വെഞ്ഞാറമ്മൂടും പ്രധാന വേഷത്തിലെത്തുന്ന ലാല്‍ ജൂനിയര്‍ ചിത്രം ‘ഡ്രൈവിംഗ് ലൈസന്‍സ്’, ജയസൂര്യയെ നായകനാക്കി നവാഗതനായ രാജേഷ് മോഹന്‍ സംവിധാനം ചെയ്യുന്ന തൃശൂര്‍ പൂരം, ഷെയ്ന്‍ നിഗത്തിന്റെ ഡിമല്‍ ഡെന്നിസ് ചിത്രം ‘വലിയ പെരുന്നാള്‍ എന്നിവയാണ് ക്രിസ്മസ് റിലീസുകളായി നിലവില്‍ തീരുമാനിക്കപ്പെട്ടിരിക്കുന്ന ചിത്രങ്ങള്‍.
രാജാധിരാജ, മാസ്റ്റര്‍പീസ് എന്നീ ചിത്രങ്ങള്‍ക്ക് ശേഷം അജയ് വാസുദേവും മമ്മൂട്ടിയും ഒന്നിക്കുകയാണ് ഷൈലോക്കിലൂടെ. ചിത്രം ഒരു മാസ്, ആക്ഷന്‍ ്ഫാമിലി ചിത്രം ആയിരിക്കും. ലാല്‍ ജൂനിയറിന്റെ ഡ്രൈവിംഗ് ലൈസന്‍സില്‍ വാഹനക്കമ്പമുള്ള സൂപ്പര്‍ സ്റ്റാറാണ് പൃഥ്വിരാജ് അവതരിപ്പിക്കുന്ന കഥാപാത്രം. അദ്ദേഹത്തിന്റെ ആരാധകനായ മോട്ടോര്‍ വെഹിക്കിള്‍ ഇന്‍സ്‌പെക്ടറാണ് സുരാജിന്റെ കഥാപാത്രം. ഫ്രൈഡേ ഫിലിം ഹൗസിന്റെ ബാനറില്‍ വിജയ് ബാബുവാണ് തൃശൂര്‍ പൂരം നിര്‍മ്മിക്കുന്നത്. ഷെയ്ന്‍ നിഗത്തിന്റെ വലിയ പെരുന്നാള്‍ ആക്ഷന്‍ ത്രില്ലര്‍ സ്വഭാവത്തിലുള്ള ചിത്രമാണ്.
English Summary: Christmas Malayalam movie releases 2019